ភ្នំពេញ : ក្រោយពីបញ្ចប់ភារៈជាម្ចាស់ផ្ទះសម្រាប់កិច្ចប្រជុំកំពូលអាស៊ាន និងកិច្ចប្រជុំដទៃទៀតក្នុងឆ្នាំ២០១២ ក្រុមហ៊ុនរ៉ូយ៉ាល់ ខេមបូឌាន លីម៉ូស៊ីន សឺវីស ខូអិលធីឌី បានប្រកាសលក់រថយន្ត៧០គ្រឿងដែលធ្លាប់បានប្រើប្រាស់សម្រាប់ផ្ដល់សេវាដឹកជញ្ជូនដល់គណៈប្រតិភូនានា នៅថ្ងៃទី១៣ ខែមករា ឯសណ្ឋាគារ សូហ្វីតែល ភោគីត្រា ភ្នំពេញ។
រថយន្ត៧០គ្រឿងដែលត្រូវបានដាក់លក់រួមមានរថយន្ត Mercedes Benz E280 ឆ្នាំ២០០៩ ប្រភេទទ្វារ៤ចំនួន៤០គ្រឿង ក្នុងតម្លៃ៤៥០០០ដុល្លារក្នុងមួយគ្រឿង។ រថយន្ត BMW 730Li ឆ្នាំ២០១២ ប្រភេទទ្វារ៤ចំនួន១៦គ្រឿង ក្នុងតម្លៃ៩ម៉ឺនដុល្លារក្នុងមួយគ្រឿង។ រថយន្ត BMW 520i ស៊េរីឆ្នាំ២០១២ ប្រភេទទ្វារ៤ ដូចគ្នាចំនួន១៤គ្រឿង ក្នុងតម្លៃ៦៥០០០ដុល្លារ។
រថយន្តទាំង៧០គ្រឿងត្រូវបានក្រុមហ៊ុននាំចូលដោយផ្ទាល់ និងថែទាំយ៉ាងហ្មត់ចត់។
ក្រោយពីត្រូវបានប្រើប្រាស់សម្រាប់ដឹកគណៈប្រតិភូ រថយន្តមានគីឡូម៉ែត្រទាបនៅឡើយ។ ដូច្នេះក្រុមហ៊ុនក៏សម្រេចប្រកាសលក់រថយន្តទាំងនេះ ដើម្បីផ្ដល់ឱកាសឲ្យអតិថិជនកម្ពុជាទូទៅ អាចក្លាយជាម្ចាស់រថយន្តដែលធ្លាប់មានប្រវត្តិដឹកជញ្ជូនគណៈប្រតិភូជាន់ខ្ពស់ រួមមានប្រមុខរដ្ឋល្បីៗ និងគណៈរដ្ឋមន្ត្រីអន្តរជាតិផងដែរ។
រថយន្ត BMW ឆ្នាំ២០១២ ដែលដាក់លក់នេះស្ថិតនៅក្រោមការធានារ៉ាប់រងពីរោងចក្ររហូតដល់ខែមីនា ឆ្នាំ២០១៤ ហើយក្រុមហ៊ុនក៏មានយានដ្ឋានថែទាំជាង BMW ដោយមានសម្ភារ និងឧបករណ៍ ជួសជុលទទួលស្គាល់ជាផ្លូវការផងដែរ។
ក្រុមហ៊ុនរ៉ូយ៉ាល់ ខេមបូឌាន លីម៉ូស៊ីន សឺវីស ខូអិលធីឌី ត្រូវបានបង្កើតឡើងនៅឆ្នាំ២០០៨ ជាអ្នកផ្គត់ផ្គង់សេវាដឹកជញ្ជូនផ្លូវការដល់រាជរដ្ឋាភិបាលនិងផ្ដល់សេវាដឹកជញ្ជូនដល់គណៈប្រតិភូធ្វើទស្សនកិច្ចនៅប្រទេសកម្ពុជា៕
