.jpg)
តួរថយន្តបីដូចត្បូងពេជ្រ និងមានកម្ពស់ទាបស្ទើរតែជាប់នឹងដី។ AFP
ក្រុងប៉ារីស: រាងដូចត្បូងពេជ្រពណ៌មាសទ្រវែង ទាប រថយន្ដអនាគតកាល Renault EZ-Ultimo ត្រូវបានបង្ហាញដោយមានរូបរាងស្រដៀងនឹងម៉ូដែលអគ្គិសនីដែលក្រុមហ៊ុនបារាំងមួយនេះធ្លាប់បានផលិតកន្លងមក។
ដោយរំពឹងពីការចរាចររថយន្ដអគ្គិសនីក្នុងទីក្រុងនាពេលអនាគត ក្រុមអ្នកឌីហ្សាញ Renault បាននឹកស្រមៃដល់ម៉ូដែលប្រណីតបំផុត។
សណ្ឋាគារប្រណីតទំនើបបំផុតទំនងជាប្រើប្រាស់ម៉ូដែលនេះលើដងផ្លូវដោយការដឹកជញ្ជូនមនុស្សទៅ និងមកអាកាសយានដ្ឋាន។ នេះបើយោងតាមអ្នកឌីហ្សាញឈ្មោះ ស្ដេហ្វេន ចានីន។ គូស្នេហ៍ក៏អាចជួលរថយន្ដអនាគតកាលនេះក្នុងឱកាសពិសេសនារាត្រីដ៏សែនមនោរម្យផងដែរ។
យ៉ាងណាមិញ EZ-Ultimo អ្នកដំណើរអង្គុយបាំងបង្អួចក្រឡាក្នុងតួរថយន្ដរាងគ្រាប់ពេជ្រពណ៌ស្រាសំប៉ាញ ដែលស្រដៀងនឹងពងត្រី។ រថយន្ដនេះមានតួទាប និងស្លីមដែលមានសម្ទុះល្បឿនខ្លាំង។
ចានីន បាននិយាយថា៖ «វាទំនងជាលក្ខណៈសាមញ្ញបន្ដិច តែយើងចង់បង្កើតនូវរថយន្ដបែបសិល្បៈ»។
រថយន្ត Renault EZ-Ultimo ដាក់បង្ហាញឲ្យភ្ញៀវសាកល្បងអង្គុយក្នុងពិព័រណ៍រថយន្តកាលពីថ្មីៗនេះ។ AFP
អ្នកដំណើរអាចមើលទៅក្រៅ តែអ្នកខាងក្រៅមិនអាចមើលឃើញអ្នកនៅក្នុងរថយន្ដឡើយ។ ការឌីហ្សាញផ្នែកខាងក្រៅផ្ដោតលើបច្ចេកវិទ្យា និងសិល្បៈ បិទបាំងបន្ទប់សម្រាប់ជក់បារីជាមួយការឌីហ្សាញឈើ ស្បែកពណ៌បៃតងចាស់ និងផ្ទៃលើជាថ្មម៉ាប។
ជំនួសដោយការឌីហ្សាញដូចរថយន្ដប្រណីតដទៃសម្រាប់បន្ទប់អ្នកដំណើរ ក្រុមអ្នកឌីហ្សាញផ្ដោតលើរចនាប័ទ្មសណ្ឋាគារប៊ូទិកទំនើបវិញ។
ដោយសាររថយន្ដជាយានស្វ័យប្រវត្ដិ ក្រុមអ្នកឌីហ្សាញអាចរចនាផ្ទៃក្នុងបែបបុរាណដោយផ្ដោតសំខាន់លើការអង្គុយទល់មុខគ្នារបស់អ្នកដំណើរ។ អ្នកដំណើរអាចជជែកតទល់គ្នាដូចក្នុងបន្ទប់ការិយាល័យបំពាក់សង្ហារិមប្រណីត រួមទាំងកៅអីភ្នាក់ដៃ និងកៅអីបត់ថែមទៀត។
ដោយសារវាជារថយន្ដនាពេលអនាគតកាល ក្រុមអ្នកឌីហ្សាញបានរចនាតួវាឲ្យទាបស្ទើរតែក្រាបជាប់នឹងដី។
ជាក់ស្ដែង EZ-Ultimo មិនអាចបើកបរបានយូរលើដងផ្លូវជាក់ស្ដែងឡើយ។
ប៉ុន្ដែម៉ូដែលអនាគតនេះនៅត្រូវការពេលវេលាកែកុនថែមទៀតមុនពេលបង្ហាញវត្ដមានលើដងផ្លូវក្នុងពិភពដែលរថយន្ដស្វ័យប្រវត្ដិនឹងចូលខ្លួនមកជំនួសរថយន្ដបច្ចុប្បន្ន ដោយលែងត្រូវការមនុស្សបញ្ជាវាទៀត។
ទោះជារថយន្តប្រណីតឡូយឆាយខ្លាំងបន្ដិច EZ-Ultimo ក៏ត្រូវបានរចនាឡើងសម្រាប់ជួលយ៉ាងហោចណាស់រយៈពេលខ្លីចំពោះអ្នកចង់បានបទពិសោធលំដាប់ខ្ពស់៕ HR
