.jpg)
រថយន្ត Senat មហាប្រណីត និងមានសមត្ថភាពការពារគ្រាប់ ព្រមទាំងអាវុធនានា។ AFP
ក្រុងម៉ូស្គូ: ក្រុមហ៊ុនផលិតរថយន្ដនៅរុស្ស៊ីមួយបានដាក់លក់រថយន្ដលីមូស៊ីនក្រោះតម្លៃ ៣០០ លានដុល្លារដែលជាប្រភេទរថយន្ដរបស់លោក វ្ល៉ាំឌីមៀរ ពូទីន ដើម្បីទាក់ទាញសេដ្ឋីហ៊ានចំណាយប្រាក់។
បទបង្ហាញដ៏ជក់ចិត្ដមួយនៅពិព័រណ៍រថយន្ដក្រុងម៉ូស្គូ បានឲ្យឃើញពីរថយន្ដ ២ ម៉ូដែលមកពីយីហោក្រុមហ៊ុនគ្រប់គ្រងដោយរដ្ឋ Aurus ដ៏ថ្មីសន្លាងគឺ ម៉ូដែលលីមូស៊ីន Senat limousine និងម៉ូដែលធុនតូច Senat sedan។
រថយន្តការពារគ្រាប់ផ្ទុះ និងគ្រាប់ផ្លោង នឹងប្រើជាយានជំនិះរដ្ឋថ្មីរបស់រុស្ស៊ី និងត្រូវបានដាក់សម្ពោធដំបូងនៅក្នុងក្បួនរថយន្ដរបស់លោកប្រធានាធិបតី វ្ល៉ាឌីមៀរ ពូទីន កាលពីដើមឆ្នាំ។
Senat Limousine បំពាក់ម៉ាស៊ីន V8 ចំណុះ ៤,៤ លីត្រ អភិវឌ្ឍដោយ NAMI និងក្រុមហ៊ុន Porsche ជាមួយប្រភេទម៉ាស៊ីនកូនកាត់ថាមពល ៥៩០ សេះ និងអាចជាន់ល្បឿនពី ០ ទៅ ១០០ គីឡូម៉ែត្រក្នុង ១ ម៉ោងត្រឹមថិរវេលាតិចជាង ៦ វិនាទី។
វាត្រូវបានរចនាកៅអីសម្រាប់ផ្អែកទម្រេតត្រឹមកម្រិត ៤៥ ដឺក្រេ និងបំពាក់ជាមួយខ្នើយរោមទន់ល្មើយអមដោយទូទឹកកក កែវគ្រីស្ដាល់យីហោ Aurus និងតុបត់បាន។
ពេលបើកសម្ពោធក្នុងអាណត្ដិប្រធានាធិបតីទី ៤ កាលពីខែឧសភា លោក ពូទីន បានជិះទៅកាន់វិមានក្រឹមឡាំង ក្នុងរថយន្ដលីមូស៊ីនពណ៌ខ្មៅក្រឹបដែលមានចម្រឹងខ្យល់ធំ។
មិនសូវមានព័ត៌មានលម្អិតស្ដីពីម៉ូដែល Senat ដែលអាចចុះទឹក ខណៈថែរក្សាអ្នកដំណើរឲ្យមានសុខសុវត្ថិភាព និងមានសមត្ថភាពសង្គ្រោះកង់ពីការបែកធ្លាយទៀតផង។
បរិក្ខារក្នុងរថយន្តប្រណីតគ្មានទាស់ លំដាប់ថ្នាក់ដឹកនាំ។ AFP
វាត្រូវបានផលិតឡើងជា ការឆ្លើយតបនឹងរថយន្ដប្រធានាធិបតីអាមេរិក ដែលបំពាក់កាមេរ៉ាពេលរាត្រី បំពង់ឧស្ម័ន កាំភ្លើងក្នុងដៃទ្វារ ប្រអប់បិទជិតទប់ទល់នឹងការវាយប្រហារអាវុធគីមី និងប្លោកឈាមលោក ដូណាល់ ត្រាំ ជាច្រើនទៀតសម្រាប់ការសង្គ្រោះបន្ទាន់។
រថយន្ដលោក ពូទីន ក៏មានសមត្ថភាពការពារគ្រាប់បែក ហើយធំជាងរថយន្ដប្រធានាធិបតីអាមេរិក Cadillac។
ប្រធានផ្នែកឌីហ្សាញ លោក Vadim Pereverzev បានប្រាប់ទីភ្នាក់ងារ AFP ថា ការស្រាវជ្រាវទីផ្សារចំណោមពលរដ្ឋរុស្ស៊ី បានបង្ហាញថា ពិតជាមានតម្រូវការរថយន្តលីមូស៊ីនទំនើបដែលផលិតក្នុងស្រុក។
លោកបានបន្ថែមថា៖ «ក្លាយជាអតិថិជនរថយន្ដប្រភេទនេះ លោកអ្នកអាចនិយាយបានថា ពួកគេប្រាកដជារងាន់នឹងជិះត្រឹមស៊េរី Rolls-Royces, Mercedes និង Maybachs មិនខាន»៕
លោក ពូទីន ប្រើរថយន្ត Senat អមដោយក្បួនម៉ូតូ។ AFP
