ក្រុងម៉ូស្គូ: វាត្រូវបានចាត់ទុកជាម៉ាស៊ីនសេសសល់ចុងក្រោយបំផុត និងជារថយន្ដដែលនរណាៗក៏ប្រាថ្នាចង់បានវា។
រថយន្ដ Sherp ATV បំពាក់កង់សប់ប៉ោងដោយខ្លួនឯងដ៏ធំដែលអនុញ្ញាតឲ្យ អ្នកបើកបរធ្វើដំណើរស្ទើរតែគ្រប់ទីកន្លែង ជាមួយល្បឿនតែ ៤០ Km/h ប៉ុណ្ណោះ។
ម៉ាស៊ីនមិនចេះខូចនេះមានសមត្ថភាពជូនអ្នកដំណើរទៅស្ទើរតែគ្រប់ច្រកល្ហក ដែលមនុស្សពុំធ្លាប់ទៅដល់។ ក្រុមហ៊ុនរុស្ស៊ី ដែលផលិតម៉ូដែល ដ៏ចម្លែកនេះបានប្រាប់ថា វាមានតម្លៃ ៦៥ ០០០ ដុល្លារ។
ទស្សនាវដ្ដី Auto Motor und Sport បានផ្សាយថា Sherp ATV កើតឡើងពីគំនិតផ្ដួចផ្ដើមរបស់ Alexei Garagashyan ជាជាងម៉ាស៊ីននៅ Saint Petersburg ដែលចាប់អារម្មណ៍រកដំណោះស្រាយលើម៉ូដែលរថយន្ដតួខ្ពស់ SUV ធ្លាប់ជួបប្រទះញឹកញយ។
ក្រុមហ៊ុន បានឲ្យដឹងថា៖ «វា អណ្ដែតលើទឹក ងាយឆ្លងកាត់វាលភក់ និងព្រឹលកប់ជ្រៅៗ ព្រមទាំងអាចឡើងគោកចុះទឹកកកបានយ៉ាងងាយ។ យើងអាចធ្វើដំណើររុករកគ្រប់ទិសទី ដែលមិនធ្លាប់មានមនុស្សទៅដល់ជាមួយរថយន្ដមិនចេះខូចម៉ាស៊ីនមួយនេះ»។
វាមានប្រវែងតែ ៣,៣៥ ម៉ែត្រ និងអាចឡើងចំណោតឧបសគ្គកម្ពស់ ៧ តឹក។ នៅលើដីគោក កង់ធំៗរបស់វាធ្វើចលនាដូចចង្វាក់កង់រថក្រោះ និងអាចបំផ្លាស់ទីម្ដងម្ខាង។
កៅអីក្នុងកាប៊ីនសម្រាប់មនុស្ស ២ នាក់ ដែលប្រើចង្កឹះលេខសម្រាប់កាច់ចង្កូត ព្រមទាំងបង្កើន និងបន្ថយល្បឿនម៉ាស៊ីន។
ម៉ាស៊ីនម៉ាស៊ូតមិនចេះខូចមានកម្លាំង ៤៤ សេះ ចំណុះប្រេង ៥៨ លីត្ររបស់ គូបូតា ក្រុមហ៊ុនជប៉ុន ត្រូវបានប្រើលើរថយន្ដទម្ងន់ ១៣០០ គីឡូក្រាមនេះ ដែលមានល្បឿនកំពូលត្រឹម ៤៤,៩០ គីឡូម៉ែត្រក្នុង ១ ម៉ោងនៅលើដីគោក និង ៥,៩៥ គីឡូម៉ែត្រក្នុង ១ ម៉ោងនៅក្នុងទឹក៕HR