ក្រុងបាងកក៖ រ៉ូបូតឆ្កែឈ្មោះ K9 ចូលខ្លួនមកបម្រើទឹកលាងដៃ ដល់កុមារ និងអ្នកដើរផ្សារ។ នេះជាមធ្យោបាយថ្មីប្លែក ដែលផ្សារទំនើបនៅថៃបានអនុវត្ត ខណៈដែលប្រទេសនេះបានបន្ធូរបន្ថយបម្រាមរឹតបន្តឹងការដើរហើរ និងដំណើរការទីប្រជុំជនឡើងវិញ។
រ៉ូបូតឆ្កែបម្រើជែលលាងដៃស្ថិតក្នុងដំណាក់កាលប្រតិបត្តិការជាបឋម ហើយវាត្រូវបានបញ្ជាដោយប្រព័ន្ធ 5G ល្បឿនលឿនបំផុត។
ជាមួយកាយវិការត្រាប់តាមកូនឆ្កែដ៏រស់រវើក រ៉ូបូត K9 ដើរក្រវែលជុំវិញផ្សារទំនើប Central World ដ៏ពេញនិយមនៅក្រុងបាងកក ទាក់ទាញចំណាប់អារម្មណ៍អ្នកដំណើរ ជាពិសេសក្មេងៗដែលចូលមកក្បែរ ដើម្បីយកទឹកលាងដៃលើខ្នងរ៉ូបូតឆ្កែ។
មន្ត្រីផ្នែកទីផ្សាររបស់ក្រុមហ៊ុនប្រព័ន្ធទូរស័ព្ទ AIS ភេត្រា សាក់ធីដេយហានូបាន បានលើកពីអត្ថប្រយោជន៍នៃរ៉ូបូតនេះថា៖ «វាផ្ដល់ភាពងាយស្រួលដល់មនុស្សក្នុងការលាងសម្អាតដៃ ពេលកំពុងដើរផ្សារ។ វាជាផ្នែកមួយនៃវិធានការរក្សាអនាម័យ ជាពិសេសក្នុងស្ថានភាពមានជំងឺកូវដី ១៩»។
ក្រុមហ៊ុននេះក៏មានគោលដៅដាក់ឲ្យដំណើរការនូវប្រព័ន្ធ 5G សម្រាប់ស្មាតហ្វូនឲ្យបាននៅចុងឆ្នាំ ២០២០ ផងដែរ។ អមវត្តមានជាមួយរ៉ូបូតឆ្កែ K9 ដែលដាក់ឲ្យប្រតិបត្តិការនៅផ្សារទំនើបនោះ គឺជារ៉ូបូត ROC ដើរតួនាទីវាស់កម្ដៅអតិថិជន និងរ៉ូបូត LISA ផ្ដល់សេវាណែនាំអតិថិជន។
វត្តមានគ្រឿងយន្តទាំងនេះនៅផ្សារទំនើប ក៏ធ្វើឲ្យអតិថិជនខ្លះមិនស្វាគមន៍ដែរ។
អ្នកនាង ឡាផាសាណាន ប៊ូរ៉ាណាផាត់ផាកន បានថ្លែងថា៖ «ខ្ញុំគិតថា គ្រាន់តែឃើញរូបរាងឆ្កែយន្តហ្នឹងវាគួរឲ្យខ្លាចបាត់ទៅហើយ»។
យ៉ាងណាមិញ ស្ត្រីវ័យ ២៩ ឆ្នាំរូបនេះទទួលស្គាល់ថា៖ «ប៉ុន្តែការដើរចល័តផ្ដល់ទឹកលាងដៃដល់អតិថិជនបែបនេះ ក៏ជារឿងល្អដែរ»៕ AFP