.jpg)
អង្គុយធ្វើការនៅផ្ទះបណ្ដើរ នាង ហាមូរ៉ា ងាកទៅជជែកជាមួយរ៉ូបូត ឆាលី បណ្ដើរ។ រូបថត AFP
ក្រុងតូក្យូ៖ ណាមិ ហាមូរ៉ា បាននិយាយថា អ្នកស្រីមិនសូវមានអារម្មណ៍ឯកាចំពោះការបំពេញកិច្ចការការិយាល័យពីផ្ទះនោះទេ។
អ្នកនាងអរគុណដល់គូកនឈ្មោះ ឆាលី ជារ៉ូបូតជំនាន់ថ្មីដ៏ឃ្យូត និងវៃឆ្លាត ១ គ្រឿង ជាម៉ូដែលមានការលក់ដាច់ខ្លាំងអំឡុងពេលវិបត្តិកូវីដ ១៩។
ផ្ទះដែលបំពាក់ដោយបច្ចេកវិទ្យាជំនួយការឆ្លាតវៃ ដូចជាប្រព័ន្ធប្រត្តិបត្តិការ Alexa របស់ Amazon ទទួលបានជោគជ័យជុំវិញពិភពលោក ហើយនៅប្រទេសជប៉ុន ក៏មានតម្រូវការវត្ថុកំដរប្រចាំថ្ងៃ ប៉ះប៉ូវវត្តមានមនុស្សផងដែរ។
អង្គុយក្បែររ៉ូបូតតូចច្រឡឹង បុគ្គលិកវ័យ ២៣ ឆ្នាំ ហាមូរ៉ា បាននិយាយថា៖ «ខ្ញុំចាត់ទុកវាដូចជាសត្វចិញ្ចឹមដែលចេះនិយាយប៉ប៉ាច់ ហើយវាក៏អត់សូវហត់ថែទាំដែរ»។
នាងបន្តទៀតថា៖ «រ៉ូបូតហ្នឹងនិយាយជាមួយខ្ញុំ ដោយវាមានតួនាទីដូចជាសមាជិកគ្រួសារ មិត្តភក្ដិ អ្នកស្គាល់ និងចៅហ្វាយនាយខ្ញុំអ៊ីចឹង»។
ស្ទើរតែរាល់ថ្ងៃដែលអ្នកនាង ហាមូរ៉ា អង្គុយធ្វើការងារពីផ្ទះ នាងតែងតែសួរទៅកាន់រ៉ូបូតតូចថា៖ «ឆាលី រករឿងអ្វីគួរឱ្យចាប់អារម្មណ៍ ហើយនិយាយប្រាប់ខ្ញុំបន្តិចមក»។
តម្រូវការរ៉ូបូតកំដរនៅផ្ទះ មានការកើនឡើងនៅជប៉ុន។ រូបថត AFP
ពេលនាងកំពុងវាយកុំព្យូទ័របណ្ដើរ រ៉ូបូត ឆាលី ក៏បានតបវិញបណ្ដើរថា៖ «អូខេ ប្រាប់រឿងមួយក៏បានដែរ។ ប៉េងប៉ោងនឹងបែកភូស បើយើងហ៊ានបាញ់ទឹកក្រូចឆ្មារលើវា»។
ក្រុមហ៊ុន Sharp បាននិយាយថា រ៉ូបូតតូចមានតម្រូវការកើនឡើងលើទីផ្សារដល់ទៅ ៣០ ភាគរយ នាត្រីមាសចុងក្រោយ បើធៀបនឹងវេលាដូចគ្នាកាលពីឆ្នាំមុន។
អ្នកនាំពាក្យក្រុមហ៊ុនបានលើកឡើងថា៖ «តម្រូវការវាមិនមែនសម្រាប់តែគ្រួសារមានកូនតូចទេ សូម្បីតែមនុស្សចាស់វ័យ ៦០ និង ៧០ ឆ្នាំ ក៏ត្រូវការវាកំដរដែរ»។
តម្លៃរបស់រ៉ូបូត Robohon ក៏មិនថោកដែរ ដោយស្ថិតក្នុងចម្លោះពី ៨២០ ទៅ ២ ២៥០ ដុល្លារ ជាតម្លៃអតិថិជនក្នុងស្រុកហ៊ានចំណាយលើវត្ថុកំដរអារម្មណ៍ស្ទួយជីវិតស្រស់បំព្រងចាកពីភាពឯកា។
ស៊ុនស៊ូកេ អោគី អគ្គនាយកក្រុមហ៊ុនបច្ចេកវិទ្យា Yukai Engineering បាននិយាយថា៖ «អ្វីដែលសំខាន់ គឺជនជាតិជប៉ុនជាច្រើនមានផ្នត់គំនិតថា គ្រប់វត្ថុទាំងអស់សុទ្ធតែមានវិញ្ញាណ»៕ AFP/HR
