.jpg)
បំពាក់ដោយដៃបត់បែន រ៉ូបូតអាចបាញ់ថ្នាំសព្វទីកន្លែង។ រូបថត AFP
ក្រុងសិង្ហបុរី៖ ក្រុមអ្នកស្រាវជ្រាវសិង្ហបុរីបានច្នៃបង្កើតរ៉ូបូតបាញ់ថ្នាំសម្លាប់វីរុសដោយបំពាក់ដៃធ្វើចលនាស្រដៀងមនុស្ស ដើម្បីជួយបន្ទុកកិច្ចការក្រុមអ្នកអនាម័យអំឡុងពេលរីករាលដាលនៃវីរុសកូរ៉ូណា។
រ៉ូបូត «XDBOT» ជារ៉ូបូតប្រអប់ បំផ្លាស់ទីដោយកង់រំអិលជាមួយប្រមោយដៃដ៏ប៉ិនប្រសប់ ដែលអាចលូកចូលកន្លុកកន្លៀត ដូចជា ក្រោមតុ និងក្រោមគ្រែជាដើម។ រ៉ូបូត ដែលផលិតឡើងដោយក្រុមអ្នកស្រាវជ្រាវនៅសាកលវិទ្យាល័យបច្ចេកវិទ្យាណាន់យ៉ាង (NTU) មានភារកិច្ចបាញ់ថ្នាំសម្លាប់មេរោគ និងអាចសម្អាតបរិវេណធំទូលាយ។
វាត្រូវបានគ្រប់គ្រង និងបញ្ជាពីចម្ងាយដោយកុំព្យូទ័រ ឬថេប្ល៊ិត ដែលកាត់បន្ថយហានិភ័យចំពោះក្រុមអនាម័យក្នុងការឆ្លងរោគ ដោយបានឆក់យកជីវិតមនុស្សរាប់ម៉ឺននាក់នៅជុំវិញពិភពលោក។
ឈិន អ៊ីមីង ជាអ្នកវិទ្យាសាស្ដ្រនៅ NTU ដែលដឹកនាំគម្រោងនេះ បាននិយាយថា៖ «ការប្រើប្រាស់រ៉ូបូតថ្មីរបស់យើងពីចម្ងាយ ដែលប្រតិបត្ដិការដោយមនុស្ស អាចគ្រប់គ្រងការបាញ់ថ្នាំសម្លាប់មេរោគ ដោយមិនចាំបាច់មនុស្សប៉ះពាល់ទីតាំងផ្ទាល់»។
រ៉ូបូតត្រូវបានប្រើប្រាស់ប្រឆាំងវីរុសកូរ៉ូណា ព្រោះវាធ្វើការរហ័ស និងមានប្រសិទ្ធភាព។ រូបថត AFP
រ៉ូបូតអនាម័យខុសពីរ៉ូបូតដទៃទៀតនៅលើទីផ្សារ ដែលវាត្រូវបានរចនាឡើង ដើម្បីសម្អាតបរិវេណកម្រាលទីវាល និងមិនអាចបាញ់ថ្នាំលើវត្ថុរូបរាងប្លែកៗ។ រ៉ូបូតអាចជួយសម្រួលកិច្ចការចំពោះការសម្អាតអនាម័យ និងសេវាកម្មបាញ់ថ្នាំសម្លាប់មេរោគនៅសិង្ហបុរី ដោយរបាយការណ៍នានាបានលើកឡើងថា ក្រុមអ្នកអនាម័យត្រូវធ្វើការងារច្រើនម៉ោង ទៅតាមតម្រូវការជាក់ស្ដែងអំឡុងពេលរីករាលដាលនៃមេរោគរាតត្បាត។
XDBOT ត្រូវបានធ្វើតេស្ដសាកល្បងនៅតាមបរិវេណសាកលវិទ្យាល័យបច្ចេកវិទ្យាណាន់យ៉ាង (NTU) ហើយក្រុមអ្នកផលិតរំពឹងថានឹងធ្វើតេស្ដវានៅលើទីលានបរិវេណធំ និងនៅមន្ទីរពេទ្យនានា។
សិង្ហបុរី កំពុងប្រយុទ្ធប្រឆាំងនឹងរលកនៃការឆ្លងលើទី ២ កំពុងតែវាយលុកខ្លាំង ដោយមានមនុស្សឆ្លងវីរុសកូរ៉ូណាហក់ឡើងជាង ១ ពាន់នាក់ ក្នុង ១ ថ្ងៃ ដែលនាំឲ្យករណីសរុបមានជាង ១ ម៉ឺន។ការរីករាលដាលច្រើនផ្ទុះឡើងពីអគារកម្មករសំណង់ជនបរទេស។
ចាប់ពីថៃរហូតដល់អ៊ីស្រាអែល រ៉ូបូតត្រូវបានប្រើប្រាស់ច្រើនក្នុងការប្រយុទ្ធប្រឆាំងវីរុសកូរ៉ូណា ដោយរ៉ូបូតត្រូវបានសម្គាល់ថា ធ្វើការរហ័ស ប្រសិទ្ធភាព និងនៅតំបន់រីករាលដាលខ្លាំង៕ AFP/HR
កុំព្យូទ័រត្រូវបានភ្ជាប់សម្រាប់បញ្ជាការសម្អាតគ្រប់ទីតាំង។ រូបថត AFP
