ក្រុងកាត់ថ្មាន់ឌូ: «សូមរីករាយជាមួយអាហាររបស់លោកអ្នក» នេះជាសម្ដីរបស់អ្នករត់តុនេប៉ាល់ដំបូងឈ្មោះ Ginger ខណៈវាលើកនំចំហុយដាក់លើតុអាហាររបស់ភ្ញៀវដែលកំពុងតែស្រេកឃ្លាន។
ប្រទេសនៅជាប់ភ្នំហិមពាន្ដដ៏ក្រីក្រនេះល្បីសម្បូរភ្នំខ្ពស់ៗជាងបច្ចេកវិទ្យា តែយុវជនស្រាវជ្រាវដោយខ្លួនឯងមួយក្រុម ព្យាយាមស្វែងយល់ផ្លាស់ប្ដូរទស្សនៈនេះ។ ក្រុមហ៊ុនថ្មី Paaila Technology បានផលិត Ginger ជារ៉ូបូតកម្ពស់ ១,៥ ម៉ែត្រ ពីកម្មវិធី scratch ដើម្បីឲ្យវាស្ដាប់យល់ភាសាអង់គ្លេស និងនេប៉ាល់។
រ៉ូបូត ២ ភាសា ដែលត្រូវបានដាក់ឈ្មោះ Ginger តាមគ្រឿងផ្សំអាហារដ៏ពេញនិយមរបស់នេប៉ាល់ ថែមទាំងនិយាយលេងសើច ដូចជា កម្មវិធី Siri របស់ Apple និង Alexa របស់ Amazon ផងដែរ។
Ginger ៣គ្រឿងបម្រើការនៅភោជនីយដ្ឋាន Naulo ក្នុងទីក្រុងដីហុយកាត់ថ្មាន់ឌូ ដែលដងវិថីសម្បូររន្ធបាយខុំ និងអគារចាស់ៗបាក់បែកបន្សល់តាំងពីគ្រោះមហន្ដរាយរញ្ជួយដីជាង ៣ ឆ្នាំមុន។
លោក ប៊ីណាយ រោត អគ្គនាយកក្រុមហ៊ុនឲ្យដឹងថា៖ «នេះជាផលិតផលសាកល្បងរបស់យើង។ យើងស្វាគមន៍នូវប្រតិកម្មនានាពីភ្ញៀវ»។
ក្រុមវិស្វករយុវជន ២៥ នាក់ ដែលលោក រោត ចាស់ជាងគេ អាយុ ២៧ ឆ្នាំ បានធ្វើការងាររាប់ខែដើម្បីផលិតរ៉ូបូត ដោយប្រើដៃសុទ្ធសាធនៅក្នុងការិយាល័យមាន ៣ បន្ទប់តូច។
អ្វីដែលប្រទេសនេប៉ាល់ខ្វះក្នុងវិស័យបច្ចេកវិទ្យា ក្រុមវិស្វករទាំងនេះចេះច្នៃប្រឌិតខ្លួនឯង។ រូបរាងបា្លស្ទិកដ៏ស្លីមរបស់ Ginger ត្រូវបានលាបថ្នាំពណ៌ក្នុងហ្គារ៉ាសឡានក្បែរខាង។
ភោជនីយដ្ឋាន Naulo បានសម្ពោធកាលពី ៤ ខែមុន ហើយអ្នករត់តុជារ៉ូបូតរបស់ខ្លួន គឺជាភាពទាក់ទាញចម្បងដោយបានអន្ទងចិត្ដអតិថិជនទាំងចាស់ ទាំងក្មេងឲ្យចង់ដឹង និងចង់ឃើញ។
អតិថិជនកុម្ម៉ង់ម្ហូបតាមរយៈតារាងមុខម្ហូបលើអេក្រង់ថាច់ស្គ្រីននៅលើតុ ហើយ Ginger ត្រូវបានហៅចូលផ្ទះបាយ ពេលមុខម្ហូបត្រូវបានចុងភៅរៀបចំដាក់ចានរួចរាល់។
សាលីក្រាម សាម៉ា អាយុ ៧៣ ឆ្នាំ ដែលកើតមុនវត្ដមានទូរទស្សន៍លក់ក្នុងប្រទេសនេប៉ាល់ បាននិយាយថា៖ «វាពិតជាបទពិសោធថ្មីសន្លាង»។
មនុស្សយន្ត Ginger បានក្លាយទៅជាតារាល្បី និងរមែងត្រូវបានរំខានដោយក្មេងៗ ដើម្បីចាប់វាថតរូប។ កំពុងលូកដៃយកម្ហូបពីរ៉ូបូត នីឡាម គូម៉ា ប៊ីម៉ាលី អតិថិជនមកញ៉ាំអាហារពេលល្ងាចជាមួយក្រុមគ្រួសារ បាននិយាយថា៖ «ពួកគេពិតជាល្អមែន។ ខ្ញុំមិនជឿថា រ៉ូបូតទាំងនេះផលិតក្នុងប្រទេសនេប៉ាល់យើងសោះ»។
វេទិកាសេដ្ឋកិច្ចពិភពលោកថ្មីៗនេះ បានទស្សន៍ទាយថា នៅមុនឆ្នាំ ២០២៥ ការងារទាំងអស់លើសពីពាក់កណ្ដាលនឹងត្រូវបានធ្វើឡើងដោយរ៉ូបូត ច្រើនជាងជិត ២ ដងនាពេលបច្ចុប្បន្ន៕