ភ្នំពេញ៖ ក្រុមវិស្វករកម្ពុជាវ័យក្មេង ArrowDot ដែលជាក្រុមហ៊ុនធ្វើការងារលើស្វ័យប្រវត្ដិកម្ម អេឡិចត្រូនិក និងឧស្សាហកម្មរ៉ូបូត បានច្នៃបង្កើតឧបករណ៍ថ្មី ដែលផ្ដល់អុកស៊ីហ្សែន និងជួយអ្នកជំងឺដែលត្រូវការជំនួយផ្លូវដង្ហើមពីជំងឺកូវីដ ១៩ និងផ្លូវដង្ហើមផ្សេងៗទៀត។
ម៉ាស៊ីនជំនួយផ្លូវដង្ហើម ឬ (Emergency Low Cost Ventilator Machine) អាចបញ្ចូលខ្យល់អុកស៊ីហ្ស៊ែន និងខ្យល់បរិយាកាសទៅកាន់ផ្លូវដង្ហើមសម្រាប់អ្នកជំងឺពិបាកដកដង្ហើម។
លោក លីម សង្វា សហស្ថាបនិក ArrowDot បានឲ្យដឹងថា៖ «ម៉ាស៊ីននេះមានមុខងារជួយបញ្ចូលខ្យល់អុកស៊ីហ្សែ៊ន ឬខ្យល់បរិយាកាសដល់អ្នកជំងឺដែលមានអាការពិបាកដកដង្ហើម ហើយវាបំពេញមុខងារមួយភាគធំនៃម៉ាស៊ីនស្ដង់ដា ដែលមាននៅតាមមន្ទីរពេទ្យធំៗដោយវាផ្ដល់លក្ខណៈប្រើប្រាស់ងាយស្រួល និងចំណាយថវិកាតិចតួចក្នុងការផលិតពេលមានកង្វះខាតខ្លាំង បើមានការរាតត្បាតនៃជំងឺផ្លូវដង្ហើមថ្មីនេះ»។
ម៉ាស៊ីនជំនួយផ្លូវដង្ហើម ដែលផលិតគំរូដំបូង ៤ គ្រឿង ត្រូវបានប្រើប្រព័ន្ធមេហ្គានិក ដែលមានមុខងារបញ្ចូលខ្យល់អុកស៊ីហ្ស៊ែនតាមរយៈបំពង់ខ្យល់ទៅកាន់សួត នៅពេលអ្នកជំងឺដកដង្ហើមចូល និងបន្ធូរវិញនៅពេលដកដង្ហើមចេញ។
លោក សង្វា ក៏ជាអគ្គនាយក ArrowDot បានប្រាប់ភ្នំពេញ ប៉ុស្ដិ៍ ថា៖ «យើងក៏បានបំពាក់មុខងារ ដើម្បីធ្វើការផ្លាស់ប្ដូរល្បឿន បរិមាណខ្យល់ទៅតាមលក្ខណៈរបស់អ្នកជំងឺផ្សេងៗគ្នាដោយយោងលើទម្ងន់ និងមាឌជាដើម ដែលលក្ខណៈនេះ គ្រូពេទ្យនឹងធ្វើការវាស់មុននឹងដំណើរការម៉ាស៊ីននេះ»។
ម៉ាស៊ីនជំនួយផ្លូវដង្ហើមត្រូវបានត្រួតពិនិត្យ និងដាក់ឲ្យដំណើរការកម្មវិធីទូរស័ព្ទចំនួន ២ ក្នុងកិច្ចប្រជុំរវាង ក្រុមអ្នកស្រាវជ្រាវ និងវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យា គមនាគមន៍ និងព័ត៌មាន ហៅកាត់ថា និបទិក (NIPTICT) ដែលដឹកនាំដោយរដ្ឋមន្ដ្រីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត។
យោងតាមរបាយការណ៍ក្នុងទំព័រហ្វេសប៊ុកក្រសួង លោករដ្ឋមន្ដ្រីបានជំរុញក្រុមវិស្វករកម្ពុជាបន្ដកិច្ចការជាមួយក្រសួងសុខាភិបាល ដើម្បីបន្តនីតិវិធីដាក់ឲ្យដំណើរការកម្មវិធីខាងលើក្នុងពេលឆាប់ៗខាងមុខ។
លោក សង្វា បាននិយាយថា ម៉ាស៊ីនជំនួយផ្លូវដង្ហើម ៤ គ្រឿងដំបូង ដែលនីមួយៗត្រូវការពេល ៥ ថ្ងៃ ដើម្បីអភិវឌ្ឍនៅមន្ទីរពិសោធន៍ ArrowDot ត្រូវបានដាក់ដំណើរការពិសោធលើគុណភាព និងមុខងាររបស់វា។
លោកនិយាយថា៖ «ថ្មីៗនេះ យើងបានយកម៉ាស៊ីនគំរូទៅធ្វើតេស្ដបញ្ជាក់ជាមួយមន្ដ្រីក្រសួងសុខាភិបាល ហើយពួកគេនឹងយកវាទៅសាកល្បងជាមួយសត្វសិន។ ក្រុមហ៊ុនដាក់ស្នើសុំការឯកភាពពីក្រសួង ដែលត្រូវការពេលវេលាតេស្ដច្រើនទៀត»។
លោកបន្ដថា ចំពោះកិច្ចសហការជាមួយសាកលវិទ្យាល័យសុខាភិបាល ម៉ាស៊ីនជំនួយផ្លូវដង្ហើមនេះត្រូវបានធ្វើឲ្យប្រសើរឡើងលើប្រព័ន្ធប្រតិបត្ដិការឲ្យកាន់តែមានគុណភាពក្នុងការសង្គ្រោះជីវិតមនុស្ស។
បើមានការផ្ទុះឡើងខ្លាំងនៅប្រទេសកម្ពុជា ហើយកូវីដ ១៩ បានធ្វើឲ្យប៉ះពាល់ខ្លាំងលើសួតអ្នកជំងឺ លោកអះអាងថា ម៉ាស៊ីនជំនួយផ្លូវដង្ហើមមានតួនាទីសំខាន់ក្នុងការជួយអ្នកជំងឺដកដង្ហើមជាមួយនឹងការបញ្ចូលអុកស៊ីហ្ស៊ែនគ្រប់គ្រាន់។
លោក សង្វា និយាយទាំងស្ទាក់ស្ទើរថា៖ «ក្នុងករណីនេះ ក្រុមវិស្វកររបស់ ArrowDot អាចផលិតម៉ាស៊ីនជំនួយផ្លូវដង្ហើម ១០ គ្រឿងក្នុង ១ ថ្ងៃ។ ប៉ុន្ដែបើមានការផ្ទុះជាយថាហេតុ ក្រុមហ៊ុនរបស់យើងអាចធ្វើការជាមួយនិស្សិតវិស្វករតាមសាកលវិទ្យាល័យនានា ដើម្បីបង្កើនការផលិតដល់ ៥០ គ្រឿង ក្នុង ១ ថ្ងៃ»។
ម៉ាស៊ីនរបស់ ArrowDot លក់ក្នុងតម្លៃ ១៨០ ដុល្លារ ១ គ្រឿង ដែលលោក សង្វា បានអះអាងថា វាជាតម្លៃដើមប៉ុណ្ណោះ ដើម្បីជួយប្រទេសក្នុងគ្រាអាសន្ន។
អគ្គនាយក ArrowDot បានបន្ថែមថា ម៉ាស៊ីនជំនួយផ្លូវដង្ហើមនេះមិនត្រឹមតែសម្រាប់ប្រើដើម្បីជួយអ្នកជំងឺកូវីដ ១៩ ធ្ងន់ធ្ងរប៉ុណ្ណោះទេ ប៉ុន្ដែថែមទាំងអ្នកជំងឺផ្លូវដង្ហើមដទៃទៀត។
លោក លីម សង្វា បានប្រាប់ ភ្នំពេញ ប៉ុស្ដិ៍ ថា៖ «ក្រោយកូវីដ ១៩ បាត់ពីលើលោកនេះទៅ ម៉ាស៊ីននេះអាចត្រូវបានប្រើសម្រាប់អ្នកជំងឺនៅតាមមន្ទីរពេទ្យបង្អែកនានាដែលខ្វះឧបករណ៍ទាំងនេះ។ ម៉ាស៊ីនជំនួយផ្លូវដង្ហើមអាចជួយគ្រូពេទ្យ ដែលធ្លាប់តែឈរសប់បញ្ចូលខ្យល់អុកស៊ីហ្ស៊ែនដល់អ្នកជាច្រើនម៉ោងក្នុងការដកដង្ហើម»។
លោកបន្ដថា៖ «ក្រោយពីតេស្ដលើមុខងារ និងគុណភាព យើងអាចសន្និដ្ឋានថា វាអាចត្រូវបានប្រើនៅផ្ទះផងដែរ។ ប៉ុន្ដែអ្នកប្រើប្រាស់ត្រូវទទួលការបណ្ដុះបណ្ដាល និងធ្វើតាមគោលការណ៍ដោយសារវាត្រូវបានគ្រប់គ្រងដោយវេជ្ជបណ្ឌិត»។
នេះមិនមែនជាលើកដំបូងដែលសហគ្រិនវ័យក្មេងរូបនេះ និងក្រុមការងារបានអភិវឌ្ឍឧបករណ៍បច្ចេកវិទ្យាក្នុងសម័យឧស្សាហកម្ម ៤.០។ កាលពីខែតុលា ឆ្នាំមុន ArrowDot បានផលិតឧបករណ៍ប្រកាសអាសន្នអគ្គិភ័យប៉ុនបាតដៃភ្ជាប់ជាមួយកម្មវិធីទូរស័ព្ទឈ្មោះ FireDot ត្រូវបានអភិវឌ្ឍ ដើម្បីការពារគ្រោះថ្នាក់កើតឡើងជាយថាហេតុសម្រាប់ប្រើប្រាស់ក្នុងអគារ និងផ្ទះសំបែង។
ក្នុងឆ្នាំ ២០១៧ ក្រុមហ៊ុនបានឈ្នះពានរង្វាន់ផ្នែកស្រាវជ្រាវ និងអភិវឌ្ឍឆ្នើមក្នុងវិស័យបច្ចេកវិទ្យាពីក្រសួងប្រៃសណីយ៍ និងទូរគមនាគមន៍សម្រាប់បច្ចេកវិទ្យារ៉ូបូតក្នុងការប្រកួតប្រជែង។
សម្រាប់ព័ត៌មានលម្អិត សុំចូលទៅកាន់វេបសាយ www.arrowdot.io ឬហ្វេសប៊ុក @ArrowdotTech៕