.jpg)
វ៉ែនតាជំរុញការហាត់កីឡាដល់អ្នកពាក់ Radar Pace។ AFP
ក្រុងញូវយ៉ក: ដោយបានចំណាយពេលផលិត ២ ឆ្នាំ Radar Pace របស់ក្រុមហ៊ុន Oakley ក្លាយជាវ៉ែនតាកម្ដៅថ្ងៃ បំពាក់នូវប្រព័ន្ធបច្ចេកវិទ្យាបង្វឹកតាមសំឡេងដ៏ពិតប្រាកដហាក់បីដូចជាអ្នកមានអ្នកគ្រូកីឡាម្នាក់តោងជាប់ភ្នែកអ៊ីចឹង។
ជាមួយជំនួយកម្មវិធីទូរស័ព្ទ លោកអ្នកអាចដំឡើងកម្មវិធីបង្វឹកផ្ទាល់ខ្លួន ដោយតាមដានពីសមត្ថភាព និងទទួលការបណ្ដុះបណ្ដាលដ៏ពិតប្រាកដ តាមរយៈកាសរបស់វ៉ែនតា។
ក្រឡេកមួយភ្លែត Radar Pace មិនខុសពីវ៉ែនតាខ្មៅរបស់ Oakley ទូទៅនោះទេ ទាល់តែលោកអ្នកពិនិត្យឲ្យជិតបន្ដិចនៅត្រង់ដងរបស់វា ដែលអាចសម្គាល់ឃើញការបង្កប់ហាដវែរ Intel។
ត្រង់ចំណុចសៀតផ្កា លោកអ្នកនឹងមើលឃើញបន្ទះថាច់មួយ បំពាក់សេនស័រជាច្រើន រួមទាំង ប្ល៊ូធូស ក្បាលមេក្រូតូច និងរន្ធឌុយ USB ភ្ជាប់នឹងកាសថែមទៀត។
សរុបមក ដងរបស់វាបំពាក់មេក្រូ ៣ និងសេនស័រមិនតិចជាង ៥ នោះទេ ដូចជា ឧបករណ៍ស្ទង់ល្បឿន រង្វាស់រង្វិល បរិធានស្ទង់អាកាសធាតុ ព្រមទាំងសំណើម និងសេនស័រមួយចំនួនទៀត។
ដងវ៉ែនតាក៏បំពាក់ជាមួយប្ល៊ូធូស និងបច្ចេកវិទ្យា ANT+ សម្រាប់ផ្គូផ្គងជាមួយសេនស័រភាគីទី ៣ ដូចជា រង្វាស់ចង្វាក់បេះដូង វាស់ថាមពល និងសេនស័រវាស់ចង្វាក់។
ទិន្នន័យទាំងនេះត្រូវបានបញ្ជូនទៅកាន់កម្មវិធី Radar Pace និងបញ្ជូនមកវិញតាមរយៈសំឡេងនារីយ៉ាងស្រទន់ក្នុងកាសវ៉ែនតា ដែលហាក់បីដូចជាអ្នកមានជំនួយការ ឬអ្នកគ្រូបង្វឹកចាំប្រាប់ពីរបៀបហាត់ ថាគួរបន្ថែមល្បឿន កាត់បន្ថយការហាត់ ឬគួរសម្រាកឆ្លៀតដកដង្ហើមជាដើម។
ជាមួយថ្មអាចប្រើបាន ៤ ម៉ោង និងអាចចាក់តន្ដ្រី ៦ ម៉ោង វ៉ែនតាបង្វឹកវៃឆ្លាត Oakley Radar Pace មានតម្លៃ ៤៤៩ ដុល្លារ៕HR
