.jpg)
ក្រុម Tech Girls Cambodia ឈ្នះជយលាភីលេខ ១ ពីកម្មវិធី Technovation Cambodia។ រូបថត សហការី
ភ្នំពេញ៖ ពេលពួកគេជួបបទពិសោធរៀនមុខវិជ្ជាវិទ្យាសាស្ដ្រនៅសាលារដ្ឋ ដែលទាក់ទងនឹងការពិសោធផ្នែកគីមីវិទ្យា ពួកគេដឹងថា វាហាក់ដូចជាខ្វះអ្វីម្យ៉ាងដែលជាការអនុវត្ដជាក់ស្ដែងនៅក្នុងថ្នាក់រៀន។
ក្រុម Tech Girls Cambodia ជាមួយសមាជិក ៥ នាក់ ភាគច្រើនរៀនថ្នាក់ទី ១២ នាពេលនោះបានឈ្នះពានរង្វាន់លេខ ១ នៃព្រឹត្ដិការណ៍ Technovation Cambodia ដោយការអភិវឌ្ឍកម្មវិធីទូរស័ព្ទ E-Lab ដើម្បីសិស្សវិទ្យាល័យអនុវត្ដការពិសោធវិទ្យាសាស្ដ្រនៅផ្ទះ។
យុវតី ស្រ៊ីនវ៉ាសាន ចាស្មីន ជាសមាជិកក្រុមម្នាក់ បានឲ្យដឹងថា៖ «E-Lab គឺជាកម្មវិធីទូរស័ព្ទបែបអប់រំដោយផ្ដោតលើគីមីវិទ្យា។ កម្មវិធីនេះបានដាក់បញ្ចូលនូវការពិសោធដែលទាក់ទងកម្មវិធី STEM ជាមួយការណែនាំច្បាស់ៗ ហើយយើងក៏រួមបញ្ចូលនូវការបង្ហាត់បង្ហាញ បញ្ជីឈ្មោះសម្ភារពិសោធតម្លៃសមរម្យ និងគន្លឹះសុវត្ថិភាពថែមទៀត។ វាត្រូវបានបែងចែកជា ៣ ផ្នែក គឺសម្រាប់មុខវិជ្ជាចាប់ពីថ្នាក់ទី ៧ ដល់ ទី ៩ និងពីទី ១០ ដល់ទី ១២ ព្រមទាំងការពិសោធបែបកម្សាន្ដសប្បាយ»។
កាលពីមួយឆ្នាំមុន យុវសិស្ស ឈី សុគន្ធទេវី កំពុងសិក្សាថ្នាក់ទី ១២ នៃវិទ្យាល័យព្រះស៊ីសុវត្ថិ និងបានគិតថា ការសិក្សាផ្នែកវិទ្យាសាស្ដ្រនៅសាលារៀនដោយការទន្ទេញទ្រឹស្ដី និងនឹកស្រមៃពីការពិសោធផ្នែកគីមីវិទ្យាពិតជាកិច្ចការមិនងាយស្រួលឡើយ។
រូបភាពពីអេក្រង់កម្មវិធី E-Lab សម្រាប់ Android។ រូបថត សហការី
កញ្ញា សុគន្ធទេវី បានប្រាប់ ភ្នំពេញប៉ុស្ដិ៍ ថា៖ «រហូតដល់សព្វថ្ងៃ យើងនៅបន្ដអនុវត្ដការទន្ទេញមេរៀននៅឡើយ។ យើងប្រឈមនឹងបញ្ហាខ្លះៗទាក់ទងនឹងការរៀនមុខវិជ្ជាវិទ្យាសាស្ដ្រ និងបច្ចេកវិទ្យា។ យើងចង់ស្វែងរកដំណោះស្រាយលើបញ្ហានេះ»។
ចាប់ពីយុវសិស្សដ៏សាមញ្ញម្នាក់ដែលអត់ស្គាល់អ្វីសោះជាបច្ចេកវិទ្យា ពេលនេះ ឈី សុគន្ធទេវី បានពានរង្វាន់ស្ត្រីកម្ពុជាក្នុងវិស័យបច្ចេកវិទ្យា ឆ្នាំ ២០១៩ ដែលបង្កើតឡើងដោយក្រសួងប្រៃសណីយ៍ និងទូរគមនាគមន៍កម្ពុជា ដើម្បីលើកកម្ពស់ស្ដ្រីក្នុងវិស័យព័ត៌មានវិទ្យានៅយុគសម័យឌីជីថល។
កញ្ញា ឈី សុគន្ធទេវី អាយុ ១៩ ឆ្នាំ ជានាយកប្រតិបត្ដិ E-Lab ចាត់ចែងលើផ្នែកបច្ចេកទេស លោក អ៊ុតងី ពិសាល អាយុ ២៤ ឆ្នាំ ជាអ្នកសរសេរកូដ កញ្ញា ពុទ្ធិរិទ្ធ អរុណរស្មី អាយុ ១៨ ឆ្នាំ ចែករំលែកគំនិតជំនួញ និងដោះស្រាយបញ្ហាផ្សេងៗ កញ្ញា សូ វច្ជនា អាយុ ១៨ ឆ្នាំ ទទួលខុសត្រូវផ្នែកមូលនិធិ និងកញ្ញាកូនកាត់ខ្មែរ-ឥណ្ឌា ស្រ៊ីនវ៉ាសាន ចាស្មីន អាយុ ១៨ ឆ្នាំ កាន់ផ្នែកទំនាក់ទំនង។
កញ្ញា សុគន្ធទេវី បាននិយាយថា ជាមួយបំណងចង់បង្កើត E-Lab ក្លាយជាការពិតវាមិនអាចកើតចេញជារូបរាងឡើយ បើគ្មានការចូលរួមពីអ្នកណែនាំ និងសិស្សច្បង និងកិច្ចសហការជាក្រុម។
ស្របពេលនោះ យុវសិស្សរូបនេះចង់ចូលរួមប្រកួតក្នុងព្រឹត្ដិការណ៍ Technovation Cambodia កញ្ញាបានសហការជាមួយសមាជិក ៤ នាក់ទៀត ដើម្បីអភិវឌ្ឍកម្មវិធី E-Lab ហើយពួកគេបានឈ្នះពាន 1st Place National Grand Prize Winner ក្នុងប្រភេទ Senior Division ពីព្រឹត្ដិការណ៍ National Pitch Event for Technovation 2018។
និស្សិតអាហារូបករណ៍ផ្នែកគីមីវិទ្យានៅវិទ្យាស្ថានបច្ចេកវិទ្យាគិរីរម្យ (KIT) កញ្ញា ទេវី បាននិយាយថា៖ «មូលហេតុមួយ កម្មវិធីទូរស័ព្ទនេះត្រូវបានបង្កើតឡើងដោយសារយើងមើលឃើញថា សាលារដ្ឋខ្វះមន្ទីរពិសោធន៍ និងសម្ភារ។ សិស្សភាគច្រើនចាប់អារម្មណ៍នឹងមុខវិជ្ជាវិទ្យាសាស្ដ្រ និងការពិសោធ តែពួកគេមិនមានធនធាន។ ដូច្នេះ យើងនឹកឃើញគំនិតបង្កើត E-Lab ដែលអាចឲ្យអ្នកប្រើអនុវត្ដការពិសោធដោយការមើលវីដេអូក្នុង app។ មូលហេតុមួយទៀត វាចាប់ផ្ដើមអំឡុងពេលចូលរួមប្រកួត Technovation Cambodia នៅឆ្នាំ ២០១៨»។
ជាមួយការចាប់ផ្ដើមបង្ហោះវីដេអូប៉ុន្មានឃ្លីបលើ E-Lab ដែលដំណើរការក្នុងខែឧសភា សិស្សអាចរៀន និងអនុវត្ដខ្លួនឯងនៅផ្ទះ។ យុវតីកូនកាត់ខ្មែរ-ឥណ្ឌា ចាស្មីន បានបន្ដថា៖ «សិស្សអាចរៀនផ្នែកវិទ្យាសាស្ដ្រតាមរយៈវីដេអូ ហើយពួកគេក៏អាចស្វែងយល់ស៊ីជម្រៅអំពីប្រតិកម្មគីមីផ្សេងៗផងដែរ។ ពួកគេអាចអនុវត្ដចំណេះដឹង ឬជជែកវែកញែកជាមួយមិត្ដរួមថ្នាក់ថែមទៀត»។
ក្រោយពីដោនឡូដ និងចុះឈ្មោះប្រើកម្មវិធី E-Lab ដែលទើបដាក់ឲ្យប្រើប្រាស់ប្រព័ន្ធប្រតិបត្ដិការ Android សិស្សអាចជ្រើសរើសប្រភេទគីមីវិទ្យា រូបវិទ្យា និងជីវវិទ្យា (បច្ចុប្បន្ន ដំណើរការតែគីមីវិទ្យា) និងប្រភេទកម្រិតថ្នាក់ពី ៧-៩ និង ១០-១២ ព្រមទាំងការពិសោធកម្សាន្ដសប្បាយ។
ក្រុម Tech Girls Cambodia ស្ថាបនិកកម្មវិធី E-Lab។ រូបថត សហការី
យុវសិស្សវិទ្យាល័យព្រះស៊ីសុវត្ថិរូបនេះ និយាយថា៖ «យើងបានប្រើពេលអភិវឌ្ឍកម្មវិធីនេះមួយឆ្នាំកន្លះ។ វាមានដំណើរការពេញលេញ និងអាចដោនឡូដប្រើប្រាស់បាន តែនៅបន្ដអភិវឌ្ឍបន្ថែម។ សម្រាប់អ្នកប្រើប្រាស់ប្រតិបត្ដិការ iOS សូមរង់ចាំបន្ដិចទៀត»។
ទោះសមាជិកម្នាក់ៗសុទ្ធតែរវល់នឹងការសិក្សារៀងៗខ្លួន ពួកគេនៅតែប្ដេជ្ញាបន្ថែមវីដេអូពិសោធ និងមុខងារសំខាន់ៗថែមទៀតសម្រាប់សិស្សអាចបង្កើនសមត្ថភាពការគិត និងគំនិតច្នៃប្រឌិត។
កញ្ញា ទេវី បានបន្ថែមថា៖ «យើងបន្ដអភិវឌ្ឍមុខងារឲ្យកាន់តែទាន់សម័យ។ យើងបានដឹងថា កម្មវិធីទូរស័ព្ទរបស់យើងត្រូវបន្ដធ្វើបច្ចុប្បន្នភាពជាប់ជានិច្ច។ ដូច្នេះ យើងព្យាយាមដាក់បញ្ចូលវីដេអូកាន់តែច្រើនបន្ថែមទៀត»។
កញ្ញាបាននិយាយថា ក្រុមការងារចង់ប្រែក្លាយ E-Lab ឲ្យទៅជាវេទិកាសង្គមមួយសម្រាប់អ្នកសិក្សាវ័យក្មេងបានជជែកវែកញែកពីមុខវិជ្ជានីមួយៗ និងកាន់តែងាយស្រួលជាងមុន។
ឈី សុគន្ធទេវី បានលើកទឹកចិត្ដឲ្យយុវជនខ្មែរជួយស្វែងរកដំណោះស្រាយផ្សេងៗដែលសង្គមជាតិកំពុងជួបប្រទះ។ កញ្ញាបានបញ្ជាក់ថា៖ «យើងពិតជាឃើញយុវជនទាំងប្រុសស្រីបង្កើតក្រុមហ៊ុនបច្ចេកវិទ្យាច្រើន។ យើងលើកទឹកចិត្ដពួកគេបង្ហាញគំនិត និងចាប់ផ្ដើមគិតអំពីបញ្ហាសង្គមកំពុងជួបប្រទះ ព្រមទាំងព្យាយាមស្វែងរកដំណោះស្រាយ»។
ជាមួយដំណើរការតែនៅលើប្រព័ន្ធប្រតិបត្ដិការ Android នាពេលបច្ចុប្បន្ន សម្រាប់ព័ត៌មានលម្អិត សូមចូលទៅកាន់ទំព័រហ្វេសប៊ុក E-Lab Official៕
