ក្រុងតូក្យូ: ការស្នើសុំឲ្យនរណាម្នាក់ពាក់ម៉ាសការពារសុវត្ថិភាព គឺជាសំណើដ៏លំបាកមួយ។ ដូច្នេះ ហាងមួយនៅជប៉ុនបានជួលរ៉ូបូតមួយគ្រឿង ដើម្បីបំពេញកិច្ចការដោយធានាថាអតិថិជនរបស់ខ្លួនបានពាក់ម៉ាសអំឡុងពេលវិបត្ដិកូវីដនេះ។
គ្រឿងម៉ាស៊ីនរ៉ូបូតដ៏តូចមួយបាននិយាយក្រោយអូសខ្លួនទៅជួបអ្នកដើរផ្សារអត់ពាក់ម៉ាស តាមរយៈវីដេអូបទបង្ហាញដែលចាក់ផ្សាយដោយក្រុមអ្នកផលិតថា៖ «សុំទោសដែលរំខាន! តែសុំមេត្ដាពាក់ម៉ាសផង»។
វាបាននិយាយពេលអតិថិជនគោរពតាមការស្នើ ដោយការឱនក្បាលគោរពដោយដឹងគុណថា៖ «អរគុណចំពោះការយល់យោគ»។
រ៉ូបូតឈ្មោះ «Robovie» ត្រូវបានដាក់ឲ្យធ្វើការនៅតាមហាងលក់សម្ភារកីឡាមួយក្នុងទីក្រុងអូសាកា ជាការធ្វើពិសោធដោយក្រុមវិទ្យាស្ថានស្រាវជ្រាវ ATR ដែលមានមូលដ្ឋាននៅទីក្រុងក្យូតុ ដែលបានផលិតបុគ្គលិកអគ្គិសនីនេះ។
កាមេរ៉ា និងម៉ាស៊ីនហ្គេនឡាស៊ែររបស់វាអាចមើលឃើញមនុស្សអត់ពាក់ម៉ាស ឬឈរកៀកគ្នាពេកនៅតាមជួររង់ចាំ ដោយវាក៏បានស្នើសុំឲ្យអតិថិជនរក្សាគម្លាតសុវត្ថិភាពផងដែរ។
យោងតាម ATR បានបង្ហាញថា នៅពេលរ៉ូបូតអនុវត្ដគោលការណ៍រក្សាគម្លាត Robovie អាចណែនាំឲ្យអតិថិជនទៅកាន់ហាងផ្សេងៗទៀត ដែលពួកគេចង់។
ជប៉ុននៅមានអ្នកឆ្លងវីរុសកូរ៉ូណាតិចជាងបណ្ដាលប្រទេសជាច្រើនទៀត ទោះបីជាមានការកើនឡើងអត្រាឆ្លងខ្ពស់រហូតដល់ ២ ២០១ ករណី ក្នុងមួយថ្ងៃនៅទូទាំងប្រទេសកាលពីថ្ងៃពុធ៕ AFP/HR