ពីឆ្វេងទៅស្ដាំ : រថយន្តហុងដា City ហុងដា Pilot និងហុងដា CR-V ដាក់តាំងនៅក្នុងពិព័រណ៍រថយន្តអន្តរជាតិ នៅកោះពេជ្រកាលពីពាក់កណ្ដាលខែមីនា។ រូបថត សហការី
ភ្នំពេញ : ក្នុងកម្មវិធីពិព័រណ៍រថយន្តខ្នាតអន្តរជាតិដំបូងបង្អស់នៅកោះពេជ្រ ដែលត្រូវបានរៀបចំឡើងដោយសហព័ន្ធឧស្សាហកម្មយានយន្តកម្ពុជា(CAIF) តាំងពីថ្ងៃទី១៥ ដល់១៧ ខែមីនាកន្លងទៅនេះ រថយន្តហុងដា ស៊េរីឆ្នាំ២០១៣ ជាច្រើនម៉ូដែល ត្រូវបានដាក់តាំងបង្ហាញដោយក្នុងនោះមានដូចជា ហុងដា Pilot, CR-V និង City ជាដើម។
រថយន្តហុងដា Pilot ត្រូវបានក្រុមហ៊ុនភ្នំពេញហុងដា ដែលទទួលបានសិទ្ធិចែកចាយរថយន្តហុងដាផ្ទាល់ពីក្រុមហ៊ុនហុងដា ម៉ូទ័ររបស់ប្រទេសជប៉ុននោះ នាំចូលពីក្រុមហ៊ុនហុងដានៅសហរដ្ឋអាមេរិក។ ហុងដា Pilot ជារថយន្តមានកៅអី៣ជួរសម្រាប់អ្នកដំណើរ៨នាក់។ កៅអីត្រូវបានស្រោបដោយពូកស្បែកពណ៌លឿង។ តួរថយន្តមានភាពធំទូលាយ និងបំពាក់ដោយម៉ាស៊ីនត្រជាក់ ដែលអាចឲ្យអ្នកបើកបរ និងអ្នកនៅខាងក្រោយគ្រប់គ្រងសីតុណ្ហភាពបានដោយខ្លួនឯង។ មិនត្រឹមតែប៉ុណ្ណោះ ហុងដា Pilot ក៏មានបំពាក់នូវហ្វ្រាំងសុវត្ថិភាព ABS, EBD ប្រព័ន្ធសម្រាប់ទប់លំនឹងរថយន្តពេលបើកបរ និងប្រព័ន្ធជំនួយក្នុងការបើកបរតំបន់ភ្នំ និងខ្ពង់រាប។ យោងតាមគេហទំព័រវាស់ការប្រើប្រាស់ថាមពលអន្តរជាតិ ក្នុងប្រេង១លីត្រ ហុងដា Pilot ដែលបំពាក់ដោយម៉ាស៊ីន V6 អាចបើកបរបានចម្ងាយពី៧,៦ ទៅ១០,៦គីឡូម៉ែត្រ។
ដោយឡែក រថយន្តហុងដា CR-V ស៊េរីថ្មី គឺជាឈ្មោះដែលអតិថិជនតែងឮជារឿយៗ ដោយសារសែស្រឡាយឆ្នាំមុនៗរបស់វាមានវត្តមាននៅប្រទេសកម្ពុជាជិត ២ទសវត្សរ៍មកហើយនោះ។
ចំពោះហុងដា CR-V ស៊េរីចុងក្រោយឆ្នាំ២០១៣នេះ វាជាប្រភេទរថយន្តកៅអី ៥។ នៅតួខាងមុខត្រូវបានបំពាក់ដោយប៉ាណាក្រូម៉េ និងអំពូលចង្កៀងប្រភេទ HID ភ្លឺច្បាស់ល្អ។ ក្រៅពីមាន ហ្វ្រាំងសុវត្ថិភាព ABS, EBD និងប្រព័ន្ធសម្រាប់ទប់លំនឹងរថយន្តពេលបើកបរ រថយន្តនេះក៏ភ្ជាប់មកជាមួយនូវប្រព័ន្ធកាមេរ៉ាមើលក្រោយ ដែលសម្រួលដល់ការបើកបរ។ ដៃចង្កូតមានស្បែក ប៊ូតុងបញ្ជាលើសំឡេង ប្រព័ន្ធ កំណត់ល្បឿន និងប្រព័ន្ធបញ្ឆេះ និងពន្លត់ម៉ាស៊ីនដោយស្វ័យប្រវត្តិដោយគ្រាន់តែចុចប៊ូតុងតែប៉ុណ្ណោះ មិនចាំបាច់ប្រើសោឡើយ។
យោងតាមតេស្តបើកបរសាកល្បងនៅសហរដ្ឋអាមេរិក ក្នុងប្រេង១លីត្រ ហុងដា CR-V ឆ្នាំ២០១៣ ដែលបំពាក់ដោយម៉ាស៊ីន៤ស៊ីឡាំង ២,៤L អាចរត់បានចម្ងាយពី៩,៧ ទៅ១៣គីឡូម៉ែត្រ អាស្រ័យតាមស្ថានភាពផ្លូវ។
ចំណែកឯរថយន្តហុងដា City ដែលមានរាងរៅត្រូវនឹងការនិយមរបស់យុវវ័យនោះមានបរិក្ខារខាងក្នុងទំនើប។ កុងទ័រត្រូវបានរចនាឡើងយ៉ាងស្រស់ស្អាត រីឯចង្កូតមានប៊ូតុងបញ្ជាសំឡេង និងមានរន្ធសម្រាប់ប្រើ USB និង AUX ព្រមទាំងអាចភ្ជាប់ Bluetooth ទៀតផង។ បរិក្ខារទាំងនេះហើយដែលផ្ដល់ភាពទាក់ទាញ ដល់អតិថិជនវ័យក្មេង។ រថយន្តនេះដំណើរការដោយម៉ាស៊ីន៤ស៊ីឡាំង ១,៥L ដ៏សន្សំសំចៃ ហើយក្នុងប្រេង១លីត្រវាអាចរត់បានចម្ងាយដល់ទៅ១៤ដល់១៧គីឡូម៉ែត្រឯណោះ។
យោងតាម ក្រុមហ៊ុនភ្នំពេញហុងដា សម្រាប់រថយន្តទាំង៣ម៉ូដែលខាងលើ ត្រូវបានបំពាក់ដោយប្រព័ន្ធកំណត់ល្បឿនបើកបរ និងប្រព័ន្ធត្រួតពិនិត្យការបើកបរ Eco Button និង Eco Light ដែលជួយឲ្យអ្នកប្រើប្រាស់រថយន្តដឹងពីការសន្សំសំចៃសាំង។
ព័ត៌មានលម្អិតស្ដីពីរថយន្តទាំង៣ខាងលើនេះ អាចទំនាក់ទំនងក្រុមហ៊ុនភ្នំពេញហុងដា ស្ថិតនៅទល់មុខអាកាសយានដ្ឋានអន្តរជាតិភ្នំពេញ៕
