ភ្នំពេញ៖ តួអង្គតុក្កតាគំនូរជីវចលក្មេងស្រីដ៏គួរឲ្យស្រឡាញ់ម្នាក់បានផុសឡើងនៅលើកណ្ដាលវេទិកា ហាក់ដូចជាវេទមន្ដសិល្ប៍សាស្រ្តក្នុងព្រេងបុរាណខ្មែរ នៅចំពោះមុខរដ្ឋមន្ដ្រីក្រសួងអប់រំ និងអតីតឯកអគ្គរដ្ឋទូតអាមេរិក។
គំនូរជីវចលក្មេងស្រីរំលេចសក់វែងខ្មៅរលោង ភ្នែកមូលក្រឡង់ ទំនងជាអាយុជាង ១០ ឆ្នាំរូបនេះនិយាយស្វាគមន៍ថា «សួស្ដីខ្ញុំឈ្មោះ រចនា ហើយខ្ញុំជាតំណាងនិម្មិត (Virtual Ambassador) ក្នុងកម្មវិធី Technovation ....។ កុំភ្លេចចូលរួមជាមួយខ្ញុំនៅក្នុង season ក្រោយ»។
រូបភាពនិម្មិតផុសក្នុងលម្ហ ជាបច្ចេកវិទ្យាហូឡូក្រាមនេះ ដែលទំនងជាទម្រង់ថ្មីមួយនៅកម្ពុជា បានទទួលការចាប់អារម្មណ៍ពីអ្នកចូលរួម ក៏ដូចជារដ្ឋមន្ដ្រី និងឯកអគ្គរដ្ឋទូតកោតសរសើរចំពោះការប្រើប្រាស់បច្ចេកវិទ្យាហូឡូក្រាមណែនាំគម្រោង ‘I Am Rachana!’។
កញ្ញា ឃួន សុវណ្ណវត្ដី ជាអតីតអ្នកច្នៃប្រឌិតវ័យក្មេងរបស់ Development Innovation (DI) បានឲ្យដឹងថា៖ «ពេលនោះ ខ្ញុំមើលឃើញថា វាទទួលបានការចាប់អារម្មណ៍ខ្លាំងដែរ ដោយសារវាថ្មីប្លែក អត់ទាន់មាននរណាគេបង្ហាញបច្ចេកវិទ្យាហូឡូក្រាមបែបធំក្នុងកម្មវិធីបែបនេះពីមុនមកដែរ។ តា វីលៀម ក៏បានប្រាប់ខ្ញុំថា ‘Your Rachana is cool!'' តែពេលនោះ អត់មានអ្នកយល់ពី concept ហូឡូក្រាមទេ។ ហេតុអ្វីបានយើងធ្វើហូឡូក្រាមអ៊ីចឹង? ណាមួយទៀត concept ‘I Am Rachana!’កូនស្រីនេះ ពិតជា cool ស្រាប់»។
ការរចនាបច្ចេកវិទ្យា ហូឡូក្រាមនេះ បំណងណែនាំអ្នកតំណាងនិម្មិតឌីជីថល (Digital Role Model) និងជាផ្នែកមួយនៃការលើកកម្ពស់ស្ដ្រីក្នុងវិស័យបច្ចេកវិទ្យាគម្រោងមួយឈ្មោះ I Am Rachana! ក្នុងឆ្នាំ ២០១៨។
យុវតីអាយុ ២៣ ឆ្នាំ កញ្ញា សុវណ្ណវត្ដី បាននិយាយថា៖ «កាលនោះ ខ្ញុំអ្នកកាន់គម្រោង I Am Rachana! ហើយគេឲ្យស្រាវជ្រាវអំពីគម្រោងនេះ តែមិនស៊ីជម្រៅអីប៉ុន្មានទេ ដោយសារយើងមានរយៈពេលខ្លីត្រឹម ១ ឬ ២ ខែ។ ខ្ញុំត្រូវបង្ហាញនៅចំពោះមុខឯកឧត្ដម ហង់ ជួនណារ៉ុន និងឯកអគ្គរដ្ឋទូតអាមេរិក លោក វីលៀម។ ខ្ញុំប្រើទូរទស្សន៍ ៦០ អ៊ិញ និងកាត់កញ្ចក់ធំដាក់លើឆាក ដើម្បីឲ្យពួកគាត់បានឃើញ ក្នុងកម្មវិធី Technovation National Pitch ដែលមានអ្នកចូលរួម ៥០០ នាក់»។
ដោយក្ដីស្រឡាញ់គម្រោង ''I Am Rachana!'' កញ្ញា វត្ដី ស្ម័គ្រចិត្ដដឹកនាំក្រុម និងចង់បង្ហាញគម្រោងរបស់ខ្លួន ដើម្បីបង្កើតភាពទាក់ទាញក្នុងនាមជាអ្នកច្នៃប្រឌិតវ័យក្មេងចំពោះវិស័យបច្ចេកវិទ្យានៅកម្ពុជា។
កញ្ញាបន្ដថា៖ «គ្រាន់តែដើម្បីយល់ពី concept វា ខ្ញុំត្រូវចំណាយពេលដល់ ២ ទៅ ៣ សប្ដាហ៍ ដោយសារខ្ញុំត្រូវ run campaign ផង និងស្រាវជ្រាវអានេះផង ហើយគម្រោង I Am Rachana! នេះ ត្រូវដំឡើង ជារូបរាងប្រភេទ 3D ដែលត្រូវរង់ចាំអ្នកជំនាញផលិត។ តែបើឈានដល់ការអនុវត្ដ ការបង្កើតហូឡូក្រាម ពិតជាស្រួលមែនទែន។ យើងគ្រាន់តែកាត់ប្លាស្ទិកថ្លារាងពីរ៉ាមីត ដាក់ផ្កាប់ពីរ៉ាមីតចុះលើស្មាតហ្វូន រួចយើងបញ្ចាំងវីដេអូ នោះជាការស្រេច»។
តាមរបាយការណ៍របស់ Development Innovations និង USAID ចុះផ្សាយក្នុងឆ្នាំ ២០១៨ បានបង្ហាញថា សិស្សស្រីកម្ពុជាក្រោយបញ្ចប់ថ្នាក់វិទ្យាល័យចាប់យកមុខវិជ្ជា និងជំនាញព័ត៌មានវិទ្យាតែ ៨,៥ ភាគរយ។
យុវតីដែលស្រឡាញ់ជំនាញបច្ចេកវិទ្យាដោះស្រាយបញ្ហាសង្គមរូបនេះ បានឲ្យដឹងថា ដោយមើលឃើញថា ការចូលរួមរបស់ក្មេងស្រីនៅក្នុងបច្ចេកវិទ្យា វាមិនទាន់ទូលំទូលាយនៅឡើយ គេរកឃើញមូលហេតុមួយ ដែលថា ក្មេងស្រីមិនមានអ្នកតំណាង (Role Model) ក្នុងវិស័យនេះ។
អតីតនិស្សិតវិទ្យាសាស្ដ្រកុំព្យូទ័ររូបនេះ ប្រាប់ ភ្នំពេញ ប៉ុស្ដិ៍ ថា៖ «ខ្ញុំបានជួបក្មេងស្រីមួយចំនួន និងបានសាកសួរពួកគាត់ថា តើចរិតក្មេងស្រីនៅក្នុងវិស័យតិចណូឡូជីយ៉ាងដូចម្ដេច? ខ្ញុំរកឃើញថា គាត់មានចរិត fun មានការលេងសើចច្រើន និងចូលចិត្ដសិក្សាស្រាវជ្រាវ។ ដូច្នេះ team យើងបង្កើត profile គាត់មួយមក ដែលមានអាយុប្រហែល ១៣ ឆ្នាំ ចន្លោះ [១០ ទៅ ១៨ ឆ្នាំ តាមលក្ខខណ្ឌ Technovation ] ហើយយើងបង្កើតចលនាអាកប្បកិរិយារបស់គាត់ (Rachana)»។
តុក្កតាគំនូរជីវចលលើកតម្លៃស្ដ្រីក្នុងវិស័យតិចណូឡូជី ''I Am Rachana!'' តាមរយៈហូឡូក្រាម មានរយៈពេលត្រឹម ៣០ វិនាទី ជាជំហានដំបូងក្នុង ការផ្សព្វផ្សាយ និងលើកទឹកចិត្ដដល់ក្មេងស្រីកម្ពុជាឲ្យមានការចូលរួមកាន់តែច្រើន។
កញ្ញា ឃួន សុវណ្ណវត្ដី បានឲ្យដឹងថា៖ «យើងព្យាយាមរិះរកវិធីនានាដើម្បី empower ក្មេងៗ និងមនុស្សស្រីក្នុងវិស័យតិចណូឡូជីឲ្យកាន់តែសកម្ម ហើយដំបូង ពេលខ្ញុំនៅជា young innovator Development Innovation រយៈពេល ៦ ខែ ខ្ញុំធ្វើហូឡូក្រាម និងបង្កើតផេក ''I Am Rachana!'' ហើយពេលនេះ team បានបង្កើត comic book និងចែករំលែកលើបណ្ដាញសង្គមដូចគ្នា។ នៅជំហានបន្ទាប់ យើងប្រហែលជាតុក្កតា ឬភាពយន្ដអីតទៅមុខទៀត»។
ក្រៅពីដើរតួសំខាន់ក្នុងការបង្កើតតួអង្គតំណាងនិម្មិតក្មេងស្រីក្នុងវិស័យបច្ចេកវិទ្យា កញ្ញា បានប្រាប់ថា ភាគច្រើន គេប្រើបច្ចេកវិទ្យាហូឡូក្រាម ដោយវាផ្ដល់អត្ថប្រយោជន៍អាចរំលេចនូវរូបភាព ឬវីដេអូប្រភេទ 3D ក្នុងលម្ហ ហើយនៅកន្លែងខ្លះ គេប្រើវាក្នុងសារមន្ទីរ។
កញ្ញា វត្ដី បានពន្យល់ថា៖ «ឧទាករណ៍ថា Albert Einstein គាត់ស្លាប់បាត់ហើយ តែចង់បានទិដ្ឋភាពគាត់អង្គុយនិយាយពីមេរៀនអ្វីមួយ បច្ចេកវិទ្យាហូឡូក្រាម អាចជួយយើងឲ្យអ្នកមើលមានអារម្មណ៍ទំនាក់ទំនងជាមួយ Einstein បីដូចជារូបលោកនៅមានជីវិតដែរ»៕