ក្រុងអូតាវ៉ា: បើម៉ូដែលស្ព័រ Ford GT នៅមិនទាន់ផ្គាប់ចិត្ដរបស់អ្នក អ៊ីចឹង Ford ក៏បានបន្ថែមនូវសមាជិកកំពូលរថយន្ដដោយការបើកសម្ពោធវត្ដមានកេរដំណែលវិសេស (Heritage Edition) ថ្មីដោយការប្រើពណ៌ខៀវផ្ទៃមេឃ និងទឹកក្រូចស្រោបលើ GT។
វាមិនត្រឹមតែជាការរំឭកដល់ម៉ូដែលចាស់កាលពីទសវត្សរ៍ឆ្នាំ ១៩៦៨ និងឆ្នាំ ១៩៦៩ លើទីលានប្រណាំងរថយន្ដ Le Mans 24 Hours ប៉ុណ្ណោះទេ ប៉ុន្ដែវាក៏រំលេចនូវរូបរាងកំពូលរថយន្ដដោយការប្រើពណ៌ខៀវផ្ទៃមេឃ និងទឹកក្រូចថែមទៀតផង។
សម្រាប់អ្នកដែលអត់ដឹងរថយន្ដប្រណាំង GT40 ដែលក្រុមហ៊ុន Ford ប្រើពេលល្បីនៅក្រុង Le Mans រយៈពេល ២ ឆ្នាំក៏មានពណ៌ទឹកក្រូចឆ្អិនឆ្អៅនេះដែលត្រូវបានគេចាត់ទុកថាជាពណ៌ជ័យជម្នះ។
ជាមួយម៉ាស៊ីនទែរបូភ្លោះ V6 ចំណុះ ៣,៥ លីត្រដែលផលិតថាមពល ៦៤៧ សេះ និងកម្លាំងបង្វិល ៥៥០ ផោនហ្វ៊ីត កំពូលរថយន្ដស្ព័រមួយនេះអាចបង្កើនសម្ទុះល្បឿនពី ០ ទៅ ១០០ គីឡូម៉ែត្រក្នុង ១ ម៉ោងត្រឹមថិរវេលាប្រហែល ៣ វិនាទីមុនពេលវាកើនល្បឿនកំពូលដល់ ៣៥០ គីឡូម៉ែត្រក្នុង ១ ម៉ោង។
ទោះបីជាក្រុមហ៊ុន Ford មិនបានប្រាប់ថាខ្លួនផលិតម៉ូដែល Ford GT Heritage Edition ប៉ុន្មានគ្រឿងក៏ដោយ ក៏រថយន្ដនីមួយៗដែលផលិតចេញពីរោងចក្រស្ថិតនៅក្នុងទីក្រុងអុនតារីយ៉ូ ទឹកដីកាណាដានឹងមានស្លាកលេខសម្គាល់យ៉ាងពិសេស (សម្រាប់ទឹកដីអាមេរិក) ដែលបង្ហាញពីចំនួនលេខរៀងរបស់រថយន្ដ។ ប៉ុន្ដែតម្លៃក៏មិនថោកដែរ។
ព័ត៌មានលម្អិតអំពីតម្លៃនៅមិនទាន់លាតត្រដាង តែមិនរំពឹងថាម៉ូដែល Ford GT Heritage Edition នឹងត្រូវលក់ក្រោមតម្លៃ ៤៥ ម៉ឺនដុល្លារក្នុង ១ គ្រឿងសម្រាប់ម៉ូដែលស្ដង់ដាឡើយ ហើយវាទំនងជាមានតម្លៃជាក់លាក់ប្រមាណ ៥០ ម៉ឺនដុល្លារសម្រាប់ពណ៌ទឹកក្រូច (Gulf Oil)។
កំពូលរថយន្ដរចនាម៉ូដបែប Ford GT Heritage Edition អតីតកាលនេះស្ថិតនៅកំពូលតារាងនៃការដាក់លក់ដេញថ្លៃសប្បុរសធម៌ Scottsdale ដោយក្រុមហ៊ុន Barrett-Jackson។ Ford GT Heritage Edition ឆ្នាំ ២០១៩ ដំបូងរំលេចពណ៌ទឹកក្រូចពិសេស (Gulf Oil) នឹងមានតម្លៃ ២,៥ លានដុល្លារ។
នាយកប្រតិបត្ដិសកលរបស់ Ford លោក ចូ ហ៊ីនរីចស៍ ដែលបានបើកបរលើវេទិកាជាមួយវេជ្ជបណ្ឌិត អគ្គនាយកសប្បុរសធម៌ Darienne Driver ឲ្យដឹងថា៖ «ឱកាសក្លាយជាម្ចាស់ Ford GT Heritage Edition ឆ្នាំ ២០១៩ ដំបូងគេ ដែលមានពណ៌ពិសេសគឺជាឱកាសដ៏ពិសេសក្នុងឆាកជីវិត»៕ HR