ក្រុងញូវយ៉ក: កសិដ្ឋានប៊្លូប៊ឺរី នៅរដ្ឋ Oregon បានជួបនូវបញ្ហាធ្ងន់ធ្ងរដែលហ្វូនបក្សីលួចដំណាំរហូតដល់ ២៥ ភាគរយនៃទិន្នផល ហើយឆ្នាំមុនពួកគេដោះស្រាយបញ្ហាដោយការប្រើបច្ចេកវិទ្យាច្នៃយ៉ាងវិសេស។
នៅដើមរដូវនៃការដាំប៊្លូប៊ឺរីកសិដ្ឋានបានដំឡើង 6 Agrilaser Autonomics កាំភ្លើងឡាស៊ែរស្វ័យប្រវត្ដិដែលបំពាក់លើបង្គោលទម្រ។ កាំភ្លើងឡាស៊ែរទាំងនេះបាញ់ភ្លើងពណ៌បៃតងកាត់ដំណាំ។ បក្សីទំនងជាមានការភាន់ច្រឡំភ្លើងឡាស៊ែរជាមួយវត្ដមានសត្រូវ ហើយនឹងហើរចេញភ្លាមៗ។
ក្រុមហ៊ុន Bird Control Group បានអះអាងថាបច្ចេកវិទ្យារបស់ខ្លួនបានកាត់បន្ថយចំនួនបក្សីលើកសិដ្ឋានរហូតដល់ ៩៩ ភាគរយ។ ម្ចាស់កសិដ្ឋានជឿថា ឡាស៊ែរបានសង្គ្រោះដំណាំរបស់ខ្លួនជាង ២៦ ម៉ឺនគីឡូក្រាមដែលមានតម្លៃជិត ១០ ម៉ឺនដុល្លារ។
ឡាស៊ែរនេះត្រូវការពេលផលិត ៤ ឆ្នាំក្រោយពីបានធ្វើតេស្ដពណ៌ផ្សេងៗ ប្រវែងរលកសញ្ញា និងទំហំនៃពន្លឺ។ ពួកគេសម្រេចរើសយកពន្លឺពណ៌បៃតងធំ និងប្រើរនាំងបាំងពន្លឺដើម្បីកាត់បន្ថយការប៉ះពាល់។
លោក Steinar Henskes ជាអគ្គនាយកបាននិយាយថា៖ «យើងបានសិក្សាពីអានុភាពនូវអ្វីដែលយើងបានហៅកាំរស្មីឡាស៊ែរក្នុងការជួយបណ្ដេញហ្វូងបក្សី»។
ចំណុចអវិជ្ជមានគឺតម្លៃ ១ ម៉ឺនដុល្លារហើយតាមកន្លែងភាគច្រើនត្រូវការលើសពី ១ គ្រឿង។ វាក៏នៅមិនទាន់អាចបែងចែកអម្បូរបក្សីផ្សេងៗដែរ តែសព្វថ្ងៃកសិដ្ឋានជាង ១០០ កន្លែងនៅអាមេរិកបានប្រើបច្ចេកវិទ្យានេះ និងបន្តកើនឡើងជាហូរហែ៕ HR