.jpg)
រថយន្តតួខ្ពស់ Lister LFP ប្រភេទគ្រួសារ តម្លៃជាង ១១ ម៉ឺនដុល្លារ។
ក្រុងឡុងដ៍: រថយន្ដតួខ្ពស់ហាក់ដូចជាមានភារកិច្ចធ្ងន់ធ្ងរនៅក្នុងក្រុមគ្រួសារដ៏មមាញឹកជាងការរត់លើផ្លូវប្រណាំង។ យ៉ាងណាមិញ ម៉ូដែលតួខ្ពស់ SUV ថ្មីសន្លាងនេះ ផ្ដោតលើការឌីហ្សាញផ្នែកសមត្ថភាព និងអាចបើកបរដល់ល្បឿន ៣២០ គីឡូម៉ែត្រក្នុង ១ ម៉ោង ដែលអាចប្រកួតប្រជែងជាមួយរថយន្ដប្រណាំងបាន។
នៅចក្រភពអង់គ្លេស ក្រុមហ៊ុនផលិតរថយន្តប្រណាំង Lister បង្ហាញស្នាដៃឌីហ្សាញរថយន្ដតួខ្ពស់ថ្មីតម្លៃ ១១ ម៉ឺនដុល្លារ ដែលអាចបង្កើនសម្ទុះល្បឿនពី ០ ទៅ ១០០ ត្រឹមថិរវេលា ៣,៥ វិនាទី។
Lister LFP ដែលទើបស្ថិតក្នុងការធ្វើតេស្ដសាកល្បងនៅឡើយ ផ្ដោតចម្បងលើម៉ូដែលតួខ្ពស់ Jaguar F-Pace ដោយវានឹងបំពាក់ម៉ាស៊ីនកម្លាំង ៦៧០ សេះនិងអាចបើកបរលើល្បឿនពី ១៩៥ ទៅ ២៨០ គីឡូម៉ែត្រក្នុង ១ ម៉ោង។
យោងតាមប្រភពពីក្រុមហ៊ុន ផ្ទាល់ សមត្ថភាពពេញលេញរបស់ Lister LFP នឹងត្រូវបានលាតត្រដាងនៅចុងខែកញ្ញានេះ ដោយការដាក់លក់អាចនឹងចាប់ផ្ដើមក្នុងខែតុលា។
Lister គំរូដើមគឺជារថយន្ដស្ព័រប្រណាំងដ៏ល្បីល្បាញបំផុតមួយនៅចក្រភពអង់គ្លេសក្នុងទសវត្សរ៍ឆ្នាំ ១៩៥០ ដោយឈ្នះស្ទើរតែគ្រប់ការប្រកួតក្នុងទឹកដី និងនៅទូទាំងអង់គ្លេស បរទេស និងសហរដ្ឋអាមេរិក។
ថ្មីៗនេះ ក្រុមហ៊ុនដែលមានមូលដ្ឋាននៅ Cambridge មួយនេះបានផ្លាស់ប្ដូរពីការច្នៃរថយន្ដស្ព័រល្បឿនកាំជ្រួចមកបរលើដងវិថី ព្រមទាំងផ្ដល់សេវាកម្មកែកុនផ្សេង។
យោងតាមក្រុមអ្នកឌីហ្សាញ បានអះអាងថា ស្បែកក្រែបដ៏ធំលើតួរថយន្ដ LFP អាចជួយបង្កើនអានុភាពវាក្លាយជារថយន្ដតួខ្ពស់ល្បឿនលឿនបំផុតក្នុងលោក។
ម្ចាស់ក្រុមហ៊ុន ឡូរ៉េន វ៉ៃថេកឃ័រ បានថ្លែងថា៖ «បន្ថែមពីជោគជ័យលើម៉ូដែលមុន LFT-666 ការបញ្ចេញម៉ូដែល LFP ដ៏កប់ស៊េរី នឹងធ្វើឲ្យក្រុមហ៊ុនយើងកាន់តែរឹងមាំ»៕ HR
