ក្រុងភើត: អ្នកដំណើរដែលត្រូវរង់ចាំជើងហោះហើរ នៅអាកាសយានដ្ឋាន ក្រុងភើត ពេលនេះអាចជួលប្រអប់ដំណេកដ៏ទំនើប T1 ដើម្បីសម្រាកកាយ និងប្រើប្រាស់បរិក្ខារបច្ចេកវិទ្យាដោយគ្មានការរំខាន។
នេះជាព្រលានយន្តហោះដំបូងនៅប្រទេសអូស្ត្រាលី ដែលបានដាក់ដំណើរការប្រអប់ដំណេក ជាកូនបន្ទប់តូចល្មមមួយខ្លួន បំពាក់ដោយបរិក្ខារបច្ចេកវិទ្យាចុងក្រោយ ក្រោមការសហការជាមួយក្រុមហ៊ុនហ្វាំងឡង់ GoSleep និង Smarte Carte។
មន្ត្រីជាន់ខ្ពស់អាកាសយានដ្ឋានក្រុងភើត លោក ខេវិន ប្រោន បានឲ្យដឹងថា ប្រអប់ដំណេក (Sleeping Pods) គឺជាទីសម្រាកដ៏ប្រសើរ និងឡូយបំផុតសម្រាប់អ្នកដំណើរកំពុងរង់ចាំជើងហោះហើរ។
លោកបានលើកឡើងថា៖ «ប្រអប់ដំណេកផ្ដល់ឲ្យពួកគេនូវការសម្រាកបែបឯកជនប្រកបដោយផាសុកភាព នៅទីសាធារណៈដ៏ទូលំទូលាយ»។
លោកបញ្ជាក់ទៀតថា៖ «នេះជាផ្នែកមួយនៃកិច្ចខិតខំប្រឹងប្រែងឲ្យអាកាសយានដ្ឋាននេះមានភាពទំនើប និងផ្ដល់សេវាប្រកបដោយផាសុកភាព និងប្រសិទ្ធភាព»។
ជាការចាប់ផ្ដើមដំបូងប្រអប់ដំណេកចំនួន ៨ នឹងត្រូវបានបំពាក់។ GoSleep Pod ជាប្រអប់ដំណេកដែលស្រដៀងនឹង ប្រភេទកៅអីប្រណីតលំដាប់ខ្ពស់ក្នុងយន្តហោះ។
អ្វីដែលពិសេស គឺប្រអប់ដំណេកមានគម្របបិទបាំង ដែលផ្ដល់នូវ ភាពឯកជន និងសម្រួលដល់កាយវិការគេងរបស់អ្នកដំណើរ។ នៅក្នុងនោះក្រៅពីខ្នើយ ភួយដ៏ទន់ល្មើយ និងថតសម្រាប់ទុកដាក់វ៉ាលិសទំហំតូច វាក៏មានបំពាក់នូវរន្ធដោត USB និង GPO សម្រាប់អ្នកប្រើប្រាស់កុំព្យូទ័រយួរដៃ និងសាកថ្មទូរស័ព្ទ។ អ្នកដំណើរអាចកក់ប្រអប់ដំណេកអនឡាញ ក្នុងតម្លៃ ១ ម៉ោង ១៤ ដុល្លារ និងរយៈពេល ៥ ម៉ោង តម្លៃ ៥០ ដុល្លារ។
អគ្គនាយកក្រុមហ៊ុន GoSleep លោក ជូស៊ី ភីស្ប៉ានិន បានឲ្យដឹងថា៖ «យើងបានបំពាក់ប្រអប់ដំណេកនៅ ១៥ អាកាសយានដ្ឋាន រួមទាំងថ្មីៗនៅអូស្ត្រាលីផងដែរ»៕