.jpg)
គំរូម៉ូដែលរថយន្តប្រណីត Aston Matin Lagonda ដែលមានតម្លៃដើមចេញពីរោងចក្រប្រមាណ ៤២ ម៉ឺនដុល្លារ។
ក្រុងឡុងដ៍: Aston Martin បានបង្ហាញម៉ូដែលលីម៉ូស៊ីនប្រណីត Lagonda ថ្មីសន្លាងដែលវានឹងអាចប្រកួតប្រជែងជាមួយដៃគូរួមប្រទេស Rolls-Royce និង Bentley។
ក្រុមហ៊ុនផលិតរថយន្ដចក្រភពអង់គ្លេស កំពុងគាស់កកាយម៉ូដែល Lagonda បាត់មុខបាត់មាត់មកកាន់ពិភពរថយន្ដអគ្គិសនីកំពូលប្រណីតដំបូងបំផុតក្នុងលោក ដែលអាចមានតម្លៃដើមចេញពីរោងចក្រ លើស ៣០ ម៉ឺនផោន (១,៧០ ពាន់លានរៀល ឬជិត ៤២ ម៉ឺនដុល្លារ)។
នាយកប្រតិបត្ដិក្រុមហ៊ុន Aston Martin វេជ្ជបណ្ឌិត អេនឌី ផាល័រ បាននិយាយថា ម៉ូដែល Lagonda នឹងអាចបរបានចម្ងាយផ្លូវ ៦៤៥ គីឡូម៉ែត្រ ទើបសាកថាមពលម្ដង ដែលសមល្មមលើដំណើរចេញពីក្រុងឡុងដ៍ ទៅកាន់ក្រុងអេឌីប៊ឺក ពីក្រុងឡូសអេនជឺលេស ទៅកាន់ក្រុង សាន ហ្រ្វានស៊ីស្កូ ឬពីក្រុងប៊ែរឡាំងទៅកាន់ក្រុងវីយែន ដោយមិនចាំបាច់ឈប់ដើម្បីសាកថាមពលនោះទេ។
Lagonda ២ ម៉ូដែល ត្រូវបានគ្រោងផលិតឡើង គឺប្រភេទកៅអី ៤ ដែលបង្ហាញវត្ដមាននៅក្រុងហ្សឺណែវ ជិតត្រូវបានដាក់លក់នៅឆ្នាំ ២០២១ និងម៉ូដែល ២ កៅអី នឹងចេញលក់នៅក្នុងឆ្នាំ ២០២៣។
ជាមួយរចនាប័ទ្មផ្ទៃក្នុងប្រណីតនិងកៅអីភ្នាក់ដៃវាមានបន្ទប់វៃឆ្លាតលើសពីកាប៊ីនរថយន្ដធម្មតា។ ថ្វីដ្បិតតែម្ចាស់រថយន្តអាចអនុញ្ញាតឲ្យតៃកុងមនុស្សបញ្ជាចង្កូត ពេលប្ដូរមកប្រើបច្ចេកវិទ្យាបើកបរស្វ័យប្រវត្ដិ កៅអីមុខទាំង ២ អាចបង្វិលបាន ១៨០ ដឺក្រេដើម្បីឆ្លៀតមកជជែកទល់មុខគ្នាជាមួយអ្នកដំណើរខាងក្រោយ។
កៅអី២ខាងមុខ អាចបង្វិលមកទល់មុខកៅអីក្រោយ សម្រួលដល់ការសន្ទនា។
វេជ្ជបណ្ឌិតនិយាយថា លោកចង់ចូលប្រឡូកក្នុងឧស្សាហកម្មរថយន្ដកំពូលប្រណីតដែលគ្រប់គ្រងទីផ្សារដោយ Rolls-Royce ដែលកំពុងត្រៀមចេញម៉ូដែល 4X4 ថ្មីឈ្មោះ Cullinan រួមទាំង Bentley ផងដែរ។
Lagonda រូបរាងឌីណាមិកខ្យល់មានប្រវែងជិត ៥,៥ ម៉ែត្រ គ្រាន់តែខ្លីជាងម៉ូដែលចុងក្រោយ Rolls-Royce Phantom តែ ២៧ សង់ទីម៉ែត្រប៉ុណ្ណោះ។ អវត្ដមានម៉ាស៊ីនសាំង Lagonda មានបរិវេណកាន់តែធំទូលាយ។ វាមានទីធ្លាសម្រាប់មនុស្សធំអង្គុយ ៤ នាក់យ៉ាងផាសុកភាព។
លោកនិយាយថា Lagonda មានបរិវេណប្រហាក់ប្រហែលម៉ូដែល Rolls-Royce Phantom និងធំជាង Rolls-Royce Ghost ដោយលោកលើកឡើងថា៖ «បើ Rolls-Royce ប្រៀបដូចជាប្រភេទ Boeing 777 អ៊ីចឹង Lagonda ប្រាកដជា Concorde ហើយ។ វាមិនចាំបាច់ត្រូវការចម្រឹងខ្យល់ធំនោះទេ»៕HR
