ក្រុងឡុងដ៍: ត្រូវបានគេស្គាល់ជារថយន្តប្រណីតរបស់អង់គ្លេសដែលពោរពេញទៅដោយថាមពល និងសម្ទុះល្បឿន Bentley ថ្មីៗនេះទើបតែបានប្រកាសពីនិន្នាការឆ្ពោះទៅរកភាពបៃតង។
បង្ហាញខ្លួនក្នុងពិព័រណ៍រថយន្ត ក្រុងហ្សឺណែវ កាលពីថ្មីៗនេះ ក្រុមហ៊ុនផលិតរថយន្តប្រណីតរបស់អង់គ្លេសមួយនេះបានប្រកាសពីជំហរនៃអនាគតបៃតង ស្នេហាបរិស្ថាន ជាមួយជម្រើសរថយន្តកូនកាត់ ដំបូងបង្អស់ មុននឹងឈានទៅដល់ការផលិតរថយន្តអគ្គិសនីទាំងស្រុងតែម្ដង។
ថ្នាក់ដឹកនាំក្រុមហ៊ុន លោក អេន ឌ្រាន ហលម៉ាក (Adrian Hallmark) បានប្រកាសថា រថយន្ត Bentley តួខ្ពស់ Bentayga Hybrid ជារថយន្តប្រណីតកូនកាត់ប្រើឥន្ធនៈ និងអគ្គិសនី ដែលជាជំហានដំបូងក្នុងការសម្រេចក្ដីប្រាថ្នាផលិតរថយន្តដើរដោយថាមពលអគ្គិសនីសុទ្ធសាធ។
លោកបានបញ្ជាក់ថា ក្រុមហ៊ុនគ្រោងនឹងផលិតរថយន្តអគ្គិសនី ១០០ ភាគរយ ចំពោះគ្រប់ម៉ូដែល Bentley នៅអំឡុងឆ្នាំ ២០២៥។
ការប្រកាសពីវត្តមានរថយន្ត Bentley 4x4 ជាប្រភេទតួខ្ពស់ហៅថា Bentayga កូនកាត់នេះ គឺជាការបើកទំព័រថ្មីនៃប្រវត្តិសាស្ត្ររថយន្តគ្រប់ខួប ១០០ ឆ្នាំ ចាប់តាំងពីក្រុមហ៊ុនកកើតនៅឆ្នាំ ១៩១៩។
ម៉ូដែលកូនកាត់តួខ្ពស់ដែលប្រើរចនាប័ទ្មពណ៌ស លាយឈាមជ្រូកដូចស្រទាប់ផ្កាកុលាបតាំងពីក្រៅដល់ក្នុងនេះបំពាក់ដោយម៉ាស៊ីនម៉ាស៊ូត ធើរបូឆាច 3.0-litre V6 ផ្គួបនឹងម៉ូទ័រអគ្គិសនី ដែលរួមគ្នាផ្ដល់ថាមពលដ៏រលូន។
នៅពេលដំណើរការដោយថាមពលអគ្គិសនីសុទ្ធ វាអាចបរបានចម្ងាយជាង ៥០ គីឡូម៉ែត្រ ដោយមិនមានបំភាយផ្សែងប៉ះពាល់បរិស្ថានទាល់តែសោះ។ យ៉ាងណា សម្រាប់ការសាកអគ្គិសនីធម្មតា ត្រូវការពេល ៧ ម៉ោងកន្លះ ឬយ៉ាងហោចក៏ ២ ម៉ោងកន្លះ ចំពោះជម្រើសសាកល្បឿនលឿន។
ម៉ាស៊ីនកូនកាត់ V6 hybrid ត្រូវបានគេរំពឹងថា នឹងបញ្ចេញថាមពល 450bhp។ កម្រិតល្បឿនកំពូលគឺ ២៤០ គីឡូម៉ែត្រក្នុង ១ ម៉ោង ជាមួយសម្ទុះល្បឿនបង្កើនពី ០ ទៅ ១០០ គីឡូម៉ែត្រក្នុងមួយម៉ោងដោយប្រើថិរវេលាជាន់ហ្គែរមិនដល់ ៦ វិនាទី។
រថយន្តតួខ្ពស់ Bentayga កូនកាត់នេះ ត្រូវបានគេប៉ាន់ប្រមាណថានឹងចេញលក់ក្នុងតម្លៃដើមពីរោងចក្រប្រមាណ ១៩៦៨៦៣ ដុល្លារ (ជិត ២០ ម៉ឺនដុល្លារ) ខណៈការកុម្ម៉ង់នឹងចាប់ផ្ដើមធ្វើឡើងនៅពាក់កណ្ដាលឆ្នាំ ២០១៨។ យ៉ាងណាមិញ ក្រុមហ៊ុនមិនបានទម្លាយតម្លៃផ្លូវការឡើយ៕