.jpg)
រថយន្ត BMW អគ្គិសនីបើកបរដោយស្វ័យប្រវត្តិនាថ្ងៃអនាគតដ៏ខ្លី។
ក្រុងប៊ែរឡាំង: BMW បានបង្ហាញរថយន្ដតួខ្ពស់ SUV អគ្គិសនី គ្មានមនុស្សបើកដ៏ថ្មីសន្លាង ដែលបំពាក់នូវបរិក្ខារពិសេសៗច្រើនសន្ធឹកសន្ធាប់ដោយយកលំនាំតាមភាពយន្ដ ដ៏ល្បីល្បាញវីរបុរសចារកម្ម ចេមស៍ ប៊ន ០០៧។
ដោយគ្រោងចេញលក់ក្នុងឆ្នាំ ២០២១ ជារថយន្ដចរាចរណ៍លើដងផ្លូវសាធារណៈ រថយន្ដអគ្គិសនី Vision iNext កកើតឡើងចេញពីទស្សនៈច្នៃប្រឌិតថ្មី រួមទាំង «កៅអីឆ្លាតវៃ អាចប្រាស្រ័យទាក់ទងជាមួយមនុស្ស»។
វីដេអូ និងរូបភាពផ្សព្វផ្សាយ បានបង្ហាញថា អ្នកដំណើរអង្គុយខាងក្រោយអាចសេរ៉េវ៉ូលូមសំឡេងតន្ដ្រីដោយការចុចលើពូកកៅអីអង្គុយផ្ទាល់។
អ្នកដំណើរក៏នឹងអាចពង្រីកផែនទីដោយការធ្វើចលនាដូចគ្នានៅខ្នើយក្បាលកៅអីមុខ។ វីដេអូដដែលនោះក៏បានបន្ថែមទៀតថា រថយន្ដអនាគតកាល ចេះចូលចំណតដោយខ្លួនឯងថែមទៀត។
ក្រុមហ៊ុនក៏បានសន្យាផងដែរថា បច្ចេកវិទ្យាបើកបរស្វ័យប្រវត្ដិនឹងផ្ដល់គុណប្រយោជន៍ពេញលេញនៅឆ្នាំ ២០២១ ដែលអាចផលិតឡើងជារូបរាងនិងសមត្ថភាពបើកបរប្រកបដោយទំនុកចិត្ត។
រថយន្ដ 4x4 នេះមានទ្វារបើកដូចបង្អួច ដំបូលកញ្ចក់ រួមទាំង ចង្កៀងមុខ និងស្ដុបក្រោយតូចឈ្លែម។ ប៉ុន្ដែការឌីហ្សាញដ៏ស្លីមនេះមិនទាន់អាចកញ្ឆក់អារម្មណ៍អ្នកនិយមរថយន្ដប្រណីត គ្រប់រូបឡើយ។
យ៉ាងណាមិញចម្រឹងខ្យល់មុខត្រូវបានរិះគន់លើបណ្ដាញសង្គម ដែលគេនាំគ្នាប្រៀបធៀបម៉ូដែលថ្មីនេះទៅនឹងមាត់ត្រី និងធ្មេញភេ។
វីដេអូបានបង្ហាញពីប្រព័ន្ធអេឡិចត្រូនិកនៅផ្នែកខាងក្រោយរថយន្ដ ដែលបញ្ជូនរូបភាពទៅកាន់អេក្រង់លើតាបឡូ។ ដៃចង្កូតក៏លិបចូលក្នុងតាបឡូពេលអត់ត្រូវការប្រើ ព្រមទាំងបង្ហាញនូវសញ្ញាគ្មានមនុស្សបញ្ជាផងដែរ៕HR
