ក្រុងឡូសអេនជឺលេស: BMW Vision iNEXT ត្រូវបានតាំងបង្ហាញនៅព្រឹត្ដិការណ៍ពិសេសមុនពិព័រណ៍រថយន្ដក្រុងអិលអេ នៅថ្ងៃទី ២៧ ខែវិច្ឆិកា ឆ្នាំ ២០១៨ ក្នុងក្រុងឡូសអេនជឺលេស។
BMW Vision iNEXT បំពាក់បច្ចេកវិទ្យាអគ្គិសនីសុទ្ធសាធ និងបើកបរដោយស្វ័យប្រវត្ដិ។ អគ្គនាយក BMW ហារ៉ាល់ គ្រូជ័រ បាននិយាយថា គឺជាម៉ូដែលអនាគតកាល Vision iNext របស់ក្រុមហ៊ុន។
លោកនិយាយថា ក្រុមហ៊ុនកំពុងតែញាប់ដៃញាប់ជើងក្នុងការស្រាវជ្រាវ និងអភិវឌ្ឍរថយន្ដអគ្គិសនី និងស្វ័យប្រវត្ដិ។
លោកបានលើកឡើងថា៖ «យើងចាប់ផ្ដើមតាំងពី ១០ ឆ្នាំមុន ពេលអ្នកខ្លះទៀតមិនរំឭកដល់បច្ចេកវិទ្យាអគ្គិសនីនោះទេ»។
ក្រៅពីមានចិត្ដគំនិតគិតដល់អនាគតកាល យើងគិតដល់ការធ្វើដំណើរ ស្វែងរកសម្ភារថ្មីៗក្នុងពិភពសែស្រឡាយ BMW។ នេះជាម៉ូដែលតួខ្ពស់ SUV អគ្គិសនីសុទ្ធសាធ ជាស៊េរីស្ថិតនៅក្នុងចន្លោះម៉ូដែល BMW X5 និង BMX X6 ក្នុងលក្ខខណ្ឌទំហំ តែក៏បំពាក់បច្ចេកវិទ្យាស្វ័យភាពបើកបរកម្រិត ៣ ផងដែរ។
វាអាចបរបានចម្ងាយ ៦៤០ គីឡូម៉ែត្រ ប្រធានផ្នែកឌីហ្សាញ Domagoj Dukec បានសង្កត់ធ្ងន់ថា៖ «បច្ចេកវិទ្យាទំនើបនេះត្រូវតែជាបទពិសោធសម្រាប់មនុស្ស។ ការឌីហ្សាញកាន់តែអស្ចារ្យ។ វាជាសម្ភារដ៏មានសារៈសំខាន់សម្រាប់មនុស្ស។ រថយន្ដនេះ អាចបើកបរដោយស្វ័យប្រវត្ដិដ៏ជឿទុកចិត្ដ»។
លោកនិយាយថា៖ «ចំពោះបរិក្ខារខាងក្នុងបន្ទប់នីមួយៗមានរចនាប័ទ្មខុសៗគ្នា ដូចជាផ្ទះអ៊ីចឹង។ ដូច្នេះ នៅផ្នែកខាងមុខជាស្បែកលាត និងផ្នែកខាងក្រោយជាក្រណាត់ត្បាញពណ៌ខៀវភ្ជាប់ជាមួយនឹងគែមទ្វារតែម្ដង»។
រថយន្តនិមិត្តរូបបច្ចេកវិទ្យាថ្មី BMW នឹងត្រូវបានផលិតឡើងនៅរោងចក្រ BMW Dingolfing ចាប់ពីឆ្នាំ ២០២១៕HR