ភ្នំពេញ៖ ដើម្បីបណ្តុះសិស្សឲ្យឆាប់ជ្រួតជ្រាបពីបច្ចេកវិទ្យា បង្កើនសក្តានុពលដោះស្រាយចម្ងល់ ជំរុញភាពច្នៃប្រឌិត និងស្វែងរកដំណោះស្រាយបញ្ហាផ្អែកលើកម្មវិធីសរសេរកូដ Coding Cats បានដំឡើងអក្សរខ្មែរនៅលើកម្មវិធីសរសេរ Scratch ដែលជាកម្មវិធីបង្កើត Game។
ជាគម្រោងអភិវឌ្ឍន៍ការិយាល័យប្រកបដោយភាពច្នៃប្រឌិត Raintree និង Saturday Kids ជាកម្មវិធីសិក្សារបស់ប្រទេស សិង្ហបុរី គ្រប់គ្រងដោយលោក ចន តាន់ (Jonh Tan) វគ្គបណ្តុះបណ្តាលបំផុសចំណាប់អារម្មណ៍សិស្សមកលើបច្ចេកវិទ្យាដូចជាការបង្កើតប្រភេទ Game នៃកម្មវិធី Coding Cats នេះបានផ្តល់ការសិក្សាឥតគិតថ្លៃដល់សិស្សវិទ្យាល័យដែលមានអាយុចាប់ពី ១៥ ទៅ ១៨ ឆ្នាំ ចំនួន ១០០ នាក់ ដោយជោគជ័យរួចមកហើយ។
កញ្ញា ចាន់ ពេញល័ក្ខ ជាអ្នកគ្រប់គ្រងផ្នែកសហគមន៍នៅ Raintree បានប្រាប់ភ្នំពេញប៉ុស្តិ៍ ថា៖ «កាលពីវគ្គមុន យើងក៏បានបង្រៀន Coding Cats នៅលើកម្មវិធី Scratch អ៊ីចឹងដែរ ប៉ុន្តែយើងប្រើប្រាស់ភាសាអង់គ្លេសនៅលើកម្មវិធីហ្នឹង។ ជាទូទៅនៅទូទាំងពិភពលោក នៅពេលដែលគេបង្កើតកម្មវិធីអ្វីមួយគេតែងតែបង្កើត Tools នីមួយៗជាភាសាអង់គ្លេសមុន រួចទើបគេបង្កើតជាភាសាជាតិតាមក្រោយ ដើម្បីមានភាពងាយស្រួលដល់សិស្សក្នុងការស្វែងយល់ និងគ្រូបង្រៀនផងដែរ ទើបយើងសម្រេចចិត្តបង្កើតជាភាសាខ្មែរនៅលើ Tools នីមួយៗវិញ»។
Coding Cats ជាកម្មវិធីបង្រៀនទៅលើការសរសេរកូដនៅលើកម្មវិធី Scratch ជាកម្មវិធីសម្រាប់បង្កើត Game គ្រប់ប្រភេទ ដែលសិស្សអាចរៀបចំគំនូរជីវចលរឿង និងល្បែងដ៏ទាក់ទាញការចាប់អារម្មណ៍ពីអ្នកដទៃ។
សម្រាប់វគ្គសិក្សាថ្មីមានការជ្រើសរើសបេក្ខភាពសិស្ស ១០០ នាក់ ដោយបែងចែកជា ២ វគ្គ ហើយក្នុង ១ វគ្គមានរយៈពេល ១៦ ម៉ោង និងបង្រៀនជារៀងរាល់ថ្ងៃសៅរ៍។
បន្ទាប់ពីវគ្គសិក្សាចាស់បានបញ្ចប់ទៅ គ្រូបង្រៀនបានសង្កេតឃើញថា សិស្សមួយចំនួនពិបាកក្នុងការចាប់យកចំណេះដឹងមួយនេះ ដោយសារ Tools នីមួយៗសុទ្ធតែជាភាសាអង់គ្លេស។
សិស្សខ្លះត្រូវប្រើពេលបកប្រែសិន ទើបអាចទៅមុខបានទៀត ដែលធ្វើឲ្យការចាប់យកចំណេះដឹងរបស់គាត់ យឺតជាងមិត្តរួមថ្នាក់ដទៃទៀត។
អ្នកគ្រប់គ្រងផ្នែកសហគមន៍នៅ Raintree រូបនេះបានបន្តទៀតថា៖ «មិនមានន័យថាពួកគាត់មិនចេះ ឬខ្សោយភាសាអង់គ្លេសនោះទេ ប៉ុន្តែអាចថាមកពីភាសានៅកម្មវិធីកូដវាថ្មីសម្រាប់ពួកគាត់ ទើបគ្រូៗគាត់ព្យាយាមកាត់បន្ថយបញ្ហាទាំងអស់ហ្នឹងមកបង្កើត Tools ជាភាសាខ្មែរវិញ ហើយចំពោះកម្មវិធីថ្មីនេះ បើទោះបីជាសិស្សគាត់មិនសូវពូកែភាសាក៏អាចរៀនបានដែរ»។
បេក្ខភាពនៃវគ្គសិក្សាថ្មីរបស់កម្មវិធី Coding Cats បានជ្រើសរើសចាប់ពីអាយុ ៨ ទៅ ១២ ឆ្នាំ ដោយចាប់ផ្តើមកម្មវិធីសិក្សាពីថ្ងៃទី ៥ ខែ តុលា និងគ្រោងបញ្ចប់វគ្គសិក្សាក្នុងអំឡុងខែធ្នូ ខាងមុខនេះ។
ការជ្រើសរើសបេក្ខជនដែលមានអាយុតិចជាងវគ្គសិក្សាចាស់ ត្រូវបានកញ្ញា ចាន់ ពេញល័ក្ខ ប្រាប់ពីមូលហេតុឲ្យដឹងថា៖ «យើងសង្កេតឃើញថាកាលវគ្គមុនសិស្សធំៗ គាត់សប្បាយចិត្តនឹងរៀន ប៉ុន្តែពួកគាត់មានភាពមមាញឹក ដោយសារអ្នកខ្លះគាត់រវល់ត្រៀមប្រឡងទី ១២។ គាត់អត់សូវមានពេល។ យើងក៏គិតថា បើសិនជាបង្រៀនក្មេងដែលតូចៗជាងនេះ ប្រហែលជាគាត់មានពេលរៀនជាងនេះ»។
កញ្ញាមានទំនុកចិត្តទៅលើសិស្ស ដែលមានអាយុតិច ដោយសារកម្មវិធីសិក្សាត្រូវបានរៀបចំថ្មីសម្រាប់សិស្សតូចៗ និងភាពងាយស្រួលជាងមុន ដើម្បីឲ្យកុមារកាន់តែឆាប់ចាប់បាននូវការពន្យល់របស់គ្រូ។ ជាពិសេសនោះសិស្សអាចមានសិទ្ធិជ្រើសរើសភាសា (ខ្មែរ និងអង់គ្លេស) ក្នុងការសិក្សានៃភាសាកូដ។
កញ្ញា ពេញល័ក្ខ ដែលជាអ្នកគ្រប់គ្រងសហគមន៍នៃ Raintree បញ្ជាក់ទៀតថា៖ «ម្យ៉ាងទៀត យើងចង់បញ្ចូលភាសានៃបច្ចេកវិទ្យាហ្នឹងឲ្យគាត់តាំងពីតូច នៅពេលគាត់ធំឡើងគាត់នឹងដឹងថា បច្ចេកវិទ្យាហ្នឹងគេប្រើម៉េចខ្លះ និងមិនមានអារម្មណ៍ខ្លាចក្នុងការប្រើប្រាស់បច្ចេកវិទ្យា»៕