The Phnom Penh Post Search

Search form

Logo of Phnom Penh Post newspaper Phnom Penh Post - Hilux Revo ជម្រើស​ពណ៌​ឆើតៗ ច្រើន តម្រូវ​ស្ថានភាព​ផ្លូវ​នៅ​កម្ពុជា​




Hilux Revo ជម្រើស​ពណ៌​ឆើតៗ ច្រើន តម្រូវ​ស្ថានភាព​ផ្លូវ​នៅ​កម្ពុជា​

Content image - Phnom Penh Post
រថយន្ដ​ភីកអាប់ Hilux Revo មាន​ជម្រើស​រហូតដល់ ៧ ពណ៌ និង​ត្រូវបាន​ក្រុមហ៊ុន​អះអាង​ថា​ស៊ីប្រេង​តិច​។ ឈឹម ស្រីនាង

Hilux Revo ជម្រើស​ពណ៌​ឆើតៗ ច្រើន តម្រូវ​ស្ថានភាព​ផ្លូវ​នៅ​កម្ពុជា​

ភ្នំពេញ: ជាមួយ​ទម្រង់​មុខកាច ​ជម្រើសពណ៌​ឆើត​ឆាយ​ជា​ច្រើន​បែប រថយន្ដ​ភីកអាប់ ​Hilux Revo ដែល​ក្រុមហ៊ុន​តូយ៉ូតា​ (ខេមបូឌា) អះអាង​ថា​រឹងមាំ ​ធន់នឹង​ស្ថានភាព​ផ្លូវ​ក្នុង​ស្រុកនោះ ឥឡូវ​ផ្ដើម​រំលេច​វត្ដ​មាននៅ​កម្ពុជា​ហើយ​។​

លោក ម៉ាសាអាគិ​ ​កាវ៉ាបាតា អគ្គនាយក​ក្រុមហ៊ុន​តូយ៉ូតា (ខេមបូឌា) បាន​ឲ្យដឹង​ថា៖ «រថយន្ដ​ Hilux Revo ស៊េរី​ថ្មីឆ្នាំ ២០១៥ គឺជាជំនាន់ទី ៨ របស់ម៉ាក់ Hilux ដែលបាន​សាង​កេរ្តិ៍ឈ្មោះ​ដ៏រឹងមាំជា​យូរ​មកហើយ នៅ​ក្នុង​ប្រវត្តិសាស្រ្ដ​រថយន្ដ ចាប់​តាំងពី​ឆ្នាំ ១៩៦៨ មកម្ល៉េះ»។

ក្រឡេក​មើល​ផ្នែក​ខាងក្រៅ រថយន្ដ​ភីកអាប់ Hilux Revo ត្រូវ​បាន​រចនា​ផ្នែក​ខាង​មុខ​ឡើង​ឲ្យ​មើល​ទៅ​មាន អំណាច ស័ក្ដិសម​ជាមួយ​ទ្រង់ទ្រាយ​នៃ​រថយន្ដ និង​បន្ទះ​ចម្រឹង​ខ្យល់​នៅ​ខាងមុខ​រថយន្ដ​មាន​រាង​ជាបន្ទាត់​ស៊ីមេទ្រី​ជាមួយ​ទម្រង់​ចង្កៀង​ខាងមុខ។ រីឯ​ឈ្នាន់​សម្រាប់​ជាន់​ឡើង​ជិះ​រថយន្ដ​វិញ​គឺ​កៀក​ជាមួយ​តួឡាន​តែម្ដង​នាំ​មកនូវ​ភាព​ងាយស្រួល ពេល​ឡើង​ចុះពី​រថយន្ដ។

ផ្នែក​ខាង​ក្រោយ​ត្រូវ​បាន​បំពាក់ដោយ​ភ្លើង​ចង្កៀង LED ធ្វើ​ឲ្យ​អ្នកដំណើរ​ដទៃ​ទៀត​អាច​មើលឃើញ​ពីចម្ងាយ និង​ភ្ជាប់​ដោយ​ស្លាប​ខ្យល់​ធ្វើឲ្យ​ការ​បើកបរ​មាន​លំនឹង ព្រមទាំង​ស្វាហាប់​ជាង​មុន។

កង់​បែប​យ៉ាន់ស្ព័រ​ទំហំ​រហូត​ដល់ ១៨ អ៊ី​ញ ហើយ​រថយន្ដក៏​ត្រូវ​បាន​ភ្ជាប់នូវ​កង់​បម្រុង​មួយ​ដែល​មាន​រូបរាង​ដូច​កង់ទាំងបួន​នៃរថយន្ដ​ផង​ដែរ​។ ក្រៅពី​មាន​បំពាក់​កាមេរ៉ា ឈ្នាន់ជាន់​នៅ​ខាងក្រោយ​មានសភាព​ឡើង​ធំ​ជា​មុន ងាយ​ស្រួល​ក្នុង​ការ​ឡើង​ចុះ​រថយន្ដ ​និង​លើក​ឥវ៉ាន់ធ្ងន់​ដាក់ចូល។

នៅ​ផ្នែក​ខាង​ក្នុង​នៃ​រថយន្ដ វា​ត្រូវ​បាន​វិវឌ្ឍ​ឲ្យ​មានភាព​ធំ​ទូលាយ​ជាង​មុន ជាមួយ​ដៃ​ចង្កូត​អាច​លៃកម្ពស់ទាប​ខ្ពស់ និង​គម្លាតជិត ឬ​ឆ្ងាយ​តាម​តម្រូវការ​របស់​អ្នក​បើកបរ។ ​ដៃ​ចង្កូត​ជួយរក្សា​ល្បឿន​បើកបរ​ឲ្យ​នៅថេរ ដោយ​មិន​ចាំបាច់​ជាន់ឈ្នាន់​ហ្គែរ សម្រួលដល់​អ្នកបើកបរ​​ផ្លូវឆ្ងាយ។

អេក្រង់ Touch screen ទំហំ ៧ អ៊ិញ​សម្រាប់បង្ហាញ​ពហុព័ត៌មាន ភ្ជាប់​ជាមួយ​ប្រព័ន្ធ​បង្ហាញ​ផ្លូវ T-connect និង​អាចភ្ជាប់​ជាមួយ USB/Aux រួមទាំង​ឧបករណ៍​បំពង​សំឡេង​តាមរយៈ​ប្លូធូស។ នៅ​ផ្នែក​ខាង​ស្ដាំ​នៃ​រថយន្ដ​ក៏​មាន​ប្រអប់​សម្រាប់​ក្លាស្សេ​ទឹក​និង​ភេសជ្ជៈផ្សេងៗងាយ​ស្រួល​សម្រាប់​ដំណើរកម្សាន្ដ​។

​ក្នុង​រថយន្ដ​មាន​ពោង​សុវត្ថិភាព​ចំនួន ៩ ដែល​ចូលរួម​កាត់​បន្ថយ​គ្រោះថ្នាក់​ពេលមាន​ករណី​បុកទង្គិច​កើត​ឡើង។

យោង​តាមការ​អះអាង​ពី​ក្រុមហ៊ុនរថយន្ដ​​នេះ​ស៊ីប្រេង​តិច​បំផុត និង​ត្រូវបាន​បានបំពាក់​នូវ​ប្រព័ន្ធ​បញ្ចុះ​កម្តៅ ដែល​ជួយ​ឲ្យ​ម៉ាស៊ីន​រក្សាបាន​នូវ​ថាមពល​ខ្លាំងក្លា និង​កម្លាំង​រមួល​ខ្ពស់បំផុត។

រថយន្ដប្រើប្រេង​ម៉ាស៊ូត​នេះ​មាន​ជា​ជម្រើស​លេខអូតូ និង​លេខ​ដៃ​ ត្រូវ​នឹង​ការបើកបរ​គ្រប់​កាលៈទេសៈ​ផ្លូវនៅ​កម្ពុជា​ ទោះ​បី​ជា​មាន​ជង្ហុកធំៗ​ ឬ​ផ្លូវ​គ្រួស​ក៏ដោយ។

លោក លី​ ប៊ុ​ន​ហៃ នាយក​ចាត់ការផ្នែកលក់​ និង​ទីផ្សារ​​​ក្រុមហ៊ុន​តូយ៉ូតា (ខេមបូឌា) បាន​ថ្លែង​ពី​រថយន្ដ​​នេះ​ថា៖ «ខ្ញុំ​ហ៊ាន​ធានាថា រថយន្ដ Hilux Revo ស៊េរីថ្មី​នេះ​គឺមាន​គុណភាព​ និង​លក្ខណៈ​ល្អ​ពិសេស​សម្រាប់​ទីផ្សារ​ស្រុក​ខ្មែរ ហើយ​អតិថិជន​អាចធ្វើ​ការ​សាកល្បង​បើកបរ​សិន​ក៏បាន​ដែរ គឺ​យើង​មាន​រថយន្ត​សម្រាប់ធ្វើ​តេស្ត​»។

លោក​បាន​ឲ្យដឹង​ទៀត​ថា៖ «រថយន្ត Hilux Revo ស៊េរី​ថ្មី ២០១៥ ជំនា​ន់ទី ៨ នេះ​មាន ៧ ពណ៌​សម្រាប់​ជ្រើសរើស​ដូចជា​ពណ៌​ខៀវ សក្បុស ក្រហម ទឹកក្រូច ទឹកប្រាក់ ប្រផេះ និង​ខ្មៅ ដោយ​មាន​តម្លៃ​ ៤៦ ៩០០ ដុល្លារ»៕

អត្ថបទគួរចាប់អារម្មណ៍