ភ្នំពេញ : ទូរស័ព្ទស្មាតហ្វូន LG Optimus L9 ដែលមកដល់ទីផ្សារប្រទេសកម្ពុជាកាលពីខែធ្នូថ្មីៗនេះ បានក្លាយជាជំនួយការផ្នែកបកប្រែភាសា និងបំពាក់ដោយមុខងារពិសេសៗជាច្រើនទៀត។
ស្មាតហ្វូនស៊េរីថ្មី Optimus L9 នេះមានបំពាក់ដោយអេក្រង់ IPS ដែលមានទំហំ៤,៧ អ៊ីញធំទូលាយ មានពណ៌ស្រស់ស្អាតដូចធម្មជាតិ ហើយថែមទាំងមានមុខងារពិសេសជាច្រើនទៀតរួមមាន QuickTranslator, My Style Keypad និង QuickMemoTM។
កម្មវិធី QuickTranslator ជាកម្មវិធីសម្រាប់បកប្រែភាសាបានដល់ទៅ៦៤ ភាសាដោយប្រើកាមេរ៉ាថតស្កេនយកអក្សរនៃភាសាណាមួយ បន្ទាប់មកបកប្រែទៅជាភាសាមួយទៀតយ៉ាងងាយស្រួលតាមរយៈបច្ចេកវិទ្យា Optical Character Recognition (OCR)។
Optimus L9 ក៏មានកម្មវិធី QuickMemoTM ដែលអាចឲ្យលោកអ្នកថតយករូបអេក្រង់ ហើយសរសេរ ឬគូសលើរូបនោះ និងចែករំលែកតាមរយៈប្រព័ន្ធប៊្លូធូត សារអ៊ីមែល ឬហ្វេសប៊ុកជាដើម។ CPU របស់វាមានល្បឿនលឿន 1GHz ចំនួន២ (Dual-Core)។ ក្រៅពីមានអង្គចងចាំភ្ជាប់មកជាមួយទំហំ៤GB អ្នកប្រើប្រាស់ក៏អាចបន្ថែមទំហំអង្គចងចាំឲ្យបានរហូតដល់៣២GB។ ប្រភេទថ្មទំហំ 2150 mAh និងបច្ចេកវិទ្យា SiO+បានធ្វើឲ្យស្មាតហ្វូនOptimus L9 កាន់ថ្មបានយូរ។
ដំណើរការដោយប្រព័ន្ធ Android 4.0.4 Ice Cream Sandwich ទូរស័ព្ទ Optimus L9 មិនត្រឹមតែមានកាមេរ៉ាទំហំ៨MP ដ៏ច្បាស់ជាមួយវីដេអូគុណភាពខ្ពស់ Full HD នោះទេ លោកអ្នកក៏អាចថតរូបពុំចាំបាច់ចុចលើអេក្រង់ ដោយគ្រាន់តែនិយាយពាក្យថា ឈីស (Cheese) ស្មាលយ៍ (Smile) វីស្គី (Wisky) គីមឈី (Kimchi) ឬ អិលជី (LG) នោះ Optimus L9 នឹងថតរូបដ៏ស្រស់ស្អាតរបស់លោកអ្នកដោយស្វ័យប្រវត្តិ។
ចំណែក My Style Keypad ជាមុខងារដែលអាចឲ្យលោកអ្នកប្ដូរទម្រង់ក្ដារចុចទៅតាមដៃ ដែលលោកអ្នកប្រើ ដូចជាការវាយអក្សរដោយប្រើដៃតែម្ខាង (ឆ្វេង ឬស្ដាំ) ឬប្រើដៃពីរ។
យោងតាមលោក ហ៊ ហាប់ អគ្គនាយករងក្រុមហ៊ុន ជី ហ្គៀបានឲ្យដឹងថា តម្លៃរបស់ទូរស័ព្ទ Optimus L9 ស៊េរីថ្មីនេះនៅសាខា លក់ចែកចាយរបស់ LG គឺប្រមាណ៣៨៥ដុល្លារ៕
