.jpg)
ខុសពីបន្ទះសូឡាប្រើឯកជន បច្ចេកវិទ្យា Okra អាចបែងចែកថាមពលដោយផ្ទះនីមួយៗដោតឌុយភ្ជាប់គ្នា។ រូបថត សហការី
ភ្នំពេញ: អង្គុយក្នុងបន្ទប់ចាំងពន្លឺធម្មជាតិនៃអគារជាន់ទី ១៧ Nithya Menon ជា Lead Firmware Engineer របស់ Okra កំពុងឆែកទិន្នន័យលើអ៊ីនធឺណិតស្ដីពីបច្ចុប្បន្នភាពនៃសេវាកម្មថាមពលរបស់ខ្លួននៅតាមសហគមន៍។
កញ្ញា Nithya បាននិយាយពីបញ្ហាខ្សោយអាគុយក្នុងផ្ទះមួយនៅសហគមន៍ថា៖ «ខ្ញុំបានឃើញទិន្នន័យ ដែលប្រាប់ពីបញ្ហាខ្សោយអាគុយពីមួយថ្ងៃទៅមួយថ្ងៃ។ វាគួរតែកើនឡើងខ្ពស់ពេលសាកថ្មពេញ។ យើងមើលឃើញបញ្ហាអាចកើតឡើងមុនដោយសារតែទិន្នន័យទាំងនេះ»។
បង្កើតឡើងក្នុងឆ្នាំ ២០១៦ Okra គឺជាក្រុមហ៊ុនបច្ចេកវិទ្យាដែលផលិតថាមពលសូឡាវៃឆ្លាតសម្រាប់សហគមន៍ដាច់ស្រយាល។
លោក Afnan Hannan សហស្ថាបនិក និងជាអគ្គនាយក Okra បាននិយាយថា៖ «ខ្ញុំបានបង្កើត Okra ២ ឆ្នាំកន្លះមកហើយ ហើយបេសកកម្មរបស់ខ្ញុំគឺធានាថា មនុស្សគ្រប់រូបនៅលើភពផែនដីនេះមានលទ្ធភាពប្រើប្រាស់អគ្គិសនីគ្រប់ពេលវេលា។ ដូច្នេះពួកគេអាចរស់នៅប្រកបដោយភាពទាន់សម័យ។ ការប្រើប្រាស់អគ្គិសនីដើម្បីសិក្សា ទទួលការងារ រកប្រាក់ផ្គត់ផ្គង់គ្រួសារ និងធ្វើអ្វីគ្រប់យ៉ាងដែលធ្វើឲ្យជីវិតកាន់តែងាយស្រួល»។
សហគមន៍ដាច់ស្រយាលប្រើសូឡាសម្រាប់បំភ្លឺផ្ទះសំបែង។ រូបថត សហការី
ស្ថាបនិកដែលមកពីអូស្ដ្រាលីរូបនេះបានថ្លែងបន្ដថា៖ «យើងបង្កើតឧបករណ៍គ្រប់គ្រង IoT ដែលត្រូវបានដំឡើងតាមផ្ទះនីមួយៗ។ វាអាចតភ្ជាប់ពីផ្ទះមួយ ទៅកាន់ផ្ទះមួយទៀតតាមរយៈខ្សែកាប្លិ៍ ដើម្បីប្រើប្រាស់ថាមពលអគ្គិសនីវៃឆ្លាត។ ដូច្នេះបើបន្ទះសូឡា ឬអាគុយនៅតាមផ្ទះ សូហ្វវែរបែងចែកថាមពលពីផ្ទះមួយទៅផ្ទះមួយទៀតដោយការកាត់បន្ថយភាពខ្ជះខ្ជាយ និងធានាដល់ការផ្ដល់ថាមពលគ្រប់ពេលវេលា»។
ផ្ទះដំបូងដែលទទួលថាមពលអគ្គិសនីសូឡាវៃឆ្លាតផ្ដើមពីខែមីនាឆ្នាំមុន ហើយបច្ចុប្បន្នផ្ទះ ១០១ ខ្នងត្រូវបានភ្ជាប់ថាមពល Okra វៃឆ្លាតក្នុងតំបន់ដាច់ស្រយាលបំផុតនៃខេត្ដតាកែវ និងកំពង់ស្ពឺ។
លោក Afnan Hannan ដែលធ្លាប់បម្រើការងារនៅ BUENO និង IBM បានបន្ដថា៖ «ចក្ខុវិស័យយើងគឺមិនត្រឹមតែប្រាកដថា សហគមន៍ដាច់ស្រយាលមានអគ្គិសនីប្រើប្រាស់នោះទេ តែដៃគូយើងក៏ជួយសហគមន៍តាមរយៈការបង្កើនលទ្ធភាពថាមពលនាពេលអនាគតផងដែរ»។
លោកបានបន្ថែមថា៖ «យើងបានយល់ដឹងច្រើនពីផ្ទះជាង ១០០ ខ្នងនោះ ហើយពេលនេះយើងកំពុងកែកុនផលិតផលរបស់យើងឲ្យកាន់តែងាយស្រួលប្រើប្រាស់ដែលនឹងបំពាក់លើផ្ទះសំបែងពលរដ្ឋរាប់ពាន់ម៉ឺនខ្នងក្នុងរយៈពេល ១៨ ខែខាងមុខ»។
ការគ្រប់គ្រងទិន្នន័យថាមពលពីការិយាល័យស្នូលនៅភ្នំពេញ។ រូបថត លៀប ទេពិទូ
លោកអះអាងថា Okra ប្រើបច្ចេកវិទ្យាគណិតវិទ្យាវៃឆ្លាត និងម៉ាស៊ីនចេះបែងចែកថាមពលអគ្គីសនីដោយមានប្រសិទ្ធភាពខ្ពស់។ ថាមពលនឹងត្រូវបានបែងចែកបំពេញតម្រូវការទៅតាមផ្ទះសម្បែងគ្រប់គ្រាន់ បើទោះបីជារដូវក្ដៅ ដែលសូម្បីតែនៅក្នុងរាជធានីបច្ចុប្បន្នក៏ត្រូវបានកាត់ផ្ដាច់ការផ្គត់ផ្គង់ដោយអន្លើផងដែរ។
ពលរដ្ឋជនបទនៅបន្ដប្រើម៉ាស៊ូត និងប្រេងកាតដែលមានតម្លៃខ្ពស់ពី ១០ ទៅ ១០០ ដងនៃបណ្ដាញអគ្គិសនីវៃឆ្លាត ហើយថាមពលភ្លើងពីប្រេងទាំងនោះមិនសូវភ្លឺច្បាស់ល្អថែមទៀត។ នេះបើយោងតាមសម្ដីសហស្ថាបនិក Okra ជាសមាជិកម្នាក់ក្នុងចំណោម ១០ នាក់ដែលសុទ្ធតែជាវិស្វករមកពីអាមេរិក អូស្ដ្រាលី អង់គ្លេស ក្រុមស្រាវជ្រាវមកពីរុស្ស៊ី និងចិន រួមទាំង នាយកផ្នែកគម្រោងមកពីកម្ពុជាផងដែរ។
បច្ចុប្បន្នថាមពលសូឡាពី Okra មានតម្លៃទាបជាងគេបំផុតដែលអាចផ្ដល់ថាមពល ២ ម៉ោងលើរយៈពេល ៧ ថ្ងៃក្នុង ១ សប្ដាហ៍។
លោក Afnan បានបញ្ជាក់ថា Okra ថោកជាង ១០ ដងពីថាមពលភ្លើងអគ្គិសនីអូសខ្សែ ៣ គីឡូម៉ែត្រ ៣ ដងពីប្រភពថាមពល AC ទោល ខណៈ Okra ប្រើថាមពលចែក 55 V DC ដែលមិនតម្រូវឧបករណ៍ AC ដូចជាឧបករណ៍ទប់ភ្លើង និងបង្គោលម៉ាសក្រោមដីឡើយ។
ថាមពលសូឡាឆ្លាតវៃអាចប្រើប្រាស់សម្រាប់ទូទឹកកក។ រូបថត សហការី
លោកនិយាយថា៖ «យើងមិនហ៊ាននិយាយថា យើងជាដំណោះស្រាយល្អបំផុតគ្រប់កាលៈទេសៈនោះទេ។ បើគ្រួសារត្រូវការបន្ទុកថាមពលច្រើនដូចជាការប្រើម៉ាស៊ីនត្រជាក់ ពួកគេនឹងត្រូវប្រើជម្រើសផ្សេង»។
ថាមពលអគ្គិសនី Okra ត្រូវបានប្រើសម្រាប់ផ្ដល់ការបំភ្លឺអំពូល សាកថ្មទូរស័ព្ទ ដាំបាយ កង្ហារ ទូរទស្សន៍ ទូទឹកកក និងបូមទឹក ដែលផ្ទះមួយអាចនឹងចំណាយប្រាក់ពី ៥ ទៅ ១៥ ដុល្លារ និងការកក់លើឧបករណ៍ពី ២០ ទៅ ៣០ ដុល្លារ។
ខុសពីបន្ទះសូឡាប្រើឯកជនតាមផ្ទះដែលមានបន្ទះសូឡាមួយ និងអាគុយមួយជាមួយថាមពលមានកំណត់សម្រាប់តែផ្ទះមួយខ្នងប៉ុណ្ណោះ បច្ចេកវិទ្យា Okra តភ្ជាប់បណ្ដាញផ្ទះសំបែងដែលអាចបែងចែកថាមពលតាមផ្ទះនីមួយៗ ដោយការគ្រប់គ្រងទិន្នន័យចេញពីការិយាល័យស្នូលនៅភ្នំពេញ។ ពលរដ្ឋតាមផ្ទះនីមួយៗគ្រាន់តែដោតឌុយភ្ជាប់ជាមួយផ្ទះអ្នកជិតខាង ដើម្បីចែករំលែកថាមពលប្រើប្រាស់គ្រប់គ្រាន់ដូចៗគ្នា។
ដំបូងឡើយមិនសុទ្ធតែពលរដ្ឋទាំងអស់រីករាយនឹងការចែករំលែកថាមពលអគ្គិសនីប្រើប្រាស់ ដោយពួកគេបារម្ភការខ្វះខាតពីផ្ទះរបស់ខ្លួន។
ឆ្លើយតបនឹងបញ្ហាមួយនេះ កញ្ញា Nithya បានប្រាប់ថា៖ «ពេលយើងចាប់ផ្ដើមដំបូងយើងជជែកអំពីការចែករំលែកថាមពលនេះ ហើយពួកគាត់ខ្លះមានការបារម្ភ។ យើងប្រាប់ថា វាគ្មានបញ្ហាថា តើអ្នកប្រើអស់ប៉ុន្មាន ឬខ្ញុំប្រើប៉ុន្មាននោះទេ។ អ្នកគ្រាន់តែបង់ប្រាក់លើអ្វីដែលខ្លួនបានប្រើប៉ុណ្ណោះ»៕
វីដេអូ៖
