ក្រុងឡុងដ៍: ក្រោយពីនៅទីផ្សារ មានវត្តមានកំពូលរថយន្តល្បីៗថ្លៃកប់ពពកដូចជា Lamborghini Urus និង Bentley Bentayga V8 បានរំលេចម៉ូដែលតួខ្ពស់ SUV ប្រណីតមក ក្រុមហ៊ុន Rolls Royce ក៏បានឈានជើងចូលទីផ្សាររថយន្ដសម្រាប់ឆ្លងកាត់ឧបសគ្គនេះជាមួយតម្លៃចាប់ពី ៣២៥ ០០០ ដុល្លារផងដែរ។
ជាឈ្មោះយកលំនាំតាមត្បូងពេជ្រដ៏ធំបំផុត រថយន្ដតួខ្ពស់របស់ Rolls Royce ជាម៉ូដែលតួវែង សម្រាប់អ្នកដំណើរ ៦ នាក់ចុងក្រោយពីក្រុមហ៊ុនផលិតរថយន្ដប្រណីត។
កាលពីខែមេសាកន្លងទៅថ្មីៗនេះ ក្រុមហ៊ុនរថយន្តស្ព័រអ៊ីតាលី Lamborghini បានបង្ហាញម៉ូដែល Urus របស់ខ្លួនតម្លៃ ២០ ម៉ឺនដុល្លារ ខណៈ Bentley បានបង្ហាញម៉ូដែល Bentayga V8 តម្លៃ ២០ ម៉ឺនដុល្លារនៅចុងឆ្នាំ ២០១៧ ផងដែរ។
ដោយឡែក Rolls-Royce Cullinan បំពាក់ម៉ាស៊ីនទែរបូភ្លោះ V12 ចំណុះ ៦,៧៥ លីត្រ កម្លាំង ៥៧០ សេះ និងថាមពលបង្វិល ៦២៧ ផោនហ្វីត ប្រវែង ៥,៣ ម៉ែត្រ ទម្ងន់ ២៦៦០ គីឡូក្រាម បង្កើតនូវបរិយាកាសធំទូលាយ និងប្រកបដោយផាសុកភាព។
ចាប់ពីកម្រាលរោមចៀមរហូតដល់ទេពរូប (Spirit of Ecstasy) សន្លឹកមាស និងកៅអីបត់ ដែលពង្រីកទំហំគូទសម្រាប់ទុកដាក់សម្ភារកាន់តែធំទូលាយ។
ទោះបីជាវាមិនទាន់ត្រូវបានបង្ហើបប្រាប់ពីតម្លៃច្បាស់លាស់យ៉ាងណាក៏ដោយ ក៏អ្នកនិយម Rolls Royce Cullinan បានប៉ាន់ប្រមាណថា យ៉ាងហោចណាស់ ក៏វាមានតម្លៃចាប់ពី ៣២៥ ០០០ ដុល្លារ។
ការរចនារូបរាងខាងក្រៅហាក់មិនមានអ្វីប្រែប្រួលពីសែស្រឡាយ Rolls Royce ស្ដង់ដារនោះទេ ដោយវាខុសតែទំហំនៃតួខ្ពស់ប៉ុណ្ណោះ។
សូម្បីតែពណ៌គំនូរដ៏ផ្ចិតផ្ចង់បំផុតរបស់ Rolls Royce ក៏នៅតែរក្សាដដែល ដោយរំលេចនូវចម្រឹងខ្យល់ពណ៌ប្រាក់។
អ្វីដែលទាក់ចិត្ដមុនគេនោះគឺទ្វារ ៤ ដែលត្រូវបិទបើកស្ទីលដដែល។ ឃ្លុបក្រោយបើកបិទដោយស្វ័យប្រវត្ដិជាមួយការចុចប៊ូតុង លើសោវៃឆ្លាត។ យ៉ាន់ធំទំហំ ២២ អ៊ិញ រំលេចរាងធំគ្រាក់នូវជ្រុងទាំង ។
Rolls-Royce រំលេចនូវកង់ស្ព័រកាន់តែតូចជាងមុន ស្ដើងជាងមុនសម្រាប់ម៉ូដែល តួខ្ពស់ Cullinan មុខងារតាប្លូបង្ហាញនៅលើកញ្ចក់ រួមទាំងមុខងារបច្ចេកវិទ្យាទំនើបៗតាមសែស្រឡាយ Rolls-Royce ដូចជាបច្ចេកវិទ្យាបំភ្លឺទីងងឹត និងសញ្ញាព្រមានដល់អ្នកថ្មើរជើងប្រព័ន្ធជំនួយសំឡេងរោទ៍ ដែលជួយបញ្ចៀសការបើកបរពេលងងុយដេក ប្រព័ន្ធកាមេរ៉ាសុវត្ថិភាពចំនួន ៤ ប្រព័ន្ធអ៊ីនធឺណិត WiFi ប្រព័ន្ធបញ្ជាចង្កូតស្ដង់ដារ និងប្រព័ន្ធផ្ដល់ការកម្សាន្ដផ្សេង។
ទោះជាម៉ូដែលផ្សព្វផ្សាយ មានពណ៌ក្រហម ប្រផេះ លឿង ស្លែ និងខៀវ ក៏ពិតមែន តែយោងតាម bmwblog.com អតិថិជន Cullinan អាចធ្វើការកុម្ម៉ង់ជម្រើសពណ៌រហូតដល់ ២០ ពណ៌។
បើលោកអ្នកមានប្រាក់មិនខ្លាចនឹងចំណាយ អ្នកនឹងអាចមានឱកាសបញ្ជាដៃចង្កូត Cullinan ដោយផ្ទាល់ មិនដូចជា Lamborghini Urus ដែលត្រូវបានលក់ដាច់អស់រលីងនៅត្រឹមរយៈពេល ២ ឆ្នាំដំបូងនោះទេ៕HR