.jpg)
សេវាកម្មតម្លៃប្រមាណ ៦ ដុល្លារក្នុងចម្ងាយផ្លូវ ១,៦ គីឡូម៉ែត្រ។ រូបថត AFP
ក្រុងវ៉ាស៊ីនតោន: Uber កាលពីថ្ងៃអង្គារបានជ្រើសរើសទីក្រុងមេលប៊នរបស់ប្រទេសអូស្ដ្រាលីជាទីក្រុងក្រៅទឹកដីអាមេរិកដំបូងសម្រាប់ផ្ដល់សេវាកម្មតាក់ស៊ីអាកាសដែលរំពឹងថានឹងបើកដំណើរការក្នុងឆ្នាំ ២០២៣ ខាងមុខ ខណៈខ្លួនបានបង្ហាញដៃគូថ្មីសម្រាប់គម្រោងដ៏អស្ចារ្យនេះ។
ក្រុងមេលប៊ន ត្រូវបានដាក់រហស្សនាមជាទីក្រុងពីឡុតផ្លូវការទី ៣ សម្រាប់ Uber Air បន្ទាប់ពីទីក្រុងដាឡាស និងឡូសអេនជឺលេស។ ការហោះហើរសាកល្បងគ្រោងនឹងចាប់ផ្ដើមក្នុងឆ្នាំ ២០២០ ជាមួយប្រតិបត្ដិការពាណិជ្ជកម្មក្នុងឆ្នាំ ២០២៣។
ព័ត៌មាននេះត្រូវបានបង្ហើបប្រាប់នៅកិច្ចប្រជុំ Uber Elevate Summit ក្នុងក្រុងវ៉ាស៊ីនតោនជាទីដែលក្រុមហ៊ុនយក្សនៅរដ្ឋកាលីហ្វ័រនីញ៉ា ផ្ដល់ព័ត៌មានលម្អិតបន្ថែមស្ដីពីចក្ខុវិស័យចំពោះតាក់ស៊ីហោះជាមធ្យោបាយសម្រួលដល់ការស្ទះចរាចរណ៍ និងបង្កើនការអភិវឌ្ឍផ្នែកសេវាកម្មចល័តក្នុងក្រុង។
អ្នកគ្រប់គ្រងក្រុមហ៊ុន Uber ប្រចាំតំបន់ដែលរួមបញ្ចូលទាំងប្រទេសអូស្ដ្រាលី អ្នកស្រី ស៊ូសាន អានឌើសុន បាននិយាយថា៖ «ដោយគួបផ្សំនឹងប្រជាសាស្ដ្រ និងភូគព្ពសាស្ដ្រនៃទីក្រុងមេលប៊នរួមទាំងកត្ដាវប្បធម៌នវានុវត្ដភាព និងបច្ចេកវិទ្យាបានធ្វើឲ្យទីក្រុងមេលប៊នជាក្លាយទីក្រុងដ៏ស័ក្ដិសមបំផុតទី ៣ សម្រាប់តាក់ស៊ីហោះ Uber Air»។
លោក អេរិក អាល់លីសុន ប្រធាន Uber Elevate បានថ្លែងក្នុងសន្និសីទសារព័ត៌មានថា៖ «យន្ដហោះតាក់ស៊ីអគ្គិសនីនឹងមានសេវាកម្មតម្លៃប្រមាណ ៦ ដុល្លារក្នុងចម្ងាយផ្លូវ ១,៦ គីឡូម៉ែត្រ។ យើងគិតថាយើងអាចកែកុនតម្លៃឲ្យកាន់តែថោកជាង UberX ទៅទៀត»៕ HR
