ក្នុងចំណោមសិស្សនិស្សិតរាប់ពាន់នាក់នៅទូទាំងពិភពលោកដែលបានប្រឡងបញ្ចប់ការសិក្សាផ្នែកជំនាញសវនកម្ម CAT 2017 កាលពីពេលថ្មីៗនេះជាមោទនភាពនិស្សិតកម្ពុជាមកពីសាលា CamEd កញ្ញា ខ្លូត ហេឡែន ទទួលបានពិន្ទុ ៨៧ លើ ១០០ ដែលជាតួលេខពិន្ទុខ្ពស់ជាងគេបំផុតប្រចាំឆ្នាំនេះ និងបញ្ជាក់ថា នាងឈរនៅលំដាប់លេខ ១ នៅទូទាំងពិភពលោកសម្រាប់វិញ្ញាសារសវនកម្មសរសេរដោយដៃ។
បច្ចុប្បន្នកញ្ញា ខ្លូត ហេឡែន (Khlot Helene) ជាបុគ្គលិកសវនករ (PWC Auditor) នៅក្រុមហ៊ុន PWC។ ក្នុងវ័យជាង ២០ ឆ្នាំកញ្ញាទើបបានប្រឡងបញ្ចប់ការសិក្សា ផ្នែកគណនេយ្យ និងសវនកម្ម (BA and CAT) នៅសាកលវិទ្យាល័យ CamEd កាលពីខែធ្នូ ឆ្នាំ ២០១៧ ថ្មីៗនេះដោយលទ្ធផលពិន្ទុនៃការប្រឡងកម្រិត CAT របស់កញ្ញាទទួលបាន ៨៧ ពិន្ទុក្នុងចំណោមពិន្ទុពេញ ១០០ ពិន្ទុ សម្រាប់វិញ្ញាសារប្រឡងផ្នែកសវនកម្មសរសេរដោយដៃ។ ជាមួយគ្នានេះដែរកញ្ញាក៏បានបញ្ចប់ការសិក្សាបរិញ្ញាបត្រទំនាក់ទំនងវិជ្ជាជីវៈ (Bacelure of Professional Communication) ពីមហាវិទ្យាល័យ IFL នៃសាកលវិទ្យាល័យភូមិន្ទភ្នំពេញកាលពីពាក់កណ្តាលឆ្នាំ ២០១១។
កញ្ញាបញ្ជាក់ថា៖ «ក្រោយពីការខិតខំរៀនសូត្ររយៈពេល ៤ ឆ្នាំរបស់នាងខ្ញុំ ជាលទ្ធផលគឺការប្រឡងជាប់សញ្ញាបត្រ BA នៅសាលា CamEd និងប្រឡងជាប់ផ្នែកសវនកម្ម CAT 2017 ដែលគេទទួលស្គាល់ជាអន្តជាតិដោយជោគជ័យ។ ទាំងរូបខ្ញុំ និងក្រុមគ្រួសារមានមោទនៈភាពខ្លាំងណាស់ ព្រោះសញ្ញាបត្រ BA របស់ CamEd គេឲ្យតម្លៃខ្ពស់នៅកម្ពុជា ចំណែកសញ្ញាបត្រ CAT នេះត្រូវបានគេទទួលស្គាល់ជាអន្តរជាតិ»។
បន្ថែមពីលើការទទួលបានសញ្ញាបត្ររបស់ខ្លួនដែលគេឲ្យតម្លៃខ្លាំងជាអន្តរជាតិនោះកាលពីអំឡុងខែមករាថ្មីៗនេះ «សាលា CamEd និងរូបខ្ញុំផ្ទាល់ ទើបទទួលបានសារ Email ពីគណៈកម្មការប្រឡង CAT នៅប្រទេសអង់គ្លេស ប្រាប់ថាពិន្ទុ ៨៧ លើ ១០០ សម្រាប់វិញ្ញាសារ CAT សរសេរដោយដៃរបស់ខ្ញុំនេះ គឺជាពិន្ទុខ្ពស់ដាច់គេក្នុងចំណោមបេក្ខជនប្រឡង CAT 2017 នៅទូទាំងពិភពលោក។ នេះបញ្ជាក់ថាខ្ញុំឈរនៅចំណាត់ថ្នាក់ លេខ ១ សម្រាប់វិញ្ញាសារនេះ»។ នេះបើតាមការបញ្ជាក់របស់កញ្ញា ហេឡែន។
«ដំណឹងនេះធ្វើឲ្យរូបខ្ញុំ លោកឪពុកអ្នកម្តាយ បងប្អូន ញាតិមិត្ត និងសាលាមានក្តីរំភើបក្រៃលែងអំពីលទ្ធផលនៃការសិក្សារបស់ខ្ញុំពីសាលា CamEd»។
កញ្ញាបន្តថាសម័យប្រឡង CAT 2017 គេមានការបែងចែកជា ២ ប្រភេទវិញ្ញាសារ ៖ ១- វិញ្ញាសារប្រឡងតាមសំណេរដោយដៃ «គេហៅកាត់ថា PBE គឺវិញ្ញាសារ CAT សរសេរដោយដៃ នេះហើយដែលខ្ញុំជ្រើសរើសយក» និង ២- គេហៅកាត់ថា CBE គឺវិញ្ញាសារបំពេញតាមរយៈម៉ាស៊ីនកុំព្យូទ័រ។
កញ្ញា ហេឡែន បានរំឭកថានៅពេលចាប់ផ្តើមរៀននៅ CamEd សាលាបានដាក់លំហាត់ (Asigments) ជាច្រើនរៀងរាល់សប្តាហ៍ ហើយភាគច្រើនលោកគ្រូអ្នកគ្រូតម្រូវឲ្យ «ពួកយើងមិត្តរួមថ្នាក់»ធ្វើ Assignments ទាំងនោះជាក្រុមៗតែម្តង។ «របៀបរៀនតាំងពីឆ្នាំទី ១ នៅ CamEd គឺពិតជាតឹងតែងពិបាកមែន ប៉ុន្តែនោះគឺជាគន្លឹះនៃជោគជ័យសម្រាប់សិស្ស លំហាត់ទាំងនោះឲ្យយើងចេះចាប់ផ្តើមដោះស្រាយបញ្ហា រកចំណុចរួមមួយត្រឹមត្រូវទាំងនៅក្នុងចំណោមក្រុមរបស់យើងនីមួយៗជាបណ្តើរ និងក្នុងសង្គម»។ នេះបើតាមសម្តីរបស់ ហេឡែន។ «ទម្លាប់ការងារជាក្រុមបែបនេះគឺលោកគ្រូអ្នកគ្រូគាត់មានគោលដៅច្បាស់លាស់ចង់ឲ្យយើងចេះសំយោគខ្លួនទៅក្នុងក្រុមសង្គម ឆ្ពោះទៅស្វែងយល់ដោះស្រាយបញ្ហាធំ» ជាលក្ខណៈក្រុម ក្រុមហ៊ុន សហគមន៍ ទាំងនៅក្នុងថ្នាក់រៀន សាលា នៅខាងក្រៅសាលា និងនៅតាមក្រុមហ៊ុនដោយផ្ទាល់ទៀតផង។
តាមរយៈលំហាត់ បទពិសោធនៃមេរៀនផ្នែកគណនេយ្យ សវនកម្ម និងរួមទាំងមុខវិជ្ជាផ្សេងៗទៀតដែលសាលាផ្តល់ជាកម្មវិធីសិក្សាដល់សិស្សនៅសាលា CamEd បែបនេះហើយដែលបានស្ថាបនាមូលដ្ឋានគ្រឹះចំណេះដឹងដ៏រឹងមាំ និងទូលំទូលាយដល់សិស្សនិស្សិតផ្សេងទៀតរួមទាំងកញ្ញា ហេឡែន រហូតទទួលបានលទ្ធផលដ៏ត្រចះត្រចង់បែបនេះ។
ហើយអ្វីដែលសំខាន់នោះ «គឺវិន័យច្បាស់លាស់ គណៈគ្រប់គ្រងសាលា សាស្ត្រាចារ្យទាំងជនជាតិខ្មែរ និងបរទេសទាំងអស់នៅ CamEd គឺពួកគាត់សុទ្ធសឹងជាបុគ្គលមានទេពកោសល្យវិធីសាស្ត្រក្នុងការបង្រៀន និងមានភ្ជាប់ទាំងបទពិសោធការងារជាក់ស្តែងលើកមកបង្ហាត់បង្ហាញដល់ពួកយើងគ្រប់គ្នា» នេះបើតាមការបញ្ជាក់របស់កញ្ញា ហេឡែន ប្រាប់ភ្នំពេញប៉ុស្តិ៍ មុនពេលដែលកញ្ញាចេញដំណើរទៅបំពេញបេសកកម្មការងារនៅក្រៅប្រទេសកាលពីសប្តាហ៍មុន៕