The Phnom Penh Post Search

Search form

កម្ពុជា កាន់តែ​មាន​ទំនុក​ចិត្ត​ជាមួយ​ បច្ចេកវិទ្យា​ហិរញ្ញវត្ថុ Fintech

Content image - Phnom Penh Post
លោក Matthew Tippetts​។ លោ Darren Jensen​។ រូបថត supplied

កម្ពុជា កាន់តែ​មាន​ទំនុក​ចិត្ត​ជាមួយ​ បច្ចេកវិទ្យា​ហិរញ្ញវត្ថុ Fintech

មួយ​នឹង​វត្តមាន​បច្ចេកវិទ្យា​ហិរញ្ញវត្ថុ​ថ្មី ឬ​ហៅ​កាត់​ថា Fintech នៅ​កម្ពុជា​ដែល​កំពុង​តែ​នៅ​ខ្វះខាត​មធ្យោបាយ​បាន​ផ្ទេរ​ប្រាក់​តាមរយៈ​ទីតាំង​វេរ​ប្រាក់​ផ្ទាល់ ឬ​ភ្នាក់ងារ​នោះ fintech នៅ​តែ​ជា​តម្រូវការ​មួយ​ខ្ពស់​នៅ​កម្ពុជា​។

តើ​បច្ចេកវិទ្យា​នេះ​អាច​ទាក់ទង​ក្រុមហ៊ុន​ថ្មីៗ​ណា​ខ្លះ​?

Post Supplement បាន​ជួប​ពិភាក្សា​ជាមួយ​លោក Matthew Tippetts និង​លោក Darren Jensen ដែល​ជា​សហគ្រិន​ជំនាញ​ខាង​បច្ចេកវិទ្យា​នេះ​ហើយ​ដែល​ពួកគាត់​កំពុង​រៀបចំ​ត្រៀម​បញ្ចេញ​នូវ​សមិទ្ធផល​ដំបូង​របស់​ខ្លួន​នៅ​ដើម​ឆ្នាំ​ក្រោយ​នេះ និង​សិក្សា​បន្ថែម​លើ​ការ​យល់​ដឹង និង​ផ្នត់​គំនិត​របស់​អតិថិជន​ក្នុង​វិស័យ​នេះ​ដែល​បាន​ជួប​បញ្ហា​ដោយសារ​តែ​ទំហំ​ទីផ្សារ​បច្ចេកវិទ្យា​នៅ​មិន​ទាន់​រីក​ធំ​នៅ​ឡើយ​។

លោក Tippets និង Jensen ទទួល​ស្គាល់ និង​ឯកភាព​ថា​ជា​ចំណុច​មួយ​ដែល​ត្រូវ​អភិវឌ្ឍ​បន្ថែម​ទៀត​។

តើ​លោក​នឹង​នាំ​យក​អ្វី​ចូល​មក​ក្នុង​វិស័យ​បច្ចេកវិទ្យា​ហិរញ្ញវត្ថុ​នេះ​?

MT : តាមពិត​ទៅ​គោលដៅ​របស់​ពួកយើង​គឺ​ផ្តល់​នូវ​សេវា​បង់​ប្រាក់ និង​ភាព​ងាយស្រួល​ព្រម​ទាំង​គុណ​តម្លៃ​ឲ្យ​អតិថិជន​របស់​យើង​។ វា​ទាក់ទង​ទៅ​នឹង​សេវា​ផ្សេងៗ​ដែល​យើង​កំពុង​ផ្តល់​ជូន និង​អ្វី​ដែល​យើង​មាន​សម្រាប់​អតិថិជន ប៉ុន្តែ​សម្រាប់​អាជីវករ​គឺ​យើង​ផ្តល់​ឲ្យ​ច្រើន​ជាង​សេវា​បង់​ប្រាក់​ទៅ​ទៀត​គឺ​មាន​គុណ​តម្លៃ​ច្រើន​ជាង​ធម្មតា​។

យើង​បាន​ធ្វើការ​សិក្សា​យ៉ាង​ល្អិតល្អន់​អស់​រយៈពេល​ ៤ ​ខែ​ហើយ​បាន​ជួប​ជាមួយ​អាជីវករ​ភ្នាក់ងារ​ ១៨០០ ​នាក់ និង​អតិថិជន​ច្រើន​ជាង​​ ១១០០ ​នាក់ ដើម្បី​ស្វែងយល់​ឲ្យ​បាន​ច្បាស់​នូវ​របៀប​ដែល​ពួកគេ​បង់​ប្រាក់​។ អ្វី​ដែល​យើង​បាន​យល់​គឺ​ថា​ជា​មធ្យម ៧៧ ​ភាគរយ​នៃ​ចំណូល​សរុប​របស់​អាជីវករ​គឺជា​សាច់​ប្រាក់សុទ្ធ​។

បញ្ហា​ចម្បង​សម្រាប់​ពួកគាត់​គឺ​ការ​រក្សា​សាច់​ប្រាក់​សុទ្ធ ការ​ប្រថុយ​ប្រឋាន និង​គ្រោះថ្នាក់​ពី​ការ​ប្លន់​ផង​ដែរ​។ អាជីវករ​ជាច្រើន​ត្រូវការ​ដំណោះស្រាយ​សម្រាប់​បញ្ហា​នេះ​។ អ្វី​ដែល​សំខាន់​មួយ​ទៀត​ដែល​យើង​ត្រូវ​ធ្វើ​គឺ​អនុវត្ត​តាម​គោលការណ៍​របស់​ធនាគារ​ជាតិ​ដើម្បី​ធានា​ដល់​សុវត្ថិភាព​។ ការ​ស្គាល់​អតិថិជន​បាន​ច្បាស់ ការ​ប្រឆាំង​ទៅ​នឹង​ការ​លាង​លុយ និង​ជំរុញ​ឲ្យ​ប្រជាជន​ប្រើប្រាស់​លុយ​រៀល​ឲ្យ​បាន​ច្រើន​ជាង​ការ​ប្រើ​លុយ​បរទេស​។

ប៉ុន្តែ​សម្រាប់​ពួកយើង​ចំណុច​ដែល​សំខាន់​បំផុត​មួយ​គឺ​សុវត្ថិភាព​។ ជាមួយ​នឹង​បច្ចេកវិទ្យា​ដ៏ល្អ និង​សុវត្ថិភាព​បំផុត​មួយ​ដែល​យើង​នឹង​ប្រើ​ យើង​ជឿជាក់​ថា​វា​នឹង​ក្លាយ​ជា​សេវា​ដ៏សុវត្ថិភាព​បំផុត​មួយ​នៅ​កម្ពុជា​។ ហើយ​យើង​នឹង​ចល័ត​គ្រប់​ទីកន្លែង​ក្នុង​ប្រទេស​នេះ​។

តើ​មាន​ចំណុច​សំខាន់​អ្វី​ខ្លះ​ទៀត​ដែល​លោក​គិត​ថា​ជា​រឿង​ចាំបាច់​សម្រាប់​ការ​ចាប់ផ្តើម​របស់​លោក​?

MT : ការ​រួម​បញ្ចូល​ប្រព័ន្ធ​ហិរញ្ញវត្ថុ​ក្នុង​ជីវិត​ប្រចាំ​ថ្ងៃ​គឺ​សំខាន់​បំផុត​ហើយ​ប្រព័ន្ធ​របស់​យើង​នឹង​អនុញ្ញាត​ឲ្យ​អតិថិជន​ដែល​មាន​ទូរស័ព្ទ​ស្មាតហ្វូន និង ID អាច​ប្រើប្រាស់​សេវា​យើង​បាន​ហើយ​អ្នក​ដែល​មាន​ចំណុច​ទាំង​ពីរ​នេះ​នឹង​អាច​ធ្វើការ​បង់​ប្រាក់​បាន​ងាយស្រួល និង​ធ្វើ​ឲ្យ​ជីវិត​ពួកគេ​កាន់​តែ​ងាយស្រួល​ផង​ដែរ​។ យើង​ក៏​ប្រើ​នូវ​បច្ចេកវិទ្យា​មួយ​ចំនួន​ដែល​អាច​ការពារ​ពី​ការ​ហ៊ែក​ទូរស័ព្ទ​ដៃ​ផង​ដែរ​។

DJ : និយាយ​ដល់​សុវត្ថិភាព​រាប់​ចាប់​ពី​បច្ចេកវិទ្យា POV ដែល​យើង​នឹង​ប្រើ​គឺជា​បច្ចេកវិទ្យា​ដែល​មាន​កម្រិត​សុវត្ថិភាព​ខ្ពស់​ចុង​ក្រោយ​គេ​បង្អស់​ដែល​ការពារ និង​បិទ​ព័ត៌មាន​ទិន្នន័យ​បាន​យ៉ាង​ល្អ​ទៀត​ផង​។ នេះ​គឺជា​អាទិភាព​មួយ​ដែល​យើង​ផ្តោត​លើ​ដែល​វា​ជា​សុវត្ថិភាព​នៅ​លើ​ប្រព័ន្ធ​របស់​យើង​តែ​ម្តង​។

MT : យើង​មិន​ផ្តោត​លើ​ការ​មក​ដល់​មុន ឬ​ក្រោយ​នោះ​ទេ​តែ​យើង​ចង់​ផ្តល់​នូវ​សេវាកម្ម​ដែល​ល្អ​បំផុត​ដល់​អតិថិជន​យើង​ហើយ​រឿង​ដែល​ល្អ​បំផុត​អំពី​ទីផ្សារ​បច្ចុប្បន្ន​នេះ​គឺ​ដោយសារ​តែ​មាន​ក្រុមហ៊ុន​បច្ចេកវិទ្យា និង​ក្រុមហ៊ុន​ផុ្តល់​សេវាកម្ម​ហិរញ្ញវត្ថុ​ជាច្រើន​។

សេវា Bongloy និង Pipay និង​ធនាគារ​ដូចជា​អេស៊ីលីដា និង ABA ជាដើម​កំពុង​តែ​អភិវឌ្ឍ​ទៅ​មុខ​ហើយ​ប្រទេស​កម្ពុជា​កំពុង​ត្រូវការ​បែប​នេះ​។ វា​ជា​រឿង​មួយ​ដ៏ល្អ​បំផុត​ដែល​ពួកគេ​បាន​ប្រឡូក​ចូល​ក្នុង​ទីផ្សារ​នេះ​។ និយាយ​ទៅ​និយាយ​មក​គឺ​ប្រជាជន​កម្ពុជា​ទេ​ដែល​ជា​អ្នក​ទទួល​បាន​អត្ថប្រយោជន៍​ពី​សេវា​ទាំង​នេះ​។

តើ​ពួកគេ​ជា​ដៃគូ​ប្រកួត​របស់​លោក​ទេ​?

MT : ច្បាស់​ណាស់​គឺ​ពួកគេ​ជា​ដៃគូ​ប្រកួត​ប្រជែង​របស់​យើង ប៉ុន្តែ​ខ្ញុំ​គិត​ថា​ទីផ្សារ​មាន​ទំហំ​ធំ​ណាស់​។

បច្ចុប្បន្ន​នេះ​យើង​ពុំ​បាន​ផ្តោត​លើ​ភាគរយ​នៃ​ទីផ្សារ​ដែល​យើង​ត្រូវ​ដណ្តើម​នោះ​ទេ ប៉ុន្តែ​យើង​ផ្តោត​ថា តើ​យើង​អាច​បោះ​ជំហាន​លូតលាស់​ក្នុង​ទីផ្សារ​នេះ​បាន​ប៉ុណ្ណា​។ ទីផ្សារ​សម្រាប់​ការ​បើក​សាច់​ប្រាក់​គឺ​តូច​បំផុត​ហើយ​សេវា​ហិរញ្ញវត្ថុ​លើ​ប្រព័ន្ធ​អ៊ិនធើណិត​ក៏​នៅ​តូច​នៅ​ឡើយ​ដែរ​។

តើ​យើង​ធ្វើ​ដូចម្តេច​អាច​ជំរុញ​ឲ្យ​អតិថិជន​ ៧៧ ​ភាគរយ​ដែល​មក​វេរ​ជា​សាច់​ប្រាក់​នោះ​ប្តូរ​មក​ប្រើ​សេវា​របស់​យើង​វិញ​? យើង​ត្រូវការ​ពេលវេលា​យូរ​ទៀត​ហើយ​បច្ចេកវិទ្យា និង​ក្រុមហ៊ុន​ទាំងអស់​នឹង​អាច​ពង្រីក​សក្តានុភាព​របស់​ខ្លួន​បាន​កាន់​តែ​ធំ​ថែម​ទៀត​នៅ​ក្នុង​ទីផ្សារ​នេះ​។

តើ​អ្វី​ទៅ​ជា​ឧបសគ្គ​ដ៏ធំ​បំផុត​សម្រាប់​បច្ចេកវិទ្យា​ហិរញ្ញវត្ថុ​នេះ​?

MT : អតិថិជន​។ ពួកគេ​គឺ​ពិបាក​បញ្ចុះបញ្ចូល​ណាស់​ហើយ​ពួកគេ​ដឹង​តម្លៃ​ច្បាសលាស់​។

អ្នក​ត្រូវ​តែ​កសាង​អ្វី​ដែល​ជា​ដំណោះស្រាយ​បញ្ហា​ពិតប្រាកដ​សម្រាប់​អតិថិជន​ហើយ​អ្វី​ដែល​អតិថិជន​ពេញ​ចិត្ត​ក្នុង​ការ​ប្រើប្រាស់​។ នេះ​មាន​វិធី​ច្រើន​ណាស់ ហើយ​ការ​ផ្តល់​ផលប្រយោជន៍​បន្ថែម​ក៏​នៅ​ក្នុង​នោះ​ដែរ​។ ប៉ុន្តែ​នៅ​ពេល​ដែល​យើង​បាន​ធ្វើការ​សិក្សា យើង​បាន​ស្វែងរក​ថា​ពួកគេ​សុទ្ធសឹង​តែ​មាន​កម្មវីធី​ទូទាត់​ទឹកប្រាក់​អេឡិចត្រូនិក​នៅ​លើ​ទូរស័ព្ទ​របស់​ខ្លួន​។ ៨០ ​ភាគរយ​នៃ​មនុស្ស​ដែល​យើង​បាន​សម្ភាស​បាន​និយាយ​ថា​ពួកគេ​ប្រើប្រាស់​សេវា​ផ្ទេរប្រាក់​ចល័ត​ដូចជា​វីង ឬ True Money ប៉ុន្តែ​មាន​តែ​ ១៨ ​ភាគរយ​ប៉ុណ្ណោះ​បាន​ប្រើប្រាស់​កម្មវិធី​របស់​សេវា​ទាំង​នោះ​។

ចុងក្រោយ​អ្វី​ដែល​សំខាន់​គឺ​ថា តើ​អ្នក​ប្រាស្រ័យ​ទាក់ទង​របៀប​ណា​ហើយ​កម្មវិធី​ទាំងអស់​នោះ​មាន​ភាព​ងាយស្រួល ឬ​ពិបាក​ក្នុង​ការ​ប្រើប្រាស់​។ ប្រសិន​បើ​កម្មវិធី​នេះ​គឺ​ហួស​សម័យ​ហើយ​មើល​ទៅ​មិន​ទាក់ទាញ​ភ្នែក​អ្នក​នឹង​មិន​ទទួល​បាន​អតិថិជន​ទេ​។

តើ​នរណា​នឹង​ទទួល​បាន​ផលប្រយោជន៍​ពី​ក្រុមហ៊ុន​របស់​អ្នក​ច្រើន​ជាង​គេ​បំផុត​?

MT : បើ​សម្លឹង​មើល fintech ជាទូទៅ​អ្នក​ជំនួញ​នឹង​ទទួល​បាន​ប្រយោជន៍​យ៉ាង​ខ្លាំង​ព្រោះ​វា​នឹង​កាត់បន្ថយ​ការ​ចំណាយ​ហានិភ័យ​យ៉ាង​ច្រើន​ថែម​ទាំង​ការ​ធ្វើ​ឲ្យ​សេវា​អតិថិជន​របស់​ពួកគេ​កាន់តែ​ល្អ​ប្រសើរ​។ អតិថិជន​កម្ពុជា​ជាទូទៅ​គឺ​មិន​មាន​ភាព​ស្មោះស្ម័គ្រ​នោះ​ឡើយ​ពួកគេ​នឹង​ជ្រើសរើស​យក​តម្លៃ​ណា​ដែល​ថោក​បំផុត​។

ទីផ្សារ​នេះ​គឺ​មាន​ភាព​កាចសាហាវ​ណាស់​នេះ​ហើយ​ជា​មូលហេតុ​ដែល​មាន​អត្រា​អ្នក​ប្រើប្រាស់​ស៊ីម​ចម្រុះ​ចំនួន​ ១៨០ ​ភាគរយ​មនុស្ស​ច្រើន​ណាស់​មាន​ស៊ីម​ពីរ​ដោយសារ​តែ​ពួកគេ​ចង់​បាន​ការ​ផ្តល់​ជូន​ពិសេស​ដែល​ល្អ​បំផុត​ពី​ក្រុមហ៊ុន​ទូរគមនាគមន៍​ផ្សេង​គ្នា​។ វា​ជា​បញ្ហា​ប្រឈម​ក្នុង​ទីផ្សារ​នេះ ប៉ុន្តែ​ប្រសិន​បើ​អ្នក​រកឃើញ​រូបមន្ត​ដែល​ត្រឹមត្រូវ​មួយ​ក្នុង​ការ​ផ្តល់​ជូន​នូវ​តម្លៃ​ឱ្យ​បាន​គ្រប់គ្រាន់ អតិថិជន​ទាំង​នេះ​នឹង​ក្លាយ​អតិថិជន​ស្មោះស្ម័គ្រ​។

តើ​អ្នក​រំពឹង​ទុក​ថា​មូលដ្ឋាន​អតិថិជន​របស់​ខ្លួន​នឹង​មាន​ភាព​ស្មោះស្ម័គ្រ​ដូចម្ដេច​?

MT : នេះ​ជា​រូបមន្ត​សម្ងាត់​របស់​យើង​។ វា​មាន​ទំនាក់​ទំនង​ជាមួយ​គំរូ​អាជីវកម្ម​របស់​យើង និង​របៀប​ដែល​យើង​ផ្តល់​ជូន​នូវ​សេវាកម្ម​របស់​យើង​។

ប្រសិន​បើ​យើង​សម្លឹង​មើល​ទៅ​គំនិត​ទូទៅ​នៃ​ការ​ផ្ដល់​ការ​បញ្ចុះ​តម្លៃ និង​ការ​ផ្តល់​ប្រយោជន៍​ពិសេស​នេះ​មិនមែន​ជា​ការ​ច្នៃ​ប្រឌិត​ថ្មី​ដែល​យើង​កំពុង​តែ​នាំ​យក​មក​ចូល​ក្នុង​ទីផ្សារ​នោះ​ទេ​យើង​ត្រូវការ​ការ​ប្រាស្រ័យ​ទាក់ទង​គ្នា​ជាមួយ​អតិថិជន ប៉ុន្តែ​តើ​យើង​ទទួល​បាន​ភក្ដីភាព​ដែរ​ឬ​ទេ​? តើ​ការ​បញ្ចុះ​តម្លៃ​ដែល​អ្នក​កំពុង​ផ្តល់​ឱ្យ​នោះ​វា​នឹង​វិល​ត្រឡប់​មក​ចូល​មក​ក្នុង​ហោប៉ៅ​របស់​អ្នក​វិញ​ដែរ​ឬ​ទេ​? ការ​វិល​ត្រឡប់​របស់​អ្នក​ពី​ការ​វិនិយោគ​ទទួល​បាន​ប៉ុន្មាន​?

ក្រុមហ៊ុន​ទូរគមនាគមន៍​ឥឡូវ​នេះ​កំពុង​ប្រឈមមុខ​នឹង​ទីផ្សារ​ដែល​មាន​ការ​ប្រកួត​ប្រជែង​ដ៏ខ្លាំងក្លា​មួយ​ដែល​ក្នុង​នោះ​អតិថិជន​លោត​ពី​ការ​ផ្តល់​ជូន​ពិសេស​ពី​ក្រុមហ៊ុន​ទូរគមនាគមន៍​មួយ​ទៅ​មួយ​ផ្សេង​ទៀត​ជាមួយ​នឹង​ក្រុមហ៊ុន​ទូរគមនាគមន៍​ទាំងអស់​ផ្ញើ​សារ​ផ្តល់​ដំណឹង​ពី​ការ​ផ្តល់​ជូន​ពិសេស​ទៅ​អតិថិជន​របស់​ពួកគេ​គ្រប់​ពេលវេលា​ដល់​អតិថិជន​ទាំងអស់​នោះ មិន​ទាំង​ចងចាំ​ការ​ផ្តល់​ជូន​ពិសេស​នេះ​ដោយសារ​តែ​ពួកគេ​គឺ​ទទួល​បាន​សារ​នេះ​ច្រើន​ពេក​។

ខ្ញុំ​សង្ឃឹម​ថា​ឧស្សាហកម្ម fintech នឹង​មិន​ឈាន​ដល់​ចំណុច​នោះ​ទេ​។ ខ្ញុំ​គិត​ថា​ប្រសិន​បើ​ធ្វើ​បាន​ត្រឹមត្រូវ អ្នក​ជំនួញ អ្នក​ប្រើប្រាស់ និង​ជា​ការពិត​ណាស់ អ្នក​ផ្តល់​សេវា​នឹង​ទទួល​បាន​ផលប្រយោជន៍​រយៈពេល​វែង​។

តើ​មាន​អ្វី​ផ្សេង​ទៀត​ដែល​អ្នក​ចង់​និយាយ​អំពី​ទីផ្សារ fintech នៅ​ក្នុង​ប្រទេស​កម្ពុជា​ដែរ​ឬ​ទេ​?

DJ : ប្រទេស​កម្ពុជា​មាន​ឱកាស​ធំៗ​ច្រើន​ណាស់​ហើយ​វា​ជា​កន្លែង​មួយ​យ៉ាង​ល្អ​ដើម្បី​សង្កេត​មើល​ពី​របៀប​ដែល​ទីផ្សារ​ថ្មីថ្មោង​អាច​ដុះ​លូតលាស់​បែប​ណា​ខ្លះ​ហើយ​អាច​សិក្សា​មេរៀន​ពី​ទីផ្សារ​ក្នុង​តំបន់​ផ្សេងៗ​ទៀត​រួច​យក​មក​អនុវត្ត​នៅ​ទី​នេះ​។ យើង​កំពុង​តែ​ឈរ​នៅ​លើ​ទិដ្ឋភាព​មួយ​ដែល​ថ្មី និង​គួរ​ឱ្យ​រំភើប វា​ជា​កាលៈទេសៈ​ដ៏ល្អ​មួយ​ដែល​ខ្ញុំ​នៅ​ទី​នេះ​ពេល​នេះ​។

MT : ការ​ប្រកួត​ប្រជែង​គឺជា​ការ​ល្អ​ប្រសិន​បើ​មាន​ការ​ប្រកួត​ប្រជែង​កាន់តែ​ច្រើន​អ្នក​ប្រើប្រាស់​នឹង​តែងតែ​ឈ្នះ​ជានិច្ច​។ នៅពេល​ដែល​គេ​លើក​មក​និយាយ​អំ​ពី​បទប្បញ្ញត្តិ​ដែល​ជា​គន្លឹះ​ដ៏សំខាន់​វា​ជា​ការ​ចាំបាច់​បំផុត​ដែល​ទីផ្សារ​ជា​កន្លែង​ស្មើភាព​គ្នា​ដែល​អាច​ឱ្យ​សហគ្រិន​មាន​ឱកាស​ក្នុង​ការ​ច្នៃប្រឌិត និង​ដើម្បី​រក្សា​របា​ឲ្យ​បាន​ខ្ពស់​នៅក្នុង​លក្ខខណ្ឌ​ស្តង់ដារ​។

មនុស្ស​គួរ​តែ​សម្លឹង​មើល​អ្វី​ដែល​កំពុង​តែ​កើតឡើង​នៅ​ក្នុង​ទីផ្សារ​ក្នុង​តំបន់ និង​រៀន​ពី​អ្វី​ដែល​ខ្លួន​បាន​ឃើញ​។

ជាមួយ​នឹង fintech អ្វីៗ​ដែល​នឹង​ផ្លាស់ប្តូរ​យ៉ាង​ខ្លាំង​មាន​ន័យ​ថា​ទីផ្សារ​នឹង​មិន​មាន​ពោរពេញ​ដោយ​កីឡាករ​ជើងចាស់​ដូចជា​ធនាគារ ឬ​ក្រុមហ៊ុន​ទូរគមនាគមន៍​ដែល​កំពុង​ដឹកនាំ​បដិវត្តន៍​នេះ​ទេ វា​នឹង​ចេញ​ពី​ក្រុមហ៊ុន fintech ច្នៃប្រឌិត​ថ្មី​ហើយ​ឯករាជ្យ​ដូចជា​ពួកយើង​ផង​ដែរ​។

តម្លៃ​នៃ​ភាព​ច្នៃប្រឌិត​អាច​នាំ​មក​គឺ​មាន​លក្ខណៈ​អស្ចារ្យ​ជាពិសេស​នៅក្នុង​ប្រទេស​កម្ពុជា​ដោយសារ​តែ​ទី​នេះ​មាន​ការ​រួមបញ្ចូល​ហិរញ្ញវត្ថុ​នៅ​មាន​កម្រិត​មួយ​។ ៥០ ​ភាគរយ​នៃ​ប្រជាជន​មាន​ស្មាតហ្វូន​ហើយ​នេះ​គឺជា​ឧបករណ៍​ដែល​មាន​ប្រយោជន៍​បំផុត​។ ក្នុង​រយៈពេល​បី​ឆ្នាំ​មនុស្ស​ ១០ ​លាន​នាក់​នៅ​ទី​នេះ​នឹង​មាន​ស្មាតហ្វូន​។

តើ​អ្វី​ទៅ​ជា​កម្រិត​រីកចម្រើន​នៃ fintech នៅ​ក្នុង​ព្រះរាជាណាចក្រ​កម្ពុជា​នៅ​ពេល​ឥឡូវ​នេះ​?

MT : ល្បឿន​នៃ​ការ​ច្នៃប្រឌិត​ថ្មី​កំពុង​តែ​បង្កើន​ល្បឿន​។ អ្វី​ដែល​យើង​កំពុង​មើល​ឃើញ​នៅ​ពេល​នេះ​គឺ​គ្រាន់តែ​ជា​ការ​ចាប់ផ្តើម​ប៉ុណ្ណោះ​។

គ្រាន់​តែ​ទីផ្សារ​ប្រទេស​កម្ពុជា​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ​តែ​ប៉ុណ្ណោះ​យើង​ឃើញ​មាន​អ្នក​ផ្តល់​សេវា​ផ្ទេរ​ប្រាក់​ចល័ត​ថ្មី​បាន​ចូល​មក​ដល់​ធនាគារ​បាន​នាំ​មក​នូវ​ជាមួយ​នឹង​ផលិតផល​ដែល​អស្ចារ្យ​មាន​គំរូ​អាជីវកម្ម​ល្អៗ ដូច Pay2Go រួម​ទាំង​ពួកយើង​ក៏​ចូល​មក​ដែរ​។ ក្រុមហ៊ុន​ទូរគមនាគមន៍​ក៏​នឹង​ចេញ​នូវ​អ្វី​ថ្មីៗ​ផង​ដែរ​។

នេះ​ជា​ពេល​ដែល​ដែល​គួរ​ឱ្យ​រំភើប​មួយ​ដែល​ក្រុមហ៊ុន​ទាំងអស់​ព្យាយាម​ធ្វើការ​ច្នៃប្រឌិត​ដូចនេះ​អតិថិជន​គួរ​តែ​មាន​ចម្ងល់​តាមដាន​ចង់​ដឹង​ថា​ពួកគេ​អាច​ផ្តល់​នូវ​អ្វី​ខ្លះ​។ កម្ពុជា​មាន​ចំនួន​ប្រជាជន​មួយ​ផ្នែក​ធំ​ដែល​ប្រើប្រាស់​ប្រព័ន្ធ​ទាំង​នេះ​ដែល​ក្នុង​នោះ​ ៧០ ​ភាគរយ​មាន​អាយុ​តិច​ជាង​ ៣០ ​ឆ្នាំ​។

តើ​អ្នក​មាន​គម្រោង​ធ្វើ​ឱ្យ​ពួកគេ​យល់​ដឹង​អំពី​អ្នក​យ៉ាង​ដូចម្តេច​?

MT : នេះ​ជា​ផ្នែក​មួយ​លំបាក​នៃ​ទីផ្សារ​។ ការ​ផ្សព្វផ្សាយ​ពាណិជ្ជកម្ម​គឺ​នៅ​គ្រប់​ទីកន្លែង​។ វា​ជា​របៀប​ដែល​អ្នក​អាច​ទាក់ទាញ​ការ​ចាប់​អារម្មណ៍ និង​ភក្តីភាព​ពី​ប្រជាជន​។

មនុស្ស​មួយ​ចំនួន​បាន​បោះ​លុយ​ជាច្រើន​ទៅ​លើ​ការ​ផ្សព្វផ្សាយ​ធំដុំ ប៉ុន្តែ​អ្នក​ផ្សេង​ទៀត​ត្រូវ​តែ​មាន​​ភាព​វៃឆ្លាត​ខ្លាំង​ណាស់​ដើម្បី​ឈាន​ទៅ​ដល់​មនុស្ស​ទាំង​នោះ​។

អ្នក​ត្រូវការ​ទាក់ទាញ​មនុស្ស​ឲ្យ​បាន​ច្រើន​បំផុត ប៉ុន្តែ​មិន​បំភិតបំភ័យ​ពួកគេ​ហើយ​ធ្វើ​ឱ្យ​ពួកគេ​គិត​ថា​កម្មវិធី​នេះ ឬ​គម្រោង​នេះ​ស្មុគស្មាញ​ពេក ឬ​មិនមែន​សម្រាប់​ពួកគេ​នោះ​ទេ​។ គន្លឹះ​សំខាន់​គឺ​ការ​ចាប់យក​ការ​ចង់​ដឹង​ចង់​ឃើញ និង​ភក្តីភាព​នៃ​អតិថិជន​កម្ពុជា​ជាមួយ​នឹង​បទពិសោធ​ដ៏លេចធ្លោ​មួយ​៕

អត្ថបទគួរចាប់អារម្មណ៍