.jpg)
កញ្ញា Pheng Sopeak Neary (ផេង សុភក្តិ នារី) ម្ចាស់ App Weddingate នៅឯការិយាល័យធ្វើការរបស់នាងកាលពីសប្តាហ៍មុន។ មឿន ញាណ
គំនិតអាជីវកម្មរបស់យុវជនកម្ពុជាវ័យក្មេងដែលមានជំនាញក្នុងផ្នែកបច្ចេកវិទ្យាម្នាក់គឺទាក់ទងជាមួយការប្រើប្រាស់បច្ចេកវិទ្យាព័ត៌មាន និងទូរគមនាគមន៍ (ICT) ដើម្បីជួយគូស្វាមីភរិយាក្នុងការរៀបចំផែនការសម្រាប់ថ្ងៃរៀបអាពាហ៍ពិពាហ៍របស់ពួកគេ។ ការរិះរកមធ្យោបាយបែបថ្មីនេះបានឈានទៅដល់ការបង្កើតកម្មវិធីទូរស័ព្ទស្មាតហ្វូនថ្មីដោយអាចរកប្រាកចំណេញពីវិស័យអាពាហ៍ពិពាហ៍ដែលកំពុងតែរីកលូតលាស់នៅក្នុងព្រះរាជាណាចក្រកម្ពុជា។
កាលពីខែមិថុនាឆ្នាំ ២០១៤ កញ្ញា Pheng Sopeak Neary (ផេង សុភក្តិ នារី) កំពុងអានអត្ថបទមួយនៅក្នុងផ្នែកអាជីវកម្មនៃកាសែតភ្នំពេញប៉ុស្តិ៍អំពីជំនួញទាក់ទងនឹងអាពាហ៍ពិពាហ៍របស់ប្រជាជនកម្ពុជាដែលកំពុងតែរីកដុះដាលខណៈពេលដែលគំនិតថ្មីមួយបានផុសឡើង។
អ្នកនាងបានរំឭកថា៖ «អត្ថបទនេះបាននិយាយថា គ្រាន់តែនៅឆ្នាំ ២០១៣ មានការរៀបអាពាហ៍ពិពាហ៍ចំនួនជាង ១២០០០ គូនៅក្នុងរាជធានីភ្នំពេញ»។ អ្នកនាងបន្តថា៖ «អត្ថបទនេះក៏បានលើកឡើងផងដែរថា ប្រជាជនកម្ពុជាច្រើនជាង ២០ ភាគរយមានអាយុចន្លោះពី ១៥ ទៅ ២៤ ឆ្នាំ។ ដូច្នេះខ្ញុំគិតថាច្បាស់ណាស់អាជីវកម្មណាដែលមានទំនាក់ទំនងជាមួយអាពាហ៍ពិពាហ៍ត្រូវតែមានទីផ្សារដ៏ធំសម្បើមមួយ»។
អ្នកនាង SopeakNeary កាលនោះមានអាយុ ១៨ ឆ្នាំជាអ្នកហាត់ការនៅក្រុមហ៊ុនអភិវឌ្ឍន៍គេហទំព័រ និងទូរស័ព្ទដៃក្នុងស្រុកមួយឈ្មោះថា Codingate ក៏បានចាប់ផ្តើមគិតអំពីមធ្យោបាយដើម្បីយកផលចំណេញពីទីផ្សារនោះ។
ក្រុមហ៊ុនដែលនាងធ្លាប់បំពេញការងារឲ្យឈ្មោះថា Codingate បានធ្វើការប្រជុំជារៀងរាល់ថ្ងៃសៅរ៍ដែលក្នុងនោះក្រុមហ៊ុនបានលើកទឹកចិត្តដល់បុគ្គលិក និងអ្នកហាត់ការរបស់ខ្លួនឲ្យស្វែងរកបញ្ហាជាក់លាក់នៅក្នុងសង្គម និងដោះស្រាយបញ្ហាសមស្របដោយការប្រើប្រាស់ ICT។ នៅក្នុងកិច្ចប្រជុំថ្ងៃសោរ៍មួយអ្នកនាង នារី បានធ្វើបទបង្ហាញពីគំនិតរបស់នាង ៖ ការបង្កើតកម្មវិធីស្មាតហ្វូនដែលជួយឲ្យគូស្វាមីភរិយាដែលជិតនឹងចូលរោងការរៀបចំផែនការអាពាហ៍ពិពាហ៍ដោយខ្លួនឯងបានយ៉ាងរលូន។
រូបភាពខ្លះៗនៅក្នុង App Weddingate របស់នាង នារី។ រូបថត សហការី
កញ្ញាបានពន្យល់ថា៖ «នៅប្រទេសកម្ពុជាការរៀបចំពិធីរៀបអាពាហ៍ពិពាហ៍មានភាពស្មុគស្មាញ និងអស់កម្លាំងខ្លាំងបំផុត។ ខ្ញុំបានកត់សម្គាល់ឃើញមនុស្សជាច្រើនមានបញ្ហាក្នុងការគ្រប់គ្រងថវិកាសម្រាប់ពិធីរៀបអាពាហ៍ពិពាហ៍របស់ពួកគេ ឬក្នុងការស្វែងរកសេវាកម្មស័ក្តិសម និងមានតម្លៃសមរម្យ»។
គំនិតនេះបានទាក់ទាញចំណាប់អារម្មណ៍ ប៉ុន្តែត្រូវរង់ចាំរហូតដល់ពេលកញ្ញាបានបញ្ចប់ការហ្វឹកហាត់ការងាររបស់ខ្លួនទើបកញ្ញាមានពេលវេលាគ្រប់គ្រាន់ក្នុងការអភិវឌ្ឍគំនិតនេះបានពេញលេញ។ ដោយការធ្វើការជាមួយអ្នកបច្ចេកទេសកុំព្យូទ័រវ័យក្មេងម្នាក់ឈ្មោះថាលោក Chan Vanneth (ចាន់ វណ្ណណេត) ដែលនាងបានជួបនៅពេលហ្វឹកហាត់ការងារនៅ Codingate។ អ្នកទាំង ២ បានសហការបង្កើត Weddingate ដែលជាវេទិកាអនឡាញមួយដើម្បីជួយគូស្វាមី-ភរិយាភ្ជាប់ទំនាក់ទំនងជាមួយក្រុមអ្នកផ្តល់សេវាកម្មអាពាហ៍ពិពាហ៍ការរៀបចំកញ្ចប់ថវិកា និងរៀបចំបញ្ជីឈ្មោះភ្ញៀវចូលរួមជាដើម។
ខណៈពេលដែល Weddingate មិនមែនជាប្រព័ន្ធឌីជីថលដំបូងគេនៅក្នុងព្រះរាជាណាចក្រកម្ពុជាដែលបម្រើសេវាកម្មប្រភេទនេះតែវាជាកម្មវិធីប្រភេទនេះដំបូងបង្អស់ដែលត្រូវបានអភិវឌ្ឍទៅជាកម្មវិធីទូរស័ព្ទស្មាតហ្វូន និងបញ្ចូលមុខងារប្រព័ន្ធផ្សព្វផ្សាយសង្គមចូលក្នុងនោះផងដែរ។
នៅឆ្នាំ ២០១៧ កញ្ញានារី និងលោក វណ្ណណេត បានបង្កើតទម្រង់អាល់ហ្វានៃកម្មវិធីនេះរួមជាមួយនឹងផែនការរកប្រាក់ចំណូលដែលមានមូលដ្ឋានផ្អែកលើការផ្សាយពាណិជ្ជកម្ម។ អ្នកអភិវឌ្ឍន៍វ័យក្មេងទាំង ២ នាក់បានដាក់ Weddingate ចូលទៅក្នុងការប្រកួតប្រជែងគម្រោងអាជីវកម្មរយៈពេល ៦ ខែហៅថា Cellcard Lab ដែលដឹកនាំដោយសហការិយាល័យ Impact Hub និងត្រូវបានផ្តល់ហិរញ្ញប្បទានដោយ Cellcard ដែលជាក្រុមហ៊ុន ទូរគមនាគមន៍កម្ពុជា។ គម្រោងរបស់ពួកគេទទួលបានចំណាត់ថ្នាក់ទី ៣។
អ្នកទាំង ២ នេះបានទទួលរង្វាន់ទឹកប្រាក់ចំនួន ២០០០ ដុល្លារអាមេរិក។ ហើយបានប្រើប្រាស់ថវិការបស់ពួកគេដើម្បីទិញឧបករណ៍ និងបង់ថ្លៃឈ្នួលដាក់បង្ហាញកម្មវិធីនៅលើ Google Play និង Apple Store។
កញ្ញា Neary បានលាឈប់ពីការងាររបស់នាង ដើម្បីមានពេលវេលាគ្រប់គ្រាន់សម្រាប់ផ្តោតការយកចិត្តទុកដាក់លើគម្រោងមួយនេះ ខណៈពេលដែលវណ្ណណេតនៅតែកំពុងធ្វើការនៅ Codingate។ ដោយមានអារម្មណ៍ថាមិនអាចទ្រទ្រង់បន្ទុកការងារបន្ថែមហើយក៏បានដកខ្លួនចេញពីមុខជំនួញនេះដោយទុកឲ្យកញ្ញានារីកាន់កាប់គម្រោងនេះទាំងមូល។
ទោះជាយ៉ាងណាក៏ដោយកញ្ញានារីមិនមែនធ្វើតែម្នាក់ឯងទាំងអស់ដោយគ្មានការគាំទ្រនោះទេ។ ដោយឡែកអតីតនិយោជករបស់នាងនៅ Codingate បានផ្តល់ការគាំទ្រដោយផ្តល់នូវការិយាល័យក៏ដូចជាជំនួយបច្ចេកទេស និងហិរញ្ញវត្ថុផងដែរ។
លោក SokSopheakmonkol ជានាយកប្រតិបត្តិ និងជាសហស្ថាបនិករបស់ Codingate បានមានប្រសាសន៍ថា៖ «វាគឺជាបេសកកម្មរបស់យើងក្នុងការលើកកម្ពស់គំនិតអាជីវកម្មរបស់យុវជនតាមរយៈ ICT។ យើងក៏សប្បាយរីករាយផងដែរចំពោះផលប្រយោជន៍ជាសាធារណៈដែលគំនិតច្នៃប្រឌិតទាំងនេះអាចនាំមកជូនដល់ប្រជាជនកម្ពុជា»។
កញ្ញា នារី បន្តអភិវឌ្ឍ Weddingate បានរៀបចំប្រព័ន្ធចម្រោះចោលមេរោគ និងបន្ថែមលក្ខណៈពិសេសជាច្រើន។ កំណែប្រែបច្ចុប្បន្ននៃវេបសាយ និងកម្មវិធីនេះអនុញ្ញាតឲ្យអ្នកប្រើប្រាស់ស្វែងរក និងទំនាក់ទំនងអ្នកផ្គត់ផ្គង់សេវាកម្មដែលជាដៃគូនៃកម្មវិធីដូចជាសេវាផ្តល់ម្ហូបអាហារធ្នួង និងអ្នករៀបផ្កា។ វាក៏រួមបញ្ចូលនូវមុខងារប្រព័ន្ធផ្សព្វផ្សាយសង្គមដែលដៃគូភ្ជាប់ពាក្យនឹងគ្នាហើយអាចប្រើដើម្បីប្រាប់ និងរំឭកមិត្តភ័ក្តិរបស់ពួកគេថាថ្ងៃសំខាន់របស់ពួកគេកំពុងតែខិតជិតមកដល់ ឬអញ្ជើញពួកគេទៅពិធីមង្គលការតាមរយៈអ៊ីមែល និងហ្វេសប៊ុក។
យោងតាមកញ្ញា នារី កម្មវិធី Weddingate ត្រូវបានគេទាញយកជាង ២៥០ ដងដើម្បីដំណើរការលើប្រព័ន្ធប្រតិបត្តិការ Android ឬ IOS ចាប់តាំងពីការសម្ភោធ ៤ ខែមុន។
ប៉ុន្តែការអភិវឌ្ឍនៅតែបន្ត។ កញ្ញាបាននិយាយថា កញ្ញាគ្រោងនឹងដាក់បញ្ចូលមុខងារ «អំណោយអាពាហ៍ពិពាហ៍» ដែលភ្ញៀវអាចផ្ញើប្រាក់ចងដៃទៅឲ្យគូស្នេហ៍ទើបនឹងរៀបការដោយប្រើសេវាកម្មបង់ប្រាក់អេឡិចត្រូនិកដូចជា Wing ឬ Pi Pay។នាងក៏ចង់បន្ថែម «កំណត់ហេតុស្នេហា» ដែលជាមុខងារមួយដែលគូស្វាមីភរិយាអាចកត់ត្រានូវគ្រាដ៏គួរឲ្យចងចាំរបស់ពួកគេ និងការរំឭកពួកគេអំពីខួបអាពាហ៍ពិពាហ៍ និងព្រឹត្តិការណ៍ផ្សេងទៀតរបស់ពួកគេ។
កញ្ញាបាននិយាយថាមុខងារថ្មីនេះមានគោលបំណងក្នុងការពង្រីកផលប្រយោជន៍ដែលកម្មវិធីនេះអាចផ្តល់ឲ្យបាន។
អ្នកនាងបាននិយាយថា៖ «ខ្ញុំមិនចង់បង្កើតកម្មវិធីដែលមនុស្សទាំងអស់នឹងលុបចោលភ្លាម បន្ទាប់ពីថ្ងៃរៀបអាពាហ៍ពិពាហ៍របស់ពួកគេនោះទេ»។ នាងបន្តថា៖ «ខ្ញុំចង់ឲ្យ Weddingate ក្លាយទៅជាកម្មវិធីមួយដែលមនុស្សគ្រប់គ្នារក្សាទុកជាប់រហូតនៅក្នុងទូរស័ព្ទរបស់ពួកគេព្រោះវាបានបង្ហាញពីភក្តីភាពពិតប្រាកដក្នុងក្តីស្រឡាញ់ដ៏ស្មោះស្ម័គ្រជាមួយគ្នា»៕
