ការមកដល់នៃធនាគារចល័តបានផ្តល់ឲ្យអ្នកប្រើប្រាស់ស្មាតហ្វូននូវមធ្យោបាយមួយដើម្បីចៀសវាងការតម្រង់ជួរចាំនៅតាមសាខាធនាគារក្នុងស្រុកនានា និងដោះស្រាយតម្រូវការផ្នែកធនាគាររបស់ពួកគេគ្រប់ទីកន្លែងទាំងអស់។
កម្មវិធីស្មាតហ្វូនឥឡូវនេះជាផលិតផលស្តង់ដារសម្រាប់ធនាគារពាណិជ្ជកម្ម និងគ្រឹះស្ថានមីក្រូហិរញ្ញវត្ថុភាគច្រើននៅក្នុងប្រទេសកម្ពុជា ហើយសម្រាប់អតិថិជនជាច្រើននាក់ វាគឺជាកត្តាសំខាន់មួយដែលកំណត់ការពេញចិត្តរបស់ពួកគេជាមួយស្ថាប័នហិរញ្ញវត្ថុណាមួយ។
សេវាកម្មមូលដ្ឋានដូចជាការផ្ទេរប្រាក់នៅតាមធនាគារ និងពិនិត្យមើលចំនួនទឹកប្រាក់ ឬ ប្រវត្តិនៃការផ្ទេរប្រាក់ គឺសុទ្ធតែជាលក្ខណៈទូទៅសម្រាប់កម្មវិធីធនាគារទាំងអស់ដែលត្រូវបានយកមកវាយតម្លៃនៅក្នុងអត្ថបទនេះ។
ចំណុចសំខាន់នៃភាពខុសគ្នារវាងវេទិកានីមួយៗ គឺផ្អែកទៅលើអ្វីដែលពួកគេអាចផ្តល់ជូនលើសពីសេវាកម្មមូលដ្ឋានទាំងនេះ។ ឧទាហរណ៍កម្មវិធីខ្លះផ្តល់លទ្ធភាពទូទាត់ជាមួយទូរស័ព្ទស្មាតហ្វូនរបស់អ្នក ដោយប្រើប្រាស់កូដ QR ឬដើម្បីទូទាត់វិក្កយបត្រដោយផ្ទាល់តាមរយៈកម្មវិធីតែម្តង។
ធនាគារ ABA
ជាមួយនឹងការបើកដំណើរការកម្មវិធីធនាគារចល័តលើទូរស័ព្ទស្មាតហ្វូនជំនាន់ទី ២ របស់ខ្លួនកាលពីដើមខែនេះធនាគារ ABA ផ្តល់ជូននូវផលិតផលដែលប្រកបដោយវិជ្ជាជីវៈ មិនស្មុគស្មាញ និងទូលំទូលាយ ដែលធ្វើឲ្យប្រតិបត្តិការធនាគារកាន់តែងាយស្រួលសម្រាប់អតិថិជនរបស់ពួកគេ។
គេហទំព័រដំបូងរបស់កម្មវិធីដែលឃើញនៅពេលចូលទៅដល់ភ្លាមបង្ហាញពីនិមិត្តសញ្ញាសេវាកម្មជាច្រើនដែលអតិថិជនអាចចូលទៅប្រើប្រាស់សេវាហិរញ្ញវត្ថុទាំង ៧ ដូចជាការចេញប័ណ្ណទូទាត់ប្រាក់ជាក់លាក់ក្នុងទូរស័ព្ទ ឬការបើកគណនីបញ្ញើមានកាលកំណត់ថ្មី ឬគណនីសន្សំដែលជាលក្ខណពិសេសមានតែក្នុងកម្មវិធីនៃធនាគារ ABA តែប៉ុណ្ណោះ។
ខាងក្រោមនេះមានប៊ូតុង ២ ពណ៌ធំៗដែលមានពណ៌ឆើតៗដើម្បីផ្តល់ជូននូវការផ្ទេរប្រាក់រហ័ស ប្លង់គំរូដែលបង្កើតដោយអ្នកប្រើសម្រាប់ប្រតិបត្តិការដែលពួកគេឧស្សាហ៍ប្រើប្រាស់ដូចជាការបង់វិក្ក័យបត្រ ឬបញ្ចូលលុយក្នុងទូរស័ព្ទជាដើម។ កម្មវិធីរបស់ធនាគារ ABA មានភាពលេចធ្លោនៅក្នុងសោភ័ណភាពដ៏គួរឲ្យទាក់ទាញរបស់ខ្លួនការឌីហ្សាញត្រឹមត្រូវ និងការផ្តល់សេវាកម្មដ៏ធំទូលាយ។ កម្មវិធីក៏ទទួលបានពិន្ទុវាយតម្លៃពីអ្នកប្រើប្រាស់ខ្ពស់បំផុតនៅលើ Google Play store ក្នុងចំណោមកម្មវិធីចំនួន ៥ ដែលលើកយកមកនៅក្នុងអត្ថបទនេះ។
ធនាគារអេស៊ីលីដា
ជាងមួយឆ្នាំមុននេះ អេស៊ីលីដាបានធ្វើបច្ចុប្បន្នភាពកម្មវិធីធនាគារចល័តរបស់ខ្លួនពីអេស៊ីលីដាយូនីធី ទៅអេស៊ីលីដាយូនីធីទាន់ចិត្ត ដើម្បីបង្កើនបទពិសោធរបស់អ្នកប្រើប្រាស់។ មុនពេលចូលទៅក្នុងគណនី កម្មវិធីនេះបង្ហាញនិមិត្តសញ្ញានៃសេវាកម្ម ដែលមិនទាក់ទងនឹងគណនេយ្យដូចជាការបង្ហាញទីតាំងអេធីអឹម ឬសាខាធនាគារ និងម៉ាស៊ីនគណនាអត្រាប្តូរប្រាក់។
នៅពេលដែលចូលក្នុងគណនីហើយ អ្នកប្រើប្រាស់ត្រូវបានបង្ហាញនូវនិមិត្តសញ្ញាសេវាកម្មចំនួន ៦ ទៀតសម្រាប់ការចូលទៅកាន់សេវាកម្មហិរញ្ញវត្ថុរបស់ធនាគាររួមទាំងជម្រើសដ៏ពេញនិយមជាច្រើនទៀតដូចជាការបង់វិក្កយបត្រ ការដកប្រាក់តាមម៉ាស៊ីនអេធីអឹមដោយមិនចាំបាច់ប្រើប្រាស់កាត និងបញ្ចូលទឹកប្រាក់ក្នុងទូរស័ព្ទ។ ប្លង់របស់កម្មវិធីគឺមានភាពងាយស្រួលក្នុងការប្រើប្រាស់ សូម្បីតែអ្នកប្រើប្រាស់វាជាលើកដំបូងក៏មិនមានការលំបាកក្នុងការរៀនប្រើប្រាស់ដោយខ្លួនឯងនោះដែរ។
កម្មវិធីថ្មីបំផុតរបស់អេស៊ីលីដា គឺមានប្រសិទ្ធភាព មានភាពសាមញ្ញ និងជាក់ស្តែង ហើយផ្តល់ជូនអតិថិជននូវផលិតផលងាយនឹងប្រើប្រាស់ដែលមានគ្រប់តម្រូវការផ្នែកធនាគារប្រចាំថ្ងៃរបស់ពួកគេ។
ធនាគារ Maybank កម្ពុជា
កម្មវិធី Maybank KH ផ្តល់ជូននូវបទពិសោធដ៏គួរឲ្យពេញចិត្តសម្រាប់អ្នកប្រើប្រាស់ជាមួយនឹងលក្ខណៈពិសេសជាច្រើនដែលធ្វើឲ្យវាមានភាពលេចធ្លោ។ ផ្ទៃដំបូងគេនៃកម្មវិធីគឺត្រូវបានរចនាឡើងយ៉ាងទាក់ទាញដោយប្រើប្រាស់ពណ៌លឿង និងពណ៌ខ្មៅដែលជាពណ៌សម្គាល់របស់ធនាគារនេះ។ ទំព័រចូលទៅកាន់គណនីផ្តល់នូវសេវាកម្មមិនទាក់ទងនឹងគណនេយ្យជាច្រើន ពិសេសគឺការផ្សព្វផ្សាយរបៀបរស់នៅ និងទីតាំង ATM ឬសាខាធនាគារសម្រាប់បទពិសោធដែលកាន់តែរស់រវើកថែមទៀត។
នៅពេលចូលទៅក្នុងគណនី កម្មវិធីនេះបានបង្ហាញនិមិត្តសញ្ញារាងជារង្វង់ដើម្បីប្រើប្រាស់សេវាកម្មហិរញ្ញវត្ថុចំនួន ៤ របស់ធនាគារដែលសេវាកម្មមួយប្លែកខុសគេនៅក្នុងនោះគឺជាការផ្ទេរប្រាក់រវាងធនាគារ ២ ខុសគ្នា និងសេវាកម្មបន្ថែមទៀតនៅលើគេហទំព័រនេះ។ លើសពីនេះទៀតការអ៊ីនគ្រីបស្រទាប់សុវត្ថិភាព Socket Layer 256-bit ធានានូវភាពការពារ និងសុវត្ថិភាពទិន្នន័យលើសពីកម្រិតស្តង់ដារទៅទៀត។ ជម្រើសដ៏ល្អនៃលក្ខណពិសេសដែលមានទាំងស្តង់ដារ និងលក្ខណៈខុសប្លែករួមជាមួយនឹងការឌីហ្សាញគួរឲ្យទាក់ទាញធ្វើឲ្យអតិថិជនមានភាពសប្បាយរីករាយក្នុងការប្រើប្រាស់កម្មវិធីទូរស័ព្ទ Maybank KH។
ធនាគារពាណិជ្ជកម្មក្រៅប្រទេសនៃកម្ពុជា(FTB)
កម្មវិធី FTBMohaBot របស់ធនាគារពាណិជ្ជកម្មក្រៅប្រទេសនៃកម្ពុជាគឺជាកម្មវិធីងាយស្រួលប្រើដែលគ្របដណ្តប់លើតម្រូវការធនាគារប្រចាំថ្ងៃរបស់អតិថិជន។ នៅពេលបានចូលទៅកាន់គណនី អ្នកប្រើប្រាស់នឹងមើលឃើញ និមិត្តសញ្ញានៃសេវាកម្មចំនួន ៨ របស់ធនាគារដូចជាការទូទាត់តាមកូដ QR ការទូទាត់ប្រាក់តាមទូរស័ព្ទ ការផ្ទេរប្រាក់ និងបញ្ចូលទឹកប្រាក់ក្នុងទូរស័ព្ទជាដើម។
សេវាកម្មបន្ថែមអាចចូលទៅប្រើប្រាស់តាមរយៈប៊ូតុងពណ៌ខៀវ ដែលមានសញ្ញា “+” នៅជ្រុងខាងស្តាំនៃអេក្រង់។
សេវាកម្មផ្សេងៗដែលមិនទាក់ទងនឹងគណនេយ្យរួមមាន ការបង្ហាញទីតាំងអេធីអឹម និងសាខាធនាគារ និងការផ្សព្វផ្សាយរបៀបរស់នៅតាមតំបន់ដែលសេវាកម្មទាំង ២ នេះអាចចូលទៅប្រើប្រាស់បាននៅលើបារនៃបាតរបស់អេក្រង់។ កម្មវិធីប្រើប្រាស់ក្បាច់ឌីហ្សាញតិចតួចបំផុតដោយមានចន្លោះពណ៌សធំៗដែលរួមចំណែកដល់ភាពងាយស្រួលប្រើប្រាស់របស់វា។ ជាមួយនឹងការផ្តល់នូវសេវាកម្មយ៉ាងទូលំទូលាយ កម្មវិធីទូរស័ព្ទរបស់ធនាគារ FTB ធ្វើឲ្យប្រតិបត្តិការធនាគារកាន់តែងាយស្រួលសម្រាប់អតិថិជនរបស់ខ្លួន។
ធនាគារកម្ពុជាសាធារណៈ CPB
គឺផ្តល់សម្រាប់អតិថិជនរបស់ខ្លួនដើម្បីទទួលបាននូវសេវាកម្មស្តង់ដារជាច្រើនរបស់ធនាគារកម្ពុជាសាធារណៈនៅគ្រប់ទីកន្លែងទាំងអស់។ ការរចនារបស់កម្មវិធីគឺសាមញ្ញ ស្អាត ត្រង់ទៅត្រង់មកដែលធ្វើឲ្យវាមានភាពងាយស្រួលក្នុងការរុករក សូម្បីតែអ្នកប្រើប្រាស់ដំបូងក៏ដោយ។ មុននឹងចូលក្នុងគណនី អ្នកប្រើប្រាស់អាចមើលនៅសំណួរដែលសួរញឹកញាប់ ម៉ាស៊ីនគណនាអត្រាប្តូរប្រាក់ និងការបង្ហាញម៉ាស៊ីនអេធីអឹម ឬសាខាធនាគារ។ បន្ទាប់ពីចូលក្នុងគណនីអ្នកប្រើប្រាស់ កម្មវិធីនេះបង្ហាញពីក្រឡាពណ៌ចំនួន ៣ ដែលអតិថិជនអាចប្រើប្រាស់សេវាធនាគារដោយចុចទៅលើពួកគេបាន។
បើនិយាយតាមជាក់ស្តែង CPB ផ្តល់ជូននូវជម្រើសសេវាកម្មហិរញ្ញវត្ថុតិចជាងកម្មវិធីដែលបានលើកឡើងនៅក្នុងអត្ថបទនេះ។ ទោះជាយ៉ាងណាក៏ដោយ សេវាមួយដែលផ្តល់ឲ្យគឺការត្រួតពិនិត្យសៀវភៅសែកដែលជាសេវាកម្មដែលមិនត្រូវបានផ្តល់ដោយកម្មវិធីណាមួយរបស់ធនាគារផ្សេងៗទៀតនោះទេ។
នៅពីលើប្លង់ជួរដេកដែលមានសេវាកម្មនោះមានឈ្មោះអ្នកប្រើប្រាស់ និងកាលបរិច្ឆេទចូលចុងក្រោយក៏ដូចជាសេវាកម្មដែលមិនទាក់ទងនឹងគណនេយ្យ គឺបានបញ្ជាក់នៅខាងលើដែរ។ CPB ទទួលបានជោគជ័យក្នុងការផ្តល់ជូនអតិថិជននូវដំណោះស្រាយមិនស្មុគស្មាញសម្រាប់តម្រូវការធនាគារ ដែលចាំបាច់បំផុតរបស់ពួកគេនៅក្នុងបរិយាកាសមួយមានសណ្តាប់ធ្នាប់ និងងាយស្រួលប្រើ។
ហត្ថាកសិករលីមីធីត
ដោយត្រូវបានទិញយកថ្មីៗនេះដោយធនាគារ Krunsgri របស់ប្រទេសថៃ ហត្ថាកសិករគឺជាគ្រឹះស្ថានមីក្រូហិរញ្ញវត្ថុ ដែលធំជាងគេលំដាប់ទី ២ នៅកម្ពុជា។ កម្មវិធីទូរស័ព្ទស្មាតហ្វូនរបស់ពួកគេគឺមានភាពទាក់ទាញភ្នែក និងងាយស្រួលក្នុងការប្រើដែលជាទូទៅនាំឲ្យបទពិសោធអ្នកប្រើប្រាស់មានភាពវិជ្ជមាន។ ជួរដេកដែលបំពាក់ដោយពណ៌ស្រស់ឆើតជាច្រើននៅបាតអេក្រង់ Login ផ្តល់ជូននូវសេវាកម្មដែលមិនទាក់ទងទៅនឹងគណនេយ្យច្រើនជាងកម្មវិធីស្មាតហ្វូនធនាគារផ្សេងៗទៀតដែលបានលើកឡើងក្នុងអត្ថបទនេះ។ ចំណុចមួយដែលគួរឲ្យចាប់អារម្មណ៍គឺប្រដាប់គណនាអត្រាការប្រាក់ដែលជាលក្ខណពិសេសមួយនៃកម្មវិធីស្មាតហ្វូនរបស់ហត្ថាកសិករ។
បន្ទាប់ពីអ្នកប្រើប្រាស់ចូលទៅកាន់គណនីរបស់ខ្លួនហើយ ពួកគេត្រូវបានបង្ហាញពីបទសង្ខេបទូទៅនៃគណនីរបស់ពួកគេ។ ជួរដេកនៃផ្ទាំងពណ៌ខៀវនៅបាតអេក្រង់ ផ្តល់ជូននូវសេវាកម្មហិរញ្ញវត្ថុផ្សេងទៀតរបស់ធនាគារ ដែលរួមមានការទូទាត់វិក្កយបត្រ និងបញ្ចូលទឹកប្រាក់ក្នុងទូរស័ព្ទដៃ។ ចំណុចមិនល្អមួយនៃការដាក់ប្លង់ជួរដេកគឺថាគ្រប់ជម្រើសនៃសេវាកម្មទាំងអស់មិនត្រូវបានបង្ហាញក្នុងប្លង់តែមួយនោះទេ ដែលអាចធ្វើឲ្យអ្នកប្រើមួយចំនួនពិបាកស្វែងរកសេវាកម្មដែលខ្លួនចង់បាន។ ក្រៅពីនេះកម្មវិធីស្មាតហ្វួនរបស់ HKL នៅតែជាឧបករណ៍ដ៏មានអានុភាពដែលបំពេញតម្រូវការធនាគារប្រចាំថ្ងៃរបស់អតិថិជន។
ប្រាសាក់
ប្រាសាក់ គឺជាគ្រឹះស្ថានមីក្រូហិរញ្ញវត្ថុដែលធំជាងគេនៅក្នុងប្រទេសកម្ពុជា ហើយកម្មវិធីស្មាតហ្វូន Prasac MB របស់ពួកគេផ្តល់ជូននូវជម្រើសនៃសេវាកម្មដ៏ធំទូលាយដល់អតិថិជននៅក្នុងបរិយាកាសស្អាតបាត និងងាយស្រួលដល់អ្នកប្រើប្រាស់របស់ពួកគេ។ កម្មវិធីនេះបានប្រើប្រាស់ពណ៌បៃតង និងពណ៌ទឹកក្រូចរបស់ខ្លួនយ៉ាងល្អដែលអាចស្តែងចេញយ៉ាងច្បាស់ទៅកាន់អ្នកប្រើប្រាស់នៅពេលដែលពួកគេបើកមើលកម្មវិធីភ្លាមៗ។
មុនពេលចូលក្នុងគណនីផ្ទាល់ខ្លួនអ្នកប្រើប្រាស់អាចមើលឃើញម៉ាស៊ីនអេធីអឹម / ទីតាំងសាខា និងព័ត៌មានទំនាក់ទំនងរបស់ធនាគារតាមរយៈជួរដេកពណ៌បៃតងនៅបាតអេក្រង់។ បន្ទាប់ពីចូលគណនីរួចហើយអ្នកប្រើប្រាស់អាចចូលទៅកាន់សេវាកម្មហិរញ្ញវត្ថុ ការកំណត់ និងព័ត៌មានបន្ថែមរបស់ធនាគារតាមរយៈជួរដេកពណ៌បៃតងដែលបានជំនួសជួរដេកបាតអេក្រង់មុន។
យ៉ាងណាក៏ដោយដូចដែលបានបញ្ជាក់ជាមួយប្រាសាក់ ប្លង់បែបនេះអាចលាក់បាំងសេវាដែលអ្នកប្រើប្រាស់ចង់បានផងដែរ។ ថ្វីបើកម្មវិធីរបស់ប្រាសាក់ផ្តល់ជូននូវសេវាកម្មហិរញ្ញវត្ថុល្អៗ តែអ្វីដែលគួរឲ្យកត់សម្គាល់គឺថាពួកគេគិតប្រាក់កម្រៃសេវាប្រចាំខែចំនួន $០,៥០ ឬ ២០០០ រៀលសម្រាប់សេវាធនាគារតាមទូរស័ព្ទនេះ៕
Jacob Gardner