ការដឹកជញ្ជូនផ្លូវគោកទៅកាន់អាកាសយានដ្ឋានអន្តរជាតិទាំងបីរបស់ប្រទេសកម្ពុជាមានភាពប្រសើរឡើងក្នុងអំឡុងប៉ុន្មានឆ្នាំចុងក្រោយនេះហើយសេវាកម្មថ្មីមួយចំនួនត្រូវបានបង្កើតឡើង ដែលផ្តល់ឲ្យអ្នកដំណើរនូវជម្រើសបន្ថែមទៀតដើម្បីតភ្ជាប់រវាងព្រលានយន្តហោះ និងទីប្រជុំជន។ ខាងក្រោមនេះជាការសង្ខេបនៃជម្រើសសម្រាប់អ្នកដែលធ្វើដំណើរទៅព្រលានយន្តហោះ។
ភ្នំពេញ
អាកាសយានដ្ឋានអន្តរជាតិភ្នំពេញមានចម្ងាយប្រហែល ១២ គីឡូម៉ែត្រទៅភាគខាងលិចនៃទីក្រុងស្ថិតនៅលើផ្លូវជាតិលេខ ៤។ ក្នុងនាមជាព្រលានយន្តហោះធំជាងគេនៅក្នុងប្រទេសកម្ពុជា អាកាសយានដ្ឋាននេះមានជម្រើសដឹកជញ្ជូនច្រើនជាងអាកាសយានដ្ឋានដទៃទៀតនៅក្នុងប្រទេស។ ចរាចរណ៍គឺជាកត្តាដ៏សំខាន់មួយនៅក្នុងរដ្ឋធានីដូច្នេះពេលវេលាធ្វើដំណើរទៅ និងមកពីព្រលានយន្តហោះអាចមានរយៈពេលចន្លោះពី ៣០ នាទីទៅជាង ១ ម៉ោង អាស្រ័យលើជម្រើសមធ្យោបាយធ្វើដំណើរ និងពេលព្រឹក ពេលថ្ងៃ ឬពេលយប់។
រថយន្តក្រុងសាធារណៈ ៖
ផ្លូវឡានក្រុងខ្សែទី ៣ រត់ចេញពីចំណតរថយន្តនៅផ្លូវខាងក្រៅច្រកអាកាសយានដ្ឋានទៅផ្សាររាត្រីនៅតំបន់មាត់ទន្លេ។ ឡានក្រុងរត់ពីម៉ោង ៥:៣០ ព្រឹករហូតដល់ម៉ោង ៨:៣០ នាទីល្ងាចជារៀងរាល់ថ្ងៃរៀងរាល់ ១៥ នាទីម្តង។ ការធ្វើដំណើរទៅផ្សាររាត្រីអាចចំណាយពេលពី ៣០ នាទីទៅប្រហែល ១ ម៉ោងដោយអាស្រ័យលើលក្ខខណ្ឌចរាចរណ៍។ ឡានក្រុងមានបំពាក់ម៉ាស៊ីនត្រជាក់ហើយមានតម្លៃត្រឹមតែ ១,៥០០ រៀល (០.៣៧ ដុល្លារ)ប៉ុណ្ណោះ។ មិនមានថ្លៃបន្ថែមសម្រាប់ឥវ៉ាន់ទេ ប៉ុន្តែក៏មិនមានចន្លោះទុកឥវ៉ាន់ច្រើនដែរ។
ឡានក្រុងចល័ត ៖
KK Star Airport Express ប្រតិបត្តិដំណើរការផ្លូវរថយន្ដក្រុងចំនួនពីរសម្រាប់ធ្វើដំណើរទៅ និងមកពីព្រលានយន្តហោះ។ ខ្សែពណ៌ក្រហមរត់រៀងរាល់ ៣០ នាទីរៀងរាល់ថ្ងៃចាប់ពីម៉ោង ៩ ព្រឹក ដល់ ៧:៤០ ល្ងាចពីព្រលានយន្តហោះទៅកាន់ ផ្ទះសំណាក់ Toyoko ក្នុងសង្កាត់ទន្លេបាសាក់។ ខ្សែពណ៌ទឹកក្រូចរត់រៀងរាល់ម៉ោងចាប់ពីម៉ោង ៩:៤៥ ព្រឹករហូតដល់ម៉ោង ៩:៣៥ នាទីល្ងាច រៀងរាល់ថ្ងៃទៅកាន់សណ្ឋាគារសូហ្វីតែលក្បែរផ្សារទំនើបអ៊ីអន។ សំបុត្រមានតម្លៃ ៥ ដុល្លារ ហើយអាចទិញបាននៅតាមចំណតតាក់ស៊ីនៅឯអាកាសយានដ្ឋានពីសណ្ឋាគារដែលចុះកិច្ចសន្យាជាមួយអាកាសយានដ្ឋាន ឬពីអ្នកបើកបរនៅពេលដែលឡើងជិះ។
រថភ្លើង ៖
ចំណតរថភ្លើងដែលទើបតែបើកដំណើរការកាលពីដើមខែមេសានេះ រថភ្លើងដឹកអ្នកដំណើររត់ចេញពីស្ថានីយ៍រថភ្លើងនៅលើមហាវិថីព្រះមុនីវង្ស ទៅកាន់ព្រលានយន្តហោះផ្ទាល់ចម្ងាយ ១០ គីឡូម៉ែត្រ ដែលចំណាយពេល ៤៥ នាទី ដើម្បីទៅដល់។ សេវាផ្លូវរថភ្លើង ដែលធ្វើដំណើរការ ២៤ ម៉ោងក្នុងមួយថ្ងៃដោយរថភ្លើងចាកចេញរៀងរាល់ ២០ នាទីគឺមិនគិតថ្លៃទេរហូតដល់ខែកក្កដា។ ក្រុមហ៊ុនអាកាសចរណ៍កំពុងសាកល្បងការអនុញ្ញាតឲ្យអ្នកដំណើរចាកចេញអាច check-in ជើងហោះហើរនៅស្ថានីយរថភ្លើងតែម្តង។
តាក់ស៊ី ម៉ូតូកង់បី និងម៉ូតូឌុប ៖
សេវាតាក់ស៊ីតម្លៃម៉ៅ គឺអាចរកជិះបានពីចំណតតាក់ស៊ីនៅព្រលានយន្តហោះនៅខាងក្រៅកន្លែងអ្នកដំណើររង់ចាំនៅព្រលានយន្តហោះដោយរថយន្តតាក់ស៊ីធុនតូចដែលមានតម្លៃពី ១២-១៥ ដុល្លារ អាស្រ័យលើទិសដៅដែលអ្នកដំណើរជ្រើសរើស។ ម៉ូតូកង់បីប្រចាំអាកាសយានដ្ឋាននៅចំណតនៅខាងក្រៅកន្លែងអ្នកដំណើររង់ចាំមានតម្លៃម៉ៅក្នុងចន្លោះ ៩-១២ ដុល្លារអាស្រ័យលើទិសដៅផងដែរ។
អ្នកដំណើរក៏អាចដើរចេញពីតំបន់ជុំវិញអគារស្ថានីយអាកាសយានដ្ឋានទៅផ្លូវធំ (ផ្លូវជាតិលេខ ៤) ហើយរកម៉ូតូកង់បីជិះ ឬម៉ូតូតាមផ្លូវដែលមានតម្លៃថោកជាងនេះ គឺប្រហែល ៦ ដុល្លារសម្រាប់ម៉ូតូកង់បី និង ៣ ដុល្លារសម្រាប់ម៉ូតូឌុបទៅទីប្រជុំជន។
ភាគច្រើនតម្លៃកាន់តែថោកបើសិនជាធ្វើដំណើរពីទីក្រុងទៅព្រលានយន្តហោះវិញ ដោយឡានតាក់ស៊ីឯកជនកក់តាមសណ្ឋាគារ ដែលមានតម្លៃ ១០ ដុល្លារ ហើយម៉ូតូកង់បី និងម៉ូតូឌុបធម្មតាតាមដងផ្លូវ អាចបញ្ចុះតម្លៃដល់ ៥ ដុល្លារ ឬ ២ ទៅ ៣ ដុល្លាររៀងគ្នា។
ឡានតាក់ស៊ីក៏អាចកក់ទុកតាមអ៊ីនធឹណិតផងដែរ តាមរយៈកម្មវិធី និងគេហទំព័រ BookMeBus ដែលមានអត្រាចាប់ពី ១៥ ដុល្លារ សម្រាប់រថយន្ត SUV៤ កៅអី។ រថយន្តដែលអាចផ្ទុកអ្នកដំណើរបានច្រើនក៏អាចរកបានដែរតែនៅក្នុងតម្លៃខ្ពស់។ លើសពីនេះទៅទៀតសណ្ឋាគារធំៗមួយចំនួនអាចផ្តល់ការដឹកជញ្ជូនពីព្រលានយន្ដហោះដោយឥតគិតថ្លៃ ឬការដឹកជញ្ជូនតាមឡានក្រុង ប៉ុន្តែត្រូវស្នើរសុំជាមុន។
កម្មវិធីហៅរថយន្តលើស្មាតហ្វូន ៖
ជម្រើសមួយទៀតគឺប្រើកម្មវិធីស្មាតហ្វូន ដូចជាកម្មវិធី Grab ឬ PassApp។ តម្លៃខុសៗគ្នា ប៉ុន្តែអាចប៉ាន់ស្មានថានឹងបង់ប្រាក់ប្រហែល ៧ ដុល្លារសម្រាប់រថយន្ត SUV សម្រាប់ ៤ នាក់ និងតម្លៃប្រហែល ៦ ដុល្លារសម្រាប់រថយន្តធុនតូច និង ៥ ដុល្លារសម្រាប់ម៉ូតូកង់បី និង ៤ ដុល្លារសម្រាប់ម៉ូតូកង់បីទំហំតូច ដើម្បីធ្វើដំណើរទៅមកពីទីប្រជុំជន។
អ្នកអាចត្រូវរង់ចាំរយៈពេលមួយស្របក់ក្នុងការរង់ចាំអ្នកបើកបរ។ អ្នកខ្លះចូលទៅបរិវេណអាកាសយានដ្ឋាឋានផ្ទាល់តែម្តង តែអ្នកបើកបរខ្លះទៀតនឹងឈប់មុខព្រលានយន្តហោះដើម្បីចាំអ្នក។ អ្នកដំណើរដែលធ្វើដំណើរចេញពីប្រទេសអាចហៅរថយន្តគ្រប់ទីកន្លែងនៅទីក្រុង។
សៀមរាប
ព្រលានយន្តហោះអន្តរជាតិសៀមរាបអង្គរស្ថិតលើផ្លូវជាតិលេខ ៦ មានចម្ងាយប្រហែល ១០ គីឡូម៉ែត្រភាគពាយព្យនៃក្រុងសៀមរាប។ ការធ្វើដំណើរពីអាកាសយានដ្ឋានទៅទីប្រជុំជនត្រូវចំណាយពេលប្រហែល ២០ ទៅ ៣០ នាទី អាស្រ័យលើចរាចរណ៍ និងមធ្យោបាយធ្វើដំណើរ។
តាក់ស៊ី ៖
រថយន្តតាក់ស៊ីតម្លៃម៉ៅអាចត្រូវបានហៅបាននៅឯចំណតតាក់ស៊ីនៅខាងក្រៅអគាររង់ចាំដោយមានគម្រោងតម្លៃពីរផ្សេងគ្នាមួយសម្រាប់ម៉ោងនៅពេលថ្ងៃ (៦ ព្រឹកដល់ ១១ យប់) និងមួយទៀតសម្រាប់ម៉ោងពេលយប់ (ចាប់ពីម៉ោង ១១ ដល់ ៦ ព្រឹក)។ ក្នុងអំឡុងពេលថ្ងៃរថយន្ដតាក់ស៊ីមានតម្លៃ ១០ ដុល្លារ ដែលរថយន្តនេះមាន ៤ កៅអី ហើយមានកន្លែងដាក់ឥវ៉ាន់បាន ២ វ៉ាលី។ ឡានតាក់ស៊ីមានតម្លៃ ១៥ ដុល្លារ មានកៅអី ៦+ ហើយមានចន្លោះច្រើនសម្រាប់ដាក់ឥវ៉ាន់។ តម្លៃសំបុត្រកើនឡើង ៥ ដុល្លារនៅពេលយប់។
រថយន្តតាក់ស៊ីដឹកទំនិញតូចៗក៏អាចត្រូវបានកក់តាមអ៊ីនធឺណិតផងដែរ តាមរយៈកម្មវិធី និងគេហទំព័រ BookMeBus ដែលមានអត្រាចាប់ពី ២២ ដុល្លារ។ លើសពីនេះទៀតសណ្ឋាគារធំៗមួយចំនួនអាចផ្តល់ជូននូវការដឹកជញ្ជូនដោយរថយន្ត ឬរថយន្តដឹកទំនិញខ្នាតតូចដោយឥតគិតថ្លៃទៅមកពីព្រលានយន្តហោះ។
ម៉ូតូកង់បី និងម៉ូតូឌុប ៖
ម៉ូតូកង់បីតម្លៃម៉ៅក៏អាចត្រូវបានរៀបចំពីចំណតតាក់ស៊ីប្រចាំព្រលានយន្តហោះសម្រាប់ ៩ ដុល្លារនៅពេលថ្ងៃ និង ១៤ ដុល្លារនៅពេលយប់។ អ្នកក៏អាចដើរទៅផ្លូវធំនៅខាងមុខព្រលាន និងហៅម៉ូតូកង់បី ឬម៉ូតូឌុបបានដែរ។ ការចំណាយគឺថោកជាងការហៅនៅក្នុងព្រលានយន្តហោះដែលមានតម្លៃជាធម្មតា ៥ ដុល្លារ ឬ ២ ដុល្លាររៀងគ្នា ប៉ុន្តែអ្នកអាចត្រូវរង់ចាំរយៈពេលយូរក្នុងការស្វែងរករថយន្តឆ្លងកាត់ដើម្បីហៅ។
ក្រុងព្រះសីហនុ
អាកាសយានដ្ឋានអន្តរជាតិសីហនុស្ថិតនៅចម្ងាយប្រហែល ២៥ គីឡូម៉ែត្រ ខាងកើតក្រុងព្រះសីហនុនៅលើផ្លូវជាតិលេខ ៤។ ជម្រើសនៃការធ្វើដំណើរទៅមកពីអាកាសយានដ្ឋាន និងខេត្តព្រះសីហនុត្រូវមានការកំណត់ ដូច្នេះតម្លៃគឺមានភាពស្ថិតស្ថេរ។ បន្ទាប់ពីចុះពីលើយន្តហោះ តុសេវានៅក្បែរកន្លែងយកឥវ៉ាន់អាចជួយអ្នកក្នុងការរៀបចំយានយន្តធ្វើដំណើរបាន។ អាស្រ័យលើលក្ខខណ្ឌចរាចរ និងទីតាំងសណ្ឋាគាររបស់អ្នក មិនថានៅឆ្នេរជ័យជម្នះ ឆ្នេរសិរិនឌីភីធី ឬឆ្នេរអូត្រេះ នោះទេការធ្វើដំណើរអាចចំណាយពេលពី ២០ នាទីទៅមួយម៉ោង។
ឡានក្រុងចល័ត ៖
ក្រុមហ៊ុន United Ground Services (UGS) ធ្លាប់រៀបចំសេវាឡានក្រុងចល័តដឹកអ្នកដំណើរទៅកណ្តាលក្រុងក្នុងតម្លៃ ៥ ដុល្លារក្នុងម្នាក់ ប៉ុន្ដែសេវាឡានក្រុងនេះត្រូវបានផ្អាកបន្ទាប់ពីកិច្ចសន្យារបស់ក្រុមហ៊ុនជាមួយនឹងអាកាសយានដ្ឋានត្រូវបានបានផុតកំណត់ ហើយអ្នកតំណាងអាកាសយានដ្ឋានមិនប្រាកដថាគួរបន្តកុងត្រាឬអត់។
តាក់ស៊ី
ការធ្វើដំណើរក្នុងឡានតាក់ស៊ីរួមគ្នានឹងត្រូវចំណាយអស់ ៥ ដុល្លារក្នុងម្នាក់ រីឯការធ្វើដំណើរតាមឡានតាក់ស៊ីម្នាក់ឯងអាចចំណាយប្រាក់អស់ ២០ ដុល្លារ អាស្រ័យលើជំនាញតថ្លៃរបស់អ្នក។ ជម្រើសមួយទៀតគឺការកក់ឡានតាក់ស៊ីឯកជនតាមអ៊ីនធឺណិតតាមរយៈកម្មវិធី និងគេហទំព័រ BookMeBus ដែលមានតម្លៃចាប់ពី ២៥ ដុល្លារ។ សណ្ឋាគារ និងផ្ទះសំណាក់ខ្លះអាចផ្តល់ការដឹកជញ្ជូនដោយឥតគិតថ្លៃ ឬ ការបង់ពាក់កណ្តាលក្នុងការធ្វើដំណើរទៅមកពីព្រលានយន្តហោះ ប៉ុន្តែនេះត្រូវតែរៀបចំទុកជាមុន។
ម៉ូតូកង់បី និងម៉ូតូឌុប ៖
អ្នកនឹងរកឃើញម៉ូតូកង់បីនៅគ្រប់ទីកន្លែងនៅក្នុងទីក្រុង និងមានម៉ូតូកង់បីមួយចំនួនរង់ចាំពីរបីតាមព្រលានយន្តហោះក្នុងរយៈពេលមមាញឹក។ អ្នកបើកបរជាច្រើននាក់ត្រូវបានចុះឈ្មោះនៅក្នុងកម្មវិធី iTsumo និង PassApp ប៉ុន្តែនឹងបដិសេធមិនប្រើប្រាស់វាក្នុងការដឹកអ្នកដំណើរទៅមកលើព្រលានយន្ដហោះហើយសុខចិត្តយកតម្លៃម៉ៅ ១៥ ដុល្លារទៅវិញ។
ប្រសិនបើធ្វើដំណើរដោយមានឥវ៉ាន់តិច (ឧទាហរណ៍ដូចជាតែធ្វើដំណើរតែមួយថ្ងៃ) អ្នកប្រហែលជាអាចហៅម៉ូតូឌុបឆ្លងកាត់តាមផ្លូវជាតិលេខ ៤ ប៉ុន្តែកុំសង្ឃឹមថាអ្នកបើកបរនឹងរង់ចាំនៅខាងក្រៅព្រលានយន្តហោះឲ្យសោះ។ ភ្ញៀវទេសចរណ៍ធ្វើដំណើរម្នាក់ឯងមួយចំនួនបានរាយការណ៍អំពីការចំណាយលុយប្រហែល ៧ ដុល្លារលើម៉ូតូឌុបពីព្រលានយន្តហោះទៅទីក្រុង និង ៥ ដុល្លារសម្រាប់ការធ្វើដំណើរត្រឡប់ទៅព្រលានយន្តហោះវិញ៕
Jacob Gardner