.jpg)
ជាមួយនឹងការរីកចម្រើនវិស័យទេសចរណ៍ ក្រុមហ៊ុនអាកាសចរណ៍កាន់តែច្រើនបានចាប់អារម្មណ៍ចំពោះទីផ្សារកម្ពុជា ដែលធ្វើឱ្យទីផ្សារអាកាសចរណ៍កម្ពុជាមានការប្រកួតប្រជែងខ្លាំងឡើងជាលំដាប់។ ការធ្វើឱ្យប្រសើរឡើងនូវការតភ្ជាប់ផ្លូវអាកាស ជាពិសេសការរីកចម្រើននៃការហោះហើរទៅកាន់ប្រទេសចិននាពេលថ្មីៗនេះបានទាក់ទាញភ្ញៀវទេសចរជនជាតិចិនជាច្រើនឲ្យធ្វើដំណើរមកប្រទេសកម្ពុជា។
កាលពីឆ្នាំ ២០១៧ កម្ពុជាទទួលបានភ្ញៀវទេសចរបរទេស ៥,៦០ លាននាក់ ដោយក្នុងនោះប្រហែល ៦០ ភាគរយបានមកដល់តាមផ្លូវអាកាស។ អាកាសយានដ្ឋានអន្តរជាតិទាំង ៣ នៅភ្នំពេញ សៀមរាប និងក្រុងព្រះសីហនុ បានទទួលអ្នកដំណើរចំនួន ៨,៨ លាននាក់ដោយកើនឡើង ២៥ ភាគរយបើធៀបនឹងឆ្នាំ ២០១៦។
ចំនួនជើងហោះហើរសរុបបានកើនឡើងដល់ ៩០០០០ ដងកាលពីឆ្នាំមុន ហើយចំនួននេះត្រូវបានគេរំពឹងថា នឹងកើនឡើងបន្ថែមទៀតនៅឆ្នាំនេះ នៅពេលដែលក្រុមហ៊ុនអាកាសចរណ៍ថ្មីៗនឹងចាប់ផ្តើម ហើយក្រុមហ៊ុនដឹកជញ្ជូនដែលមានស្រាប់ក៏បង្កើនជើងហោះហើរ ឬបន្ថែមផ្លូវហោះហើរថ្មី។
បច្ចុប្បន្នមានក្រុមហ៊ុនអាកាសចរណ៍ប្រមាណ ៦០ ដែលកំពុងធ្វើប្រតិបត្តិការនៅកម្ពុជា ខណៈក្រុមហ៊ុនអាកាសចរណ៍យ៉ាងហោចណាស់ចំនួន ៦ ផ្សេងទៀតកំពុងរង់ចាំវិញ្ញាបនបត្រ AOC ដែលនឹងអនុញ្ញាតឱ្យពួកគេធ្វើការហោះហើរនៅក្នុងដែនអាកាសរបស់ព្រះរាជាណាចក្រកម្ពុជា។
យោងតាមលោក ស៊ិន ចាន់សេរីវុត្ថា អ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល (SSCA) ដែលជាស្ថាប័នទទួលខុសត្រូវក្នុងការអនុម័តវិញ្ញាបនបត្រ AOC បាននិយាយថា ការពង្រីកបញ្ជីឈ្មោះក្រុមហ៊ុនអាកាសចរណ៍ និងផ្លូវហោះហើរ បានធ្វើឱ្យគ្រប់គ្នាមានការចាប់អារម្មណ៍។
លោកមានប្រសាសន៍ថា៖ «ជាមួយនឹងចំនួនក្រុមហ៊ុនអាកាសចរណ៍ថ្មី ដែលចូលមកទីផ្សារអាកាសចរណ៍របស់យើង វានឹងមានការប្រកួតប្រជែងកាន់តែខ្លាំង ប៉ុន្តែវាជាការល្អដែលយើងនឹងមានការប្រកួតប្រជែងខ្លាំង ព្រោះវានឹងផ្តល់ជម្រើសបន្ថែមទៀតដល់អតិថិជន»។
លោកបានបន្តថា ក្រុមហ៊ុនអាកាសចរណ៍ចំនួន ៦ បានចាប់ផ្តើមដាក់ពាក្យសុំវិញ្ញាបនបត្រ AOC នៅកម្ពុជាដែលនឹងនាំឱ្យក្រុមហ៊ុនអាកាសចរណ៍ក្នុងស្រុកកើនឡើងដល់ទៅ ១៣។ ក្រុមហ៊ុនអាកាសចរណ៍ថ្មីចំនួន ២ គឺ MJ Airline និងក្រុមហ៊ុន Domrey Angkor Airline បានទទួលការអនុម័តពីរដ្ឋាភិបាលរួចហើយ ដោយរំពឹងថានឹងទទួលបានវិញ្ញាបនបត្រ AOC ហើយនឹងចាប់ផ្តើមបើកដំណើរការនៅចុងឆ្នាំនេះ។ ក្រុមហ៊ុនអាកាសចរណ៍ចំនួន ៤ ផ្សេងទៀត បានដាក់ពាក្យស្នើសុំដើម្បីធ្វើប្រតិបត្តិការផងដែរ។
ដូចក្រុមហ៊ុនអាកាសចរណ៍ក្នុងស្រុកជាច្រើនដែរ ក្រុមហ៊ុនអាកាសចរណ៍ MJ Airlines និងក្រុមហ៊ុន Domrey Angkor Airline គឺជាក្រុមហ៊ុនបណ្តាក់ទុនរួមគ្នារវាងវិនិយោគិនកម្ពុជា និងចិន។
លោក ចាន់សេរីវុត្ថា បានថ្លែងថា៖ «ក្រុមហ៊ុនអាកាសចរណ៍ទាំង ២ នេះចង់ទាក់ទាញភ្ញៀវទេសចរចិនទៅកាន់ទីផ្សារ អាកាសចរណ៍កម្ពុជា»។
ការរីកចម្រើនយ៉ាងឆាប់រហ័សនៃវិស័យអាកាសចរណ៍របស់កម្ពុជា ពិសេសក្នុងចំណោមក្រុមហ៊ុនដែលបានចុះបញ្ជីក្នុងស្រុកធ្វើឱ្យមានការប្រកួតប្រជែងគ្នាកាន់តែខ្លាំង ដោយសារតែក្រុមហ៊ុនអាកាសចរណ៍ជាច្រើនកំពុងមានវត្តមាននៅក្នុងទីផ្សារដ៏តូចមួយនេះ។
របាយការណ៍ពីមជ្ឈមណ្ឌលអាកាសចរណ៍អាស៊ីប៉ាស៊ីហ្វិក (CAPA) ដែលចេញផ្សាយកាលពីខែកុម្ភៈបានកត់សម្គាល់ថា យន្តហោះពាណិជ្ជកម្មសរុបរបស់កម្ពុជាបានកើនឡើងពីក្រុមហ៊ុនអាកាសចរណ៍ចំនួន ២ ដែលហោះហើរយន្តហោះចំនួន ៧ គ្រឿងក្នុងឆ្នាំ ២០១៣ ដល់ចំនួន ៧ ក្រុមហ៊ុន ដោយប្រើប្រាស់យន្តហោះចំនួន ៣០ គ្រឿង។ នៅចុងឆ្នាំនេះគេរំពឹងថានឹងមានយន្តហោះ ១៥ គ្រឿងទៀតចូលក្នុងទីផ្សារនេះ។
របាយការណ៍នេះបានឱ្យដឹងទៀតថា ៖ «អាកាសចរណ៍កម្ពុជានឹងបន្តពង្រីកយ៉ាងឆាប់រហ័សក្នុងរយៈពេល ២-៣ ឆ្នាំខាងមុខ ដោយសារចរាចរណ៍អ្នកធ្វើដំណើរកើនឡើងយ៉ាងឆាប់រហ័ស ជាពិសេសភ្ញៀវជនជាតិចិន»។
ទោះបីជាវិស័យទេសចរណ៍កម្ពុជា រីកចម្រើនជាមធ្យមជិត ៨ ភាគរយ ក្នុង ១ ឆ្នាំ បើគិតចាប់ពីឆ្នាំ ២០១៤ ដល់បច្ចុប្បន្នក៏ដោយ CAPA ព្រមានថា «វាពិបាកក្នុងការស្រមៃមើលទីផ្សារកម្ពុជា ដែលមានក្រុមហ៊ុនអាកាសចរណ៍ក្នុងស្រុកលើសពី ៥»។
ប្រទេសកម្ពុជាមានកេរ្ដិ៍ឈ្មោះថា ជាទីផ្សារងាយស្រួលបំផុតសម្រាប់ក្រុមហ៊ុនអាកាសចរណ៍ដើម្បីទទួលបានវិញ្ញាបនបត្រអាកាសចរណ៍ ប៉ុន្តែវាក៏អាចជាទីផ្សារលំបាកមួយដើម្បីទទួលបានប្រាក់ចំណេញ។ ក្រុមហ៊ុនអាកាសចរណ៍ Apsara International Air បានបាត់ខ្លួនក្នុងរយៈពេលតែប៉ុន្មានសប្តាហ៍ប៉ុណ្ណោះបន្ទាប់ពីបានចាប់ផ្តើមសេវាកម្មនៅឆ្នាំ ២០១៤ ដោយសារមានការខាតបង់យ៉ាងធ្ងន់ធ្ងរនៅក្នុងសង្គ្រាមតម្លៃជាមួយក្រុមហ៊ុនដឹកជញ្ជូនក្នុងស្រុកផ្សេងទៀត។
ក្រុមហ៊ុនអាកាសចរណ៍ក្នុងស្រុកត្រូវតែប្រកួតប្រជែងជាមួយក្រុមហ៊ុនអាកាសចរណ៍ក្នុងតំបន់អាស៊ី និងក្រុមហ៊ុនដឹកជញ្ជូនដែលមានតម្លៃថោកផ្សេងទៀតនៅលើផ្លូវអាកាសអន្តរជាតិ។
អ្នកជំនាញអាកាសចរណ៍ម្នាក់ដែលសុំមិនបញ្ចេញឈ្មោះបាននិយាយថា ទាំងផ្លូវហោះហើរជាតិ និងអន្តរជាតិជាទូទៅមិនមានផលចំណេញសម្រាប់ក្រុមហ៊ុនអាកាសចរណ៍ ដែលមានមូលដ្ឋាននៅប្រទេសកម្ពុជាទេ។
លោកបានថ្លែងថា៖ «ក្រុមហ៊ុនអាកាសចរណ៍ថ្មីនៅកម្ពុជាចាប់ផ្តើមជាមួយនឹងសេវាកម្មក្នុងស្រុកមុនពេលពង្រីកទៅកាន់ទីផ្សារអន្តរជាតិ ប៉ុន្តែអ្នកដំណើរក្នុងស្រុកមិនមានចំនួនច្រើនគ្រប់គ្រាន់សម្រាប់ស្វែងរកប្រាក់ចំណេញទេ»។
ការពង្រីកអាកាសយានដ្ឋានអន្តរជាតិទាំង ៣ របស់ប្រទេសបានបង្កើនសមត្ថភាពក្នុងការគ្រប់គ្រងចរាចរណ៍ផ្លូវអាកាស ប៉ុន្តែប្រតិបត្តិករព្រលានយន្តហោះក៏ត្រូវគ្រប់គ្រងតម្រូវការនៃការចុះចតយន្តហោះផងដែរដោយក្រុមហ៊ុនអាកាសចរណ៍ក្នុងស្រុកតែងតែព្យាយាមរក្សាទុកកន្លែងសម្រាប់យន្តហោះរបស់ខ្លួន។
លោក Nuno Costa ប្រធានផ្នែកលក់ និងទីផ្សារនៃក្រុមហ៊ុន Cambodia Airports បាននិយាយថា អាកាសយានដ្ឋានអន្តរជាតិទាំង ៣ របស់ប្រទេសកម្ពុជាមានសមត្ថភាពគ្រប់គ្រាន់ក្នុងការដោះស្រាយកន្លែងចតទាំងអស់ ប៉ុន្តែក្រុមហ៊ុនអាកាសចរណ៍មួយចំនួនមិនបានគោរពតាមគោលការណ៍ណែនាំ ដែលធ្វើឱ្យពិបាកក្នុងការបម្រុងទុកកន្លែងចត ប្រកបដោយប្រសិទ្ធភាព។
លោកមានប្រសាសន៍ថា៖ «កាលពីឆ្នាំមុនក្រុមហ៊ុនអាកាសចរណ៍កម្ពុជាបានវិនិយោគលើប្រព័ន្ធគ្រប់គ្រង ប្រព័ន្ធកុំព្យូទ័រទំនើបៗហៅថា SCORE ដែលត្រូវបានប្រើប្រាស់ដោយអាកាសយានដ្ឋានធំៗនៅជុំវិញពិភពលោក។
«យើងបានសង្កេតឃើញថាមានការរីកចម្រើនយ៉ាងខ្លាំងក្នុងការគ្រប់គ្រងទីតាំងចត ប៉ុន្តែក្រុមហ៊ុនអាកាសចរណ៍ចាំបាច់ត្រូវបន្តកែលម្អការអនុវត្តផែនការរបស់ខ្លួន ដើម្បីបង្កើនការប្រើប្រាស់សមត្ថភាពនៅលើព្រលានយន្តហោះរបស់យើង»៕
