នៅពេលដែលធនាគារហ្វីលីព និងគ្រឹះស្ថានមីក្រូហិរញ្ញវត្ថុក្រេឌីត រួមបញ្ចូលគ្នាជាគ្រឹះស្ថានតែមួយនិយោជិកប្រមាណជា ១៧០០ នាក់នឹងត្រូវបានបណ្តុះបណ្តាលជាមួយនឹងជំនាញថ្មីលើវិស័យធនាគារ ដែលនឹងជួយដល់ការពង្រីកសេវាកម្មធនាគារនៅទូទាំងប្រទេស និងចូលរួមចំនែកដល់បរិយាប័ន្នហិរញ្ញវត្ថុ។
ការរួមបញ្ចូលគ្នាទាំងស្រុងរវាងធនាគារហ្វីលីពដែលជាផ្នែកមួយនៃក្រុមហ៊ុន PhillipCapital Group ហើយមានមូលដ្ឋាននៅប្រទេសសិង្ហបុរី និង គ្រឹះស្ថានមីក្រូហិរញ្ញវត្ថុក្រេឌីតនឹងសម្រេចបាននៅចុងឆ្នាំនេះ។
ជាទូទៅនៅពេលដែលមានការរួមបញ្ចូលគ្នា ឬការទិញស្ថាប័នណាមួយការកាត់បន្ថយចំនួនបុគ្គលិកដើម្បីបង្កើនផលិតភាពតែងតែកើតមានឡើង។ ទោះជាយ៉ាងនេះក្តីនេះមិនមែនជាករណីសម្រាប់ការរួមបញ្ចូលរវាងគ្រឹះស្ថានទាំងពីរខាងលើនេះឡើយ។
តំណាងភាគទុនិករបស់ធនាគារហ្វីលីពលោក Ong Teong Hoon បានបង្ហាញអំពីចក្ខុវិស័យរបស់លោកយ៉ាងច្បាស់អំពីការរួមបញ្ជូលគ្នាជាគ្រឹះស្ថានតែមួយនេះ។
លោក Ong បានប្រាប់កាសែតភ្នំពេញប៉ុស្តិ៍អំពីផែនការរបស់លោកចំពោះការរួមបញ្ចូលគ្នានេះថា៖ «នៅពេលមានការរួមបញ្ចូលគ្នា ឬការទិញដូរគ្រឹះស្ថានណាមួយការកាត់បន្ថយចំនួនបុគ្គលិកតែងតែកើតមានឡើង។ ករណីនេះនឹងមិនកើតមានឡើងលើបុគ្គលិកនៃធនាគារហ្វីលីព និងគ្រឹះស្ថានមីក្រូហិរញ្ញវត្ថុក្រេឌីតនោះឡើយ។ នៅពេលយើងធ្វើការរួមបញ្ចូលគ្នា និងក្លាយជាធនាគារតែមួយ ផលិតផល និងសេវាកម្មរបស់យើងនឹងមានកាន់តែច្រើនដែលតម្រូវឲ្យយើងបង្កើតជាមុខតំណែងថ្មីៗ និងរៀបចំរចនាសម្ព័ន្ធការងារដែលផ្តល់នូវឱកាសសម្រាប់បុគ្គលិកគ្រប់រូបក្នុងការរីកចម្រើនទៅមុខ»។
«ដើម្បីឱ្យពួកគាត់មានការរីកចម្រើនទៅមុខ យើងត្រូវយកចិត្តទុកដាក់ក្នុងការធ្វើឱ្យប្រសើរឡើងនូវជំនាញរបស់បុគ្គលិកតាមរយៈការបណ្តុះបណ្តាលជំនាញរឹងដែលមានដូចជាជំនាញបច្ចេកទេសធនាគារក៏ដូចជាជំនាញទន់ ដែលមានដូចជាការផ្លាស់ប្តូរផ្នត់គំនិតដើម្បីរៀបចំឱ្យពួកគេត្រៀមខ្លួនរួមជាស្រេចសម្រាប់បរិយាកាសអាជីវកម្មថ្មី»។
លោក Ong បានឲ្យដឹងថាការរួមបញ្ចូលគ្នានេះទទួលបានការឆ្លើយតបជាវិជ្ជមានពីបុគ្គលិកទាំងពីរគ្រឹះស្ថានផងដែរ។
លោកបន្ថែមថា៖ «អ្វីដែលគួរឱ្យចាប់អារម្មណ៍នោះគឺថាបុគ្គលិករបស់គ្រឹះស្ថានមីក្រូហិរញ្ញវត្ថុក្រេឌីតកំពុងទន្ទឹងរង់ចាំបម្រើការក្នុងគ្រឹះស្ថានធនាគារ។ ជាងនេះទៅទៀតបុគ្គលិកដែលបម្រើការនៅធនាគារហ្វីលីពក៏សប្បាយចិត្តដោយសារធនាគារនឹងពង្រីកខ្លួនពីធនាគារដែលមានសាខាចំនួន ០៦ មកជាធនាគារដែលមានសាខារហូតដល់ជាង ៨០ ទូទាំងប្រទេស។ ជាទូទៅការរួមបញ្ចូលគ្នា ឬការទិញគ្រឹះស្ថានណាមួយតែងតែមានការកែប្រែមួយចំនួន។ សម្រាប់ករណីរបស់យើង គ្រឹះស្ថានទាំងពីរស្ថិតនៅក្រោមភាគទុនិកតែមួយដូចគ្នា។ ហេតុដូច្នេះយើងបានរួមបញ្ចូលគ្នា និងក្លាយជាដៃគូសហការដ៏រឹងមាំ។
ទោះបីជាយ៉ាងណាក៏ដោយលោក Ong បានបញ្ជាក់ថាដំណើរការរួមបញ្ចូលគ្នានេះក៏មិនងាយស្រួលនោះដែរ ពីព្រោះគ្រឹះស្ថានទាំងពីរជាអង្គភាពខុសគ្នាទាំងស្រុង ហើយប្រភេទអតិថិជន និងប្រតិបត្តិអាជីវកម្មក៏មានភាពខុសគ្នាផងដែរ។
បច្ចុប្បន្នធនាគារហ្វីលីពមានតែ ០៦ សាខា និងបុគ្គលិក ២៥០ នាក់ប៉ុណ្ណោះ រីឯគ្រឹះស្ថានមីក្រូហិរញ្ញវត្ថុក្រេឌីតមានរហូតដល់ ៨៣ សាខា និងបុគ្គលិករហូតដល់ជិត ១,៧០០ នាក់ដែលភាគច្រើនបម្រើអតិថិជននៅតាមជនបទ។
«យើងត្រូវទទួលយកការពិតថា ក្រេឌីត គឺជាគ្រឹះស្ថានមីក្រូហិរញ្ញវត្ថុ ហើយហ្វីលីពគឺជាធនាគារពាណិជ្ជកម្ម។ គ្រឹះស្ថានទាំងពីរមានផ្នត់គំនិត និងការប្រតិបត្តិការខុសគ្នា។ គ្រឹះស្ថានមីក្រូហិរញ្ញវត្ថុផ្តល់ប្រាក់កម្ចីដល់ភាគច្រើននៃអតិថិជនដែលមានចំណូលទាប។ ធនាគារផ្តល់ប្រាក់កម្ចីដល់អតិថិជន ដែលមានចំណូលមធ្យម និងខ្ពស់»។
«ការកែសម្រួលជាច្រើននឹងកើតមានឡើងជាមួយនឹងផលិតផលថ្មីដែលទាមទារការគិតគូយ៉ាងហ្មត់ចត់។ បន្ថែមពីលើនេះទៅទៀតយើងត្រូវយកចិត្តទុកដាក់លើការបំពាក់បំប៉នជំនាញ និងផ្លាស់ប្តូរផ្នត់គំនិតរបស់បុគ្គលិក។ អតិថិជនរបស់ធនាគាររមែងមានតម្រូវការខ្ពស់ ប៉ុន្តែខ្ញុំមិនប្រាកដថាអតិថិជនរបស់គ្រឹះស្ថានមីក្រូហិរញ្ញវត្ថុមានតម្រូវការដូចគ្នានោះឡើយ»។
«តាមរយៈការរួមបញ្ចូលគ្នានេះយើងនឹងគ្របដណ្តប់អតិថិជនគ្រប់ស្រទាប់វណ្ណៈរាប់ចាប់តាំងពីអតិថិជនដែលមានចំណូលទាបរហូតដល់អតិថិជនដែលមានចំណូលខ្ពស់ ហើយហេតុផលដែលយើងធ្វើដូច្នេះគឺយើងមើលឃើញចំណុចជារួមមួយរវាងធនាគារ និងគ្រឹះស្ថានមីក្រូហិរញ្ញវត្ថុ។ យើងមើលឃើញថា ធនាគារកំពុងកាត់បន្ថយទំហំប្រាក់កម្ចីរបស់ពួកគេហើយគ្រឹះស្ថានមីក្រូហិរញ្ញវត្ថុមួយចំនួនកំពុងបង្កើនទំហំប្រាក់កម្ចីរបស់ពួកគេ»។
ធនាគារហ្វីលីពនឹងនាំមកនូវផលិតផល និងសេវាកម្មជាច្រើននៅពេលដែលការរួមបញ្ចូលគ្នាត្រូវបានបញ្ចប់ដែលផលិតផលទាំងនោះមានដូចជា សេវាធនាគារតាមទូរស័ព្ទ អ៊ិនធឺណិត ប្រតិបត្តិការតាមប្រព័ន្ធឌីជីថល ការផ្ទេរប្រាក់ ហើយអ្វីដែលសំខាន់បំផុតនោះគឺការបណ្តុះបណ្តាលជំនាញដល់និយោជិក។
លោក Ong ដែលមានសុទិដ្ឋិនិយមចំពោះការរួមបញ្ចូលគ្នានេះបានថ្លែងថា៖ «ខ្ញុំបានចាប់ផ្តើមជាមួយនឹងការភ័យខ្លាចតិចតួច ប៉ុន្តែអតិថិជននឹងទទួលបានអត្ថប្រយោជន៍។ ក្នុងរយៈពេលដ៏ខ្លីខាងមុខ ខ្ញុំនឹងណែនាំគម្រោងធនាគារតាមប្រព័ន្ធអ៊ិនធឺណិតដែលនេះជាអ្វីដែលយើងកំពុងយកចិត្តទុកដាក់យ៉ាងខ្លាំងលើប្រព័ន្ធឌីជីថល និងបច្ចេកវិទ្យាហិរញ្ញវត្ថុ។ វានឹងក្លាយជាបញ្ហាប្រឈមដ៏ធំ ប៉ុន្តែយើងរំពឹងថាវានឹងផ្តល់អត្ថប្រយោជន៍ជាច្រើនសម្រាប់អតិថិជនរបស់យើង។ យើងមានក្តីស្រមៃចង់ក្លាយជាធនាគារមួយដែលបម្រើដល់អតិថិជនគ្រប់រូបនៅកម្ពុជា»៕
អំពី PhillipCapital:
ក្រុមហ៊ុន PhillipCapitalGroup បានចាប់ផ្តើមប្រតិបត្តិការនៅក្នុងប្រទេសកម្ពុជាចាប់តាំងពីឆ្នាំ ២០០៩ ។
ក្រុមហ៊ុនរបស់យើងខ្ញុំ ត្រូវបានបង្កើតឡើងតាំងពីឆ្នាំ ១៩៧៥ និងមានការិយាល័យកណ្តាលស្ថិតនៅប្រទេសសិង្ហបុរី។ បច្ចុប្បន្ននេះក្រុមហ៊ុនមានការិយាល័យប្រតិបត្តិការផ្នែកហិរញ្ញវត្ថុនៅក្នុងប្រទេសចំនួន ១៥ រួមមានសហរដ្ឋអាមេរិកចក្រភពអង់គ្លេស ប្រទេសទួរគីចិនអូស្ត្រាលីជប៉ុន អារ៉ាប់រួម ឥណ្ឌា ថៃ ឥណ្ឌូនេស៊ី ម៉ាឡេស៊ី វៀតណាម ហុងកុង និងសិង្ហបុរី។
ក្រុមហ៊ុនយើងខ្ញុំ មាននិយោជិតចំនួន ៥០០០ នាក់ និងអតិថិជនជាងមួយលាននាក់ទូទាំងពិភពលោក។ សេវាកម្មរបស់ក្រុមហ៊ុន យើងខ្ញុំរួមមាន ការជួញដូរមូលប័ត្រជំនួញហិរញ្ញវត្ថុពាណិជ្ជកម្មទំនិញប្តូររូបិយប័ណ្ណបរទេសការគ្រប់គ្រងមូលនិធិធានារ៉ាប់រងអាយុជីវិត និងទូទៅក៏ដូចជាការប្រឹក្សាលើផ្នែកអចលនទ្រព្យ។ មូលនិធិនៃម្ចាស់ភាគហ៊ុនរបស់ក្រុមហ៊ុនមានចំនួនលើសពី ១,៥ ពាន់លានដុល្លារអាមេរិក។
នៅក្នុងប្រទេសកម្ពុជា ក្រុមហ៊ុនរបស់យើងខ្ញុំត្រូវបានតំណាងដោយ ធនាគារហ្វីលីពដែលបបច្ចុប្បន្នមានសាខាប្រតិបត្តិការចំនួន ៦ ទីតាំង។ នៅក្នុងពេលអនាគតដ៏ខ្លី ធនាគារតែមួយនឹងរួមគ្នាជាមួយគ្រឹះស្ថានមីក្រូហិរញ្ញវត្ថុក្រេឌីតដែលមានសាខាប្រតិបត្តិការជាង ៨០ ទូទាំងប្រទេស។ តាមរយៈការរួមបញ្ចូលគ្នានេះ ធនាគារហ្វីលីពនឹងក្លាយជាធនាគារដែលមានបណ្តាញសាខាធំជាងគេទីបីនៅក្នុងប្រទេសកម្ពុជា។ យើងក៏មានក្រុមហ៊ុនបុត្រសម្ព័ន្ធចំនួនពីរទៀតដែលធ្វើការលើផ្នែកធានារ៉ាប់រងគឺ Phillip General និង Phillip Life ។ យើងកំពុងឈានទៅបង្កើតទីផ្សារផ្នែកសេវាកម្មហិរញ្ញវត្ថុមួយដែលផ្តល់ជូននូវភាពងាយស្រួលដល់ប្រជាជនក្នុងការទទួលបានទាំងផលិតផលហិរញ្ញវត្ថុ ទាំងការការពារផ្សេងៗនៅជុំវិញប្រទេសកម្ពុជា។
PhillipBank:
ធនាគារហ្វីលីពភីអិលស៊ីជាធនាគារពាណិជ្ជរបស់សិង្ហបុរីតែមួយគត់ដែលធ្វើប្រតិបត្តិការនៅក្នុងប្រទេសកម្ពុជា។ ជាមួយនឹងក្រុមហ៊ុនបុត្រសម្ព័ន្ធពោលគឺគ្រឹះស្ថានមីក្រូហិរញ្ញវត្ថុក្រេឌីតដែលយើងកំពុងធ្វើការរួមបញ្ចូលគ្នាយើងបានផ្តល់ជូននូវផលិតផល និងសេវាកម្មហិរញ្ញវត្ថុជាច្រើនដល់អតិថិជនសាជីវកម្មសហគ្រាសធុនតូច និងមធ្យម និងមីក្រូហិរញ្ញវត្ថុ។ ផលិតផលទាំងនេះត្រូវបានផ្តល់ជូនជាមួយនឹងកញ្ចប់សេវាកម្មធានារ៉ាប់រងដែលផ្តល់ដោយក្រុមហ៊ុនធានារ៉ាប់រងបុត្រសម្ព័ន្ធទាំងពីររបស់យើងគឺ Phillip General និង Phillip Life។
ផលិតផលថ្មីរបស់យើងរួមមានឥណទានរថយន្តដែលមានភ្ជាប់ជាមួយនូវសេវាកម្មធានារ៉ាប់រងដោយមិនគិតថ្លៃ ឥណទានបុគ្គលដែលមានភាពបត់បែនសម្រាប់តម្រូវការផ្សេងៗគ្នារបស់អតិថិជន និងគណនីសន្សំដោយស្វ័យប្រវត្តិដែលផ្តល់ជូននូវអត្រាការប្រាក់ខ្ពស់។
ធនាគារហ្វីលីព ជាធនាគារដែលផ្តល់សេវាកម្មពិសេសនៅក្នុងទីផ្សារនេះ។ នេះក៏ដោយសារតែលទ្ធភាពរបស់យើងក្នុងការបំពេញនូវតម្រូវការហិរញ្ញវត្ថុ និងការការពារផ្សេងៗដល់អតិថិជនតាមរយៈផលិតផលដែលមានភាពច្នៃប្រឌិតការចូលទៅប្រើប្រាស់ដោយផ្ទាល់ ឬតាមប្រព័ន្ធអ៊ិនធឺណិត សម្រាប់គ្រប់ប្រភេទអតិថិជនរួមមាន អតិថិជនដែលមានចំណូលទាប មធ្យម ឬខ្ពស់ សហគ្រាសធុនតូច និងមធ្យម និងអាជីវកម្មខ្នាតធំ ។
PhillipGeneralInsurance:
ការរីកចម្រើននៃទីផ្សារធានារ៉ាប់រងក្នុងរយៈពេលពីរទសវត្សរ៍កន្លងមកគឺពិតជាគួរឱ្យកត់សម្គាល់។ ទោះបីជាមានបញ្ហាប្រឈមក្នុងទីផ្សារក្មេងខ្ចីមួយនេះដូចជាការយល់ដឹងជាសាធារណៈ និងបញ្ហាធនធានមនុស្ស ការរីកចម្រើនលើវិស័យនេះពិតជាមានការរំពឹងទុកខ្ពស់។ នៅក្រុមហ៊ុនធានារ៉ាប់រង Phillip General Insurance យើងយល់ឃើញថាបញ្ហាប្រឈមទាំងនេះគឺជាឱកាសក្នុងការផ្តល់ការការពារដែលប្រសើរជាងមុន និងអត្ថប្រយោជន៍ជាក់ស្តែងជាច្រើន។ ភាពខ្លាំងរបស់យើងគឺស្ថិតនៅក្នុងការដោះស្រាយបណ្តឹងទាមទារសំណងភ្លាមៗ។ យើងបានប្តេជ្ញាចិត្តចំពោះសេវាកម្មទាមទារសំណងខ្ពស់ ដោយសារតែវត្តមាននៃសេវាកម្មរបស់យើងលើគ្រប់ស្ថានការណ៍រួមមានការការពារអាជីវកម្ម លំនៅដ្ឋាន ទ្រព្យសម្បត្តិ និងការការពារផ្ទាល់ខ្លួន។ វាជាគោលនយោបាយ និងគោលការណ៍សាជីវកម្មរបស់យើងក្នុងការទូទាត់លើបណ្តឹងទាមទារសំណងក្នុងរយៈពេល ៧ ថ្ងៃធ្វើការ។
PhillipLifeInsurance:
ក្រុមហ៊ុនធានារ៉ាប់រងអាយុជីវិត Phillip Life Assurance កំពុងបោះជំហានទៅមុខយ៉ាងឆាប់រហ័សស្របពេលដែលឧស្សាហកម្មធានារ៉ាប់រងអាយុជីវិតនៅកម្ពុជាកំពុងមានការរីកចម្រើនខ្លាំង។ ក្រុមហ៊ុនយើងខ្ញុំផ្តល់ជូននូវផលិតផលដែលមានភាពប្រកួតប្រជែង សម្រាប់ទាំងទីផ្សារពាណិជ្ជកម្ម និងបុគ្គល។ យើងទទួលបានការគាំទ្រពីក្រុមហ៊ុនធានារ៉ាប់រង Phillip Life Assurance នៅប្រទេសថៃដែលជាក្រុមហ៊ុននាំមុខខាងផ្នែកធានារ៉ាប់រងតាមប្រព័ន្ធអ៊ិនធឺណិត និង Phillip Capital Singapore ដែលបាននាំមកនូវបណ្តាញស្ថាប័នហិរញ្ញវត្ថុលំដាប់ថ្នាក់ពិភពលោក។ ជាមួយនឹងក្រុមហ៊ុនបុត្រសម្ព័ន្ធរបស់យើងខ្ញុំ ពោលគឺក្រុមហ៊ុនធានារ៉ាប់រង Phillip General Insurance និងធនាគារហ្វីលីព យើងនឹងផ្តល់ជូនប្រជាជនកម្ពុជានូវផលិតផល និងសេវាកម្មហិរញ្ញវត្ថុប្រកបដោយភាពច្នៃប្រឌិត និងងាយស្រួលនៅទូទាំងប្រទេសនៅក្នុងពេលឆាប់ៗខាងមុខនេះ។ យើងមានមោទនភាពចំពោះសសរស្តម្ភដ៏រឹងមាំរបស់យើង ពោលគឺការគាំទ្រផ្នែកហិរញ្ញវត្ថុដ៏រឹងមាំរបស់យើងពីក្រុមហ៊ុន Phillip Capital Group ដែលបង្ហាញថាយើងទទួលបានការជឿទុកចិត្តខ្ពស់ពីអតិថិជនលើប្រតិបត្ដិការសន្សំប្រាក់ហើយស្តង់ដារអន្តរជាតិរបស់យើងមានន័យថាយើងអាចផ្តល់ជូននូវសេវាកម្មដ៏ល្អឥតខ្ចោះដល់ប្រជាជនកម្ពុជាទាំងអស់។