ការិយាល័យឥណទានកម្ពុជា (ស៊ីប៊ីស៊ី) បានដើរតួនាទីយ៉ាងសំខាន់សម្រាប់ស្ថាប័នហិរញ្ញវត្ថុនៅក្នុងប្រទេស កម្ពុជា តាមរយៈការផ្តល់នូវទិន្នន័យយ៉ាងសំខាន់ និងឧបករណ៍វិភាគទិន្នន័យប្រកបដោយភាពច្នៃប្រឌិត ដើម្បីជួយដល់ស្ថាប័នហិរញ្ញវត្ថុធ្វើការសម្រេចចិត្តបានត្រឹមត្រូវ និងធ្វើឲ្យអាជីវកម្មរបស់ពួកគេរីកចម្រើន។
លោក អឿ សុធារ័ត្ន ប្រធាននាយកប្រតិបត្តិនៃស៊ីប៊ីស៊ី ដែលបានផ្តល់បទសម្ភាសដល់ភ្នំពេញប៉ុស្តិ៍កន្លងមកនេះ បានមានប្រសាសន៍ថា យោងទៅលើរបាយការណ៍ស្រាវជ្រាវស្តីពីប្រព័ន្ធចែករំលែកព័ត៌មានឥណទាននៅប្រទេស កម្ពុជា ស៊ីប៊ីស៊ីតាមរយៈប្រព័ន្ធចែករំលែកព័ត៌មានឥណទានរបស់ខ្លួន បានជួយធ្វើឲ្យប្រសើរនូវលទ្ធភាពទទួលបានឥណទាន ដោយមើលឃើញកំណើន ២៥,៧% សម្រាប់កម្ចីដល់ស្ត្រី និង ២៤,៤% សម្រាប់កម្ចីដល់សហគ្រិនចន្លោះឆ្នាំ ២០១៦ និង ២០១៧។
«ស៊ីប៊ីស៊ីមិនត្រឹមតែជួយគាំទ្រដល់ស្ថាប័នហិរញ្ញវត្ថុក្នុងការគ្រប់គ្រងហានិភ័យឥណទាន និងស្ថិរភាពហិរញ្ញវត្ថុប៉ុណ្ណោះទេ ប៉ុន្តែស៊ីប៊ីស៊ីក៏បានជួយដល់បុគ្គល និងអាជីវកម្មក្នុងការទទួលបានឥណទានផងដែរ»។
«ការទទួលបាននូវព័ត៌មានឥណទានដែលមានគុណភាពខ្ពស់ជួយកាត់បន្ថយបញ្ហានៃការជ្រើសរើសខុស និងគម្លាតព័ត៌មានរវាងអ្នកផ្តល់កម្ចី និងអ្នកខ្ចី។ វាក៏ជួយកាត់បន្ថយហានិភ័យកម្ចីដែលអាចខូច និងធ្វើឱ្យប្រសើរឡើងនូវការបែងចែកឥណទានថ្មី។
ការចែករំលែកព័ត៌មានឥណទានក៏អាចលើកកម្ពស់ការផ្តល់ឥណទានប្រកបដោយការទទួលខុសត្រូវ តាមរយៈមិនលើកទឹកចិត្តដល់បំណុលហួសប្រមាណ និងផ្តល់ការគាំទ្រដល់ការខ្ចី និងសងត្រឡប់ប្រកបដោយការទទួលខុសត្រូវ។ អ្វីដែលសំខាន់បំផុតនោះ គឺរបាយការណ៍ឥណទានអនុញ្ញាតឱ្យអ្នកខ្ចីបង្កើតប្រវត្តិឥណទាន និងប្រើប្រាស់វាក្នុងការស្នើសុំឥណទាន។ នេះជាគុណប្រយោជន៍ជាពិសេសសម្រាប់សហគ្រាសខ្នាតតូច និងអ្នកខ្ចីថ្មី»។
លោក សុធារ័ត្ន បន្ថែមថា ដោយទទួលបានការយល់ព្រមពីអតិថិជនក្នុងការឆែកប្រវត្តិឥណទាន ស្ថាប័នធនាគារ និងហិរញ្ញវត្ថុបានចូលឆែកក្នុងប្រព័ន្ធរបស់ស៊ីប៊ីស៊ី ដើម្បីឆែកប្រវត្តិឥណទានអតិថិជន និងកម្រិតហានិភ័យឥណទានរបស់អតិថិជនរបស់ខ្លួន ដែលជាផ្នែកមួយនៃការវាយតម្លៃឥណទានមុនពេលសម្រេចចិត្តក្នុងការអនុម័តឥណទាន។
លោក សុធារ័ត្ន បញ្ជាក់ថា វាជាផ្នែកមួយនៃកិច្ចខិតខំប្រឹងប្រែងរបស់ខ្លួនក្នុងការធ្វើឲ្យប្រសើរឡើងនូវសេវារបស់ខ្លួន ហើយស៊ីប៊ីស៊ីបានដាក់ឲ្យនូវពិន្ទុឥណទានឈ្មោះថា ខេ ស្ករ ឬខ្មែរ ស្ករ នៅឆ្នាំ ២០១៥។
«ខេ ស្ករ គឺជាលេខដែលគណនាអំពីព័ត៌មានទាំងអស់នៃរបាយការណ៍ឥណទានទៅជាពិន្ទុមួយ។ វាវាស់វែងពីហានិភ័យឥណទានរបស់អ្នកស្នើសុំកម្ចីម្នាក់ៗ និងព្យាករពីកម្ចីដែលអាចខូចក្នុងរយៈពេល ១២ ខែខាងមុខ»។
«វាត្រូវបានបង្កើតឡើង ដើម្បីផ្ដល់នូវមូលដ្ឋានព័ត៌មាននៃកម្រិតហានិភ័យសម្រាប់អ្នកផ្តល់ឥណទាន ដែលអាចជួយដល់ដំណើរការផ្តល់ឥណទានសម្រាប់អតិថិជនថ្មី និងទទួលបានព័ត៌មានកាន់តែច្បាស់ជាងមុន ហើយធ្វើការសម្រេចចិត្តក្នុងការផ្តល់ឥណទានបានត្រឹមត្រូវជាងមុន។ វាជួយដល់មន្ត្រីវាយតម្លៃឥណទានវាយតម្លៃទៅលើគុណភាពឥណទានរបស់អតិថិជនបានឆាប់រហ័សជាងមុន និងធ្វើការសម្រេចចិត្តកាន់តែមានភាពសុក្រឹត ហើយជួយដល់អតិថិជនដើម្បីបានឥណទានផងដែរ»។
លោកបន្ថែមថា ការប្រើប្រាស់ ខេ ស្ករ បានកើនឡើងដោយសារតែមានការយល់ដឹងច្រើនពីអត្ថប្រយោជន៍របស់វានៅក្នុងទីផ្សារមួយដែលទាមទារឲ្យមានការសម្រេចចិត្តបានឆាប់រហ័សជាងមុន។
«ទន្ទឹមនឹងនោះ ស៊ីប៊ីស៊ី បានសង្កេតឃើញពីតម្រូវការរបស់ស្ថាប័នហិរញ្ញវត្ថុលើការបង្កើតពិន្ទុឥណទានផ្ទាល់ខ្លួនរបស់ស្ថាប័ន ហើយពួកគេក៏កំពុងចង់បាននូវពិន្ទុឥណទានថ្មីទៀតពីការិយាល័យឥណទាន ដែលឲ្យឈ្មោះថា ប៊ី ស្ករ ឬពិន្ទុឥរិយាបថឥណទានរបស់អតិថិជន»។
«ដើម្បីជួយដល់សមាជិករបស់យើងឲ្យយល់ពីគំរូពិន្ទុឥណទានផ្ទៃក្នុងរបស់ស្ថាប័ន និងអត្ថប្រយោជន៍របស់វា នៅពាក់កណ្តាលឆ្នាំ ២០១៩ នេះ ស៊ីប៊ីស៊ីបានរៀបចំនូវសិក្ខាសាលាស្តីអំពីការបង្កើតពិន្ទុឥណទានដល់អ្នកចូលរួមជាង ៣០០ នាក់ ដែលមកពីស្ថាប័នជាសមាជិក ដោយបាន អញ្ជើញអ្នកជំនាញមកពីក្រុមហ៊ុនដែលមានបទពិសោធយ៉ាងច្រើនលើការបង្កើតពិន្ទុឥណទាន និងសេវាផ្សេងទៀតនៅ ១៣ ប្រទេស ក្នុងតំបន់មកធ្វើបទបង្ហាញដល់អ្នកចូលរួមទាំងអស់»។
លោកបន្តថា៖ «បន្ថែមលើនេះ ស៊ីប៊ីស៊ី ក៏បានចាប់ផ្តើមក្នុងការបង្កើត ខេស្ករជំនាន់ទី ២ របស់យើង ហើយរំពឹងថានឹងដាក់ឲ្យប្រើប្រាស់ទៅក្នុងទីផ្សារក្នុងឆ្នាំ ២០២០»។
ក្នុងរយៈពេលជាង ៧ ឆ្នាំ នៃប្រតិបត្តិការរបស់ខ្លួន ស៊ីប៊ីស៊ី ត្រូវបានទទួលស្គាល់ និងផ្តល់តម្លៃខ្ពស់ពីស្ថាប័នហិរញ្ញវត្ថុថាជាផ្នែកមួយយ៉ាងសំខាន់ជួយដល់វិស័យក្នុងការសម្រេចចិត្តលើការវាយតម្លៃឥណទានបានត្រឹមត្រូវតាមរយៈសេវាដំណោះស្រាយអាជីវកម្មរបស់ខ្លួន។
«គិតត្រឹមខែវិច្ឆិកា ឆ្នាំ ២០១៩ ស៊ីប៊ីស៊ី មានសមាជិកចំនួន ១៦៧ ស្ថាប័ន។ នៅក្នុងឆ្នាំនេះផងដែរ ស៊ីប៊ីស៊ី ក៏បានដាក់ឲ្យប្រើប្រាស់ជាផ្លូវការនូវប្រព័ន្ធចែករំលែកព័ត៌មានឥណទានក្រុមហ៊ុននៅខែកក្កដា ដែលជាឧបករណ៍មួយទៀតជួយដល់ស្ថាប័នហិរញ្ញវត្ថុមានព័ត៌មានគ្រប់ជ្រុងជ្រោយសម្រាប់វាយតម្លៃឥណទានអាជីវកម្ម»។
លោកបន្តថា ការិយាល័យឥណទានបានធ្វើឲ្យទិន្នន័យបុគ្គល និងក្រុមហ៊ុនអាចរកបាននៅក្នុងប្រព័ន្ធរបស់ស៊ីប៊ីស៊ី ហើយអាចចែករំលែកព័ត៌មានទាំងនោះក្នុងទម្រង់ជាព័ត៌មានឥណទានទៅកាន់ស្ថាប័នហិរញ្ញវត្ថុដែលជាសមាជិក និងសាធា-ណជន ក៏ដូចជា និយ័តករផងដែរ។ កិច្ចខិតខំប្រឹងប្រែងនេះ គឺដើម្បីជួយកាត់បន្ថយហានិភ័យឥណទាន និងបង្កើននូវប្រសិទ្ធភាពនៃការផ្តល់ឥណទាន។
តាមរយៈរបាយការណ៍ស្រាវជ្រាវស្តីពីប្រព័ន្ធចែករំលែកព័ត៌មានឥណទាននៅក្នុងប្រទេស កម្ពុជា បានបង្ហាញថា ប្រព័ន្ធចែករំលែកព័ត៌មានឥណទានចូលរួមចំណែកក្នុងការការពារការខាតបង់ពីហានិភ័យឥណទានប្រមាណ ៦,៤ លានដុល្លារ នៅក្នុងឆ្នាំ ២០១៥ និង ១៣,២ លានដុល្លារ ក្នុងឆ្នាំ ២០១៦។
សម្រាប់ឆ្នាំ ២០២០ លោក សុធារ័ត្ន ថ្លែងថា អាទិភាពចម្បងរបស់ស៊ីប៊ីស៊ី គឺនៅតែផ្តោតទៅលើសុវត្ថិភាពទិន្នន័យតាមរយៈការវិនិយោគបន្ថែមលើបច្ចេកវិទ្យា។
លោកបន្តថា៖ «អាទិភាពមួយទៀត គឺការបន្តការគាំទ្រដល់សមាជិករបស់យើង ដើម្បីធានាថាពួកគេនៅតែបន្តពេញចិត្តជាមួយសេវាកម្មរបស់ស៊ីប៊ីស៊ី ហើយស៊ីប៊ីស៊ីនឹងបន្តប្រើប្រាស់វេទិកាគណៈកម្មាធិការសមាជិក ដើម្បីពិភាក្សាពីការប្រឈម និងដំណោះស្រាយរវាងស៊ីប៊ីស៊ី និងសមាជិករបស់ខ្លួន»។
ស៊ីប៊ីស៊ី តាមរយៈបច្ចេកវិទ្យា និងឧបករណ៍ច្នៃប្រឌិតថ្មីរបស់ខ្លួន ត្រូវបានគេរំពឹងថានឹងធានាថា សេដ្ឋកិច្ចកម្ពុជានៅតែរឹងមាំដើម្បីធានាបាននូវបរិយាកាសធុរកិច្ចល្អប្រសើរសម្រាប់វិនិយោគិនក្នុងស្រុក និងបរទេស៕