.jpg)
ការវិនិយោគបន្ថែមទៀតគឺត្រូវការនៅក្នុងសុវត្ថិភាពបច្ចេកវិទ្យាព័តមាន ដើម្បីការពារទិន្នន័យ។ រូបថត សហការី
ខណៈដែលសេដ្ឋកិច្ចកំពុងតែលូតលាស់ក្នុងល្បឿនមួយយ៉ាងលឿន និងស្ថាប័នហិរញ្ញវត្ថុកាន់តែច្រើនឡើងៗ បានពង្រីកខ្លួនចូលទៅក្នុងប្រភពឌីជីថល គួរតែដល់ពេលដែលបណ្តាក្រុមហ៊ុន ត្រូវតែបន្តឹងសន្តិសុខព័ត៌មានវិទ្យារបស់ពួកគេ ដើម្បីការពារទិន្នន័យរបស់ខ្លួនពីការលួចរបស់ពួកហេកឃើរ (Hacker)។
លោក ឃិន ម៉ារិទ្ធ ជានាយករងប្រចាំនៅប្រទេស កម្ពុជា ឡាវ និងមីយ៉ាន់ម៉ា របស់ក្រុមហ៊ុន NTT Communications បានធ្វើការព្រមានថា ការវាយប្រហារដោយ DDoS(Distributed Denial of Service) កាលពីដើមខែ វិច្ឆិកា កន្លងទៅ ដែលត្រូវបានរងគ្រោះដោយក្រុមហ៊ុនផ្តល់សេវាកម្មអុីនធឺណិត (ISP) ធំៗមួយចំនួន ព្រមទាំងប៉ះពាល់ទៅដល់ល្បឿនអុីនធឺណិតនៅក្នុងប្រទេស កម្ពុជា ទាំងមូលថែមទៀតផងនោះ អាចនឹងកើតឡើងវិញម្តងទៀត ប្រសិនជាមិនមានវិធានការណាមួយត្រូវបានចាត់ឡើងដើម្បីពង្រឹងសន្តិសុខព័ត៌មានវិទ្យា និងបណ្តាញកុំព្យូទ័រនៅប្រទេស កម្ពុជា ទេនោះ។
លោកបានបន្ថែមទៀតថា ការវាយប្រហារដោយ DDOS គឺជាការដាស់តឿនមួយទៅដល់បណ្តាក្រុមហ៊ុនឲ្យប្រឈមជាមួយនឹងភាពពិតនៃការគំរាមកំហែងតាមប្រព័ន្ធអុីនធឺណិត នៅក្នុងប្រទេស។
យោងតាមសារព័ត៌មាន Fresh News កាលពីថ្ងៃទី ៦ ខែ វិច្ឆិកា លោក ខូវ មករា អ្នកនាំពាក្យ ១ រូបរបស់ក្រសួងប្រៃសណីយ៍ និងទូរគមនាគមន៍ បានបញ្ជាក់ថា ក្រសួងបានទទួលព័ត៌មានស្តីពីការវាយប្រហារដោយ DDoS នៅចុងសប្តាហ៍ ហើយក្រុមអ្នកជំនាញរបស់នាយកដ្ឋានសន្តិសុខព័ត៌មាន កំពុងតែធ្វើការជាមួយនឹងបណ្តាក្រុមហ៊ុនផ្តល់សេវាកម្មអុីនធឺណិតនៅកម្ពុជា ដើម្បីដោះស្រាយបញ្ហានេះ។
លោក ខូវ មករា បានមានប្រសាសន៍ថា៖ «DDoS គឺជាការវាយប្រហារមួយទៅលើចរាចរណ៍ទិន្នន័យ តែមិនមែនជាចារកិច្ចនោះទេ»។
លោក ឃិន ម៉ារិទ្ធ បានបន្ថែមថា៖ «ទីផ្សារក្នុងស្រុកកំពុងតែមានការលូតលាស់ ហើយនេះគឺជាការព្រមានមួយ។ យើងត្រូវតែការពារទិន្នន័យរបស់យើងពីពួកហេកឃើរ ហើយក្រុមហ៊ុនសាជីវកម្មទាំងឡាយត្រូវតែពង្រឹងសន្តិសុខព័ត៌មានវិទ្យារបស់ខ្លូន»។
លោកបន្តថា៖ «ប្រសិនជាការវាយប្រហារទាំងនេះត្រូវបានបន្ត ទិន្នន័យនឹងត្រូវបានលួចដោយពួកហេកឃើរ ដែលនឹងលក់ទិន្នន័យទាំងនោះទៅឲ្យអ្នកដទៃទៀត។ កត្តានេះអាចនឹងមានការប៉ះពាល់ទៅដល់សេដ្ឋកិច្ច និងហិរញ្ញវត្ថុ»។
ប្រសិនជាការវាយប្រហារតាមប្រព័ន្ធអុីនធឺណិតនេះត្រូវបានបន្ត ក៏អាចចោទជាបញ្ហាផងដែរទៅដល់មហិច្ឆតាចង់ផ្លាស់ប្តូរជាលក្ខណៈឌីជីថលរបស់ប្រទេស កម្ពុជា ដែលប្រទេសនេះសង្ឃឹមសម្រេចឲ្យបាននៅឆ្នាំ ២០៣០។
លោក ឃិន ម៉ារិទ្ធ និយាយថា ខណៈមានការកើនឡើងនូវការយល់ដឹងពីសន្តិសុខប្រព័ន្ធអុីនធឺណិតតាមបណ្តាក្រុមហ៊ុនដែលធ្វើប្រតិបត្តិការនៅប្រទេស កម្ពុជា កម្រិតនៃសន្តិសុខព័ត៌មានវិទ្យាចាំបាច់ត្រូវការការពង្រឹង ហើយបណ្តាក្រុមហ៊ុនគួរតែវិនិយោគនៅក្នុងវិស័យនេះ។
ជាទូទៅ ធនាគារ និងរដ្ឋាភិបាល គឺជាគោលដៅរបស់ក្រុមឧក្រិដ្ឋជនតាមប្រព័ន្ធអុីនធឺណិត។
លោក ឃិន ម៉ារិទ្ធ បានពន្យល់ថា៖ «ក្រុមហ៊ុនសាជីវកម្មភាគច្រើនមានការយល់ដឹងពីការគំរាមកំហែងទៅលើសន្តិសុខ ហើយវិធានការចាំបាច់នានាត្រូវបានរៀបចំឡើង។ ជាឧទាហរណ៍ បណ្តាធនាគារមាន ការធ្វើសវនកម្មប្រចាំឆ្នាំ និងការធ្វើតេស្តជ្រៀតចូល (Penetration Test) ២ ឬ ៣ ដងក្នុងមួយឆ្នាំ ក៏ប៉ុន្តែត្រូវតែមានការការពារស៊ីជម្រៅជាងនេះ ជាមួយនឹងការត្រួតពិនិត្យសន្តិសុខជាប្រចាំ និងជាបន្តបន្ទាប់»។
លោកឲ្យដឹងទៀតថា វិស័យព័ត៌មានវិទ្យាបានវិវឌ្ឍទៅមុខយ៉ាងខ្លាំង ហើយបណ្តាឧស្សាហកម្មក្នុងស្រុកត្រូវតែត្រៀមខ្លួនឲ្យរួចជាស្រេចដើម្បីតទល់នឹងបញ្ហាប្រឈមថ្មីៗ ដែលរួមមានការអភិវឌ្ឍធនធានមនុស្សដើម្បីគាំទ្រធុរកិច្ចព័ត៌មានវិទ្យា។
លោកបន្ថែមថា៖ «ប្រទេស កម្ពុជា នៅខ្វះអ្នកជំនាញ ICT។ យើងត្រូវតែផ្តោតសំខាន់បន្ថែមទៀតទៅលើការអភិវឌ្ឍបណ្តាធនធានមនុស្ស។ ជំនួសឲ្យការចំណាយបន្ថែមទៀតទៅលើការចំណាយបង្កើនដើមទុន បណ្តាក្រុមហ៊ុនគួរតែវិនិយោគបន្ថែមទៅលើការចំណាយប្រតិបត្តិការ»៕
