ប្រទេសជប៉ុនបានគាំទ្រយ៉ាងខ្ជាប់ខ្ជួនចំពោះកំណើនសេដ្ឋកិច្ចរបស់កម្ពុជាអស់រយៈពេលជាង ៣ ទសវត្សរ៍កន្លងមកនេះ។
រដ្ឋាភិបាលជប៉ុនតាមរយៈភ្នាក់ងារសហប្រតិបត្តិការអន្តរជាតិជប៉ុន (JICA) បានបន្តពង្រីកការគាំទ្ររបស់ខ្លួនសម្រាប់របៀបវារៈនៃការអភិវឌ្ឍប្រទេសកម្ពុជាដើម្បីពង្រឹងមូលដ្ឋានគ្រឹះសេដ្ឋកិច្ចសង្គមនឹងជួយសម្រេចឱ្យបាននូវឋានៈជាប្រទេសដែលមានចំណូលមធ្យមកម្រិតខ្ពស់ត្រឹមឆ្នាំ ២០៣០។
រដ្ឋាភិបាលជប៉ុនថែមទាំងបានកែសម្រួល «គោលនយោបាយសហប្រតិបត្តិការអភិវឌ្ឍសម្រាប់កម្ពុជា» នៅក្នុងខែកក្កដាឆ្នាំ ២០១៧ ឱ្យស្របតាមយុទ្ធសាស្ត្រជាតិរបស់កម្ពុជាដើម្បីសម្រេចឲ្យបាននូវកំណើនដែលមានស្ថិរភាព និងរបៀបវារៈកាត់បន្ថយភាពក្រីក្រ។
យោងតាមអង្គការ JICA បានឲ្យដឹងថា ដើម្បីឲ្យស្របតាមគោលនយោបាយនេះ JICA ផ្តោតលើអាទិភាពសំខាន់ចំនួន ៣ គឺការអភិវឌ្ឍឧស្សាហកម្មបង្កើនគុណភាពជីវិតឲ្យកាន់តែប្រសើរ និងការលើកកម្ពស់សង្គមប្រកបដោយចីរភាពតាមរយៈការពង្រឹងអភិបាលកិច្ចដើម្បីសម្រេចបាននូវគោលដៅរបស់ខ្លួន។
រយៈពេល ២០ ឆ្នាំកន្លងមកនេះអង្គការ JICA បានប្តេជ្ញាចិត្តយ៉ាងមុតមាំក្នុងការផ្តល់ជំនួយដើម្បីឲ្យប្រជាជនកម្ពុជាទទួលបានអត្ថប្រយោជន៍ពិតប្រាកដ និងយូរអង្វែង។ លទ្ធផលមួយក្នុងចំណោមកិច្ចខិតខំប្រឹងប្រែងទាំងនេះគឺថាប្រទេសកម្ពុជាក្លាយជាអ្នកដឹកនាំនៅក្នុងផ្នែកមួយចំនួនដែលអង្គការ JICA បានគាំទ្រអស់រយៈពេលជាយូរមកហើយដូចជាសកម្មភាពបោសសម្អាតមីន និងការផ្គត់ផ្គង់ទឹកជាដើម។
«ប្រទេសកម្ពុជាក៏បានចាប់ផ្តើមផ្តល់ជំនួយទៅដល់ប្រទេសកំពុងអភិវឌ្ឍន៍ដទៃទៀតដែរនៅក្នុងវិស័យទាំងនេះ។ តាមរយៈគម្រោង និងជំនួយរបស់ JICA យើងបានខិតខំប្រឹងប្រែងអស់ពីកម្លាំងកាយចិត្តដើម្បីសម្រេចឲ្យបាននូវការរីកចម្រើន និងសុវត្ថិភាពជូនដល់ប្រជាជនតាមរយៈកំណើនសេដ្ឋកិច្ច និងការកាត់បន្ថយភាពក្រីក្រនៅកម្ពុជា»។
តាមរយៈសាររបស់លោក Yuichi Sugano ប្រធានតំណាងអង្គការ JICA ប្រចាំកម្ពុជាបានលើកឡើងថាយើងនឹងបន្តធ្វើការរួមគ្នាជាមួយប្រជាជនកម្ពុជា និងដៃគូអភិវឌ្ឍន៍ដទៃទៀត។
ការរួមចំណែករបស់ទីភ្នាក់ងារជប៉ុនគឺគ្របដណ្តប់លើវិស័យជាច្រើនរាប់ចាប់ពីវិស័យកសិកម្ម អប់រំ អភិបាលកិច្ច ការផ្គត់ផ្គង់ទឹក ប្រព័ន្ធលូបង្ហូរទឹកស្អាត ការផ្គត់ផ្គង់ថាមពល ការដឹកជញ្ជូនក្នុងទីក្រុង និងហេដ្ឋារចនាសម្ព័ន្ធជាច្រើនទៀតរាប់ចាប់តាំងពីផ្លូវថ្នល់ ស្ពានរហូតដល់កំពង់ផែ។
ចាប់តាំងពីមានការបញ្ជូនអ្នកស្ម័គ្រចិត្តរបស់ខ្លួននៅឆ្នាំ ១៩៦៥ និងបើកការិយាល័យនៅរាជធានីភ្នំពេញក្នុងឆ្នាំ ១៩៩៣ មកអង្គការ JICA នៅតែជាម្ចាស់ជំនួយដ៏ធំដល់កម្ពុជាដើម្បីជួយលើកកម្ពស់ជីវភាពរស់នៅរបស់ប្រជាជនកម្ពុជា។
យោងតាមការិយាល័យរបស់អង្គការ JICA ក្នុងទីក្រុងភ្នំពេញបានឲ្យដឹងថា ប្រាក់កម្ចីដល់ប្រទេសកម្ពុជាគិតត្រឹមឆ្នាំ ២០១៧ គឺមានចំនួន ១៤២ ៨៨៤ លានយ៉េន និងជំនួយឥតសំណងសរុបមានចំនួន ១៤៣ ៣៥៦ លានយ៉េន ហើយកិច្ចសហប្រតិបត្តិការបច្ចេកទេសមានចំនួន ៨៦ ២៥៨ លានយ៉េនគិតត្រឹមឆ្នាំដដែល។
គិតត្រឹមឆ្នាំ ២០១៧ ចំនួនអ្នកជំនាញដែលត្រូវបានបញ្ជូនមកកម្ពុជាមានចំនួន ៦៩១ នាក់ និងអ្នកស្ម័គ្រចិត្តមានចំនួន ៤០៧ នាក់ ហើយប្រជាពលរដ្ឋកម្ពុជាចំនួន ៥១០៣ នាក់ត្រូវបានបញ្ជូនទៅទទួលការបណ្តុះបណ្តាលនៅប្រទេសជប៉ុន។
អង្គការ JICA គឺជាទីភ្នាក់ងារប្រតិបត្តិការជំនួយអភិវឌ្ឍន៍ជប៉ុននៅក្រៅប្រទេសដែលជួយដល់បណ្តាប្រទេសកំពុងអភិវឌ្ឍន៍ដើម្បីសម្រេចឲ្យបាននូវគោលដៅអភិវឌ្ឍន៍សេដ្ឋកិច្ចសង្គម។
បច្ចុប្បន្នភ្នាក់ងារនេះគឺជាទីភ្នាក់ងារផ្តល់ជំនួយទ្វេភាគីដ៏ធំបំផុតនៅក្នុងពិភពលោកដែលកំពុងប្រតិបត្តិការនៅជាង ១៥០ ប្រទេសទាំងនៅក្នុងតំបន់ និងជុំវិញពិភពលោក និងមានការិយាល័យនៅក្រៅប្រទេសជិត ១០០ ការិយាល័យ។
ទំនាក់ទំនងទ្វេភាគីរវាងប្រទេសជប៉ុន និងកម្ពុជាមានរយៈពេលជាង ៦ ទសវត្សរ៍មកហើយក្នុងនោះទំនាក់ទំនងពាណិជ្ជកម្ម និងទំនាក់ទំនងរវាងប្រជាជន និងប្រជាជនគឺបានកើនឡើងគួរឱ្យកត់សម្គាល់ក្នុងរយៈពេលជាច្រើនឆ្នាំមកនេះ ហើយជំនួយរបស់ជប៉ុនដល់កម្ពុជាក៏មិនទាន់បានបង្ហាញសញ្ញាថមថយនោះដែរ។
កាលពីថ្ងៃទី ១២ ខែកុម្ភៈស្ថានទូតជប៉ុនក្នុងទីក្រុងភ្នំពេញបានផ្តល់ថវិកាជាង ៥០ ម៉ឺនដុល្លារអាមេរិកដល់អង្គការសន្តិស្ម័គ្រចិត្តក្នុងគោលបំណងធ្វើឲ្យប្រសើរឡើងនូវគុណភាពនៃការអប់រំកុមារតូចៗតាមរយៈការបង្កើតសាលាមតេ្តយ្យគំរូបំពាក់ដោយបណ្ណាល័យ និងការបង្កើនសមត្ថភាពគ្រូមតេ្តយ្យសិក្សា និងបណ្ណារក្សនៅក្នុងខេត្តបាត់ដំបង។
យោងតាមស្ថានទូតជប៉ុនបានឲ្យដឹងថាចាប់តាំងពីឆ្នាំ ២០០២ មករដ្ឋាភិបាលជប៉ុនបានផ្តល់ថវិកាជាង ៣៥ លានដុល្លារអាមេរិកដល់គម្រោងចំនួន ១១៤ ដែលផ្តោតសំខាន់ទៅលើវិស័យអប់រំនៅកម្រិតមូលដ្ឋាន វិស័យសុខាភិបាល វិស័យកសិកម្ម និងសកម្មភាពបោសសម្អាតមីន៕