The Phnom Penh Post Search

Search form




Logo of Phnom Penh Post newspaper Phnom Penh Post - ជីវភាព​កាន់​តែ​ធូរធារ​ជីវិត​រស់​នៅ​កាន់​តែ​មាន​សុខភាព​ល្អ?

ជីវភាព​កាន់​តែ​ធូរធារ​ជីវិត​រស់​នៅ​កាន់​តែ​មាន​សុខភាព​ល្អ?

Content image - Phnom Penh Post
លោក​វេជ្ជបណ្ឌិត​ ព្រាប ឡី​។

ជីវភាព​កាន់​តែ​ធូរធារ​ជីវិត​រស់​នៅ​កាន់​តែ​មាន​សុខភាព​ល្អ?

ការ​ការពារ​ពី​ហានិភ័យ​នៃ​ការ​រស់​នៅ​ក្នុង​សម័យ​កាល​ទំនើប

ស្តង់ដារ​នៃ​ការ​រស់នៅ​របស់​ប្រជាជន​កម្ពុជា មាន​លក្ខណៈ​កាន់​តែ​ទំនើប​ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ​។​ ជាមួយ​នឹង​ជីវិត​រស់នៅ​កាន់​តែ​ទំនើប​បូករួម​នឹង​ស្ថានភាព​សេដ្ឋកិច្ច​គ្រួសារ​កាន់តែ​ប្រសើរ​ទៀត​នោះ ​ប្រជាជន​ក្នុង​សតវត្ស​រ៍​ទី​២១​នេះ ​កំពុងតែ​ជួប​នូវ​សេចក្តី​សុខដុម​រមនា​ខុសពី​ស្ថានភាព​ប្រទេស​កម្ពុជា​ពី​អតីត​កាល​។ ​

យ៉ាងណា​មិ​ញ​ ការ​ដែល​មាន​​ទឹក​ប្រាក់​កាន់​តែ​ច្រើន​មិនមែន​មាន​ន័យ​ថា ​សុខភាព​កាន់តែ​ល្អប្រសើរ​នោះ​ទេ​។

ដូច​ដែល​យើង​បាន​ឃើញ​នៅ​តាម​បណ្តា​ប្រទេស​ដទៃ​ជាច្រើន​ទៀត​ដែរនោះ​អត្ថប្រយោជន៍​នៃ​ការរស់នៅ​បែប​ទំនើប​ក៏​បង្កើតជា​ហានិភ័យ​ផង​ដែរ​។ ​មនុស្ស​ជាច្រើន​ស្វែងរក​ការកម្សាន្ត​ជា​ជាង​ការ​ធ្វើ​លំហាត់​ប្រាណ​។ ​ម៉ោង​ការងារ​នៅ​ការិយាល័យ​កាន់​តែ​ច្រើន​ហើយ​រយៈ​​ពេល​នៃ​ការ​គេង​ក៏​ខ្លី​ជាង​មុន​។ ​

ប្រសិន​បើ​ធ្វើ​លើស​កម្រិត​ទម្លាប់​មួយ​ចំនួន​ ដូច​ជា​ការ​​ចេញទៅ​ញ៉ាំ​អាហារ​នៅ​ខាង​ក្រៅ​ ការ​ ផឹក​គ្រឿង​ស្រវឹង​ និង​ការ​ជក់​បារី​ អាច​បង្ក​ ជា​ផល​ប៉ះពាល់​អវិជ្ជមាន​យ៉ាង​ខ្លាំង​។

ក្នុង​ឆ្នាំ ​២០១៥​ អង្គការ​សុខភាព​ពិភពលោក (WHO) បាន​រាយការណ៍​ថា​ ៦០​ ភាគរយ​នៃ​មរណភាព​ទូទាំង​ពិភពលោក​ គឺ​បណ្តាល​មក​ពី​ជំងឺ​មិន​ឆ្លង​ជាពិសេស​គឺ​ជំងឺមហារីក​ ជំងឺថ្លើម ​ជំងឺ​ដាច់​សរសៃ​ឈាម​ និង​ជំងឺ​បេះដូង​។​

«ជំងឺ​ធ្ងន់ធ្ងរ​ទាំង​នេះ​កំពុង​តែ​បង្ក​ជា​បន្ទុក​កាន់តែ​ធំធេង​ចំពោះ​បណ្តា​ប្រទេស​ជាច្រើន ​ដែល​កំពុងតែ​ប្រឈម​មុខ​នឹង​ការ​កើន​ឡើង​នៃ​ករណី​ជំងឺ​ទាំង​នេះ ព្រម​ទាំង​ការ​កើន​ឡើង​នៃ​ថ្លៃ​ព្យាបាល​ផង​ដែរ​» នេះ​បើ​យោង​តាម​លោក​វេជ្ជបណ្ឌិត ​Liu Yunguo អ្នកតំណាង​អង្គការ​សុខភាព​ពិភពលោក​ប្រចាំ​ប្រទេស​កម្ពុជា​។

ដូច​គ្នា​នេះ​ដែរ​ចំនួន​នៃ​អ្នក​កើត​ជំងឺ​មិន​ឆ្លង​ក៏​កំពុង​តែ​កើន​ឡើង​នៅ​កម្ពុជា​។ ​«​យ៉ាង​ហោច​ណាស់​ ៤៦​ ភាគរយ​ នៃ​ការ​ស្លាប់​សរុប​នៅ​កម្ពុជា​ គឺ​បណ្តាល​មក​ពី​ជំងឺ​មិន​ឆ្លង ជា​ពិសេស​គឺ​ជំងឺ​បេះដូង​មហារីក ​ទឹក​នោម​ផ្អែម ​ជំងឺ​សួត ​ហើយ​អត្រា​អ្នក​ជំងឺ​ទាំង​នេះ​កំពុង​តែ​បន្ត​កើន​ឡើង​ថែម​ទៀត​» នេះ​បើ​យោង​តាម​សម្តី​ឯកឧត្តម​ ម៉ម ​ប៊ុនហេង ​រដ្ឋ​មន្ត្រី​ក្រសួង​សុខាភិបាល​។​

ផ្អែក​តាម​ស្ថិតិ​របស់​អង្គការ​សុខភាព​ពិភពលោក​អត្រា​មរណភាព​បណ្តាល​មក​ពី​ជំងឺ​មិន​ឆ្លង​នៅ​កម្ពុជា ​គឺ​ខ្ពស់​ជាង​អត្រា​មរណភាព​សរុប​ ដែល​បណ្តាល​មក​ពី​គ្រោះថ្នាក់​ចរាចរណ៍​ និង​ជំងឺ​ឆ្លង​ដូចជា​ជំងឺ​អេដស៍​និង​របេង ថែម​ទៀត​ផង​។ ​

លោក​វេជ្ជបណ្ឌិត ​អ៊ំ សុភាព​ នាយក​ប្រតិបត្តិ​អង្គការ ​Khmer HIV/AIDS NGO Alliance បាន​ឯកភាព​នឹង​ព័ត៌មាន​ខាង​លើ​ ហើយ​បាន​បន្ថែម​ថា​ ៖ «​ជាមួយ​នឹង​បម្រែ​បម្រួល​នៃ​របៀប​របប​នៃ​ការ​រស់នៅ​ប្រចាំ​ថ្ងៃ​ ដូចជា​ការ​ញ៉ាំ​អាហារ​ ការ​ផឹក​គ្រឿង​ស្រវឹង​ ការ​ជក់​បារី​ និង​កង្វះ​ខាត​នៃ​ការ​ធ្វើ​លំហាត់​ប្រាណ ​យើង​បាន​សង្កេត​ឃើញ​ថា ​អត្រា​មរណភាព​បណ្តាល​មក​ពី​ជំងឺ​មិន​ឆ្លង​នេះ​មាន​ការ​កើន​ឡើង​កាន់​តែ​ច្រើន​ដោយ​មិន​ដឹង​ខ្លួន​»​។

នៅ​ប្រទេស​កម្ពុជា​ផល​ប៉ះពាល់​នៃ​ជំងឺ​ទាំង​នេះ​បាន​បង្ក​ជា​បញ្ហា​យ៉ាង​ច្រើន។​ ដោយ​សារ​តែ​កង្វះ​ខាត​នៃ​ការ​យល់​ដឹង​និង​ភាព​ស្ទាក់ស្ទើរ​ក្នុង​ការ​ពិភាក្សា​ពី​កង្វល់​សុខភាព​ ប្រជាជន​ភាគ​ច្រើន​មិន​បាន​ស្វែងរក​ការ​ព្យាបាល​រហូត​ទាល់​តែ​ជំងឺ​ទាំង​នេះ ​វិវឌ្ឍ​ដល់​ដំណាក់​កាល​ធ្ងន់ធ្ងរ​។ ​

លោក​វេជ្ជបណ្ឌិត​ ព្រាប ឡី​ប្រធាន​ផ្នែក​វះកាត់​នៅ​មន្ទីរពេទ្យ​ព្រះ សីហនុ​ មណ្ឌល​នៃ​ក្តីសង្ឃឹម​ បាន​ថ្លែងថា៖ «ការស្លាប់​ដែល​កើត​មកពី​ជំងឺ​មិន​ឆ្លង​ភាគ​ច្រើន​ អាច​បង្កា​បាន​ប្រសិនបើ​អ្នក​ ជំងឺ​ទាំង​នោះបាន​មករក​ពួកយើង​ឲ្យ​បាន​លឿន​ជាង​នេះ​។​ ប្រហែល​ ២​ភាគ​៣​នៃអ្នកជំងឺ​មហារីក​របស់​យើង ​ពួក​គេ​បាន ​ធ្លាក់ខ្លួន​ក្នុង​ដំណាក់​កាល​ទី​ ៣ ​ឬ​ ៤ ​ទៅ​ហើយ​ នៅ​ពេល​ដែល​ពួក​គាត់​មក​ស្វែង​រក​ការព្យាបាល​នៅ​មន្ទីរ​ពេទ្យ​យើង​លើក​ដំបូង​។ ​នៅពេល​ជំងឺមហារីក​ឈាន​ដល់​ដំណាក់​កាល​ធ្ងន់ធ្ងរ​បែបនេះ​ វារឹតតែ​ពិបាក​ក្នុង​ការ​ព្យាបាល​ហើយ​ឱកាស​នៃ​ការ​ព្យាបាល​ឲ្យ​បាន​ជោគជ័យ​នោះ គឺ​កាន់តែ​ទាប​បំផុត​»​។

Content image - Phnom Penh Post

ស្រដៀង​គ្នា​នេះ​ដែរ​លោក​វេជ្ជបណ្ឌិត​ជួន ​គីម​ចេង ​មកពី​ផ្នែក​សុខភាព​ទូទៅ​និង​សួត​ នៅ​មន្ទីរពេទ្យ​ព្រះសីហនុ​ មណ្ឌល ​នៃ​ក្តី​សង្ឃឹម ​ក៏បាន​លើក​ឡើង​ដែរ​ថា៖​«ករណី​ជំងឺ​ថ្លើម​ភាគ​ច្រើន​ពេល​ដែល​មិន​​បាន​ទទួល​ការ​ព្យាបាល​នឹង​វិវឌ្ឍ​ទៅ​ជា​ក្រិន​ថ្លើម​ និង​បន្ទាប់​មក​ទៅជា​មហារីក​ថ្លើម​។ ​យើង​អាច​ជួយ​ជីវិត​បាន​កាន់​តែ​ច្រើន​ថែម​ទៀត​ ប្រសិន​បើ​ប្រជាពល​រដ្ឋ​កាន់​តែ​ច្រើន​យល់​ដឹង​អំពី​សុខភាព​របស់ខ្លួន​ និង​ស្វែងរក​ការ​ព្យាបាល​ឲ្យ​បាន​លឿន​ជាង​នេះ​»​។

ជា​ការ​សោក​ស្តាយ ជំងឺ​នេះ​មិន​ត្រឹម​តែ​ប៉ះពាល់​ដល់​អ្នក​ជំងឺ​ខ្លួនឯង​ប៉ុណ្ណោះ​ទេ​ ប៉ុន្តែ​ក៏​ប៉ះពាល់​ដល់​សមាជិក​គ្រួសារ​ជាច្រើន​ជំនាន់​ផង​ដែរ​។ ​លោក​វេជ្ជបណ្ឌិត ​Liu​ បាន​ថ្លែង​ទៀតថា​ ៖ «​ករណី​ជំងឺ​ធ្ងន់ធ្ងរ​ភាគ​ច្រើន​ គឺ​គ្រួសារ​ជា​អ្នក​រង​ផល​ប៉ះពាល់ ​ដោយ​សារ​តែ​ការ​បាត់បង់​ចំណូល​បណ្តាល​មក​ពី​ពិការភាព​ពី​ជំងឺ​មិន​ឆ្លង​ និង​សម្ពាធ​ហិរញ្ញវត្ថុ​ពី​ការ​ចំណាយ​ច្រើន​លើ​ការ​ព្យាបាល​»​។

ការ​អប់រំ​ណែនាំ​ដល់​គ្រួសារ​ និង​សហគមន៍​ គឺជា​គន្លឹះ​ដ៏​សំខាន់​ក្នុងការ​ចាប់​ផ្តើម​ប្រយុទ្ធ​ប្រឆាំង​នឹង​ជំងឺ​មិន​ឆ្លង​ទាំង​នេះ​។ ​

ខណៈ​ដែល​រដ្ឋាភិបាល​ និង​ស្ថាប័ន​ក្រៅ​រដ្ឋាភិបាល​បាន​នឹង​កំពុង​ធ្វើ​ការ​លើក​កម្ពស់​ការ​យល់​ដឹង​អំពី​បញ្ហា​ទាំងនេះ ​ផ្នែក​ឯកជន​ក៏បាន​បង្ហាញ​នូវ​ការ​យក​ចិត្ត​ទុក​ដាក់​ចូល​រួម​ដោះស្រាយ​បញ្ហា​ជំងឺ​ធ្ងន់ធ្ងរ​ទាំងនេះ​ផងដែរ​។ ​

កាល​ពី​ខែ​មុន​ ក្រុមហ៊ុន​ធានា​រ៉ាប់រង​ជីវិត​អេ អាយ អេ (​ខេមបូឌា​) ឡាយ​ហ្វ៍ អ៊ិនសួរេន ម.ក ​(​ហៅ​កាត់​ថា ​AIA)​ បាន​រៀបចំ​នូវ​ព្រឹត្តិការណ៍​មួយ​ឈ្មោះ​ថា​ «Fit for Hope» ដើម្បី​ផ្តល់នូវ​ជំនួយ​គាំទ្រ​ដល់​មន្ទីរពេទ្យ​ព្រះសីហនុ​ មណ្ឌល​នៃ​ក្តី​ សង្ឃឹម​ ក្នុងការ​លើកកម្ពស់​ការ​យល់ដឹង​អំពី​ការពិនិត្យ​ស្វែងរក​ជំងឺ​ឲ្យ​ដឹង​ជាមុន​និង​ការព្យាបាល​ជំងឺ​ធ្ងន់ធ្ងរ​ទាំងនេះ​។

មន្ទីរពេទ្យ​ព្រះសីហនុ​ មណ្ឌល​នៃ​ក្តី​សង្ឃឹម ​មាន​ក្តី​សោមនស្ស​រីករាយ​ដែល​ទទួល​បាន​ជំនួយ​ពី​វិស័យ​ឯកជន​។

​«ព្រឹត្តិការណ៍​ Fit for Hope​ កាលពី​ថ្ងៃទី​២១​ ខែ​តុលា​នេះ​បាន​ផ្តល់​នូវ​ការ​ពិនិត្យ​ជំងឺ​មហារីក​សុដន់​ ដោយ​ឥត​គិត​ថ្លៃ​ដល់​ស្ត្រី​ចំនួន​ ១៧៤​ នាក់​ ហើយ​បាន​ស្វែង​រកឃើញ​អ្នក​កើត​ជំងឺ​នេះ​ចំនួន​៤ករណី។ ​ស្ត្រី​៤​នាក់​ដែលមាន​ជំងឺ​នេះ​និង​ក្រុម​គ្រួសារ​កំពុងតែ​បានទទួល​នូវ​ការ​ព្យាបាល​ និង​ជំនួយ​ចាំបាច់​នានា​ក្នុងការ​ព្យាបាល​ជំងឺ​មហារីក​សុដន់​» នេះ​បើ​យោង​តាម​លោក​ ប៊ួយ សុខ​ប្រធាន​ផ្នែក​ទំនាក់ទំនង​សាធារណៈ​នៅ​មន្ទីរពេទ្យ​ព្រះ​សីហនុ​។​

«​កម្មវិធី​នេះ​មាន​អ្នក​ចូល​រួម​ប្រហែល​១៥០០​នាក់​និង​បាន​រៃអង្គាស​ទឹក​ប្រាក់​សប្បុរស​បាន​១​ម៉ឺន​ដុល្លារ​សម្រាប់​មន្ទីរ​ពេទ្យ​ព្រះសីហនុ ​មណ្ឌល​នៃ​ក្តីសង្ឃឹម​ ដែល​នឹង​ជួយ​ពួក​យើង​ក្នុង​ការ​អប់រំ​ណែនាំ​ដល់​មហាជន​និង​ជួយ​សង្គ្រោះ​ជីវិត​មនុស្ស​រាប់​ពាន់​នាក់​ផ្សេង​ទៀត​រាប់​ឆ្នាំ​បន្ត​បន្ទាប់​ទៅ​មុខ​ទៀត​»​។ ​

លោក​វេជ្ជបណ្ឌិត​ ឡី បាន​ថ្លែង​ថា​ ៖ «នៅ​មន្ទីរ​ពេទ្យ​ព្រះសីហនុ​ មណ្ឌល​នៃ​ក្តី​សង្ឃឹម​ដោយ​សារ​តែមាន​ជំនួយ​សប្បុរស​ និង​ដៃគូ​ដូចជា​ក្រុមហ៊ុន AIA យើង​អាច​បន្ត​ផ្តល់​នូវ​សេវា​សុខាភិបាល​ដោយ​ឥត​គិត​ថ្លៃ​ដល់​ប្រជាជន​ក្រីក្រ​ និង​អ្នក​ដែល​ជួប​បញ្ហា​ខ្វះខាត​។ ​យ៉ាងណា​មិ​ញ​ ជំងឺ​នេះ​មិន​រើសអើង​មនុស្ស​នោះ ទេ​។ ​ជំងឺ​មិន​ឆ្លង​ទាំង​នេះ​អាច​កើត​មាន​ទៅ​លើ​មនុស្ស​ទាំង​ក្មេង​ទាំងចាស់ អ្នក​មាន ​និង​អ្នកក្រ​ដូច​គ្នា​»​។

Content image - Phnom Penh Post

ដើម្បី​ការពារ​សុខភាព​របស់​ខ្លួន​ និង​ក្រុម​គ្រួសារ​ ប្រជាជន​កម្ពុជា​កាន់​តែ​ច្រើន​កំពុង​តែ​ស្វែងរក​សេវា​សុខភាព ​និង​ហិរញ្ញវត្ថុ​ ដែល​អាច​ឆ្លើយ​តប​ទៅ​នឹង​តម្រូវ​ការ​របស់​ពួក​គាត់​បាន​។ ​ជាមួយ​នឹង​បទ​ពិសោធ​ជិត​១០០​ឆ្នាំ​ ក្រុមហ៊ុន​ធានា​រ៉ាប់រង​ជីវិត​នៅ​អាស៊ី​ដ៏​ធំ​ AIA នេះ​កំពុង​តែ​ឈានមុខ​គេ​ក្នុង​ការ​ផ្តល់​ជូន​នូវ​ដំណោះស្រាយ​សម្រាប់​បញ្ហា​ទាំងនេះ។

​លោក​ Richard Bates អគ្គនាយក​ក្រុមហ៊ុន AIA​ ប្រចាំ​កម្ពុជា​ បាន​ថ្លែង​ថា៖ «​យើង​ចង់​ជួយ​ឲ្យ​ប្រជាជន​កម្ពុជា​ទទួល​យក​នូវ​ការ​រស់នៅ​ដោយ​មាន​សុខភាព​កាន់​តែ​ល្អ​ ខណៈដែល​យើង​ផ្តល់​ដំណោះស្រាយ​ដែល​ពួកគាត់​ត្រូវ​ការ ​ដើម្បី​ការពារ​ខ្លួន​ពួក​គាត់​ក៏​ដូច​ជា​ក្រុម​គ្រួសារ​ពី​ជំងឺ​ធ្ងន់ធ្ងរ​ទាំងនេះ​»​។​

លោក​បន្តថា ​៖ «​ដំណោះ​ស្រាយ​នៃ​ការ​ការពារ​របស់​យើង​មាន​លក្ខណៈ​ពិសេស​ដោយ​សារ​យើង​ផ្តល់​ការ​ការពារ​ទាំង​ក្នុងដំណាក់កាល​ដំបូង​ និង​ដំណាក់​កាល​ធ្ងន់ធ្ងរ​ផងដែរ​។ ​យើង​សង្ឃឹមថា​ នេះ​គឺ​គ្រាន់តែ​ជាការ​ចាប់ផ្តើម​នៃ​ការ​គាំទ្រ​ជាច្រើន​របស់​យើង​សម្រាប់​ក្រុមគ្រួសារ​និង​សហគមន៍​នានា​នៅ​កម្ពុជា​»​។​

ទន្ទឹម​នឹង​ការ​យល់​ដឹង​អំពី​ហានិភ័យ​និង​រោគសញ្ញា​បឋម​ផ្សេងៗ​នៃ​ជំងឺ​ទាំង​នេះ ​វេជ្ជបណ្ឌិត​ជាច្រើន​បាន​ណែនាំ​ឲ្យ​ប្រជាជន​ទាំង​អស់​គ្នា​អនុវត្ត​នូវ​ទម្លាប់​រស់​នៅ​ដោយ​មាន​សុខភាព​ល្អ​។​

លោក​វេជ្ជបណ្ឌិត​ ឡី ​បន្ថែម​ទៀត​ថា​៖ «​ប្រជាជន​ ជាច្រើន​អាច​ចៀស​ពី​ជំងឺ​ទាំង​អស់​នេះ​បាន​ប្រសិន​បើ​ពួក​គាត់​ទទួល​ទាន​របប​អាហារ​ដែល​មាន​តុល្យភាព មិន​ផឹក​គ្រឿង​ស្រវឹង​ហួស​បរិមាណ ​កុំ​ជក់​បារី​និង ​ធ្វើ​លំហាត់​ប្រាណ​ឲ្យ​បាន​ទៀងទាត់​។​ ហើយ​ប្រសិន​បើ​អ្នក​មិន​ទាន់​មាន​អារម្មណ៍​ថា​ មាន​រោគសញ្ញា​អ្វី​នៅ​ឡើយ​ក៏ដោយ​សូម​ជួប​ពិគ្រោះ​ជាមួយ​គ្រូពេទ្យ​ដើម្បី​ពិនិត្យ​សុខភាព​ឲ្យ​បាន​ទៀង​ទាត់។​​ វា​អាច​ជួយ​ឲ្យ​រកឃើញ​ជំងឺ​នៅ​ដំណាក់កាល​ដំបូងៗ​បាន​ដែល​ធ្វើ​ឲ្យ​ឱកាស​នៃ​ការព្យាបាល​មាន​ភាព​ជោគជ័យ​កាន់តែ​ខ្ពស់​»៕

អត្ថបទគួរចាប់អារម្មណ៍