.jpg)
នៅក្នុងអត្ថបទស្ដីពីវិស័យអប់រំទី ២ របស់យើងក្នុងឆ្នាំ ២០១៩ នេះកាសែតភ្នំពេញប៉ុស្តិ៍ នឹងពណ៌នាអំពីសារៈសំខាន់នៃជំនាញទន់សម្រាប់ប្រជាជនកម្ពុជាជាមួយនឹងការយកចិត្តទុកដាក់ ពិសេសនៅក្នុងរបៀបដែលជំនាញទន់ទាំងនោះត្រូវបានបង្រៀន និងរៀនសូត្រ។ ជំនាញទន់ និងជំនាញរឹងទាំង ២ បានដើរតួនាទីយ៉ាងសំខាន់នៅក្នុងការបង្កើត និងបណ្ដុះបណ្ដាលពលរដ្ឋដែលមានសមត្ថភាព និងឯករាជភាពក្នុងសង្គម។
យើងនឹងសម្លឹងមើលថា តើកម្មវិធីសិក្សានៅក្នុងប្រទេសកម្ពុជាអាចផ្ដល់នូវមធ្យោបាយនៃការចែករំលែកនូវជំនាញទន់ទៅឲ្យសិស្សានុសិស្សយ៉ាងដូចម្តេច? យើងបាននិងកំពុងតែសង្កេតថា ហេតុអ្វីក៏ជំនាញទន់មានសារៈសំខាន់សម្រាប់អនាគតរបស់ប្រជាជនកម្ពុជា និងប្រទេសជាតិទាំងមូល?
ទំនាក់ទំនងគឺជាគន្លឹះដ៏សំខាន់សម្រាប់ការធ្វើពាណិជ្ជកម្ម និងការចរចាឲ្យប្រព្រឹត្តទៅដោយរលូន។ ប៉ុន្តែក្នុងជំនួញ និងពាណិជ្ជកម្មបានក្លាយជាកិច្ចការអន្តរជាតិ ដូច្នេះច្បាប់ និងទំនៀមទម្លាប់នៃការទាក់ទងគ្នានៅក្នុងសង្គម និងជំនួញនឹងប្រែប្រួលទៅតាមនោះដែរ។
ភាពប៉ិនប្រសប់នៅក្នុងការប្រើប្រាស់នូវជំនាញទន់ជាមួយគ្នានឹងផ្នែកបច្ចេកទេសនៃជំនាញរឹងក្នុងការងាររបស់បុគ្គលនីមួយៗមានន័យថា បុគ្គលនោះអាចផ្តល់ឲ្យភាគីទាំង ២ នូវលទ្ធផលដ៏គាប់ប្រសើរ។
ជាអកុសលសម្រាប់អ្នកបង្រៀនជំនាញទន់មិនដូចជាជំនាញរឹងដែលអាចវាស់ស្ទង់បាននោះទេ។ យើងមិនអាចធ្វើតេស្តសមត្ថភាពលើជំនាញទន់ទាំងនោះនៅក្នុងបរិបទផ្លូវការបានទេ។ ជំនាញទន់គឺពិបាកក្នុងការវាស់ស្ទង់ និងធ្វើតេស្តសមត្ថភាពជាមួយនឹងភាពជំនឿជាក់ណាមួយណាស់។ ផ្ទុយទៅវិញខណៈពេលដែលបុគ្គលិកលក្ខណៈរបស់សិស្សានុសិស្សមានការវិវឌ្ឍជំនាញទន់នឹងស្ដែងចេញកាន់តែច្បាស់ឡើងៗ។
ជំនាញទន់ដើរតួនាទីមិនអាចខ្វះបាននៅក្នុងការកំណត់បុគ្គលិកលក្ខណៈរបស់បុគ្គលម្នាក់ៗក៏ដូចជាផ្តល់នូវភាពធន់ទ្រាំ សមត្ថភាពដោះស្រាយបញ្ហា ការគិតស៊ីជម្រៅ និងជំនាញទំនាក់ទំនង។
សិស្សានុសិស្សដែលអាចរៀនសូត្រជំនាញទន់បានល្អឥតខ្ចោះ ទំនងនឹងមានលទ្ធភាពក្នុងការឈោងចាប់ចំណេះដឹងនៃភាសាទី ២ ស្មារតីភ្ញាក់រឭកខាងផ្នែកវប្បធម៌ ហើយពួកគេក៏មិនត្រឹមតែនឹងក្លាយជាសមាជិកក្រុមដ៏ល្អប៉ុណ្ណោះទេ ប៉ុន្តែពួកគេថែមទាំងអាចធ្វើការដោយឯករាជ្យម្ចាស់ការបានផងដែរ។ ពួកគេនឹងមានសមត្ថភាពក្នុងការស្វែងយល់ និងពិចារណាខ្ពស់ដែលអាចជួយធ្វើឲ្យការខ្វែងគំនិតគ្នាស្ថិតក្នុងសភាពវិជ្ជមានបាន។
សារៈសំខាន់នៃជំនាញទន់មិនអាចត្រូវបានមើលរំលងនោះទេ ជំនាញទន់ទាំងអស់សុទ្ធតែមានសារៈសំខាន់ដូចៗគ្នា។ ខណៈជំនាញទន់ដែលមានសារៈសំខាន់ជាងគេនៅក្នុងពេលនេះគឺទំនាក់ទំនង។
ជំនាញទន់ផ្សេងៗទៀតមានដូចជាការឲ្យតម្លៃលើខ្លួនឯងដែលជាមធ្យោបាយក្នុងការអភិវឌ្ឍខ្លួន និងបណ្ដុះភាពជឿជាក់លើខ្លួនឯង។ មួយវិញទៀតគឺជាភាសាកាយវិការ។ ការយល់ពីភាសាកាយវិការរបស់មនុស្សម្នាក់ៗអាចនិយាយបានថា វាជាអ្វីដែលខុសប្លែកពីការនិយាយដោយប្រើពាក្យសម្ដី ដែលការយល់នោះគឺជាគន្លឹះដ៏សំខាន់មួយ។
ការធ្វើបទបង្ហាញល្អ ការមានជំនាញពិភាក្សាល្អក្នុងការពិពណ៌នាពីគំនិតមួយដោយរលូន ជំនាញនៃការនិយាយជាសាធារណៈ ការរៀនសូត្រភាសាផ្សេងៗ ដែលការសិក្សាស្វែងយល់ពីជំនាញទាំងនេះសុទ្ធសឹងតែផ្នែករួមផ្សំនៃការអភិវឌ្ឍជំនាញទន់របស់សិស្សានុសិស្សកម្ពុជា។
វាពិតជាមិនលឿនពេក ឬយឺតពេកនោះទេក្នុងការចាប់ផ្ដើមរៀនសូត្រអភិវឌ្ឍ និងដុសខាត់ជំនាញទន់ទាំងនោះ។ គន្លឹះសម្រាប់បញ្ហានេះគឺស្ថិតនៅលើសមត្ថភាពរបស់បុគ្គលនីមួយៗក្នុងការទទួលស្គាល់ និងដឹងពីចំណុចខ្វះខាត និងកំហុសផ្ទាល់ខ្លួនប៉ុណ្ណោះទេ។
នៅពេលដែលបុគ្គលម្នាក់ចេះទទួលស្គាល់ពីចំណុចខ្វះខាតរបស់ខ្លួន នោះគឺជាជំហានដំបូងក្នុងការលុបបំបាត់នូវកំហុសទាំងឡាយ។ ការវិនិច្ឆ័យលើខ្លួនឯងអាចជាជំហានដំបូងឆ្ពោះទៅកាន់ការពង្រឹងនៃជំនាញទន់របស់ពួកគេ៕
