.jpg)
លោកនាយករដ្ឋមន្ត្រី ហ៊ុន សែន និងលោកនាយករដ្ឋមន្ត្រី Narendra Modi។
ទំនាក់ទំនងរវាងកម្ពុជា-ឥណ្ឌាមានស្ទើរតែគ្រប់ផ្នែកចាប់តាំងពីការចាប់ផ្តើមគ្រិស្គសករាជដំបូង ឬប្រហែលជាអាចមុននោះទៀត នៅពេលដែលឥទ្ធិពល និងវប្បធម៌សាសនាហិណ្ឌូ និងពុទ្ធសាសនាចូលមកកម្ពុជា និងតំបន់អាស៊ីអាគ្នេយ៍។
បន្ទាប់ពីការដួលរលំរបបខ្មែរក្រហម ប្រទេសឥណ្ឌាគឺជាប្រទេសដំបូងគេដែលបានទទួលស្គាល់រដ្ឋាភិបាលថ្មី និងបានបើកស្ថានទូតរបស់ខ្លួនឡើងវិញនៅក្នុងឆ្នាំ ១៩៨១។ នៅក្នុងដំណាក់កាលក្រោយរបបខ្មែរក្រហមភ្លាមៗចាប់ពីឆ្នាំ ១៩៧៩-៩១ ប្រទេសឥណ្ឌាបានជួយដល់រដ្ឋាភិបាលក្នុងការកសាងសមត្ថភាពនៃការដឹកនាំរបស់ខ្លួន។
ប្រទេសឥណ្ឌាក៏បានឆ្លើយតបទៅនឹងការអំពាវនាវរបស់រដ្ឋាភិបាលកម្ពុជាក្នុងឆ្នាំ ១៩៨៦ ឲ្យបញ្ជូនក្រុមអ្នកជំនាញមកពីភ្នាក់ងារ Archaeological Survey of India ដើម្បីជួយជួសជុលប្រាសាទអង្គរវត្តដ៏ល្បីល្បាញ ដែលត្រូវបានសាងសង់ឡើងក្នុងចន្លោះសតវត្សរ៍ទី ១២ និង ១៤ ផងដែរ។
មានកិច្ចសហប្រតិបត្តិការជាច្រើនសម្រាប់ឥណ្ឌានៅកម្ពុជាដែលត្រូវបានទ្រទ្រង់ដោយទំនាក់ទំនងជាទៀងទាត់រវាងមេដឹកនាំនយោបាយក្នុងនោះមានការផ្លាស់ប្តូរដំណើរទស្សនកិច្ចទ្វេភាគី ការផ្តល់ជំនួយកសាងសមត្ថភាព ការផ្លាស់ប្តូរវប្បធម៌ និងកម្ចីសម្បទានសម្រាប់គម្រោងអភិវឌ្ឍន៍ ក៏ដូចជាកិច្ចការស្តារឡើងវិញ និងអភិរក្សប្រាសាទបុរាណនៅកម្ពុជា។
នៅក្នុងបរិបទនៃគោលនយោបាយធ្វើសកម្មភាពឆ្ពោះទៅទិសខាងកើត (Act East) របស់ឥណ្ឌា និងអាស៊ាន ប្រទេសកម្ពុជាគឺជាអន្តរការីដ៏សំខាន់ និងជាដៃគូដ៏ល្អ។ បច្ចុប្បន្នគេបានឃើញការពង្រីកកិច្ចសហប្រតិបត្តិការក្នុងវិស័យជាច្រើនដូចជាការកសាងសមត្ថភាព ការអភិវឌ្ឍធនធានមនុស្ស និងការពង្រីកជំនួយហិរញ្ញវត្ថុនៅក្នុងគម្រោងហេដ្ឋារចនាសម្ព័ន្ធគម្រោងសន្តិសុខសង្គម និងការកសាងសមត្ថភាពក្នុងវិស័យការពារជាតិ។
តួលេខពាណិជ្ជកម្ម និងការវិនិយោគបានផ្លាស់ប្តូរជាវិជ្ជមានក្នុងរយៈពេលប៉ុន្មានឆ្នាំចុងក្រោយនេះ។ ឥណ្ឌាបាននាំចេញទំនិញមានតម្លៃ ១៧៨,២៤ លានដុល្លារមកកាន់ប្រទេសកម្ពុជា គឺកើនឡើង ៤៨,១៩ % ក្នុងឆ្នាំ ២០១៨ ខណៈការនាំចូលពីកម្ពុជាមានតម្លៃ ៤៨,៤៥ លានដុល្លារ គឺកើនឡើង ០,៩០% ក្នុងឆ្នាំដដែល។ ពាណិជ្ជកម្មសរុបសម្រេចបាន ២២៦,៦៩ លានដុល្លារក្នុងឆ្នាំ ២០១៨ កើនឡើង ៣៤,៦៩ % ធៀបនឹងឆ្នាំ ២០១៧។
ដើម្បីលើកកម្ពស់ទំនាក់ទំនងពាណិជ្ជកម្ម រដ្ឋមន្ត្រីក្រសួងពាណិជ្ជកម្ម និងឧស្សាហកម្ម និងអាកាសចរណ៍ស៊ីវិលឥណ្ឌា លោក Suresh Prabhu បានមកបំពេញទស្សនកិច្ចនៅកម្ពុជាក្នុងខែឧសភា ឆ្នាំ ២០១៨ ដើម្បីចូលរួមក្នុងសន្និសីទពាណិជ្ជកម្មឥណ្ឌា ( CLMV) នៅក្នុងរាជធានីភ្នំពេញ និងបានជួបប្រជុំជាមួយលោកនាយករដ្ឋមន្ត្រី ហ៊ុន សែន និងរដ្ឋមន្ត្រីក្រសួងពាណិជ្ជកម្មឯកឧត្តម ប៉ាន សូរស័ក្តិ ស្តីពីការលើកកម្ពស់ពាណិជ្ជកម្ម និងការតភ្ជាប់។
ឥណ្ឌា និងកម្ពុជាបានរៀបចំព្រឹត្តិការណ៍រួមគ្នានៅកម្ពុជាដូចជាវេទិកាជំនួបពាណិជ្ជកម្មលើកទី ៥ ឥណ្ឌា កម្ពុជា ឡាវ មីយ៉ាន់ម៉ា និងវៀតណាម និងកម្មវិធីផ្សព្វផ្សាយទេសចរណ៍ឥណ្ឌានៅកម្ពុជា «Incredible India Road Show» ក្នុងខែឧសភា ឆ្នាំ ២០១៨។
ទន្ទឹមនឹងការរៀបចំព្រឹត្តិការណ៍នានានៅកម្ពុជា រដ្ឋាភិបាលកម្ពុជា និងប្រតិភូធុរកិច្ចត្រូវបានអញ្ជើញទៅបំពេញទស្សនកិច្ចនៅប្រទេសឥណ្ឌា ដើម្បីចូលរួមកិច្ចប្រជុំ Advantage Assam-India’s Expressway to Asean នៅខែកុម្ភៈ ឆ្នាំ ២០១៨ និងកិច្ចប្រជុំ FICCI Higher Education Summit ក៏ដូចជាព្រឹត្តិការណ៍ និងពិព័រណ៍ផ្សេងៗជាច្រើនទៀត។
ក្រុមហ៊ុនឥណ្ឌាវិនិយោគលើវិស័យជាច្រើននៅកម្ពុជារួមមានក្រុមហ៊ុន Mesco Gold, Bajaj Cambodia និង Sram Mram Ltd. រដ្ឋាភិបាលឥណ្ឌាគ្រោងនឹងបង្កើនវត្តមានសេដ្ឋកិច្ចឥណ្ឌានៅកម្ពុជា ឡាវ មីយ៉ាន់ម៉ា និងវៀតណាម។ ពាណិជ្ជកម្មរបស់ឥណ្ឌាជាមួយប្រទេសទាំង ៤ ទទួលបានកំណើនគួរឱ្យកត់សម្គាល់ក្នុងរយៈពេលជាច្រើនឆ្នាំមកនេះពី ៤៦០ លានដុល្លារ ក្នុងឆ្នាំ ២០០០ កើនដល់ ៤,៩៧ ពាន់លានដុល្លារក្នុងឆ្នាំ ២០០៤ និង ១៤,៥ ពាន់លានដុល្លារក្នុងឆ្នាំ ២០១៧។
បច្ចុប្បន្នដៃគូពាណិជ្ជកម្មធំជាងគេជាមួយកម្ពុជា ឡាវ មីយ៉ាន់ម៉ា និងវៀតណាមរបស់ប្រទេសនៅអាស៊ីខាងត្បួងមួយនេះកំពុងពិភាក្សាលើសន្ធិសញ្ញាវិនិយោគទ្វេភាគីឥណ្ឌា-កម្ពុជា (India-Cambodia Bilateral Investment Treaty) ។
កម្ពុជា និងឥណ្ឌាបានចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការក្នុងវិស័យមួយចំនួនដូចជាកសិកម្ម សហប្រតិបត្តិការវិទ្យាសាស្ត្រ និងបច្ចេកវិទ្យា ការអភិវឌ្ឍសហគ្រិនភាព និងទេសចរណ៍។ ទំនាក់ទំនងសេដ្ឋកិច្ចរវាងប្រទេសទាំង ២ ក៏ត្រូវបានសម្របសម្រួលដោយកិច្ចសហប្រតិបត្តិការមេគង្គហ្គាំងហ្គា (Mekong-Ganga Cooperation) និងកិច្ចព្រមព្រៀងពាណិជ្ជកម្មសេរីអាស៊ាន ឥណ្ឌា។
ខណៈប្រទេសកម្ពុជា និងឥណ្ឌាកំពុងឆ្ពោះទៅរកអនាគតរុងរឿងជាមួយគ្នា ពួកគេក៏រីករាយជាមួយនឹងចំណងមិត្តភាពជាប្រវត្តិសាស្ត្រដ៏យូរលង់មកហើយផងដែរ៕
