.jpg)
វិស័យសាជីវកម្មត្រូវបានរំពឹងថានឹងមានកំណើនក្នុងឆ្នាំ ២០១៩។ រូបថត Shutterstock
ការព្យាករសេដ្ឋកិច្ចពិភពលោកគឺនៅមិនទាន់មានភាពប្រាកដប្រជានៅឡើយ ខណៈសង្គ្រាមពាណិជ្ជកម្មរវាងសហរដ្ឋអាមេរិក និងចិនកំពុងបន្តកាន់តែធ្ងន់ធ្ងរដែលបានធ្វើឲ្យប៉ះពាល់ដល់វិស័យជាច្រើន។
ទោះបីបរិយាកាសសេដ្ឋកិច្ចក្នុងតំបន់ និងពិភពលោកកំពុងមានភាពមិនច្បាស់លាស់ក្តី ប៉ុន្តែសម្រាប់ការព្យាករវិស័យសាជីវកម្មកម្ពុជានៅតែមានភាពវិជ្ជមានដោយសារក្រុមហ៊ុនវិនិយោគជាច្រើនកំពុងស្វែងរកការពង្រីកអាជីវកម្មរបស់ខ្លួននៅក្នុងតំបន់អាស៊ាន។
ក្រុមអ្នកជំនាញមានទំនុកចិត្តថា កំណើនសេដ្ឋកិច្ចកម្ពុជាក្នុងរង្វង់ ៧ ភាគរយអស់រយៈពេលប្រមាណ ២០ ឆ្នាំកន្លងមកនេះត្រូវបានគេរំពឹងថានៅក្នុងឆ្នាំ ២០១៩ នេះនៅតែបន្តកើនឡើង។ ពិតណាស់កំណើនសេដ្ឋកិច្ចរបស់កម្ពុជាគឺខ្ពស់ជាងគេក្នុងចំណោមសមាជិកអាស៊ាន។
ទោះបីយ៉ាងណាក៏ដោយការថយចុះកំណើនសេដ្ឋកិច្ចសកលដោយសារតែសង្គ្រាមពាណិជ្ជកម្មរវាងសហរដ្ឋអាមេរិក និងចិនក្នុងពេលបច្ចុប្បន្នត្រូវបានគេមើលឃើញថាវាជាឱកាសមួយសម្រាប់វិស័យសាជីវកម្មរបស់កម្ពុជាក្នុងការទាញយកប្រយោជន៍នៃការធ្វើកំណែទម្រង់ដ៏ខ្លាំងក្លាមួយចំនួន ដើម្បីគាំទ្រដល់កំណើននេះ និងធ្វើឱ្យប្រទេសកម្ពុជាមានការប្រកួតប្រជែងដល់កម្រិតសកល។
ទន្ទឹមនឹងនេះដែរវិស័យកាត់ដេរ និងទេសចរណ៍បានផ្តល់នូវកម្លាំងជំរុញសេដ្ឋកិច្ចដ៏រឹងមាំដល់សេដ្ឋកិច្ចកម្ពុជាក្នុងឆ្នាំ ២០១៨។ វិស័យទាំង ២ នេះគឺជាផ្នែកដ៏សំខាន់ដែលជំរុញដល់ដំណើរការសេដ្ឋកិច្ច។
ឧស្សាហកម្មកាត់ដេរបានកើនឡើងនៅក្នុងឆ្នាំ ២០១៨ ដោយសារការផ្លាស់ប្តូរទីតាំងមកកាន់ប្រទេសកម្ពុជាដែលបណ្តាលមកពីកំណើនប្រាក់ឈ្នួលនៅក្នុងប្រទេសចិន ខណៈដែលរោងចក្រជាច្រើននៅប្រទេសបង់ក្លាដែសបានជួបផលវិបាកមួយចំនួន។ ផលិតផលសម្លៀកបំពាក់សរុបបានកើនឡើងចំនួន ១១ ភាគរយ។
វិស័យទេសចរណ៍ក៏បានកើនឡើងចំនួន ១១ ភាគរយដែរ ដោយសារកំណើននៃការមកដល់នៃភ្ញៀវទេសចរអន្តរជាតិ។
សម្រាប់ឆ្នាំ ២០១៩ ឧស្សាហកម្មកាត់ដេរជាថ្មីម្តងទៀតត្រូវបានរំពឹងថានឹងដើរតួនាទីយ៉ាងសំខាន់ចំពោះសេដ្ឋកិច្ចដែលមាន ១៦ ភាគរយនៃផលិតផលក្នុងស្រុកសរុប (GDP) ស្មើនឹង ៨០ ភាគរយនៃការនាំចេញសរុប។
ប៉ុន្តែទោះជាយ៉ាងណាក៏ដោយវិស័យនេះអាចនឹងឃើញជួបឧបសគ្គមួយចំនួនដែលបណ្តាលមកពីបញ្ហាប្រឈមចំនួន ២។
បញ្ហាប្រឈមទី ១ គឺករណីសហភាពអឺរ៉ុបដកពន្ធអនុគ្រោះ EBA។ ប្រមាណ ៤០ ភាគរយនៃការនាំចេញសម្លៀកបំពាក់របស់កម្ពុជាទាំងអស់គឺនាំចេញទៅកាន់សហភាពអឺរ៉ុប។
ខណៈដែលបញ្ហានេះអាចប៉ះពាល់ដល់ឧស្សាហកម្មកាត់ដេរនោះក្រុមអ្នកជំនាញជឿជាក់ថាការនាំចេញទៅកាន់សហរដ្ឋអាមេរិកដែលមានប្រមាណ ៣០ ភាគរយអាចនឹងកើនឡើង។
បញ្ហាប្រឈមមួយទៀតដែលប៉ះពាល់ដល់វិស័យកាត់ដេរក៏ដូចជាវិស័យដទៃទៀតគឺថាមពលដើម្បីជំរុញដល់ការផលិត។
ខណៈប្រទេសកម្ពុជាសម្បូរទៅដោយប្រភពធនធាននោះ វិស័យថាមពលត្រូវការអភិវឌ្ឍបន្ថែមទៀត។ គម្រោងតភ្ជាប់បណ្តាញអគ្គិសនីទៅដល់គ្រប់ខេត្តក្រុងទាំង ២៥ ត្រឹមឆ្នាំ ២០២០ កំពុងប្រព្រឹត្តទៅហើយក៏មានគម្រោងទាញយកថាមពលដោយប្រើថាមពលព្រះអាទិត្យ ថាមពលខ្យល់ និងជីវឧស្ម័នផងដែរ ដើម្បីបំពេញតម្រូវការថាមពលក្នុងពេលបច្ចុប្បន្ន និងពេលអនាគត។
វិស័យសំណង់ផ្តល់នូវសក្តានុពលដ៏ធំធេងដល់វិនិយោគិន។ ការស្ថាបនាហេដ្ឋារចនាសម្ព័ន្ធ ផ្លូវថ្នល់ អគារលំឋាន អគារពាណិជ្ជកម្ម និងសាលារៀនបានផ្តល់ឱ្យអ្នកវិនិយោគនូវឱកាសដ៏ធំសម្រាប់ការវិនិយោគ និងទទួលបានផលចំណេញដ៏ប្រសើរ។
វិស័យសាជីវកម្មរបស់កម្ពុជាត្រូវបានគេរំពឹងថានឹងមានកំណើនខ្ពស់នៅក្នុងឆ្នាំ ២០១៩ នេះដោយសារតែការចំណាយរបស់អ្នកប្រើប្រាស់មានកម្រិតខ្ពស់ ដែលជាសក្តានុពលមួយធ្វើឲ្យវិស័យនេះកើនឡើង ខណៈវិនិយោគិនចាប់ផ្តើមចូលមកកាន់តែច្រើនដោយសារតម្លៃផលិតកម្មទាប ផលិតភាពការងារកំពុងកើនឡើង និងការប្រើប្រាស់ធនធានធម្មជាតិមានប្រសិទ្ធភាព។
អនាគតដ៏ត្រចះត្រចង់កំពុងរង់ចាំប្រជាជនកម្ពុជា ខណៈពួកគេកំពុងឈានជើងចូលទៅរកអនាគតមួយដែលពោរពេញទៅដោយសក្តានុពល និងឱកាស៕
