លោក Han Peng Kwang នាយកគ្រប់គ្រងទូទៅនៅធនាគារ Phillip Bank Plc បានឲ្យដឹងថា ការប្រើប្រាស់ប្រាក់រៀលនៅពេលនេះបាននឹងកំពុងរីករាលដាលកាន់តែច្រើនដោយសារតែការយល់ដឹងកំពុងចាប់ផ្ដើមកើនឡើង ដែលជាសក្ខីកម្មដ៏ច្បាស់លាស់មួយ ដែលរូបិយប័ណ្ណជាតិកំពុងទទួលបានភាពពេញនិយម។ ក្នុងបទសម្ភាសមួយជាមួយកាសែត ភ្នំពេញ ប៉ុស្ដិ៍ លោកបានពន្យល់ពីតួនាទីប្រាក់រៀល និងបញ្ហាប្រឈមរបស់វា។
តើអ្នកវាយតម្លៃសមិទ្ធផលនៃការប្រើប្រាស់រូបិយប័ណ្ណក្នុងស្រុកដូចម្ដេច?
យើងបានគិតថា ការប្រើប្រាស់រូបិយប័ណ្ណក្នុងស្រុកកំពុងមានការចាប់អារម្មណ៍កាន់តែខ្លាំងនៅតាមទីក្រុងដោយមានការបង្ហាញតម្លៃជាប្រាក់រៀលនៅតាមផ្សារទំនើប ភោជនីយដ្ឋាន និងហាងលក់រាយកើនឡើងកាន់តែខ្លាំង។ សូម្បីតែហាងធំៗដូចជា ផ្សារទំនើប Aeon Shopping Mall ផ្សារទំនើប Bayon Supermarket ផ្សារទំនើប Lucky Supermarket និងផ្សារទំនើបផ្សេងទៀត កំពុងតាំងបង្ហាញទំនិញរបស់ពួកគេជាប្រាក់រៀលក្រៅពីប្រាក់ដុល្លារ។
ហើយវាក៏ជារឿងធម្មតាសម្រាប់អ្នកលក់ក្នុងការដាក់តម្លៃជាប្រាក់រៀល សម្រាប់ទីផ្សារបន្លែ និងអាហារស្រស់ៗក្នុងស្រុក ។ លើសពីនេះការប្រើប្រាស់រូបិយប័ណ្ណក្នុងស្រុកនៅតាមតំបន់ជនបទមានជាទូទៅរួចទៅហើយ ហើយនេះក៏បានបង្ហាញពីការរីករាលដាលនៃភាពងាយស្រួលក្នុងការជួញដូរជាប្រាក់រៀលផងដែរ។ ទាំងអស់នេះគឺជា ភស្ដុតាងបញ្ជាក់ថាការប្រើប្រាស់ប្រាក់រៀលកំពុងក្លាយជាបទដ្ឋានមួយជាបណ្ដើរៗនៅក្នុងទីផ្សារនេះ។
តើសេដ្ឋកិច្ចនឹងទទួលបានអត្ថប្រយោជន៍ដូចម្ដេច ប្រសិនបើត្រូវបានប្រើប្រាស់ជំនួយដោយប្រាក់ដុល្លារអាមេរិក?
វាជាការពិតដែលថាការធ្វើដុល្លារូបនីយកម្មខ្ពស់បានធ្វើឲ្យប្រទេសកម្ពុជាកា្លយជាទិសដៅគួរឲ្យទាក់ទាញមួយសម្រាប់ការវិនិយោគបរទេសក្នុងរយៈពេលជាច្រើនឆ្នាំកន្លងមក និងបានផ្ដល់សេដ្ឋកិច្ចនូវស្ថិរភាពចាំបាច់បំផុត បន្ទាប់ពីរយៈពេលជាច្រើនឆ្នាំដោយសារតែជម្លោះស៊ីវិល។ ប៉ុន្តែវាបានបណ្ដាលឲ្យប្រទេសនេះងាយទទួលរងគ្រោះដោយសារតែការផ្លាស់ប្តូរក្នុងសេដ្ឋកិច្ចអន្តរជាតិ និងមិនមានស្ថិរភាពក្នុងការអនុវត្តគោលនយោបាយរូបិយវត្ថុប្រទេសខ្លួនប្រកបដោយប្រសិទ្ធភាពដើម្បីគ្រប់គ្រងសេដ្ឋកិច្ច។
អាស្រ័យហេតុនេះប្រសិនបើប្រាក់រៀលត្រូវប្រើប្រាស់ និងទទួលយកយ៉ាងទូលំទូលាយនិយ័តករនឹងមានឥទ្ធិពលកាន់តែរឹងមាំលើគោលនយោបាយរូបិយវត្ថុរបស់ខ្លួននៅក្នុងប្រទេសនេះ។ ក្រៅពីអាចអនុវត្តគោលនយោបាយរូបិយវត្ថុជាមួយនឹងការប្រើប្រាស់ប្រាក់រៀល ប្រទេសនេះនឹងទទួលបានអធិបតេយ្យភាព សេដ្ឋកិច្ច មោទនភាពជាតិ និងប្រាក់ចំណេញ។
តើអ្វីជាវិស័យសំខាន់ៗដែលនឹងទទួលបានអត្ថប្រយោជន៍ ប្រសិនបើក្រុមហ៊ុនផ្លាស់ប្តូរទៅប្រើប្រាស់ប្រាក់រៀលកាន់តែទូលំទូលាយ?
អាចជាវិស័យដែលមានការចំណាយរបស់អតិថិជនកម្រិតខ្ពស់ដូចជាវិស័យលក់រាយ។ វិស័យមួយផ្សេងទៀតគឺវិស័យកសិកម្មនៅក្នុងប្រទេសកម្ពុជាដោយសារតែការប្រើប្រាស់ប្រាក់រៀលអាចមានតម្លាភាពកាន់តែខ្លាំង និងជួយកាត់បន្ថយការចំណាយលើអត្រាប្តូរប្រាក់ដែលអាចធ្វើប៉ះពាល់ដល់ការចំណាយរបស់ពួកគេនៅក្នុងទីផ្សារនេះ។ ក្រុមហ៊ុនក្នុងស្រុកផ្សេងទៀតនឹងទទួលបានអត្ថប្រយោជន៍ពីការប្រើប្រាស់រូបិយប័ណ្ណរួមនេះហើយនឹងកាត់បន្ថយការចំណាយផ្សេងៗ ក្រៅពីការផលិត និងការងាររបស់ពួកគេ។
ជារួមមកចាប់តាំងពីវិស័យសាធារណៈដូចជាអគ្គិសនីកម្ពុជា (EDC) រដ្ឋាករទឹក និងក្រសួងផ្សេងៗទៀតបានជួញដូរភាគច្រើនជាប្រាក់រៀល អាស្រ័យហេតុនេះវិស័យឯកជននឹងទទួលបានអត្ថប្រយោជន៍ ប្រសិនបើពួកគេផ្លាស់ប្តូរទៅប្រើប្រាស់ប្រាក់រៀល ដូច្នេះពួកគេនឹងមិនបណ្ដាលឲ្យមានការខាតបង់អត្រាប្តូរប្រាក់ណាមួយនៅពេលពួកគេប្តូរប្រាក់ដុល្លាររបស់ពួកគេទៅជាប្រាក់រៀលនៅពេលពួកគេជួញដូរជាមួយវិស័យសាធារណៈ។
កម្ពុជាគឺជាសមាជិកដ៏សំខាន់មួយរបស់អាស៊ាន តើវិធានការទទួលយកប្រាក់រៀល ជារូបិយវត្ថុតែមួយគត់នេះរួមចំណែកដល់ពាណិជ្ជកម្មនៅក្នុងតំបន់អាស៊ានកាន់តែច្រើនដែរឬទេ?
វាអាស្រ័យលើវិសាលភាពនៃ «ការជួញដូរ» ប្រាក់រៀលនៅក្នុងទីផ្សារប្តូរប្រាក់បរទេស។ ទន្ទឹមនឹងនេះយើងបានគិតថា ប្រភេទនៃរូបិយប័ណ្ណដែលប្រើប្រាស់ដោយប្រទេសនីមួយៗនឹងមិនប៉ះពាល់ដល់ពាណិជ្ជកម្មនៅក្នុងតំបន់អាស៊ាននោះទេ។ សំខាន់ជាងនេះទៅទៀតការធ្វើសមាហរណកម្មដល់កម្រិតណាមួយនោះរវាងកម្ពុជា និងបណ្ដាប្រទេសផ្សេងទៀតនៅតំបន់អាស៊ានដូចជាពាណិជ្ជកម្មសេរីទ្វេភាគី ឬពហុភាគី និងកិច្ចព្រមព្រៀង វិនិយោគ ដែលនឹងជំរុញឲ្យមានការធ្វើពាណិជ្ជកម្មកាន់តែច្រើនរវាងប្រទេសទាំងនេះ។
តាមយោបល់របស់អ្នកក្នុងនាមជាធនាគារិកអាជីព តើរដ្ឋាភិបាលអាចប្រើប្រាស់ប្រាក់រៀលដូចម្ដេច ហើយតើនរណាគួរតែជាក្រុមទិសដៅ?
រដ្ឋាភិបាលអាចចាប់ផ្ដើមលើកកម្ពស់ការប្រើប្រាស់ប្រាក់រៀលដល់ក្រុមក្មេងៗ និងយុវវ័យ ដោយសារតែពួកគេមានចំនួនច្រើនក្នុងចំណោមប្រជាជនសរុបនៅក្នុងប្រទេស។ នៅពេលពួកគេស៊ាំនឹងការប្រើប្រាស់ប្រាក់រៀលចាប់ពីជំនាន់របស់ពួកគេតទៅមុខ ការប្រើប្រាស់ប្រាក់រៀលនឹងត្រូវបានគាំពារនៅក្នុងការរស់នៅប្រចាំថ្ងៃរបស់ពួកគេ ហើយអាស្រ័យដូចនេះនឹងក្លាយជារូបិយវត្ថុសំខាន់នៅពេលអនាគត។
រដ្ឋាភិបាលអាចចាប់ផ្ដើមធ្វើយុទ្ធនាការយុវជនផ្សេងៗក្នុងការលើកកម្ពស់ការប្រើប្រាស់ប្រាក់រៀល ហើយយុវជននឹងត្រូវបានជំរុញ និងលើកទឹកចិត្តក្នុងការប្រើប្រាស់ និងប្រាប់បន្តទៅយុវជនគ្នាគាត់។ សម្រាប់ពេលនេះរដ្ឋាភិបាលអាចប្រើប្រាស់បទប្បញ្ញត្តិដូចជា ប្រាក់ខែរបស់បុគ្គលិកទាំងអស់ត្រូវបានបើកជាប្រាក់រៀល ដូច្នេះទីបំផុតនឹងឈានទៅដល់ការប្រើប្រាស់ប្រាក់រៀលកាន់តែច្រើនឡើងៗ។
ធនាគារជាតិនៃកម្ពុជាបានដឹកនាំគ្រឹះស្ថានធនាគារ និងហិរញ្ញវត្ថុឲ្យសម្រេចបានការផ្ដល់ឥណទានជាប្រាក់រៀលឲ្យបានយ៉ាងតិច ១០ ភាគរយនៃសំពៀតឥណទានសរុបនៅចុងឆ្នាំ ២០១៩។ តើការធ្វើដូច្នេះវារីកចម្រើនដូចម្ដេច?
យើងយល់ថាធនាគារទាំងអស់កំពុងធ្វើការងារដើម្បីសម្រេចបានតាមផែនការនេះ ហើយធនាគារជាច្រើនកំពុងធ្វើការងារយ៉ាងជិតដិលជាមួយនិយ័តករ ដើម្បីសម្រេចបានតាមគោលបំណងនេះ។ ក្នុងនោះធនាគារមួយចំនួនកំពុងមានការរីកចម្រើនល្អប្រសើរ ហើយមួយចំនួនទៀតនៅតែមានឱកាសច្រើនសម្រាប់ការអនុវត្តតាមប្រកាស។ ចំពោះធនាគារ Phillip Bank យើងមានសុទិដិ្ឋនិយមថាយើងនឹងសម្រេចបានតាមទិសដៅកំណត់នេះតាមពេលវេលាកំណត់។
តើអ្វីជាបញ្ហាប្រឈមចម្បងចំពោះធនាគារបរទេស ប្រសិនបើប្រាក់រៀលជំនួសប្រាក់ដុល្លារ?
នឹងមានទំហំហានិភ័យបន្ថែម (នោះគឺ) ការប្តូរប្រាក់បរទេសរវាងប្រាក់ដុល្លារ និងប្រាក់រៀល។ ទន្ទឹមនឹងនេះយើងបានគិតថា បញ្ហាប្រឈមមិនគ្រាន់តែជួបប្រទះដោយធនាគារបរទេសប៉ុណ្ណោះទេ ប៉ុន្តែរួមទាំងធនាគារក្នុងស្រុកផងដែរ ដោយសារតែបច្ចុប្បន្នកម្ចី និងប្រាក់បញ្ញើស្ទើរតែទាំងអស់ត្រូវបានគិតជាប្រាក់ដុល្លារ។
ក្នុងនាមជាធនាគារបរទេស តើការរៀបចំលើកកម្ពស់ប្រាក់របស់អ្នកដូចម្ដេចដែរ? តើប្រាក់ខែរបស់បុគ្គលិកត្រូវបើកជាប្រាក់រៀលដែរឬ?
យើងកំពុងលើកកម្ពស់ប្រាក់រៀលតាមរយៈការលើកទឹកចិត្ត និងការបញ្ចុះបញ្ចូលអតិថិជន និងក្រុមហ៊ុនលក់រាយរបស់យើងត្រូវខ្ចីជាប្រាក់រៀលជំនួសប្រាក់ដុល្លារ។ យើងកំពុងគាំទ្រគ្រឹះស្ថានមីក្រូហិរញ្ញវត្ថុមួយចំនួនតាមរយៈការផ្ដល់កម្ចីដើម្បីផ្ដល់ដល់ពួកគេនូវទុនបង្វិលកាន់តែច្រើន ដែលអនុញ្ញាតិឲ្យពួកគេអាចផ្ដល់កម្ចីជាប្រាក់រៀល ដើម្បីគាំទ្រការរស់នៅរបស់ប្រជាជនកម្ពុជានៅតាមតំបន់ និងតាមភូមិនៅជនបទ។
យើងបានផ្ដួចផ្ដើមយុទ្ធនាការមួយដើម្បីជួយលើកកម្ពស់ការខ្ចីជាប្រាក់រៀល ជាឧទាហរណ៍នៅក្នុងយុទ្ធនាការ បន្ទាប់របស់យើងសម្រាប់កម្ចីផ្ទាល់ខ្លួន យើងនឹងផ្ដល់អត្រាការប្រាក់កម្ចីជាប្រាក់រៀលចំនួន ១៥ ភាគរយប៉ុណ្ណោះក្នុងមួយឆ្នាំ ខណៈដែលជាប្រាក់ដុល្លារ គឺ ១៦ ភាគរយក្នុងមួយឆ្នាំ។ ទាក់ទងនឹងប្រាក់ខែរបស់បុគ្គលិក យើងមានបំណងបម្លែងមួយផ្នែកនៃប្រាក់ខែបុគ្គលិកត្រូវបើកជាប្រាក់រៀលផងដែរ៕