កាលពីចុងសប្តាហ៍កន្លងទៅនេះលោក គង់ ឈុន (Kong Chhun) មកពីខេត្តសៀមរាបទើបបានបញ្ចប់ការសិក្សា និងទទួលសញ្ញាបត្រកម្រិត ACCA និងអ្នកស្រី យិនន៍ សិរីវឌ្ឍនា (Yinn Sirivaddhana) ក៏ជានិស្សិតទើបបានបញ្ចប់ការសិក្សាដោយទទួលបានសញ្ញាបត្រ CAT នៅវិទ្យាស្ថានដ៏ល្បីល្បាញ CamEd Business School ដូចគ្នា។
ថ្វីបើពួកគាត់ទាំង ២ នាក់មានការងារធ្វើស្រាប់ក៏ពិតមែន ប៉ុន្តែគាត់ទាំង ២ បានមើលឃើញពីលទ្ធភាពក្រោយពីបញ្ចប់ការសិក្សា ដើម្បីជួយឲ្យការងារប្រសើរឡើង និងមានប្រសិទ្ធភាពល្អរបស់ពួកគាត់រៀងៗខ្លួន។
នៅក្នុងដៃមានកាន់ក្រដាសសញ្ញបត្រមួយប្រកបដោយទឹកមុខរីករាយលោក គង់ ឈុន ដែលជាបុគ្គលិកបំពេញការងារនៅក្នុងក្រុមហ៊ុនឯកជនមួយនៅឯក្រុងសៀមរាបបានថ្លែងថា ការខិតខំសិក្សារហូតទទួលបានសញ្ញាបត្រ ACCA របស់លោកនៅថ្ងៃនេះវាជាមោទនភាព វាពិតជាមានប្រយោជន៍ក្នុងការជួយសម្រួលដល់កិច្ចការរបស់លោកដែលកំពុងបំពេញជារៀងរាល់ថ្ងៃនេះជាប្រាកដ។
លោកបន្តថា៖ «សម្រាប់ខ្ញុំពុំមែនធ្វើការនៅផ្នែកគណនេយ្យ ឬហិរញ្ញវត្ថុ ឬក៏សវនករមែន ប៉ុន្តែនៅពេលដែលមានសវនករពីស្ថាប័នផ្សេងៗគាត់ចង់មកធ្វើសវនកម្មនៅកន្លែងរបស់ខ្ញុំ គឺយើងងាយស្រួលក្នុងការជជែកពិភាក្សាជាមួយក្រុមអ្នកជំនាញទាំងនោះបានងាយយល់ល្អប្រសើរជាង យើងធ្វើការឆាប់ចប់ និងបានត្រឹមត្រូវល្អជាង»។
ចំណែកអ្នកស្រី យីនន៍ សិរីវឌ្ឍនា ដែលញញឹមពព្រាយជាមួយក្រដាសសញ្ញាបត្រ ១ សន្លឹកនៅក្នុងដៃផ្ទាល់នោះបានថ្លែងថា៖ «សម្រាប់ខ្ញុំរៀនចប់ និងទទួលបានសញ្ញាបត្រ CAT ហ្នឹងមានផលប្រយោជន៍ច្រើន ព្រោះការងាររបស់ខ្ញុំសព្វថ្ងៃនេះ គឺខាងសវនកម្ម (Audit) ហើយខ្ញុំធ្វើការជាមន្ត្រីរាជការនៅអគ្គនាយកដ្ឋានពន្ធដារនៅផ្នែកពន្ធដារស្រាប់ ដូច្នេះការរៀនចប់នេះគឺត្រូវនឹងជំនាញតែម្តង ហើយវានឹងជួយជាប្រយោជន៍ច្រើន»។
ទាក់ទងទៅនឹងមេរៀននៅសាលា និងបច្ចេកទេសការងារនោះអ្នកស្រី សិរីវឌ្ឍនា បន្តថា៖ «ការងាររបស់ខ្ញុំខាងសវនកម្មហ្នឹងគឺត្រូវការជំនាញទាំងគណនេយ្យ សវនកម្ម និងថែមជាមួយច្បាប់ពន្ធដាររបស់យើងទៀត។ អ៊ីចឹងទ្រឹស្តីយើងរៀននៅសាលា និងការអនុវត្ត (នៅកន្លែងធ្វើការផ្ទាល់) ហើយរួមជាមួយច្បាប់របស់យើងល្អផង ជាពិសេសពាណិជ្ជករ ឬក្រុមហ៊ុនពួកគាត់កំពុងភ្ញាក់រឭកក្នុងការបង់ពន្ធ និងចាប់ផ្តើមប្រើប្រាស់ប្រព័ន្ធមានស្តង់ដារថ្មីផង ដូច្នេះនៅពេលយើងធ្វើការ និងជជែកពិភាក្សាជាមួយពួកគាត់ (ក្រុមហ៊ុន) ឆាប់យល់គ្នាជាង»។
លោក ឈុន បានពន្យល់ថា៖ «ការសិក្សារៀនសូត្រតាមកម្មវិធី CAT និង ACCA នេះ គឺជាកម្មវិធីសិក្សាថ្មីប្លែក វាជាការអនុវត្តច្រើនជាងទ្រឹស្តី ដោយសារពួកគេ (សមាគមគណនេយ្យករជំនាញ ACCA) បានដកស្រង់យកករណីផ្ទាល់ៗដែលគេបានជួបប្រទះមកធ្វើជាមេរៀនសិក្សាអនុវត្តផ្ទាល់តែម្តង»។
លោកបន្តថា សមាគមគណនេយ្យករជំនាញ ACCA មានទីតាំងនៅចក្រភពអង់គ្លេស ពួកគេប្រមូលផ្តុំទៅដោយគណនេយ្យករជំនាញជើងចាស់ដែលមានបទពិសោធបំពេញការងារជាច្រើនឆ្នាំនៅតាមក្រុមហ៊ុននានា ឬប្រទេសផ្សេងៗ «ហើយនៅពេលគេជួបបញ្ហាអ្វីថ្មី ១ ពួកគេលើកយកទៅដោះស្រាយបានសម្រេចហើយទើបគេចងក្រងជាមេរៀន និងការអនុវត្តសម្រាប់ពួកយើងជានិស្សិត»។
ពាក់ព័ន្ធនឹងនិន្នាការថ្មីនារយៈពេលប៉ុន្មានឆ្នាំចុងក្រោយដែលចំណូលពីវិស័យពន្ធដារនៅក្នុងប្រទេសកម្ពុជាមានកំណើនខ្ពស់ជាលំដាប់នោះអ្នកទាំង ២ បានយល់ស្របគ្នាថា៖ «វាជានិន្នាការថ្មី ១ រីឯច្បាប់ពន្ធដាររបស់យើងក៏មានលក្ខណៈល្អប្រសើរឡើង និងមន្ត្រីបម្រើសេវាកម្មក៏មានតម្លាភាពល្អច្រើន។ ចំណែកឯប្រជាជន ឬអាជីវករនោះពួកគាត់ក៏មានការយល់ដឹងច្រើន និងចង់បំពេញកាតព្វកិច្ចជាប្រជាពលរដ្ឋល្អផងដែរ»។
វិទ្យាស្ថាន CamEd Business School គឺជាវិទ្យាស្ថានមួយដែលមានការបណ្ដុះបណ្ដាលលើផ្នែកគណនេយ្យ ហិរញ្ញវត្ថុ និងសវនកម្មដោយមានការទទួលស្គាល់ពីសំណាក់សមាគមគណនេយ្យករជំនាញ ACCA ដែលមានទីតាំងនៅចក្រភពអង់គ្លេស និងមានការទទួលស្គាល់រហូតទៅដល់ ១៨៣ ប្រទេសលើពិភពលោក។
ជាមួយគ្នានេះ ខេមអេដ បានដើរតួនាទីយ៉ាងសំខាន់នៅក្នុងការបណ្ដុះបណ្ដាលធនធានមនុស្សដែលមានទាំងចំណេះដឹង ជំនាញវិជ្ជាជីវៈ និងបទពិសោធច្បាស់លាស់លើផ្នែកគណនេយ្យ ហិរញ្ញវត្ថុ និងសវនកម្ម សម្រាប់បម្រើការនៅក្នុងស្ថាប័នរដ្ឋ និងស្ថាប័នឯកជននានាទាំងក្នុងស្រុក និងអន្តរជាតិ ហើយរួមផ្សំនឹងការត្រួសត្រាយដោយសាស្ត្រាចារ្យ ដែលមានទាំងបទពិសោធ ចំណេះដឹង និងការទទួលស្គាល់ជាលក្ខណៈអន្តរជាតិមកពីបណ្តាប្រទេសជាច្រើនជាលទ្ធផលនិស្សិតនៃវិទ្យាស្ថានខេមអេដ ប្រមាណ ៩៨ ភាគរយមានការងារធ្វើក្រោយពីបានបញ្ចប់ការសិក្សា៕