នៅឆ្នាំ ២០១១ អ្នកស្រី កេង សុគន្ធ បានផ្លាស់មកធ្វើការនៅសាលានា ភូមិស្រះកំប៉ោកដោយនៅសាលាថ្មីនេះ គាត់ទទួលតំណែងជានាយកសាលា។ នៅពេលចូលធ្វើការដំបូង គ្រូៗទាំងប្រាំនាក់នៅសាលាបានប្រាប់គាត់ឲ្យប្រយ័ត្នពីគ្រោះថ្នាក់ដែលអាចកើតឡើងពីគ្រាប់មីននៅដីខាងក្រោយសាលា។
ពួកគាត់ដឹងថា នៅខាងក្រោយសាលា វាប្រហែលជាមានមីន និងគ្រាប់មិនទាន់ផ្ទុះ ដែលសល់តាំងពីសម័យសង្គ្រាម ប៉ុន្តែពួកគាត់មិនបានដឹងឡើយអំពីទំហំនៃគ្រោះថ្នាក់ ហើយជាការបង្ការ គ្រូៗបានហាមឃាត់សិស្សក្នុងសាលាទាំងអស់ ជាពិសេសក្មេងៗតូចមិនឲ្យទៅលេងនៅបរិវេណនោះទេ។
អ្នកគ្រូ សុគន្ធ បាននិយាយថា៖ «ទោះបីជាពួកយើងបានពន្យល់ទៅកាន់ក្មេងៗក៏ដោយក៏ពេលខ្លះ វានៅតែពិបាក ជាពិសេសគឺក្មេងតូចៗដែលមិនសូវយល់ដឹងពីគ្រោះថ្នាក់ ហើយតែងតែភ្លេចថា ពួកគេមិនអាចលេងនៅទីនោះបាន»។
ប៉ុន្តែមិនយូរប៉ុន្មានក្នុងឆ្នាំដដែលនោះ មានសិស្សម្នាក់បានចូលទៅលេងក្នុងតំបន់ហាមឃាត់។ ក្មេងនោះក៏បានឃើញវត្ថុដែលមានរាងដូចជាគ្រាប់មីន ឫគ្រាប់មិនទាន់ផ្ទុះ តែជាសំណាងល្អ ក្មេងនោះបានជូនដំណឹងទៅគ្រូៗ ហើយពួកគាត់ក៏បានទាក់ទងអង្គការ ហេឡូត្រាស្តដើម្បីមកបោសសម្អាតមីន។
ហេឡូត្រាស្ត ជាអង្គការបោសសម្អាតមីនដែលមានវ័យចំណាស់ជាងគេ និងធំជាងគេក្នុងពិភពលោក ហើយក្នុងរយៈពេល ២៧ ឆ្នាំនៃវត្តមានរបស់អង្គការនេះនៅកម្ពុជា ហេឡូត្រាស្ត បានបោសសម្អាតមីន គ្រាប់មិនទាន់ផ្ទុះ និងសំណល់ពីសង្គ្រាមនៅតាមភូមិ ឃុំ និងទីកន្លែងដែលសហគមន៍រងការប៉ះពាល់ដោយមីន។
នៅពេលដែល ហេឡូត្រាស្ត ទទួលសំណូមពរពីអ្នកគ្រូ សុគន្ធ ក្រុមវាស់ស្ទង់ទីតាំងមីនរបស់ហេឡូត្រាស្ត បានចុះមកកាន់សាលារៀន និងចាប់ផ្តើមវាស់ស្ទង់ សិក្សាទីតាំងមុននឹងបោសសម្អាត។ ក្រោយពីវាស់ហើយក្រុមការងារបោសសម្អាតមីនដែលទទួលជំនួយពីប្រទេសអាល្លឺម៉ង់បានចូលមកសម្អាត ហើយពួកគេបានរកឃើញគ្រាប់មីនចំនួន ៧ គ្រាប់នៅដីក្រោយសាលា។
សុគន្ធ បាននិយាយថា៖ «ខ្ញុំមានការភ្ញាក់ផ្អើល ដែលពួកគាត់បានរកឃើញមីនដល់ទៅ ៧ គ្រាប់នៅដីក្រោយសាលា។ វាពិតជាមានគ្រោះថ្នាក់ណាស់ដល់ពួកយើង និងក្មេងៗ។»
ក្រុមបោសសម្អាតមីនរបស់ហេឡូត្រាស្ត បានដោះមីន និង អនុញ្ញាតឲ្យសាលា និងសហគមន៍យកដីទៅប្រើប្រាស់ឡើងវិញបាន។ នាពេលឥឡូវនេះក្មេងៗមិនត្រឹមតែអាចលេងយ៉ាងមានសុវត្ថិភាពនៅលើដីនេះទេ អ្នកគ្រូ សុគន្ធ ក៏កំពុងប្រើប្រាស់ដីនេះ ដាំបន្លែ ដើម្បីជួយជីវភាពគ្រូបង្រៀនផ្សេងទៀតផងដែរ។
ចាប់តាំងពីឆ្នាំ ២០១៥ តាមរយៈជំនួយរដ្ឋាភិបាលអាល្លឺម៉ង់ អង្គការ ហេឡូត្រាស្តបានបោសសម្អាតមីន និងបានផ្លាស់ប្តូរ ជីវភាព និងការរស់នៅរបស់ប្រជាជនជាង ១ សែននាក់ក្នុងប្រទេសកម្ពុជា។ ភាពជាដៃគូនេះបានធ្វើឲ្យប្រជាជនដូចជាអ្នកគ្រូ សុគន្ធ និងក្មេងៗដទៃទៀតអាចរៀនសូត្រដោយគ្មានការភ័យខ្លាច និងអាចប្រើប្រាស់ដីសម្រាប់ដាំដុះដោយសុវត្ថិភាព។
ប្រទេសអាល្លឺម៉ង់នឹងនៅតែបន្តសហការជាមួយ ហេឡូត្រាស្តដើម្បីសម្រេចឲ្យបានកម្ពុជាគ្មានមីននៅឆ្នាំ ២០២៥ ហើយដែលឪពុកម្តាយទាំងអស់លែងភ័យខ្លាចពីគ្រោះថ្នាក់ពីគ្រាប់មីនដល់កូនៗរបស់ពួកគាត់។ យោងតាមអាជ្ញាធរមីនកម្ពុជាបានឲ្យដឹងថា នៅមានផ្ទៃដីប្រមាណ ២ ពាន់គីឡូម៉ែតការ៉េទៀតដែលនៅមានគ្រាប់មីន គ្រាប់មិនទាន់ផ្ទុះ និងសំណល់ពីសង្គ្រាមដទៃទៀត ដែលចាំបាច់ត្រូវបោសសម្អាតហើយទំហំនេះគឺធំជាងផ្ទៃក្រឡារាជធានីភ្នំពេញដល់ទៅជិត ៥ ដង៕
អត្ថបទដោយ៖ ស្ថានទូតអាល្លឺម៉ង់ប្រចាំកម្ពុជា និង អង្គការ ហេឡូត្រាស្ត