.jpg)
លោក Tan Jiak Hiang អគ្គនាយកប្រតិបត្តិក្រុមហ៊ុនធានារ៉ាប់រងអាយុជីវិតសុវណា្ណភូមិ ឡាយហ្វ៍
ការរីកចម្រើន និងកំណើនប្រជាជនជំនាន់ថ្មីរបស់ប្រទេស កម្ពុជា គឺជាកាតាលីករដ៏សំខាន់សម្រាប់ជំរុញដល់ឧស្សាហកម្មធានារ៉ាប់រង។ ជាមួយនឹងការយល់ដឹងកាន់តែច្រើនអំពីសារៈសំខាន់នៃធានារ៉ាប់រង បច្ចុប្បន្នអតិថិជនជំនាន់ថ្មីកំពុងវិនិយោគកាន់តែច្រើនទៅក្នុងផែនការការពារអាយុជីវិត។
ឧស្សាហកម្មធានារ៉ាប់រងអាយុជីវិតនៅកម្ពុជា ទើបតែមានអាយុកាលប្រហែល ៧ ឆ្នាំប៉ុណ្ណោះ ប៉ុន្តែទីផ្សារនេះកំពុងរីកលូតលាស់យ៉ាងឆាប់រហ័ស ខណៈប្រជាជនកម្ពុជាកាន់តែច្រើនចាប់ផ្តើមយល់ដឹងអំពីសារៈសំខាន់នៃការធ្វើផែនការហិរញ្ញវត្ថុជាពិសេសនៅក្នុងចំណោមប្រជាជនដែលមានកម្រិតជីវភាពមធ្យម។ ប្រជាជនកម្ពុជាប្រមាណ ៦៥ ភាគរយមានអាយុក្រោម ៣៥ ឆ្នាំ។
ប្រទេសកម្ពុជាគឺជាទីផ្សារដែលកំពុងរីកចម្រើនសម្រាប់អាជីវកម្មធានារ៉ាប់រងអាយុជីវិត។ កាលពីឆ្នាំមុនការចេញបណ្ណសន្យារ៉ាប់រងមានការកើនឡើងរហូតដល់ ៩២ ភាគរយធៀបទៅនឹងឆ្នាំមុនមួយទៀត ហើយកំណើនឧស្សាហកម្មធានារ៉ាប់រងមានការកើនឡើង ៦០ ភាគរយ។
លោក Tan Jiak Hiang អគ្គនាយកប្រតិបត្តិក្រុមហ៊ុនធានារ៉ាប់រងអាយុជីវិត សុវណា្ណភូមិឡាយហ្វ៍ បានឲ្យកាសែតភ្នំពេញប៉ុស្តិ៍ដឹងថា៖ «បណ្ណសន្យារ៉ាប់រងដែលត្រូវបានចេញជូនបានកើនឡើងចំនួន ៩២ ភាគរយ ក្នុងឆ្នាំ ២០១៨ ធៀបនឹងឆ្នាំ ២០១៧ មានន័យថា មនុស្សកាន់តែច្រើនមានការជឿជាក់ និងទទួលយកការធានារ៉ាប់រងជាសំណាញ់គ្រប់គ្រងហានិភ័យ»។
មនុស្សជាច្រើនកំពុងគិតគូរលើការវិនិយោគសម្រាប់អនាគតតាមរយៈការសន្សំ ឬសម្រាប់ការចំណាយលើថ្លៃព្យាបាលដែលមានតម្លៃថ្លៃ។ ប៉ុន្តែដោយមានយុទ្ធនាការផ្សព្វផ្សាយអំពីសារៈសំខាន់នៃធានារ៉ាប់រងអាយុជីវិតពីក្រុមហ៊ុនធានារ៉ាប់រងនានាពួកគាត់បានផ្លាស់ប្តូរការយល់ឃើញរបស់ខ្លួនចំពោះវិស័យធានារ៉ាប់រង។
«បណ្ណសន្យារ៉ាប់រងទាយជ្ជទាន (endowment policy) គឺមានភាពពេញនិយម។ នៅកាលបរិច្ឆេទដល់កំណត់នៃបណ្ណសន្យារ៉ាប់រងអតិថិជននឹងទទួលបានទឹកប្រាក់ត្រឡប់មកវិញ។ អ្នកដែលមានអាយុ ៣០ ឆ្នាំឡើងពួកគេចូលចិត្តទិញបណ្ណសន្យារ៉ាប់រងប្រភេទនេះពីព្រោះពួកគេមានការងារ និងប្រាក់ចំណូលថេរហើយនៅពេលអ្នកមានប្រាក់ចំណូលថេរ នោះអ្នកអាចនឹងនៅសល់ចំណូលខ្លះ ហើយអ្នកអាចចាប់ផ្តើមសម្លឹងមើលផែនការហិរញ្ញវត្ថុហើយមនុស្សជាច្រើនយល់ឃើញថា ការទិញធានារ៉ាប់រងគឺជារបៀបសន្សំមួយបែប»។
ក្រុមហ៊ុនធានារ៉ាប់រងអាយុជីវិតសុវណា្ណភូមិ ឡាយហ្វ៍ដែលជាក្រុមហ៊ុនក្នុងស្រុកគឺជាក្រុមហ៊ុនវិនិយោគរួមគ្នារវាងក្រុមហ៊ុនកាណាឌីយ៉ាអ៊ិនវេសមេនហូលឌីង ភីអិលស៊ី (Canadia Investment Holding PLC) ដែលជាក្រុមហ៊ុនមេរបស់ធនាគារ កាណាឌីយ៉ា និងក្រុមហ៊ុនធានារ៉ាប់រងអាយុជីវិត មឿង ថៃ ឡាយហ្វ៍ ភីស៊ីអិល (Muang Thai Life Assurance PCL) មកពីប្រទេសថៃ។
បច្ចុប្បន្នក្រុមហ៊ុនមានចំណែកទីផ្សារចំនួន ១៦ ភាគរយនៅក្នុងផ្នែកធានារ៉ាប់រងអាយុជីវិតធៀបទៅនឹង ១០ ភាគរយក្នុងឆ្នាំ ២០១៨ ។
ក្នុងរយៈពេល ២ ឆ្នាំជាប់ៗគ្នា ក្រុមហ៊ុនធានារ៉ាប់រងអាយុជីវិតសុវណា្ណភូមិ ឡាយហ្វ៍ ក្លាយជាក្រុមហ៊ុនធានារ៉ាប់រងអាយុជីវិតដែលរីកចម្រើនលឿនជាងគេនៅកម្ពុជា។ សម្រាប់ទីផ្សារក្នុងស្រុក ក្រុមហ៊ុនមានផលិតផលសន្សំសម្រាប់ការសិក្សា ការធានារ៉ាប់រងលើឥណទានកញ្ចប់ធានារ៉ាប់រងសុខភាព និងបណ្ណសន្យារ៉ាប់រងអាយុជីវិតលក្ខណៈជាក្រុម។
អត្រាកំណើនរបស់យើងគឺមានការកើនឡើងគួរឲ្យកត់សម្គាល់។ កំណើនដ៏រឹងមាំនេះគឺដោយសារក្រុមហ៊ុនត្រូវបានគេទទួលស្គាល់កាន់តែច្រើនឡើងៗហើយបច្ចុប្បន្នប្រជាជនកម្ពុជាភាគច្រើនបានស្គាល់អំពីផលិតផលធានារ៉ាប់រងអាយុជីវិត SMILE(the SMILE products)»។
លោក Tan បានបន្ថែមថា៖ « យើងក៏មានបណ្តាញលក់ធានារ៉ាប់រងដ៏រឹងមាំតាមរយៈធនាគារ និងគ្រឹះស្ថានមីក្រូហិរញ្ញវត្ថុដែលឈានមុខជាច្រើន។ យើងមានទីផ្សាររួចហើយដែលនេះជាអំណោយផលល្អមួយសម្រាប់យើង។
លោកបន្ថែមថា៖ «ក្រុមហ៊ុនធានារ៉ាប់រងអាយុជីវិតសុវណា្ណភូមិ ឡាយហ្វ៍ មានចំណែកទីផ្សារខុសៗគ្នាអាស្រ័យលើកម្រិតនៃតម្រូវការ និងលទ្ធភាពរបស់អតិថិជនរបស់យើង»។
ចំពោះក្រុមហ៊ុនធានារ៉ាប់រងតួយ៉ាងដូចជាក្រុមហ៊ុនធានារ៉ាប់រងអាយុជីវិតសុវណា្ណភូមិ ឡាយហ្វ៍ មិនត្រឹមតែផ្តល់នូវសុវត្ថិភាពហិរញ្ញវត្ថុដែលចាំបាច់សម្រាប់បុគ្គលប៉ុណ្ណោះទេ ប៉ុន្តែពួកយើងក៏បានចូលរួមចំណែកដល់ស្ថិរភាពសង្គមដ៏សំខាន់នៅក្នុងប្រទេសផងដែរ។
«សម្រាប់បុគ្គលជាទូទៅក្រុមហ៊ុនធានារ៉ាប់រងដើរតួនាទីយ៉ាងសំខាន់។ នៅពេលបុគ្គលម្នាក់ទិញបណ្ណសន្យារ៉ាប់រងអាយុជីវិតនោះពួកគេមិនមានការព្រួយបារម្ភពីការសងបំណុលទៅស្ថាប័នផ្តល់កម្ចីហើយក៏អាចផ្តល់នូវសុវត្ថិភាពផ្នែកហិរញ្ញវត្ថុដល់គ្រួសាររបស់ពួកគេនាពេលអនាគតផងដែរ។ ដូច្នេះក្រុមហ៊ុនធានារ៉ាប់រងបានរួមចំណែកយ៉ាងសំខាន់ក្នុងការពង្រឹងស្ថិរភាពសង្គម។
ការធានារ៉ាប់រងលើឥណទានរបស់ក្រុមហ៊ុនធានារ៉ាប់រងអាយុជីវិតសុវណា្ណភូមិ ឡាយហ្វ៍គឺជាឧទាហរណ៍ ជាក់ស្តែងមួយដែលក្រុមហ៊ុននឹងជួយសងបំណុលដែលមិនទាន់សងរួចប្រសិនបើអ្នកខ្ចីប្រាក់ទទួលមរណភាព ឬពិការភាពទាំងស្រុង និងជាអចិន្ត្រៃយ៍៕
