.jpg)
មន្ទីរពិសោធន៍ក៏យកចិត្តទុកដាក់ខ្ពស់ទៅលើសុវត្ថិភាពបរិស្ថានផងដែរ។
វិទ្យាស្ថានប៉ាស្ទ័រកម្ពុជាត្រូវបានបើកដំណើរការក្នុងឆ្នាំ ១៩៥៣ គឺជាវិទ្យាស្ថានស្រាវជ្រាវ និងសុខភាពសាធារណៈចំណាស់ជាងគេបំផុតនៅក្នុងព្រះរាជាណាចក្រកម្ពុជា។ វិស័យសំខាន់មួយដែលវិទ្យាស្ថាន ប្រតិបត្តិការគឺការលើកកម្ពស់សុវត្ថិភាពចំណីអាហារ និងសុវត្ថិភាពបរិស្ថាននៅកម្ពុជា ដោយមានមន្ទីរពិសោធន៍បរិស្ថាន និងសុវត្ថិភាពចំណីអាហារ។
ប្រធានមន្ទីរពិសោធន៍ លោកស្រីបណ្ឌិត ណាវីន បានថ្លែងថា៖ «យើងមានបេសកកម្មជួយដល់ប្រតិបត្តិករចំណីអាហារទាំងអស់នៅក្នុងការត្រួតពិនិត្យ និងការការពារជំងឺដែលបណ្តាលមកពីចំណីអាហារពីកសិដ្ឋានទៅដល់អ្នកបរិភោគ និងដើម្បីផ្តល់នូវអាហារដែលមានគុណភាព និងសុវត្ថិភាព គ្មានភាពកខ្វក់ គ្មានបាក់តេរីបង្កគ្រោះថ្នាក់ គ្មានប៉ារ៉ាស៊ីត មេរោគ ជាតិពុល និងសារធាតុគីមី»។
«មន្ទីរពិសោធន៍នេះត្រូវបានបង្កើតឡើងក្នុងឆ្នាំ ១៩៩៥ ដើម្បីលើកកម្ពស់សុខភាពសាធារណៈទាក់ទងនឹងសុវត្ថិភាពចំណីអាហារ។ វាសំខាន់ណាស់ជាពិសេសសម្រាប់ប្រជាជនកម្ពុជាពីព្រោះកម្រិតអនាម័យនៅកម្ពុជានៅមានកម្រិតនៅឡើយ ហើយវាជាបញ្ហាធំមួយទាក់ទងនឹងកំណើនសេដ្ឋកិច្ចរបស់ប្រទេស»។
«មន្ទីរពិសោធន៍បានធ្វើឱ្យប្រសើរឡើងនូវស្ថានភាពនេះ ដោយផ្តល់ការបណ្តុះបណ្តាលស្តីពីអនាម័យផ្ទាល់ខ្លួន និងសុវត្ថិភាពចំណីអាហារដល់អ្នកចម្អិនម្ហូបអាហារ សណ្ឋាគារ និងអ្នកផ្គត់ផ្គង់ម្ហូបអាហារ។ លើសពីនេះទៀត លទ្ធផលនៃការធ្វើតេស្តចំណីអាហារចេញពីមន្ទីរពិសោធន៍របស់យើងគឺជាការជូនដំណឹងដល់អ្នកផលិតចំណីអាហារឱ្យពួកគេចាត់វិធានការទាន់ពេលវេលាក្នុងគោលបំណងការពារ ការឆ្លងជំងឺពីចំណីអាហារកុំឱ្យប៉ះពាល់ដល់អតិថិជនរបស់ខ្លួន»។
មន្ទីរពិសោធន៍មានធ្វើតេស្តដូចជាតេស្តមីក្រូជីវសាស្ត្រសម្រាប់ផលិតផលចំណីអាហារ ការធ្វើតេស្តមីក្រូជីវសាស្ត្រ និងសារធាតុគីមីសម្រាប់ប្រភេទទឹកផ្សេងៗ និងធ្វើតេស្តមីក្រូជីវសាស្ត្រដែលមានឆ្លងនៅក្នុងខ្យល់ និងផ្ទៃនៃកន្លែងធ្វើការងារ។
ក្រៅពីការធ្វើតេស្តក៏មានការផ្តល់សេវាកម្ម សវនកម្ម ការបណ្តុះបណ្តាល និងពិគ្រោះយោបល់អំពីអនាម័យចំណីអាហារ នៅក្នុងចង្វាក់ផលិតកម្មផងដែរ។
លោកស្រីបណ្ឌិត ណាវីន បានលើកឡើងថា៖ «សម្រាប់ការបណ្តុះបណ្តាល យើងផ្តល់ការបណ្តុះបណ្តាលភាគច្រើនលើអនាម័យផ្ទាល់ខ្លួន និងសុវត្ថិភាពចំណីអាហារ។ ទោះយ៉ាងណាយើងសម្របតាមតម្រូវការរបស់អតិថិជនថាតើពួកគេមកពីផ្នែកផ្គត់ផ្គង់ចំណីអាហារ សណ្ឋាគារ ឬកសិកម្ម»។
ហើយវាមិនត្រឹមតែសម្រាប់សុវត្ថិភាពចំណីអាហារ ដែលមន្ទីរពិសោធន៍កំពុងការពារប្រជាជនកម្ពុជាប៉ុណ្ណោះទេ ប៉ុន្តែក៏មានការផ្តោតយកចិត្តទុកដាក់ខ្ពស់ទៅលើសុវត្ថិភាពបរិស្ថានផងដែរ។
«ទាក់ទងនឹងសុវត្ថិភាពបរិស្ថាន មន្ទីរពិសោធន៍របស់យើងចូលរួមយ៉ាងសកម្មលើការវិភាគទឹកដើម្បីជូនដំណឹងដល់អ្នកប្រើប្រាស់អំពីសុវត្ថិភាពទឹក និងការចម្លងនូវសារធាតុមិនល្អ ជាពិសេសជាមួយលោហៈធ្ងន់។ ទាក់ទងនឹងអ្នកផលិតចំណីអាហារ មន្ទីរពិសោធន៍របស់យើងជួយក្នុងការគ្រប់គ្រងបរិយាកាសការងាររបស់ពួកគេដោយផ្តល់សេវាកម្មដូចជាការធ្វើតេស្តមីក្រូជីវសាស្ត្រដែលមានឆ្លងនៅក្នុងខ្យល់ និងផ្ទៃនៃកន្លែងធ្វើការងារ»។
ឱសថបណ្ឌិតដែលទទួលបានសញ្ញាបត្របណ្ឌិតផ្នែកជីវវិទ្យាពីប្រទេសបារាំងរូបនេះបន្តថា៖ «ដើម្បីធានានូវភាពត្រឹមត្រូវនៃលទ្ធផល មន្ទីរពិសោធន៍របស់យើងបានអនុវត្តតាមនិតិវិធីស្តង់ដាអន្តរជាតិសម្រាប់ការវិភាគចំណីអាហារ និងទឹក ហើយយើងកំពុងស្ថិតក្នុងដំណើរការដើម្បីទទួលបានវិញ្ញាបនបត្រ ISO17025 ដែលជាបទដ្ឋានអន្តរជាតិបញ្ជាក់ពីសមត្ថភាពនៃការវិភាគរបស់មន្ទីរពិសោធន៍»។
ជាមួយនឹងតួនាទីដ៏សំខាន់ ដើម្បីរក្សាស្តង់ដាសុវត្ថិភាពខ្ពស់ លោកស្រី/បណ្ឌិត ណាវីន បានថ្លែងថា លោកស្រី/បណ្ឌិតពិតរីករាយណាស់ ដែលបានជួយការពារប្រជាជននៅក្នុងព្រះរាជាណាចក្រកម្ពុជា។ «ខ្ញុំមានមោទនភាពដែលបានធ្វើការនៅមន្ទីរពិសោធន៍បរិស្ថាន និងសុវត្ថិភាពចំណីអាហាររបស់វិទ្យាស្ថានប៉ាស្ទ័រកម្ពុជា ពីព្រោះខ្ញុំធ្វើការនៅក្នុងមន្ទីរពិសោធន៍ដែលមានស្តង់ដាខ្ពស់ និងដែលស្ថិតក្នុងដំណើរការដើម្បីទទួលបានវិញ្ញាបនបត្រ ISO17025»។
លោកស្រីបណ្ឌិត ណាវីន ក៏បានមានប្រសាសន៍ថា៖ «ខ្ញុំក៏មានមោទនភាពផងដែរ ដែលបានចូលរួមដោយផ្ទាល់ក្នុងការលើកកម្ពស់សុខភាពសាធារណៈប្រជាជនរបស់ខ្ញុំ ហើយជាពិសេសគឺទាក់ទងនឹងសុវត្ថិភាពចំណីអាហារ»៕
