.jpg)
សាស្ត្រាចារ្យ ម៉ម ប៊ុនសុជាតិ (កណ្តាល) និងថ្នាក់ដឹកនាំ មន្ទីរពេទ្យ សង់ត្រាល់។ ហ៊ាន រង្សី
ប្រជាជនកម្ពុជាមួយចំនួនដែលបានចំណាយថវិកាធ្វើដំណើរទៅក្រៅប្រទេស ដើម្បីស្វែងរកសេវាព្យាបាលផ្នែកវេជ្ជសាស្ត្រនឹងត្រូវបានកាត់បន្ថយនាពេលខាងមុខ។
មន្ទីរពេទ្យសង់ត្រាល់ ដែលបានបង្កើតឡើងតាំងពីឆ្នាំ ២០១១ បានក្លាយជាផ្នែកមួយនៃស្ថាប័នសុខាភិបាលក្នុងការផ្តល់ជូននូវសេវាថែទាំសុខភាពតាមស្តង់ដាអន្តរជាតិទំនើប សម្រាប់អ្នកដែលស្វែងរកសេវាព្យាបាលវេជ្ជសាស្ត្រ។
មន្ទីរពេទ្យសង់ត្រាល់ គឺជាស្ថាប័នវេជ្ជសាស្ត្រក្នុងស្រុកឈានមុខគេមួយក្នុងប្រទេសដែលផ្តល់នូវការព្យាបាលទូទៅ និងឯកទេសផ្សេងៗដូចជា ពិនិត្យសុខភាព ពិគ្រោះជំងឺទូទៅ ពិគ្រោះ និងវះកាត់ជំងឺបេះដូង និងសរសៃឈាម ប្រព័ន្ធប្រសាទ ថ្លើម ក្រពះ ពោះវៀន លាងឈាម តម្រងនោម សម្ភព និងរោគស្ត្រី កុមារ វះកាត់ និង សង្គ្រោះបន្ទាន់ និងជំងឺធ្ងន់ជាដើម។
លោកសាស្ត្រាចារ្យ ម៉ម ប៊ុនសុជាតិ នាយករង និងនាយកផ្នែកវះកាត់បេះដូង និងសរសៃឈាម នៃមន្ទីរពេទ្យសង់ត្រាល់ បានប្រាប់ ភ្នំពេញ ប៉ុស្តិ៍ ថា ប៉ុន្មានឆ្នាំមកនេះ មន្ទីរពេទ្យទទួលបានកេរ្តិ៍ឈ្មោះល្បីល្បាញក្នុងនាមជាមន្ទីរពេទ្យឯកជនទំនើបក្នុងប្រទេសកម្ពុជា ដែលមានអ្នកឯកទេសវេជ្ជសាស្ត្រប្រកបដោយសមត្ថភាពខ្ពស់ និងក្រមសីលធម៌ល្អ ក្នុងការផ្តល់សេវាវេជ្ជសាស្ត្រជូនអ្នកជំងឺ។
អ្នកជំងឺកំពុងទទួលសេវាពិនិត្យសុខភាព នៅបន្ទប់ CT scan។
លោកសាស្ត្រាចារ្យ ម៉ម ប៊ុនសុជាតិ បាននិយាយថា៖ «កាលពីមុនអ្នកឯកទេសផ្នែក វះកាត់បេះដូងសរសៃឈាម និងផ្នែកប្រព័ន្ធប្រសាទនៅកម្ពុជាមានចំនួនតិចតួចណាស់។ ទោះយ៉ាងណាសព្វថ្ងៃនេះអ្នកឯកទេសផ្នែកនេះមានការកើនឡើងទាំងជាជនជាតិកម្ពុជា និងបរទេស។ កត្តាទាំងអស់នេះ រួមជាមួយនឹងឧបករណ៍វេជ្ជសាស្ត្រទំនើបៗ អាចឱ្យស្ថាប័នវេជ្ជសាស្ត្រក្នុងស្រុក ដូចជាមន្ទីរពេទ្យសង់ត្រាល់អាចផ្តល់នូវការប្រឹក្សា ព្យាបាល និងវះកាត់ដោយវេជ្ជបណ្ឌិតឯកទេស។ ទាំងនេះឆ្លុះបញ្ចាំងពីការផ្លាស់ប្តូរ និងការវិវត្តនៃវិស័យសុខាភិបាលរបស់ប្រទេសក្នុងរយៈពេល ១០ ឆ្នាំចុងក្រោយនេះ។
មន្ទីរពេទ្យសង់ត្រាល់ បានបំពាក់់ដោយម៉ាស៊ីនប្រកបដោយបច្ចេកវិទ្យាទំនើបៗ និងត្រួសត្រាយផ្លូវឆ្ពោះទៅរកស្តង់ដាខ្ពស់នៃការថែទាំសុខភាពប្រកបដោយតម្លៃសមរម្យសម្រាប់ប្រជាជនកម្ពុជា។
ដោយសារសេវាកម្មវេជ្ជសាស្ត្រមានច្រើនឯកទេសប្រកបដោយស្តង់ដាខ្ពស់ និងតម្លៃសមរម្យ បានធ្វើឱ្យមន្ទីរពេទ្យសង់ត្រាល់ ក្លាយជាទិសដៅដ៏សំខាន់ និងមានការពេញចិត្តពីសំណាក់ដៃគូ វេជ្ជសាស្ត្រ និងក្រុមហ៊ុនធានារ៉ាប់រងជាតិ និងអន្តរជាតិ។
អ្នកគ្រប់គ្រងមន្ទីរពេទ្យសង់ត្រាល់ លោកស្រី អែមម៉ារី ជែលី បានប្រាប់ ភ្នំពេញ ប៉ុស្តិ៍ ថា ក្រៅពីសហការជាដៃគូយូរអង្វែងជាមួយក្រុមហ៊ុនធានារ៉ាប់រងជាតិ និងអន្តរជាតិក្នុងការពិនិត្យសុខភាពអតិថិជន មន្ទីរពេទ្យក៏មានផ្តល់សេវាពិនិត្យសុខភាពជូនអតិថិជនទូទៅដែរ។
ក្រៅពីជាមន្ទីរដែលនាំមុខគេក្នុងការផ្តល់ជូននូវសេវាវេជ្ជសាស្ត្រដែលប្រកបដោយគុណភាពខ្ពស់ មន្ទីរពេទ្យសង់ត្រាល់ក៏បានចូលរួមក្នុងសកម្មភាពសង្គមជាច្រើន ដូចជាការពិនិត្យសុខភាពតាមសហគមន៍ដោយឥតគិតថ្លៃ យុទ្ធនាការយល់ដឹងអំពីសុខភាព បង្កើនការជឿទុកចិត្តលើសមត្ថភាពស្ថាប័នវេជ្ជសាស្ត្រក្នុងស្រុកជាដើម។
ប្រធាននាយកផ្នែកប្រព័ន្ធប្រសាទ លោកសាស្ត្រាចារ្យ Francois Xavier Roux ដែលជាអ្នកទទួលខុសត្រូវក្នុងការបង្កើតមជ្ឈមណ្ឌលវិទ្យាសាស្ត្រប្រព័ន្ធប្រសាទនៅមន្ទីរពេទ្យកាល់ម៉ែត និងចូលរួមការងារនៅមន្ទីរពេទ្យសង់ត្រាល់តាំងពីឆ្នាំ ២០១៣ បានមានប្រសាសន៍ថា ទោះបីការវះកាត់មានភាពស្មុគស្មាញក៏ដោយ ប៉ុន្តែក្រុមគ្រូពេទ្យរបស់យើង ៧ នាក់ ប្រកបដោយជំនាញ និងបទពិសោធផ្នែកប្រព័ន្ធប្រសាទ រួមទាំងឧបករណ៍ទំនើបរួមបញ្ចូលគ្នា បានធ្វើអោយការវះកាត់របស់យើងទទួលបានជោគជ័យស្របតាមស្តង់ដាអន្តរជាតិក្នុងដំណើរការវះកាត់ជំងឺធ្ងន់ធ្ងរនៅមន្ទីរពេទ្យសង់ត្រាល់់៕
