.jpg)
ជាមួយនឹងវត្តមានអាកាសយានដ្ឋានអន្តរជាតិចំនួន ៣ ដែលកំពុងទទួលស្វាគមន៍ជើងហោះហើរជាច្រើន និងមានភាពមមាញឹកខ្លាំងនោះ ក្រុមហ៊ុនគ្រប់គ្រងអាកាសយានដ្ឋានអន្តរជាតិទាំងនេះបាននឹងកំពុងខិតខំពង្រីកហាងទំនិញ ភោជនីយដ្ឋាន និងកន្លែងរង់ចាំកាន់តែច្រើនជាងមុន ដើម្បីផ្តល់នូវជម្រើសកាន់តែសម្បូរបែបសម្រាប់អ្នកធ្វើដំណើរក្នុងការទទួលទានអាហារ ទិញទំនិញ ឬសម្រាកមុនពេលចេញដំណើរ។
Cambodia Airports ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Vinci Airports មានមូលដ្ឋាននៅប្រទេសបារាំងបានសម្រេចជោគជ័យជាមួយនឹងការពង្រីកកន្លែងរង់ចាំនៅក្នុងអាកាសយានដ្ឋានអន្តរជាតិភ្នំពេញ និងសៀមរាបកាលពីឆ្នាំមុន ហើយក៏ជិតបញ្ចប់ជាស្ថាពរនូវគម្រោងកែលម្អឡើងវិញសម្រាប់កន្លែងរង់ចាំក្នុងអាកាសយានដ្ឋានក្រុងព្រះសីហនុផងដែរ។
កន្លែងរង់ចាំធំៗនេះបានផ្តល់នូវឱកាសក្នុងការបន្ថែមសេវាកម្ម ហើយបណ្តាហាងក្នុងស្រុក និងអន្តរជាតិក៏ចង់មានវត្តមាននៅទីនេះដែរ។
យ៉ាងណាមិញដំណើរការនៃការជ្រើសរើសមានលក្ខណៈមិនសូវច្បាស់លាស់នោះទេ។ Cambodia Airports បានប្រើនូវកម្មវិធីសម្រាប់ជ្រើសរើសហាងទាំងឡាយដោយផ្អែកលើរសជាតិ និងតម្លៃ។
លោកស្រី Chloé Lapeyre អ្នកគ្រប់គ្រងទូទៅអាកាសយានដ្ឋានអន្តរជាតិភ្នំពេញបានសរសេរនៅលើគេហទំព័រ Vinci ថា៖ «យើងត្រូវតែធ្វើឲ្យមានតម្លាភាពរវាងហាងលំដាប់អន្តរជាតិ ទំនិញលើកលែងពន្ធ និងហាងរបស់ខ្មែរ»។
លោក Lars Crone នាយកគ្រប់គ្រងក្រុមហ៊ុន EMCAT Cambodia និងជាម្ចាស់ក្រុមហ៊ុនគ្រប់គ្រងលើហាងម្ហូបអាហារ និងភេសជ្ជៈ Sajibumi Cambodia ដែលមានការិយាល័យនៅប្រទេសសិង្ហបុរីបាននិយាយថាក្រុមហ៊ុនរបស់លោកបានប្រើប្រាស់ទីធ្លាពង្រីកថ្មីនៅក្នុងអាកាសយានដ្ឋាន ដើម្បីធ្វើឲ្យហាងម្ហូបអាហារ និងភេសជ្ជៈកាន់តែច្រើនជាងមុន និងសម្បូរបែប។ បង្កើតឡើងក្នុងឆ្នាំ ២០១០ EMCAT កំពុងគ្រប់គ្រងលើហាងអាហារចំនួន ២៦ កន្លែងក្នុងអាកាសយានដ្ឋានអន្តរជាតិទាំង ៣ របស់កម្ពុជាដែលរួមមាន ហាងកាហ្វេ និងភោជនីយដ្ឋាន សម្រាប់មុន និងក្រោយពេលត្រួតពិនិត្យសម្ភារផ្ទាល់ខ្លួនរបស់អ្នកដំណើររួចហើយ។
លោក Crone ថ្លែងថាការពង្រីកកន្លែងរង់ចាំរបស់អាកាសយានដ្ឋានអន្តរជាតិភ្នំពេញបានផ្តល់ឱកាសដ៏ល្អបំផុតសម្រាប់គម្រោងចុងក្រោយរបស់ EMCAT នេះ ដែលជាអាហារដ្ឋានដ៏ធំនៅកន្លែងទទួលអ្នកដំណើរដែលមានសុទ្ធតែអាហារឆ្អិនស្រាប់ និងអាហារស្រស់ៗជាច្រើនប្រភេទ ព្រមទាំងមានកន្លែងអង្គុយច្រើនជាងមុនដែរ។ អាហារដ្ឋាននេះនឹងបើកដំណើរការនៅពាក់កណ្តាលខែមិថុនាខាងមុខ។
លោកបាននិយាយថា៖ «អាហារដ្ឋាននេះត្រូវបានបង្កើតឡើងដើម្បីឆ្លើយតបទៅនឹងកំណើនអ្នកធ្វើដំណើរដែលកម្ពុជាកំពុងទទួលបាន»។
លោកបានបន្តថា៖ «គិតត្រឹមត្រីមាសទី ១ នៃឆ្នាំ ២០១៨ យើងបានសង្កេតឃើញកំណើនអ្នកធ្វើដំណើរដល់ទៅ ៣០ ភាគរយនៅទីក្រុងភ្នំពេញ និង ១៨ ភាគរយនៅខេត្តសៀមរាប»។
លោកថ្លែងថាអាហារដ្ឋាននេះនឹងមានភោជនីយដ្ឋានចិនមួយចំនួនដើម្បីឆ្លើយតបទៅនឹងកំណើនភ្ញៀវទេសចរចិន ដែលធ្វើដំណើរឆ្លងកាត់ និងមកកាន់ប្រទេសកម្ពុជារៀងរាល់ឆ្នាំ។
របាយការណ៍របស់ក្រសួងទេសចរណ៍បានឲ្យដឹងថា ចំនួនភ្ញៀវទេសចរជនជាតិចិនបាននាំមុខគេក្នុងចំណោមភ្ញៀវទេសចរអន្តរជាតិដែលបានធ្វើដំណើរមកកាន់ប្រទេសកម្ពុជា។
កាលពីឆ្នាំ ២០១៧ កម្ពុជាទទួលបានភ្ញៀវទេសចរចិនចំនួន ១.២ លាននាក់ បើធៀបទៅនឹងឆ្នាំ ២០១៦ គឺបានកើនឡើងចំនួន ៤៦ ភាគរយ។ យ៉ាងណាមិញក៏មានកំណើនភ្ញៀវទេសចរជនជាតិផ្សេងៗជាច្រើនទៀតផងដែរ ដែលបានធ្វើដំណើរកាន់ប្រទេសកម្ពុជា។ តួលេខបានបង្ហាញថា កាលពីឆ្នាំ ២០១៧ កំណើនភ្ញៀវទេសចរបរទេសមកទស្សនាកម្ពុជាបានកើនឡើងចំនួន ១១.៨ ភាគរយ។
ចំនួនវិជ្ជមាននេះបានលើកទឹកចិត្តឲ្យ EMCAT បង្កើននូវជម្រើសកន្លែងទទួលអាហារឲ្យកាន់តែសម្បូរបែបនៅតាមបណ្តាអាកាសយានដ្ឋានរបស់កម្ពុជា ដើម្បីប្រកួតប្រជែងជាមួយហាងនានាតាមបណ្តាអាកាសយានដ្ឋានធំៗក្នុងប្រទេសនានានៅអាស៊ីអាគ្នេយ៍។
«ខ្ញុំមានមោទនភាពក្នុងការនិយាយថាអ្វីដែលយើងនឹងនាំយកមកកាន់ទីក្រុងភ្នំពេញក្នុងពេលឆាប់ៗនេះនឹងមានជម្រើសច្រើនជាងនៅទីក្រុងបាងកកទៅទៀត» លោក Crone ថ្លែងដោយបន្ថែមថាលោកក៏នឹងរួមបញ្ចូលហាងអាហាររបស់ខ្មែរផងដែរ។ «មានហាងដ៏ធំៗចំនួនពីរនោះគឺ Brown និង Park Café ដោយយើងមានទាំងពីរតែម្តង»។
ការពង្រីកស្ថានីយរង់ចាំកាលពីពេលថ្មីៗកន្លងទៅក៏បានបង្ហាញនូវវត្តមាននៃការកែលម្អលំដាប់កំពូលៗ រួមទាំងកន្លែងរង់ចាំលំដាប់អ្នកជំនួញ អាជីវកម្ម ដែលគ្រប់គ្រងដោយក្រុមហ៊ុន Plaza Premium Group។
ក្រុមហ៊ុនផ្គត់ផ្គង់សេវាកម្មលំដាប់កំពូលតាមអាកាសយានដ្ឋានដែលមានការិយាល័យនៅទីក្រុងហុងកុងមួយនេះបានបើកកន្លែងរង់ចាំរបស់ខ្លួនដំបូងនៅអាកាសយានដ្ឋានអន្តរជាតិភ្នំពេញកាលពីដើមឆ្នាំ ២០១៦ និង ១ ទៀតនៅអាកាសយានដ្ឋានអន្តរជាតិខេត្តសៀមរាប ប៉ុន្មានខែបន្ទាប់ពីនោះទៀត។ កន្លែងរង់ចាំដែលគ្រប់គ្រងដាច់ដោយឡែកដោយក្រុមហ៊ុននេះផ្ទាល់ គឺមានផ្តល់សេវាកម្មដល់អ្នកធ្វើដំណើរគ្រប់រូបដោយគិតកម្រៃសេវា ហើយក៏មានកន្លែងស្ប៉ា និងងូតទឹកព្រមទាំងសេវាសម្រាប់ការណាត់ជួបមនុស្សសំខាន់ៗផងដែរ។
បច្ចុប្បន្នក្រុមហ៊ុននេះកំពុងតែត្រៀមបើកសាខាកន្លែងរង់ចាំទី ៣ របស់ខ្លួននៅស្ថានីយរង់ចាំក្នុងអាកាសយានដ្ឋានក្រុងព្រះសីហនុដែលកំពុងតែស្ថិតក្រោមការកែលម្អ។
ចំនួនហាងក៏បានកើនឡើងផងដែរជាមួយនឹងចំនួនហាងទំនិញច្រើនជាងមុន និងមានលក់ទំនិញកាន់តែច្រើនប្រភេទ។ ហាងរបស់ប្រទេសស្វ៊ីសឈ្មោះ Dufry ក៏បានជួលបន្ថែមនៅក្នុងស្ថានីយរង់ចាំដែលត្រូវបានពង្រីកនេះ ដើម្បីពង្រីកសាខារបស់ខ្លួនក្នុងទីក្រុងភ្នំពេញ និងសៀមរាបផងដែរ។ ហាងធំៗជាងមុនត្រូវបានរចនាជាមួយនឹងការអនុញ្ញាតឲ្យភ្ញៀវទេសចរអាចដើរឆ្លងកាត់បានមុនពេលនឹងដើរដល់ច្រកសម្រាប់រង់ចាំការហោះហើររបស់ខ្លួន។
អ្នកស្រី Ly Kitty ម្ចាស់មុខជំនួញ និងជាអនុប្រធានសមាគមសហគ្រិនវ័យក្មេងកម្ពុជា (YEAC) បានថ្លែងថាហាងទំនិញលើកលែងពន្ធក្នុងអាកាសយដ្ឋានកម្ពុជាបាននឹងកំពុងតែពង្រីកខ្លួនយ៉ាងឆាប់ហើយ ហើយមាននិរន្តភាពយ៉ាងខ្លាំង ពិសេសសម្រាប់វិនិយោគិនក្នុងស្រុកតែម្តង។
«ចំណុចនេះនឹងផ្តល់ផលចំណេញយ៉ាងខ្លាំងហើយខ្ញុំច្បាស់ក្នុងចិត្តអំពីរឿងនេះ» អ្នកស្រីថ្លែងដោយបន្ថែមថាម្ចាស់ជំនួញអាជីវកម្មមួយចំនួនដែរនោះក៏បានរៀបចំបង្កើតនូវសម្ព័ន្ធភាពសហការជាមួយក្រុមហ៊ុនអន្តរជាតិដើម្បីយកទំនិញរបស់ខ្លួនមកបង្ហាញក្នុងអាកាសយានដ្ឋានភ្នំពេញ និងសៀមរាប។
អ្នកស្រីបានបន្តថាកំណើនវិស័យទេសចរណ៍បូករួមជាមួយនឹងការកែច្នៃបន្ថែមក្នុងអាកាសយានដ្ឋានកាលពីពេលថ្មីៗកន្លងទៅនេះបានធ្វើឲ្យមានការទាក់ទាញហាងនានាឲ្យមកវិនិយោគកាន់តែច្រើនជាងមុន។
លោកស្រីបានអះអាងថា៖ «ប្រសិនបើគេចង់ធ្វើដំណើរតាមអាកាសយានដ្ឋាន គឺពួកគេគ្មានជម្រើសអ្វីផ្សេងនោះទេ។ ដូច្នេះទីណាដែលមានអាកាសយានដ្ឋាន ទីនោះនឹងមានទំនិញសម្រាប់លក់»៕
