.jpg)
មេធាវី Sadao Matsubara ជាប្រធានផ្នែកច្បាប់សម្រាប់សាជីវកម្មជប៉ុននៅក្រុមហ៊ុន HBS Law ចាប់តាំងពីឆ្នាំ ២០១៥។
លោក Sadao Matsubara ជាមេធាវីជប៉ុន និងជាប្រធានផ្នែកច្បាប់សម្រាប់សាជីវកម្មជប៉ុននៅឯក្រុមហ៊ុនមេធាវីឈានមុខគឺក្រុមហ៊ុនមេធាវី អេចប៊ីអេស (HBS Law) លោកបានខិតខំប្រឹងប្រែងយ៉ាងខ្លាំងក្នុងការសម្របសម្រួលវិនិយោគិនជប៉ុនឲ្យមកធ្វើជំនួញនៅក្នុងប្រទេសកម្ពុជា។
មេធាវី Matsubara ដែលមានដើមកំណើតនៅទីក្រុងអូសាការូបនេះឲ្យដឹងថា៖ «ខ្ញុំធ្លាប់បានធ្វើការនៅក្នុងប្រទេសកម្ពុជាចាប់តាំងពីខែកញ្ញា ឆ្នាំ ២០១២ មកម្ល៉េះ។ ខ្ញុំបានធ្វើការជាព្រះរាជអាជ្ញាសាធារណៈនៅប្រទេសជប៉ុនចាប់តាំងពីឆ្នាំ ១៩៩៦។ ក្រោយមកខ្ញុំត្រូវបានក្រសួងយុត្តិធម៌ជប៉ុនបញ្ជូនមកប្រទេសកម្ពុជា ដើម្បីធ្វើការជាប្រធានប្រឹក្សាផ្នែកច្បាប់ និងប្រព័ន្ធ យុត្តិធម៌របស់អង្គការ JICA នៅប្រទេសកម្ពុជា»។
«តាមគម្រោងខ្ញុំត្រូវវិលត្រឡប់ទៅធ្វើការជាព្រះរាជអាជ្ញានៅប្រទេសជប៉ុនវិញក្នុងខែកញ្ញាឆ្នាំ ២០១៤ ប៉ុន្តែខ្ញុំចូលចិត្តប្រទេសកម្ពុជាហើយចង់ដឹងថា តើវានឹងអភិវឌ្ឍយ៉ាងណា? ជាពិសេសនៅក្នុងវិស័យច្បាប់ ដូច្នេះខ្ញុំក៏សម្រេចចិត្តផ្លាស់ប្តូរទិសដៅហើយចាប់ផ្តើមធ្វើការនៅក្រុមហ៊ុនមេធាវី HBS Law ក្នុងនាមជាប្រធានផ្នែកច្បាប់សម្រាប់សាជីវកម្មជប៉ុននៅខែមករាឆ្នាំ ២០១៥។
លោក Matsubara បន្តថា៖ «ប្រទេសកម្ពុជាមានការរីកចម្រើនយ៉ាងឆាប់រហ័សជាមួយនឹងកំណើនផលិតផលក្នុងស្រុកសរុបជាមធ្យមជាង ៧ ភាគរយក្នុង ១ ឆ្នាំ។ នៅពេលដែលខ្ញុំមកដល់ប្រទេសកម្ពុជាក្នុងឆ្នាំ ២០១២ ចំនួនអគារខ្ពស់ៗគឺមានតិចតួចតែប៉ុណ្ណោះ ប៉ុន្តែឥឡូវមានច្រើនសន្ធឹកសន្ធាប់ ហើយនៅក្នុងឆ្នាំ ២០១២ នោះដែរ ភោជនីយដ្ឋានជប៉ុនមានតែប្រមាណ ២០ ប៉ុណ្ណោះ ប៉ុន្តែបច្ចុប្បន្នគឺមានប្រមាណ ២០០ ភោជនីយដ្ឋាន។ លើសពីនេះទៀតផ្សារទំនើបអ៊ីអនបានចាប់ផ្តើមប្រតិបត្តិការនៅខែមិថុនាឆ្នាំ ២០១៤។ ជាមួយនឹងការវិវឌ្ឍទាំងនេះខ្ញុំជឿជាក់ថា ពាណិជ្ជករ និងវិនិយោគិនជប៉ុនអាចរស់នៅប្រកបដោយផាសុកភាពនៅក្នុងរាជធានី-ភ្នំពេញ»។
លោក Matsubara ដែលបានចូលជាសមាជិក គណៈមេធាវីនៃប្រទេសជប៉ុនក្នុងឆ្នាំ ១៩៩៣ បានថ្លែងថាក្រុមហ៊ុនមេធាវី HBS Law មានអ្នកជំនាញច្បាប់ល្អបំផុត ដើម្បីផ្តល់ប្រឹក្សាជូនក្រុមហ៊ុនជប៉ុន និងវិនិយោគិនមកពីប្រទេសជប៉ុនផ្សេងទៀត។
«ក្រុមហ៊ុនមេធាវី HBS Law ត្រូវបានបង្កើតឡើងក្នុងឆ្នាំ ២០០៥ ហើយចាប់តាំងពីពេលនោះមកវាបានក្លាយជាក្រុមហ៊ុនច្បាប់ឈានមុខគេមួយនៅកម្ពុជា។ បច្ចុប្បន្នក្រុមហ៊ុននេះមានសមាជិកប្រមាណ ៧០ នាក់ក្នុងនោះរួមមានមេធាវី និងអ្នកប្រឹក្សាច្បាប់ទាំងកម្ពុជា និងបរទេស។
លោកលើកឡើងថា៖ «យើងអាចផ្តល់សេវាកម្មផ្នែកច្បាប់យ៉ាងទូលំទូលាយ និងមានប្រសិទ្ធភាពខ្ពស់។ ខ្ញុំមានចំណេះដឹងជ្រៅជ្រះអំពីក្រមរដ្ឋប្បវេណី និងក្រមនីតិវិធីរដ្ឋប្បវេណី និងច្បាប់ពាក់ព័ន្ធរបស់កម្ពុជាជាច្រើនទៀត។ ខ្ញុំក៏បានរៀនភាសាខ្មែរផងដែរ។ ដូច្នេះខ្ញុំអាចអានច្បាប់ និងបទប្បញ្ញត្តិកម្ពុជាបានដោយខ្លួនឯង។ ខ្ញុំជឿជាក់ថា កត្តាទាំងនេះធ្វើឱ្យផ្នែកច្បាប់សម្រាប់សាជីវកម្មជប៉ុនរបស់ក្រុមហ៊ុនមេធាវី HBS Law គឺមានលក្ខណពិសេស»។
ជាមួយនឹងការប្តេជ្ញាចិត្តរបស់ជប៉ុនក្នុងការធ្វើពាណិជ្ជកម្មជាមួយអាស៊ានលោក Matsubara មានប្រសាសន៍ថាប្រទេសកម្ពុជាស្ថិតនៅទីតាំងដ៏ល្អជាមួយប្រទេសជិតខាងទាក់ទងនឹងច្បាប់ស្តីពីការធ្វើជំនួញ។
«ប្រទេសកម្ពុជាមានច្បាប់ចាំបាច់ជាច្រើនទាក់ទងនឹងការធ្វើជំនួញ។ ច្បាប់កម្ពុជាអនុញ្ញាតឱ្យបង្កើតក្រុមហ៊ុនបុត្រសម្ព័ន្ធដែលកាន់កាប់ដោយក្រុមហ៊ុនបរទេសទាំងស្រុងហើយច្បាប់ទាំងនេះអាចអនុវត្តបានស្ទើរតែគ្រប់ប្រភេទជំនួញនៅក្នុងប្រទេសកម្ពុជាម្យ៉ាងវិញទៀតរាជរដ្ឋាភិបាលកម្ពុជាក៏បានបង្កើតគោលនយោបាយ និងយន្តការផ្សេងៗដើម្បីទាក់ទាញ និងការពារដល់ការវិនិយោគផ្ទាល់ពីបរទេសផងដែរ»។
លោកមានប្រសាសន៍ថា៖ «បទប្បញ្ញត្តិស្តីពីអាជីវកម្មបរទេសនៅកម្ពុជាក៏មិនមានលក្ខណៈតឹងរ៉ឹងខ្លាំង បើប្រៀបធៀបទៅនឹងបណ្តាប្រទេសអាស៊ានដទៃទៀត។ ទាំងនេះគឺជាចំណុចទាក់ទាញដ៏ធំសម្រាប់វិនិយោគិនបរទេស»។
ខណៈបញ្ហាប្រឈមមួយចំនួននៅតែមាននោះ ព្រះរាជាណាចក្រកម្ពុជាគឺជាទិសដៅវិនិយោគដ៏គួរចាប់អារម្មណ៍ ដែលធ្វើឲ្យលោក Matsubara មានទំនុកចិត្តថា ចំនួនអាជីវកម្មជប៉ុននៅកម្ពុជានឹងបន្តកើនឡើងហើយឱកាសសម្រាប់ការវិនិយោគផ្ទាល់ពីបរទេសក៏នៅមានច្រើនដែរ។
លោកថ្លែងថា៖ «ក្នុងនាមជាមេធាវីម្នាក់ វាពិតជារីករាយណាស់ដែលបានមើលឃើញអំពីការរីកចម្រើនរបស់ប្រទេសកម្ពុជាក៏ដូចជាការវិវត្តនៃវិស័យច្បាប់»៕
